TITUS
Atharva-Veda-Samhita (Saunaka)
Part No. 756

Hymn: 126 
Verse: 1 
Halfverse: a    ví hí sótor ásr̥kṣata néndraṃ devám amaṃsata /
Halfverse: c    yátrā́madad vr̥ṣā́kapir aryáḥ puṣṭéṣu mátsakʰā víśvasmād índra úttaraḥ //1//

Verse: 2 
Halfverse: a    párā hī́ndra dʰā́vasi vr̥ṣā́kaper áti vyátʰiḥ /
Halfverse: c    nó áha prá vindasy anyátra sómapītaye víśvasmād índra úttaraḥ //2//

Verse: 3 
Halfverse: a    kím ayáṃ tvāṃ vr̥ṣā́kapiś cakā́ra hárito mr̥gáḥ /
Halfverse: c    yásmā irasyásī́d u nv à1ryó vā puṣṭimád vásu víśvasmād índra úttaraḥ //3//

Verse: 4 
Halfverse: a    yám imáṃ tváṃ vr̥ṣā́kapiṃ priyám indrābʰirákṣasi /
Halfverse: c    śvā́ nv àsya jambʰiṣad ápi kárṇe varāhayúr víśvasmād índra úttarah //4//

Verse: 5 
Halfverse: a    priyā́ taṣṭā́ni me kapír vyàktā vy àdūduṣat /
Halfverse: c    śíro nv àsya rāviṣaṃ ná sugáṃ duṣkŕ̥te bʰuvaṃ víśvasmād índra úttaraḥ //5//

Verse: 6 
Halfverse: a    ná mát strī́ subʰasáttarā ná suyā́śutarā bʰuvat /
Halfverse: c    ná mát práticyavīyasī ná sáktʰy údyamīyasī víśvasmād indra úttaraḥ //6//

Verse: 7 
Halfverse: a    uvé amba sulābʰike yátʰevāṅgáṃ bʰaviṣyáti /
Halfverse: c    bʰasán me amba sáktʰi me śíro me vī́va hr̥ṣyati víśvasmād índra úttaraḥ //7//

Verse: 8 
Halfverse: a    kíṃ subāho svaṅgure pŕ̥tʰuṣṭo pŕ̥tʰujāgʰane /
Halfverse: c    kíṃ śūrapatni nas tvám abʰy àmīṣi vr̥ṣā́kapiṃ víśvasmād índra úttaraḥ //8//

Verse: 9 
Halfverse: a    avī́rām iva mā́m ayáṃ śarā́rur abʰí manyate /
Halfverse: c    utā́hám asmi vīríṇī́ndrapatnī marútsakʰā víśvasmād índra úttaraḥ //9//

Verse: 10 
Halfverse: a    saṃhotráṃ sma purā́ nā́rī sámanaṃ vā́va gacʰati /
Halfverse: c    vedʰā́ r̥tásya vīríṇī́ndrapatnī mahīyate víśvasmād índra úttaraḥ //10//

Verse: 11 
Halfverse: a    indrāṇī́m āsú nā́riṣu subʰágām ahám aśravam /
Halfverse: c    nahy àsyā aparáṃ caná jarásā márate pátir víśvasmād índra úttaraḥ //11//

Verse: 12 
Halfverse: a    nā́hám indrā́ṇi rāraṇa sákʰyur vr̥ṣā́kaper r̥té /
Halfverse: c    yásyedám ápyaṃ havíḥ priyáṃ devéṣu gácʰati víśvasmād índra úttaraḥ //12//

Verse: 13 
Halfverse: a    vŕ̥sākapāyi révati súputra ā́d u súsnuṣe /
Halfverse: c    gʰásat ta índra ukṣáṇaḥ priyáṃ kācitkaráṃ havír víśvasmād índra úttaraḥ //13//

Verse: 14 
Halfverse: a    ukṣṇó hí me páñcadaśa sākáṃ pácanti viṃsatím /
Halfverse: c    utā́hám admi pī́va íd ubʰā́ kukṣī́ pr̥ṇanti me víśvasmād índra úttaraḥ //14//

Verse: 15 
Halfverse: a    vr̥ṣabʰó ná tigmáśr̥ṅgo ʼntár yūtʰéṣu róruvat /
Halfverse: c    mantʰás ta indra śáṃ hr̥dé yáṃ te sunóti bʰāvayúr víśvasmād índra úttaraḥ //15//

Verse: 16 
Halfverse: a    ná séśe yásya rámbate ʼntarā́ saktʰyā̀3 kápr̥t /
Halfverse: c    sédīśe yásya romaśáṃ niṣedúṣo vijŕ̥mbʰate víśvasmād índra úttaraḥ //16//

Verse: 17 
Halfverse: a    ná séśe yásya romaśáṃ niṣedúṣo vijŕ̥mbʰate /
Halfverse: c    sédīśe yásya rámbate ʼntarā́ saktʰyā̀3 kápr̥t víśvasmād índra úttaraḥ //17//

Verse: 18 
Halfverse: a    ayám indra vr̥ṣā́kapiḥ párasvantaṃ hatáṃ vidat /
Halfverse: c    asíṃ sūnā́ṃ návaṃ carúm ā́d edʰasyā́na ā́citaṃ víśvasmād indra úttaraḥ //18//

Verse: 19 
Halfverse: a    ayám emi vicā́kaśad vicinván dā́sam ā́ryam /
Halfverse: c    píbāmi pākasútvano ʼbʰí dʰī́ram acākaśaṃ víśvasmād índra úttaraḥ //19//

Verse: 20 
Halfverse: a    dʰánva ca yát kr̥ntátraṃ ca káti svit tā́ ví yójanā /
Halfverse: c    nédīyaso vr̥ṣākapé ʼstam éhi gr̥hā́m̐ úpa víśvasmād índra úttaraḥ //20//

Verse: 21 
Halfverse: a    púnar éhi vr̥ṣākape suvitā́ kalpayāvahai /
Halfverse: c    yá eṣá svapnanáṃśanó ʼstam éṣi patʰā́ púnar víśvasmād índra úttaraḥ //21//

Verse: 22 
Halfverse: a    yád údañco vr̥ṣākape gr̥hám indrā́jagantana /
Halfverse: c    kvà1 syá pulvagʰó mr̥gáḥ kám agaṃ janayópano víśvasmād índra úttaraḥ //22//

Verse: 23 
Halfverse: a    párśur ha nā́ma mānavī́ sākáṃ sasūva viṃśatím /
Halfverse: c    bʰadráṃ bʰala tyásyā abʰūd yásyā udáram ā́mayad víśvasmād índra úttaraḥ //23//



Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.