TITUS
Rg-Veda: Aitareya-Brahmana
Part No. 28
Previous part

Paragraph: 28 


Sentence: 1    Agnaye praṇīyamānāyānubrūhīty āhādʰvaryuḥ
Sentence: 2    pra devaṃ devyā dʰiyā bʰaratā jātavedasam \
   havya no vakṣad ānuṣag iti gāyātrīm brāhmaṇasyānubrūyād
Sentence: 3    gāyatro vai brāhmaṇas, tejo vai brahmavarcasaṃ gāyatrī;
   tejasaivainaṃ tad brahmavarcasena samardʰayatī/mam
Sentence: 4    mahe vidatʰyāya śūṣam iti triṣṭubʰaṃ rājanyasyānubrūyāt
Sentence: 5    traiṣṭubʰo vai rājanya, ojo vā indriyaṃ vīryaṃ triṣṭub;
   ojasaivainaṃ tad indriyeṇa vīryeṇa samardʰayati
Sentence: 6    śaśvat kr̥tva īḍyāya pra jabʰrur iti
Sentence: 7    svānām evainaṃ tac cʰraiṣṭhyaṃ gamāyati
Sentence: 8    śr̥ṇotu no damyebʰir anīkaiḥ śr̥ṇotv agnir divyair ajasra ity
Sentence: 9    ājarasaṃ hāsminn ajasro dīdāya ya evaṃ vedā/yam
Sentence: 10    iha pratʰamo dʰāyi dʰātr̥bʰir iti jagatīṃ vaiśyasyānubrūyāj
Sentence: 11    jāgato vai vaiśyo, jāgatāḥ paśavaḥ; paśubʰir evainaṃ tat samardʰayāti
Sentence: 12    vaneṣu citraṃ vibʰvaṃ viśe-viśa ity abʰirūpā.
   yad yajñe 'bʰirūpaṃ tat samr̥ddʰam
Sentence: 13    ayam u ṣya pra devayur ity
Sentence: 14    anuṣṭubbi vācaṃ visr̥jate
Sentence: 15    vāg vā anuṣṭub, vācy eva tad vācaṃ visr̥jate
Sentence: 16    'yam u ṣya iti yad āhāyam u syāgamaṃ yā purā Gandʰarveṣv
   ՚0,1 avātsam ity eva tad vāk prabrūte
Sentence: 17    'yam agnir uruṣyatīty
Sentence: 18    ayaṃ vā Agnir uruṣyaty
Sentence: 19    amr̥tād iva janmana ity, amr̥tatvam evāsmiṃs tad dadʰāti
Sentence: 20    sahasaś cit sahīyān devo jīvātave kr̥ta iti
Sentence: 21    devo hy eṣa etaj jīvātave kr̥to yad Agnir
Sentence: 22    iḷāyās tvā pade vayaṃ nābʰā pr̥tʰivyā adʰīty
Sentence: 23    etad vā iḷāyās padaṃ yad uttaravedīnābʰir
Sentence: 24    jātavedo ni dʰīmahīti, nidʰāsyanto hy enam bʰavanty
Sentence: 25    agne havyāya voḷhava iti, havyaṃ hi vakṣyau bʰavaty
Sentence: 26    agne viśvebʰiḥ svanīka devair ūrṇāvantam pratʰamaḥ sīda yonim iti
Sentence: 27    viśvāir evainaṃ tad devaiḥ sahāsādayati
Sentence: 28    kulāyinaṃ gʰr̥tavantāṃ savitra iti, kulāyam iva hy etad yajñe kriyate
   yat paitudāravāḥ paridʰayo gulgulūrṇāstukāḥ sugandʰitejanānīti.
   yajnāṃ naya yajamānāya sādʰv iti, yajñam eva tad r̥judʰā pratiṣṭhāpayati
Sentence: 29    sīda hotaḥ sva u loke cikitvān ity, Agnir vai devānāṃ hotā,
   tasyaiṣa svo loko yad uttaravedīnābʰiḥ
Sentence: 30    sādayā yajñaṃ sukr̥tasya yonāv iti,
   yajamāno vai yajño, yajamānāyaivaitām āśiṣam āśāste
Sentence: 31    devāvīr devān haviṣā yajāsy agne br̥had yajamāne vayo dʰā iti;
   prāṇo vai vayaḥ, prāṇam eva tad yajamāne dadʰāti
Sentence: 32    ni hotā hotr̥ṣadane vidāna ity; Agnir vai devānāṃ hotā,
   tasyaitad dʰotr̥ṣadanaṃ yad uttaravedīnābʰis
Sentence: 33    tveṣo dīdivām̐ asadat sudakṣa ity, āsanno hi sa tarhi bʰavaty
Sentence: 34    adabdʰavratapramatir vasiṣṭha ity, Agnir vai devānāṃ vasiṣṭhaḥ
Sentence: 35    sahasrambʰaraḥ śucijihvo agnir ity,
   eṣā ha vā asya sahasrambʰaratā yad enam ekaṃ santam bahudʰā viharanti
Sentence: 36    pra ha vai sāhasram poṣam āpnoti ya evaṃ veda
Sentence: 37    tvaṃ dūtas tvam u naḥ paraspā ity uttamayā paridadʰāti
Sentence: 38    tvaṃ vasya ā vr̥ṣabʰa praṇetā \
   agne tokasya nas tane tanūnām aprayucʰan dīdyad bodʰi gopā ity
Sentence: 39    Agnir vai devānāṃ gopā; Agnim eva tat sarvato goptāram paridatta ātmane
   ca yajamānāya ca yatraivaṃ vidvān etayā paridadʰāty,
   atʰo saṃvatsarīṇām evaitāṃ svastiṃ kurute
Sentence: 40    tā etā aṣṭāv anvāha rūpasamr̥dʰā.
   etad vai yajñasya samr̥ddʰaṃ yad rūpasamr̥ddʰaṃ,
   yat karma kriyamāṇam r̥g abʰivadati
Sentence: 41    tāsāṃ triḥ pratʰamām anvāha trir uttamāṃ, tā dvādaśa sampadyante:
   dvādasa vai māsāḥ saṃvatsaraḥ, saṃvatsaraḥ Prajāpatiḥ.
   prajāpatyāyatanābʰir evābʰī rādʰnoti ya evaṃ veda.
   triḥ pratʰamāṃ trir uttamām anvāha,
   yajñasyaiva tad barsau nahyati stʰemne balāyāvisraṃsāya



Next part


This text is part of the TITUS edition of Rg-Veda: Aitareya-Brahmana.

Copyright TITUS Project, Frankfurt a/M, 1.11.2013. No parts of this document may be republished in any form without prior permission by the copyright holder.