TITUS
Rg-Veda: Aitareya-Brahmana
Part No. 23
Previous part

Paragraph: 23 


Sentence: 1    devāsurā vā eṣu lokeṣu samayatanta.
   te vā asurā imān eva lokān puro 'kurvata, yatʰaujīyāṃso baliyāṃsa evaṃ.
   te vā ayasmayīm evemām akurvata rajatām antarikṣaṃ hariṇīṃ divaṃ,
   te tatʰemām̐l lokān puro 'kurvata.
   te devā abruvan:
   puro vā ime 'surā imām̐l lokān akrata,
   pura imām̐l lokān pratikaravāmahā iti. tatʰeti.
   te sada evāsyāḥ pratyakurvatāgnīdʰram antarikṣād dʰavirdʰāne divas.
   te tatʰemām̐l lokān puraḥ pratyakurvata
Sentence: 2    te devā abruvann:
   upasada upāyāmopasadā vai mahāpuraṃ jayantīti. tatʰeti.
   te yām eva pratʰamām upasadam upāyaṃs tayaivainān asmāl lokād anudanta,
   yāṃ dvitīyāṃ tayāntarikṣād, yāṃ tr̥tīyāṃ tayā divas.
   tāṃs tatʰaibʰyo lokebʰyo 'nudanta
Sentence: 3    te vā ebʰyo lokebʰyo nuttā asurā r̥tūn aśrayanta.
   te deva abruvann:
   upasada evopāyāmeti. tatʰeti.
   ta imās tisraḥ satīr upasado dvir-dvir ekaikām upāyaṃs,
   taḥ ṣaṭ samapadyanta. ṣaḍ vā r̥tavas. tān vā r̥tubʰyo 'nudanta
Sentence: 4    te vā r̥tubʰyo nuttā asurā māsān aśrayanta.
   te devā abruvann:
   upasada evopāyāmeti. tatʰeti.
   ta imāḥ ṣaṭ satīr upasado dvir-dvir ekaikām upāyaṃs,
   tā dvādaśa samapadyanta. dvādaśa vai māsas. tān vai māsebʰyo 'nudanta
Sentence: 5    te vai māsebʰyo nuttā asurā ardʰamāsān aśrayanta.
   te devā abruvann:
   upasada evopāyāmeti. tatʰeti.
   ta imā dvādaśa satīr upasado dvir-dvir ekaikām upāyaṃs,
   tāś caturviṃśatiḥ samapadyanta. caturviṃśatir vā ardʰamāsās.
   tān vā ardʰamāsebʰyo 'nudanta
Sentence: 6    te 'vā ardʰamāsebʰyo nuttā asurā ahorātre aśrayanta.
   te devā abruvann:
   upasadāv evopāyāmeti. tatʰeti.
   te yām eva pūrvāhṇa upasadam upāyaṃs tayaivainān ahno 'nudanta,
   yām aparāhṇe tayā rātres, tāṃs tatʰobʰābʰyām antarāyaṃs
Sentence: 7    tasmāt supūrvāhṇa eva pūrvayopasadā pracaritavyaṃ svaparāhṇe 'parayā;
   tāvantam eva tad dviṣate lokam pariśinaṣṭi



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.