TITUS
Atharva-Veda-Samhita (Saunaka)
Part No. 757

Hymn: 127 
Verse: 1 
Halfverse: a    idáṃ jánā úpa śruta nárāśáṃsa stáviṣyate /
Halfverse: c    ṣaṣṭíṃ sahásrā navatíṃ ca kaurama ā́ ruśámeṣu dadmahe //1//

Verse: 2 
Halfverse: a    úṣṭrā yásya pravāháṇo vadʰū́manto dvirdáśa /
Halfverse: c    varṣmā́ rátʰasya ní jihīḍate divá īṣámāṇā upaspŕ̥śaḥ //2//

Verse: 3 
Halfverse: a    eṣá iṣā́ya māmahe śatáṃ niṣkā́n dáśa srájaḥ /
Halfverse: c    trī́ṇi śatā́nyárvatāṃ sahásrā dáśa gónām //3//

Verse: 4 
Halfverse: a    vácyasva rébʰa vacyasva vr̥kṣé na pakvé śakúnaḥ /
Halfverse: c    náṣṭe jihvā́ carcarīti kṣuró ná bʰuríjoriva //4//

Verse: 5 
Halfverse: a    prá rebʰā́so manīṣā́ vŕ̥ṣā gā́va iverate /
Halfverse: c    amotapútrakā eṣā́mamóta gā ívāsate //5//

Verse: 6 
Halfverse: a    prá rebʰa dʰī́m bʰarasva govídaṃ vasuvídam /
Halfverse: c    devatrémāṃ vā́caṃ srīṇīhī́ṣurnā́vīrastā́ram //6//

Verse: 7 
Halfverse: a    rā́jño viśvajánīnasya yó devómártyām̐ áti /
Halfverse: c    vaiśvānarásya súṣṭutimā́ sunótā parikṣítaḥ //7//

Verse: 8 
Halfverse: a    paricʰínnaḥ kṣémam akarot táma ā́sanamācáran /
Halfverse: c    kúlāyan kr̥ṇván kaúravyaḥ pátir vádati jāyáyā //8//

Verse: 9 
Halfverse: a    katarát ta ā́ harāṇi dádʰi mántʰāṃ pári śrútam /
Halfverse: c    jāyā́h pátiṃ ví pr̥cʰati rāṣṭré rā́jñaḥ parikṣítaḥ //9//

Verse: 10 
Halfverse: a    abʰī́vásvaḥ prá jihīte yávaḥ pakváḥ patʰó bílam /
Halfverse: c    jánaḥ sá bʰadrám édʰati rāṣṭré rā́jñaḥ parikṣítah //10//

Verse: 11 
Halfverse: a    índraḥ kārúm abūbudʰad úttiṣṭʰa ví carā jánam /
Halfverse: c    mámédugrásya cárkr̥dʰi sárva ít te pr̥ṇādaríḥ //11//

Verse: 12 
Halfverse: a    ihá gā́vaḥ prá jāyadʰvam ihā́śvā́ ihá pū́ruṣāḥ /
Halfverse: c    ihó sahásradakṣiṇópi pūṣā́ ní ṣīdati //12//

Verse: 13 
Halfverse: a    némā́ indra gā́vo riṣan mó āsā́ṃ gópa rīriṣat /
Halfverse: c    mā́sām amítrayúrjana índra mā́ stená īśata //13//

Verse: 14 
Halfverse: a    úpa no na ramasi sū́ktena vácasā vayáṃ bʰadréṇa vácasā vayám /
Halfverse: c    vánād adʰidʰvanó giró ná riṣyema kadā́ caná //14//



Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.