TITUS
Rg-Veda: Rg-Veda-Samhita
Part No. 12
Previous part

Hymn: 12 
Verse: 1 
Halfverse: a    agníṃ dūtáṃ vr̥ṇīmahe hótāraṃ viśvávedasam /
   agníṃ dūtáṃ vr̥ṇīmahe
   agním dūtám vr̥ṇīmahe
   agníṃ dūtáṃ vr̥ṇīmahe

Halfverse: b    hótāraṃ viśvávedasam /
   hótāram viśvávedasam /
   hótāraṃ viśvávedasam /

Halfverse: c    asyá yajñásya sukrátum //
   asyá yajñásya sukrátum //
   asyá yajñásya sukrátum //
   asyá yajñásya sukrátum //


Verse: 2 
Halfverse: a    agním-agniṃ hávīmabʰiḥ sádā havanta viśpátim /
   agním-agniṃ hávīmabʰiḥ
   agním-agnim hávīmabʰiḥ
   agním-agniṃ hávīmabʰiḥ

Halfverse: b    sádā havanta viśpátim /
   sádā havanta viśpátim /
   sádā havanta viśpátim /

Halfverse: c    havyavā́ham purupriyám //
   havyavā́ham purupriyám //
   havyavā́ham purupriyám //
   havyavā́ham purupriyám //


Verse: 3 
Halfverse: a    ágne devā́m̐ ihā́ vaha jajñānó vr̥ktábarhiṣe /
   ágne devā́m̐ ihā́ vaha
   ágne devā́n ihá ā́ vaha
   ágne devā́m̐ ihā́ vaha

Halfverse: b    jajñānó vr̥ktábarhiṣe /
   jajñānáḥ vr̥ktábarhiṣe /
   jajñānó vr̥ktábarhiṣe /

Halfverse: c    ási hótā na ī́ḍyaḥ //
   ási hótā na ī́ḍyaḥ //
   ási hótā naḥ ī́ḍyaḥ //
   ási hótā na ī́ḍiyaḥ //


Verse: 4 
Halfverse: a    tā́m̐ uśató ví bodʰaya yád agne yā́si dūtyàm /
   tā́m̐ uśató ví bodʰaya
   tā́n uśatáḥ ví bodʰaya
   tā́m̐ uśató ví bodʰaya

Halfverse: b    yád agne yā́si dūtyàm /
   yát agne yā́si dūtyàm /
   yád agne yā́si dūtíyam /

Halfverse: c    devaír ā́ satsi barhíṣi //
   devaír ā́ satsi barhíṣi //
   devaíḥ ā́ satsi barhíṣi //
   devaír ā́ satsi barhíṣi //


Verse: 5 
Halfverse: a    gʰŕ̥tāhavana dīdivaḥ práti ṣma ríṣato daha /
   gʰŕ̥tāhavana dīdivaḥ
   gʰŕ̥tāhavana dīdivaḥ
   gʰŕ̥tāhavana dīdivaḥ

Halfverse: b    práti ṣma ríṣato daha /
   práti sma ríṣataḥ daha /
   práti ṣma ríṣato daha /

Halfverse: c    ágne tváṃ rakṣasvínaḥ //
   ágne tváṃ rakṣasvínaḥ //
   ágne tvám rakṣasvínaḥ //
   ágne tuváṃ rakṣasvínaḥ //


Verse: 6 
Halfverse: a    agnínāgníḥ sám idʰyate kavír gr̥hápatir yúvā /
   agnínāgníḥ sám idʰyate
   agnínā agníḥ sám idʰyate
   agnínāgníḥ sám idʰyate

Halfverse: b    kavír gr̥hápatir yúvā /
   kavíḥ gr̥hápatiḥ yúvā /
   kavír gr̥hápatir yúvā /

Halfverse: c    havyavā́ḍ juhvā̀syaḥ //
   havyavā́ḍ juhvā̀syaḥ //
   havyavā́ṭ juhvā̀syaḥ //
   havyavā́ḍ juhúvāsiyaḥ //


Verse: 7 
Halfverse: a    kavím agním úpa stuhi satyádʰarmāṇam adʰvaré /
   kavím agním úpa stuhi
   kavím agním úpa stuhi
   kavím agním úpa stuhi

Halfverse: b    satyádʰarmāṇam adʰvaré /
   satyádʰarmāṇam adʰvaré /
   satyádʰarmāṇam adʰvaré /

Halfverse: c    devám amīvacā́tanam //
   devám amīvacā́tanam //
   devám amīvacā́tanam //
   devám amīvacā́tanam //


Verse: 8 
Halfverse: a    yás tvā́m agne havíṣpatir dūtáṃ deva saparyáti /
   yás tvā́m agne havíṣpatir
   yáḥ tvā́m agne havíṣpatiḥ
   yás tvā́m agne havíṣpatir

Halfverse: b    dūtáṃ deva saparyáti /
   dūtám deva saparyáti /
   dūtáṃ deva saparyáti /

Halfverse: c    tásya sma prāvitā́ bʰava //
   tásya sma prāvitā́ bʰava //
   tásya sma prāvitā́ bʰava //
   tásya sma prāvitā́ bʰava //


Verse: 9 
Halfverse: a    yó agníṃ devávītaye havíṣmām̐ āvívāsati /
   yó agníṃ devávītaye
   yáḥ agním devávītaye
   yó agníṃ devávītaye

Halfverse: b    havíṣmām̐ āvívāsati /
   havíṣmān āvívāsati /
   havíṣmām̐ āvívāsati /

Halfverse: c    tásmai pāvaka mr̥ḷaya //
   tásmai pāvaka mr̥ḷaya //
   tásmai pāvaka mr̥ḷaya //
   tásmai pavāka mr̥ḷaya //


Verse: 10 
Halfverse: a    sá naḥ pāvaka dīdivó 'gne devā́m̐ ihā́ vaha /
   sá naḥ pāvaka dīdivó
   sá naḥ pāvaka dīdivaḥ
   sá naḥ pavāka dīdivo

Halfverse: b    'gne devā́m̐ ihā́ vaha /
   ágne devā́n ihá ā́ vaha /
   ágne devā́m̐ ihā́ vaha /

Halfverse: c    úpa yajñáṃ havíś ca naḥ //
   úpa yajñáṃ havíś ca naḥ //
   úpa yajñám havíḥ ca naḥ //
   úpa yajñáṃ havíś ca naḥ //


Verse: 11 
Halfverse: a    sá na stávāna ā́ bʰara gāyatréṇa návīyasā /
   sá na stávāna ā́ bʰara
   sá naḥ stávānaḥ ā́ bʰara
   sá na stávāna ā́ bʰara

Halfverse: b    gāyatréṇa návīyasā /
   gāyatréṇa návīyasā /
   gāyatréṇa návīyasā /

Halfverse: c    rayíṃ vīrávatīm íṣam //
   rayíṃ vīrávatīm íṣam //
   rayím vīrávatīm íṣam //
   rayíṃ vīrávatīm íṣam //


Verse: 12 
Halfverse: a    ágne śukréṇa śocíṣā víśvābʰir deváhūtibʰiḥ /
   ágne śukréṇa śocíṣā
   ágne śukréṇa śocíṣā
   ágne śukréṇa śocíṣā

Halfverse: b    víśvābʰir deváhūtibʰiḥ /
   víśvābʰiḥ deváhūtibʰiḥ /
   víśvābʰir deváhūtibʰiḥ /

Halfverse: c    imáṃ stómaṃ juṣasva naḥ //
   imáṃ stómaṃ juṣasva naḥ //
   imám stómam juṣasva naḥ //
   imáṃ stómaṃ juṣasva naḥ //


Next part


This text is part of the TITUS edition of Rg-Veda: Rg-Veda-Samhita.

Copyright TITUS Project, Frankfurt a/M, 28.7.2009. No parts of this document may be republished in any form without prior permission by the copyright holder.