TITUS
Atharva-Veda-Samhita (Saunaka)
Part No. 773

Hymn: 143 
Verse: 1 
Halfverse: a    táṃ vāṃ rátʰaṃ vayám adyā́ huvema pr̥tʰujráyam aśvinā sáṃgatiṃ góḥ /
Halfverse: c    yáḥ sūryā́ṃ váhati vandʰurāyúr gírvāhasaṃ purutámaṃ vasūyúm //1//

Verse: 2 
Halfverse: a    yuváṃ śríyam aśvinā devátā tā́ṃ dívo napātā vanatʰaḥ śácībʰiḥ /
Halfverse: c    yuvór vápur abʰí pŕ̥kṣaḥ sacante váhanti yát kakuhā́so rátʰe vām //2//

Verse: 3 
Halfverse: a    kó vām adyā́ karate rātáhavya ūtáye vā sutapéyāya vārkaíḥ /
Halfverse: c    r̥tásya vā vanúṣe pūrvyā́ya námo yemānó aśvinā́ vavartat //3//

Verse: 4 
Halfverse: a    hiraṇyáyena purubʰū rátʰenemáṃ yajñáṃ nāsatyópa yātam /
Halfverse: c    píbātʰa ín mádʰunaḥ somyásya dádʰatʰo rátnaṃ vidʰaté jánāya //4//

Verse: 5 
Halfverse: a    ā́ no yātaṃ divó ácʰa pr̥tʰivyā́ hiraṇyáyena suvŕ̥tā rátʰena /
Halfverse: c    mā́ vām anyé ní yaman devayántaḥ sáṃ yád dadé nā́bʰiḥ pūrvyā́ vām //5//

Verse: 6 
Halfverse: a    nū́ no rayíṃ puruvī́raṃ br̥hántaṃ dásrā mímātʰām ubʰáyeṣv asmé /
Halfverse: c    náro yád vām aśvinā stómam ā́vant sadʰástutim ājamīlhā́so agman //6//

Verse: 7 
Halfverse: a    ihéha yád vāṃ samanā́ papr̥kṣé séyám asmé sumatír vājaratnā /
Halfverse: c    uruṣyátaṃ jaritā́raṃ yuváṃ ha śritáḥ kā́mo nāsatyā yuvadrík //7//

Verse: 8 
Halfverse: a    mádʰumatīr óṣadʰīr dyā́va ā́po mádʰuman no bʰavatv antárikṣam /
Halfverse: c    kṣétrasya pátir mádʰumān no astv áriṣyanto ánv enaṃ carema //8//

Verse: 9 
Halfverse: a    panā́yyaṃ tád aśvinā kr̥táṃ vāṃ vr̥ṣabʰó divó rájasaḥ pr̥tʰivyā́ḥ /
Halfverse: c    sahásraṃ śáṃsā utá yé gáviṣṭau sárvām̐ ít tā́m̐ úpa yātā píbadʰyai //9//

Copyright TITUS Project, Frankfurt a/M, 1.1.2002. No parts of this document may be republished in any form without prior permission by the copyright holder.