TITUS
Rg-Veda: Rg-Veda-Khilani
Part No. 22
Previous part

Hymn: 6 


Verse: 1 
Halfverse: a    híraṇyavarṇām̐ háriṇīm̐ suvárṇarajatásrajām /
Halfverse: b    
candrā́m̐ hiráṇmayīṃ lakṣmī́ṃ jā́tavedo mámā́ vaha /

Verse: 2 
Halfverse: a    
tā́m ma ā́ vaha jātavedo lakṣmī́m ánapagāmínīm /
Halfverse: b    
yásyām̐ híraṇyaṃ vindéyaṃ gā́m áśvaṃ púruṣān ahám /

Verse: 3 
Halfverse: a    
aśvapūrvā́m̐ ratʰamadʰyā́m̐ hastínādapramodínīm /
Halfverse: b    
śríyaṃ devī́m úpa hvaye śrī́r devī́ juṣatām /

Verse: 4 
Halfverse: a    
kām̐sy ásmi tā́m̐ híraṇyaprāvārām ārdrā́ñ jválantīṃ tr̥ptā́ṃ tarpáyantīm /
Halfverse: b    
padmestitʰā́ṃ padmávarṇāṃ tā́m ihópa hvaye śríyam /

Verse: 5 
Halfverse: a    
candrā́ṃ prabʰāsā́ṃ yyaśásā jválantīm̐ śríyaṃ lloké devájuṣṭām udārā́m /
Halfverse: b    
tā́m padmánemim̐ śáraṇaṃ prá padye alakṣmī́r me naśyatāṃ tvā́ṃ vr̥ṇomi // 6 //

Verse: 6 
Halfverse: a    
ādityávarṇe tápasódʰi jātó vánaspátis táva vr̥kṣótʰá bilváḥ /
Halfverse: b    
tásya pʰálāni tápasā́ nudantu māyā́ntarā yā́śca bāhyā́ alakṣmī́ḥ /

Verse: 7 
Halfverse: a    
úpaitu mān devasakʰáẖ kīrtíś ca máṇinā sahá /
Halfverse: b    
prādúr bʰūtósmi rā́ṣṭresmín kīrtíṃ vr̥ddʰíṃ dadātu me /

Verse: 8 
Halfverse: a    
kṣútpipāsā́malā jyeṣṭʰā́m alakṣmī́n nāśayāmy áham /
Halfverse: b    
ábʰūtim ásamr̥ddʰiṃ ca sárvān nír ṇuda me gŕ̥hāt /

Verse: 9 
Halfverse: a    
gándʰadvārā́ṃ durā́dʰarṣāṃ nityápuṣṭāṃ karīṣíṇīm /
Halfverse: b    
ī́śvarīm̐ sárvabʰūtānān tā́m ihópa hvaye śríyam /

Verse: 10 
Halfverse: a    
mánasaẖ kā́mam ā́kūtiṃ vvācás satyám aśīmahi /
Halfverse: b    
paśū́nāṃ rūpám ánnasya máyi śrī́ś śrayatāṃ yyáśaḥ // 7 //

Verse: 11 
Halfverse: a    
kardamená prajā bʰūtā́ máyi sám bʰava kárdama /
Halfverse: b    
śríyaṃ vvāsáya me kulé mātáraṃ padmamālínīm /

Verse: 12 
Halfverse: a    
ā́pa sravantu snígdʰāni cíklītā vása me gr̥hé /
Halfverse: b    
ca devī́m mātáram̐ śríyaṃ vvāsáya me kulé /

Verse: 13 
Halfverse: a    
pakvā́ṃ puṣkáriṇīṃ puṣṭā́ṃ piṅgálāṃ padmamālínīm /
Halfverse: b    
sūryā́m̐ hiráṇmayīṃ lakṣmī́ṃ jā́tavedo mámā́ vaha /

Verse: 14 
Halfverse: a    
ārdrā́ṃ puṣkáriṇīṃ yaṣṭī́m̐ suvárṇam̐ hemamālínīm /
Halfverse: b    
candrā́m̐ hiráṇmayīṃ llakṣmī́ṃ jā́tavedo mámā́ vaha /

Verse: 15 
Halfverse: a    
tā́m ma ā́ vaha jātavedo lakṣmī́m ánapagāmínīm /
Halfverse: b    
yásyām̐ híraṇyaṃ prábʰūtaṃ gā́vo dāsyó vindéyaṃ púruṣān ahám // 8 //

Verse: 16 
Halfverse: a    
ānandám̐ samā́viśad upā́dʰāvan vibʰā́vasum /
Halfverse: b    
śríyas sárvā upā́siṣva cíklīta vasa me gr̥hé /

Verse: 17 
Halfverse: a    
kardamená prajā sraṣṭā́ sambʰū́tiṃ gamayāmasi /
Halfverse: b    
ádadʰād úpāgād yéṣāṃ kā́mām̐ sasr̥jmáhe /

Verse: 18 
Halfverse: a    
jā́tavedaḫ punīhí rāyáspóṣaṃ ca dʰāraya /
Halfverse: b    
agnír tásmād énaso viśvā́n muñcatv ám̐hasaḥ /

Verse: 19 
Halfverse: a    
áccʰā no mittramaho deva devā́n ágne vócas sumatím̐ [ródas]y[oḥ] /
Halfverse: b    
vīhí svastím̐ sukṣitín divó nŕ̥̄n dviṣó ám̐hām̐si duritā́ tarema tā́ tarema távā́vasā tarema / 9 /



Next part



This text is part of the TITUS edition of Rg-Veda: Rg-Veda-Khilani.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.