TITUS
Black Yajur-Veda: Maitrayani-Samhita
Part No. 2
Previous part

Prapathaka: 2  
Anuvaka: 1  
Line : 7  Pada: a     ā́po devīḥ śúndʰata mā mádʰumantaṃ mádʰumatīr devayajyā́yai //

Line : 8  Pada: b     óṣadʰe trā́yasvainam̐ svádʰite maínam̐ him̐sīḥ /

Line : 9  Pada: c     yā́ te śivátamā tanū́s táyainam úpaspr̥śa //

Line : 10  Pada: d     devaśrúd imā́n právape

Pada: e     svasty úttaraṃ aśīya //

Line : 11  Pada: f     híraṇyavarṇāḥ śúcayaḥ pāvakā́ḥ prácakramur hitvā́vadyám ā́paḥ /

Line : 12  Pada: g     śatáṃ pavítrā vítatāny āsu tébʰir mā deváḥ savitā́ punātu //

Page: 10  
Line : 1  Pada: h     ā́po mā mātáraḥ sūdayantu gʰr̥téna mā gʰr̥tapvàḥ punantu /

Line : 2  Pada: i     víśvam̐ hí ripráṃ praváhantu devī́r úd íd ābʰyaḥ śúcir ā́ pūtá emi //

Line : 3  Pada: j     víṣṇoḥ śármāsi

Pada: k     śárma me yaccʰa \

Pada: l     ūrjé tvā

Pada: m     mahīnā́ṃ páyo 'sy apā́m óṣadʰīnām̐ rásas \

Line : 4  Pada: n     varcodʰā́ asi

Pada: o     várco me dʰehi //

Pada: p     vr̥trásyāsi kanī́nikā cákṣuṣo me vayodʰā́s \

Line : 5  Pada: q     antár aháṃ tváyā dvéṣo antár árātīr dadʰe mahatā́ párvatena

Line : 6  Pada: r     cakṣuṣpā́ asi

Pada: s     cákṣur me pāhi //

Pada: t     citpatís tvā punātu

Pada: u     vācáspátis tvā punātu //

Line : 8  Pada: v     devás tvā savitā́ punātv ácʰidreṇa pavítreṇa / vásoḥ sū́ryasya raśmíbʰiḥ //

Line : 10  Pada: w     tásya te pavitrapate pavítreṇa yásmai káṃ puné

Pada: x     táñ śakeyam //



Anuvaka: 2  
Line : 11  Pada: a     ā́kūtyai prayúje agnáye svā́hā

Pada: b     medʰā́yai mánase agnáye svā́hā

Pada: c     dīkṣā́yai tápase agnáye svā́hā

Line : 12  Pada: d     sárasvatyai pūṣṇé agnáye svā́hā //

Line : 13  Pada: e     ā́po devīr br̥hatīr viśvaśaṃbʰuvo dyā́vāpr̥tʰivī úro antarikṣa /

Line : 14  Pada: f     bŕ̥haspátir no havíṣā vr̥dʰātu // svā́hā //

Line : 15  Pada: g     víśvo devásya netúr márto vurīta sakʰyám /

Line : 16  Pada: h     víśvo rāyá iṣudʰyati dyumnám̐ vr̥ṇīta puṣyáse // svā́hā //

Line : 17  Pada: i     r̥ksāmáyoḥ śílpe stʰas

Pada: j     té vām ā́rabʰe \

Pada: k     ā́ modŕ̥caḥ pātam \

Pada: l     víṣṇoḥ śármāsi

Line : 18  Pada: m     śárma me yacʰa

Pada: n     námas te astu

Pada: o     mā́ mā him̐sīḥ //

Page: 11  
Line : 1  Pada: p     imā́ṃ dʰíyam̐ śíkṣamāṇasya deva krátuṃ dákṣam̐ varuṇa sám̐śiśādʰi /

Line : 2  Pada: q     yáyā́ti víśvā duritā́ tárema sutármāṇam ádʰi nā́vam̐ ruheyam //

Line : 3  Pada: r     sū́ryāgnī dyā́vāpr̥tʰivī úro antarikṣā́pa oṣadʰayās \

Pada: s     úpa mā dīkṣā́yāṃ dīkṣāpatayo hvayadʰvam \

Line : 4  Pada: t     déva savitas tváṃ dīkṣā́yā dīkṣā́patir asi \

Pada: u     ittʰáṃ mā sántaṃ pāhi \

Line : 5  Pada: v     ū́rg asy āṅgirasy ū́rṇamradās \

Pada: w     ū́rjaṃ máyi dʰehi \

Pada: x     índrasya yónir asi

Line : 6  Pada: y     gopāyá mā

Pada: z     námas te astu

Pada: aa     mā́ mā him̐sīḥ //

Line : 7  Pada: ab     kr̥ṣím̐ susasyā́m útkr̥ṣe supippalā́ óṣadʰīs kr̥dʰi /

Line : 8  Pada: ac     víṣāṇe víṣyaitáṃ grantʰím̐ yád asya guṣpitám̐ hr̥dí

Pada: ad     máno yád asya guṣpitám //

Line : 9  Pada: ae     br̥hánn asi vānaspatyáḥ

Pada: af     sudyumnó dyumnám̐ yájamānāya dʰehi

Pada: ag     nákṣatrāṇāṃ mātīkāśā́t pāhi //

Line : 11  Pada: ah     ā́ vo devāsa īmahe vāmáṃ prayaty àdʰvaré /

Line : 12  Pada: ai     yád vo devāsa āgúri yájñiyāso hávāmahe //

Line : 13  Pada: aj     svā́hā yajñáṃ mánasaḥ

Pada: ak     svā́hā diváḥ

Pada: al     svā́hā pr̥tʰivyā́ḥ

Pada: am     svā́horór antárikṣāt

Line : 14  Pada: an     svā́hā vā́tāt párigr̥hṇāmi svā́hā //


Anuvaka: 3  
Line : 15  Pada: a     nákṣatrāṇām̐ sakāśā́n mā́ yauṣam \

Pada: b     vratáṃ carata //

Line : 16  Pada: c     daívīṃ dʰíyaṃ manāmahe sumr̥ḍīkā́m abʰíṣṭaye /

Line : 17  Pada: d     varcodʰā́m̐ yajñávāhasam̐ sutīrtʰā́ no asad váśe //

Line : 18  Pada: e     yé devā́ mánujātā manoyújaḥ sudákṣā dákṣapitaras té no 'vantu té naḥ pāntu

Line : 19  Pada: f     tébʰyaḥ svā́hā //

Page: 12  
Line : 1  Pada: g     śivā́ḥ pītā́ bʰavata yūyám āpo asmā́kam̐ yónā udáre suśévāḥ /

Line : 2  Pada: h     írāvatīr anamīvā́ ánāgasaḥ śivā́ no bʰavata jīváse //

Line : 3  Pada: i     kā́mo havíṣāṃ mándiṣṭʰó 'gne tvám̐ sú jāgr̥hi vayám̐ sú mandiṣīmahi /

Line : 4  Pada: j     gopāyá naḥ svastáye prabúdʰe naḥ púnas kr̥dʰi //

Line : 5  Pada: k     púnar mánaḥ púnar ā́yur nā ā́gāt púnaḥ prāṇáḥ púnar ā́kūtam ā́gāt /

Line : 6  Pada: l     vaiśvānaró 'dabdʰas tanūpā́ ápabādʰatāṃ duritā́ni víśvā //

Line : 7  Pada: m     tvám agne vratapā́ asi devá ā́ mártyeṣv ā́ /

Line : 8  Pada: n     tvám̐ yajñéṣv ī́ḍyo vratám asmā́su dʰāraya //

Line : 9  Pada: o     pūṣā́ sanīnā́m \

Pada: p     sómo rā́dʰasām \

Pada: q     mā́ pr̥ṇán pūrtyā́ vírādʰiṣṭa

Pada: r     mā́ vayám ā́yuṣā várcasā ca

Line : 10  Pada: s     rā́svéyat soma \

Pada: t     ā́ bʰū́yo bʰara

Pada: u     deváḥ savitā́ vásor vasudā́vā

Line : 11  Pada: v     vāyúr gopā́s

Pada: w     tváṣṭā́dʰipatiḥ

Pada: x     puṣā́ pratigrahītā́

Pada: y     dévīr āpo apāṃ napād yá ūrmír haviṣyà indriyā́vān madíntamas tám̐ vo mā́ kramiṣam \

Line : 12  Pada: z     yā́ḥ paśūnā́m r̥ṣabʰé vā́cas tā́ḥ sū́ryo ágre śukró ágre tā́ḥ práhiṇomi yatʰābʰāgám̐ vo átra

Line : 14  Pada: aa     śivā́ naḥ púnar ā́yantu vā́cas \

Pada: ab     vāyáve tvā

Pada: ac     váruṇāya tvā

Line : 15  Pada: ad     rudrā́ya tvā

Pada: ae     nírr̥tyai tvā \

Pada: af     índrāya tvā

Pada: ag     marúdbʰyas tvā //



Anuvaka: 4  
Page: 13  
Line : 1  Pada: a     iyáṃ te śukra tanū́r idám̐ várcas táyā sáṃbʰava

Pada: b     bʰrā́jaṃ gacʰa

Pada: c     jū́r asi dʰr̥tā́ mánasā júṣṭā víṣṇave

Line : 2  Pada: d     tásyās te satyásavasaḥ prasavé tanvò yantrám aśīya svā́hā

Pada: e     śukrám asi

Line : 3  Pada: f     candrám asi \

Pada: g     amŕ̥tam asi

Pada: h     vaiśvadevám asi

Pada: i     cíd asi

Pada: j     manā́si

Pada: k     dʰī́r asi

Pada: l     dákṣiṇāsi

Line : 4  Pada: m     yajñíyāsi

Pada: n     kṣatríyāsi \

Pada: o     áditir asy ubʰayátaḥśīrṣṇī

Pada: p     sā́ naḥ súprācī súpratīcī bʰava

Line : 5  Pada: q     mitrás tvā padí badʰnātu

Pada: r     pūṣā́dʰvanaḥ pātu \

Pada: s     índrāyādʰyakṣāya \

Pada: t     ánu tvā mātā́ mányatām ánu pitā́ \

Line : 6  Pada: u     ánu bʰrā́tā ságarbʰyas \

Pada: v     ánu sákʰā sáyūtʰyaḥ

Pada: w     sā́ devi devám ácʰehi \

Line : 7  Pada: x     índrāya sómam \

Pada: y     rudrás tvā́vartayatu

Pada: z     svastí sómasakʰā púnar éhi

Line : 8  Pada: aa     vásvy asi

Pada: ab     rudrā́si \

Pada: ac     áditir asi \

Pada: ad     ādityā́si

Pada: ae     candrā́si

Pada: af     rudrā́si

Pada: ag     bŕ̥haspátiṣ ṭvā sumné ramṇātu

Line : 9  Pada: ah     rudró vásubʰir ā́cake

Pada: ai     pr̥tʰivyā́s tvā mūrdʰánn ā́jigʰarmi yajñíyā íḍāyās padé gʰr̥távati svā́hā \

Line : 10  Pada: aj     asmé ramasva \

Pada: ak     asmé te rā́yas

Pada: al     táva rā́yas

Pada: am     távatava rā́yas \

Line : 11  Pada: an     mā́ rāyáspóṣeṇa víyauṣma

Pada: ao     tváṣṭrimantas tvā sapema //


Anuvaka: 5  
Line : 12  Pada: a     sū́ryasya cákṣur ā́ruham agnér akṣṇáḥ kanī́nikām /

Line : 13  Pada: b     yád étaśebʰir ī́yase bʰrā́jamāno vipaścítā //

Page: 14  
Line : 1  Pada: c     ápi pántʰām aganmahi svastigā́m anehásam /

Line : 2  Pada: d     yéna víśvāḥ pári dvíṣo vr̥ṇákti vindáte vásu //

Line : 3  Pada: e     āsmākò 'si

Pada: f     śukrás te gráhaḥ

Pada: g     svā́hā tvā vicídbʰyaḥ //

Line : 4  Pada: h     abʰí tyáṃ devám̐ savitā́ramoṇyòḥ kavíkratum árcāmi satyásavasam̐ ratnadʰā́m abʰí priyáṃ matím /

Line : 6  Pada: i     ūrdʰvā́ yásyāmátir bʰā́ ádidyutat sávīmani híraṇyapāṇir amimīta sukrátuḥ kr̥pā́ svàḥ //

Line : 8  Pada: j     prajā́bʰyas tvā

Pada: k     prajā́s tvānuprā́ṇantu

Pada: l     prajā́ḥ pāhi

Pada: m     śukráṃ te śukra śukréṇa candráṃ candréṇāmŕ̥tam amŕ̥tena krīṇāmi deva soma

Line : 9  Pada: n     śákma yát te gós \

Pada: o     asmé te candrā́ṇi

Line : 10  Pada: p     tápasas tanū́r asi prajā́pater várṇaḥ

Pada: q     sahasrapoṣáṃ púṣyantī

Pada: r     paraméṇa paśúnā krīyasva \

Line : 11  Pada: s     asmé te bándʰuḥ

Pada: t     súvāṅ nábʰrāḍ aṅgʰāre bámbʰāre 'star áhasta kŕ̥śāno \

Line : 12  Pada: u     eté vaḥ somakráyaṇās *
      FN Correcturen und Conjecturen zu dem ganzen Werk.

Pada: v     tā́n rakṣadʰvam \

Pada: w     mā́ vo dabʰan

Pada: x     duścákṣā vo mā́vakśat //



Anuvaka: 6  
Page: 15  
Line : 1  Pada: a     svajā́ asi

Pada: b     svabʰū́r asi \

Pada: c     asmé kármaṇe jātás \

Pada: d     r̥téna tvā gr̥hṇāmi \

Pada: e     r̥téna naḥ pāhi

Line : 2  Pada: f     mitró nā éhi súmitradʰaḥ sahá rāyáspóṣeṇa \

Pada: g     índrasyorúm ā́viśa dákṣiṇam uśánn uśántam̐ syonáḥ syonám //

Line : 4  Pada: h     úd ā́yuṣā svāyúṣód óṣadʰīnām̐ rásena /

Line : 5  Pada: i     út parjányasya dʰā́mnódastʰām amŕ̥taṃ ánu //

Line : 6  Pada: j     urv àntárikṣam̐ vī̀hi \

Pada: k     ádityāḥ sádā ā́sīda //

Line : 7  Pada: l     ástabʰnād dyā́m r̥ṣabʰó antárikṣam ámimīta varimā́ṇaṃ pr̥tʰivyā́ḥ /

Line : 8  Pada: m     ā́sīdad víśvā bʰúvanāni samrā́ḍ víśvét tā́ni váruṇasya vratā́ni //

Line : 9  Pada: n     váneṣu vy àntárikṣaṃ tatāna vā́jam árvatsu páyo agʰnyā́su /

Line : 10  Pada: o     hr̥tsú krátum̐ váruṇaṃ dikṣv àgníṃ diví sū́ryam adadʰāt sómam ádrau //

Line : 11  Pada: p     dʰū́r asi

Pada: q     dʰvára dʰvárantam̐ yó asmā́n dʰvárāt \

Pada: r     yám̐ vayáṃ dʰvárāma táṃ dʰvara //

Pada: s     vāruṇám asi

Line : 12  Pada: t     váruṇas tvóttabʰnātu

Pada: u     váruṇasya skambʰò 'si //

Line : 13  Pada: v     prácyavasva bʰuvanaspate víśvāny abʰí dʰā́māni /

Line : 14  Pada: w     mā́ tvā pariparíṇo mā́ paripantʰíno mā́ tvā vŕ̥kā agʰāyávo vidan //

Line : 16  Pada: x     śyenó bʰūtvā́ párāpata

Pada: y     yájamānasya no gr̥hé sam̐skr̥tám /

Pada: z     devébʰyaḥ sutyā́yai //

Line : 18  Pada: aa     námo mitrásya váruṇasya cákṣase mahó devā́ya tád r̥tám̐ saparyata /

Line : 19  Pada: ab     dūredŕ̥śe devájātāya ketáve divás putrā́ya sū́ryāya śam̐sata //

Page: 16  
Line : 1  Pada: ac     vāruṇám asi

Pada: ad     váruṇas tvóttabʰnātu

Pada: ae     váruṇasya skambʰasárjanam asi //

Line : 2  Pada: af     vícr̥tto váruṇasya pā́śaḥ

Pada: ag     prátyasto váruṇasya pā́śas \

Pada: ah     námo váruṇasya pā́śāya \

Line : 3  Pada: ai     agnés tanū́r asi

Pada: aj     víṣṇave tvā

Pada: ak     sómasya tanū́r asi

Pada: al     víṣṇave tvā \

Pada: am     átitʰer ātitʰyám asi

Line : 4  Pada: an     víṣṇave tvā \

Pada: ao     agnáye tvā rāyaspoṣadé

Pada: ap     víṣṇave tvā

Pada: aq     śyenā́ya tvā somabʰŕ̥te

Line : 5  Pada: ar     víṣṇave tvā

Pada: as     vāruṇám asi

Pada: at     váruṇo 'si dʰr̥távratas \

Pada: au     váruṇasya r̥tasádanam ā́sīda

Line : 6  Pada: av     váruṇāya tvā //


Anuvaka: 7  
Line : 7  Pada: a     agnér janítram asi

Pada: b     vŕ̥ṣaṇau stʰas \

Pada: c     urváśy asi \

Pada: d     āyúr asi

Pada: e     purūrávā asi

Line : 8  Pada: f     gāyatrám asi

Pada: g     triṣṭúb asi

Pada: h     jágad asi //

Pada: i     bʰávataṃ naḥ sámanasau sámokasau sácetasā arépasau //

Line : 9  Pada: j     mā́ yajñám̐ him̐siṣṭaṃ mā́ yajñápatiṃ jātavedasau

Pada: k     śivaú bʰavatam adyá naḥ //

Line : 10  Pada: l     agnā́ agníś carati práviṣṭā ŕ̥ṣīṇāṃ putró adʰirājá eṣáḥ //

Line : 11  Pada: m     tásmai vidʰema havíṣā vayáṃ mā́ devā́nām̐ yūyupāma bʰāgadʰéyam //

Line : 12  Pada: n     ā́pataye tvā gr̥hṇāmi

Pada: o     páripataye tvā gr̥hṇāmi

Pada: p     tánūnáptre śakmane śakvarā́ya śakmanā ójiṣṭʰāya \

Line : 13  Pada: q     ánādʰr̥ṣṭam asy anādʰr̥ṣyáṃ devā́nām ójaḥ // abʰiśastipā́ anabʰiśastenyám //

Line : 14  Pada: r     ánu ma idám̐ vratám̐ vratápatir manyatām ánu dīkṣā́ṃ dīkṣā́patis \

Line : 15  Pada: s     áñjasā satyám úpāgām \

Pada: t     suvité mā dʰās \

Pada: u     ágne vratapate yā́ máma tanū́r eṣā sā́ tváyi \

Line : 16  Pada: v     ágne vratapate yā́ táva tanū́r iyám̐ sā́ máyi

Pada: w     sahá nau vratapate vratínor vratā́ni \

Line : 17  Pada: x     am̐śuram̐śuṣ ṭe deva somā́pyāyatām índrāyaikadʰanavíde \

Line : 18  Pada: y     ā́ tvám índrāya pyā́yasva \

Pada: z     ā́ túbʰyam índraḥ pyāyatām

Pada: aa     ā́pyāyaya sákʰīnt sanyā́ medʰáyā

Page: 17  
Line : 1  Pada: ab     svastí te deva soma sutyā́m aśīya svasty ùdŕ̥cam

Pada: ac     éṣṭā rā́yā éṣṭā vāmā́ni préṣé bʰágāya

Line : 2  Pada: ad     r̥tám r̥tavādíbʰyas \

Pada: ae     námo divé

Line : 3  Pada: af     námaḥ pr̥tʰivyaí //

Line : 4  Pada: ag     yā́ te agne 'yāśayā́ tanū́r várṣiṣṭʰā gahenaṣṭʰā́ /

Line : 5  Pada: ah     tveṣám̐ váco ápāvadʰīr ugrám̐ váco ápāvadʰīḥ // svā́hā //

Line : 6  Pada: ai     yā́ te agne rajāśayā́

Pada: aj     yā́ te agne harāśayā́

Pada: ak     yā́ te agne rúdriyā tanū́s táyā naḥ pāhi tásyai te svā́hā //


Anuvaka: 8  
Line : 8  Pada: a     taptā́yanī me 'si

Pada: b     vittā́yanī me 'si \

Pada: c     ávatān mā nātʰitám

Pada: d     ávatād vyatʰitám

Line : 9  Pada: e     ágne aṅgiro yò 'syā́ṃ pr̥tʰivyā́m ádʰy ásy āyúnā nā́mnéhi

Pada: f     vásavas tvā harantu gāyatréṇa cʰándasā

Line : 10  Pada: g     vitsvá yajñápates \

Pada: h     yát té 'nādʰr̥ṣṭaṃ dʰā́mānādʰr̥ṣyáṃ téna tvā́dadʰe \

Line : 11  Pada: i     ágne aṅgiro yó dvitī́yasyāṃ pr̥tʰivyā́m ádʰy ásy āyúnā nā́mnéhi

Line : 12  Pada: j     rudrā́s tvā harantu traíṣṭubʰena cʰándasā

Pada: k     vitsvá yajñápates \

Pada: l     yát té 'nādʰr̥ṣṭaṃ dʰā́mānādʰr̥ṣyáṃ téna tvā́dadʰe \

Line : 13  Pada: m     ágne aṅgiro yás tr̥tī́yasyāṃ pr̥tʰivyā́m ádʰy ásy āyúnā nā́mnéhi \

Line : 14  Pada: n     ādityā́s tvā harantu jā́gatena cʰándasā

Pada: o     vitsvá yajñápates \

Pada: p     yát té 'nādʰr̥ṣṭaṃ dʰā́mānādʰr̥ṣyáṃ téna tvā́dadʰe

Pada: q     vidér agne nábʰo nā́ma yát te

Page: 18  
Line : 1  Pada: r     sim̐hī́r asi

Pada: s     mahiṣī́r asi

Pada: t     devébʰyaḥ śundʰasva

Pada: u     devébʰyaḥ śumbʰasva \

Line : 2  Pada: v     indragʰoṣā́s tvā purástād vásubʰiḥ pāntu

Pada: w     pitáras tvā mánojavā dakṣiṇatáḥ pāntu

Line : 3  Pada: x     rudrā́s tvā prácetasaḥ paścā́t pāntu

Pada: y     viśvákarmā tvādityaír uttarā́t pātu

Line : 4  Pada: z     sim̐hī́r asi sapatnasāhī́ svā́hā

Pada: aa     sim̐hī́r asi rāyaspoṣavániḥ svā́hā

Line : 5  Pada: ab     sim̐hī́r asi suprajāvániḥ svā́hā

Pada: ac     sim̐hī́r asy ādityavániḥ sajātavániḥ svā́hā

Line : 6  Pada: ad     sim̐hī́r asi \

Pada: ae     ā́vaha devā́n devāyaté yájamānāya svā́hā

Line : 7  Pada: af     bʰūtébʰyas tvā

Pada: ag     viśvā́yur asi

Pada: ah     pr̥tʰivī́ṃ dr̥m̐ha

Pada: ai     dʰruvákṣitir asi \

Line : 8  Pada: aj     antárikṣaṃ dr̥m̐ha \

Pada: ak     acyutakṣíd asi

Pada: al     dívaṃ dr̥m̐ha \

Pada: am     agnér bʰásmāsi \

Pada: an     agnéḥ púrīṣam asi \

Line : 9  Pada: ao     agnéḥ kulā́yam asi //

Line : 10  Pada: ap     vibʰrā́ḍ br̥hát pibatu somyáṃ mádʰv ā́yur dadʰad yajñápatā ávihrutam /

Line : 11  Pada: aq     vā́tajūto yó abʰirákṣati tmánā prajā́ḥ piparti bahudʰā́ vírājati //



Anuvaka: 9  
Line : 12  Pada: a     devaśrútau devéṣv ā́gʰoṣetʰām //

Line : 13  Pada: b     yuñjáte mána utá yuñjate dʰíyo víprā víprasya br̥ható vipaścítaḥ /

Line : 14  Pada: c     ví hótrā dadʰe vayunāvíd ékā ín mahī́ devásya savitúḥ páriṣṭutiḥ //

Line : 15  Pada: d     ápa jányaṃ bʰayáṃ nuda mā́ cakrā́ ā́vr̥tsata /

Line : 16  Pada: e     gr̥hám̐ sómasya gacʰataṃ gácʰad índrasya niṣkr̥tám //

Line : 17  Pada: f     idám̐ víṣṇur vícakrame tredʰā́ nídadʰe padā́ /

Line : 18  Pada: g     sámūḍʰam asya pām̐suré //

Line : 19  Pada: h     írāvatī dʰenumátī hí bʰūtám̐ sūyavasínī mánave yaśasyè /

Page: 19  
Line : 1  Pada: i     vyàṣkabʰnā ródasī viṣṇa eté dādʰártʰa pr̥tʰivī́m abʰíto mayū́kʰaiḥ //

Line : 2  Pada: j     suvā́g ā́vada deva dúryaṃ áriṣyann áriṣyataḥ //

Line : 3  Pada: k     ā́ no vīró jāyatāṃ karmaṇyò 'bʰiśastipā́ anabʰiśastenyáḥ /

Line : 4  Pada: l     yáṃ bahávo 'nujī́vān yó bahūnā́m ásad vaśī́ //

Line : 5  Pada: m     vaiṣṇavám asi

Pada: n     víṣṇus tvottabʰnātu //

Line : 6  Pada: o     divó viṣṇa utá vā pr̥tʰivyā́ urór vā viṣṇo br̥ható antárikṣāt /

Line : 7  Pada: p     hástau pr̥ṇasva bahúbʰir vasavyaìr ā́ práyacʰa dákṣiṇād ótá savyā́t //

Line : 8  Pada: q     víṣṇor nú kam̐ vīryā̀ṇi právocam̐ yáḥ pā́rtʰivāni vimamé rájām̐si /

Line : 9  Pada: r     yó áskabʰāyad úttaram̐ sadʰástʰam̐ vicakramāṇás tredʰórugāyáḥ //

Line : 10  Pada: s     víṣṇoḥ pr̥ṣṭʰám asi

Pada: t     víṣṇo rarā́ṭam asi

Pada: u     víṣṇoḥ śípre stʰas \

Pada: v     víṣṇoḥ syū́r asi

Line : 11  Pada: w     víṣṇor dʰruvò 'si

Pada: x     vaiṣṇavám asi

Pada: y     víṣṇave tvā //

Line : 12  Pada: z     prá tád víṣṇuḥ stavate vīryèṇa mr̥gó na bʰīmáḥ kucaró giriṣṭʰā́ḥ /

Line : 13  Pada: aa     yásyorúṣu triṣú vikrámaṇeṣv adʰikṣiyánti bʰúvanāni víśvā //


Anuvaka: 10  
Line : 14  Pada: a     devásya tvā savitúḥ prasavè 'śvínor bāhúbʰyāṃ pūṣṇó hástābʰyām ā́dade \

Line : 15  Pada: b     ábʰrir asi

Pada: c     nā́rir asi \

Pada: d     idám ahám̐ rákṣaso grīvā́ ápikr̥ntāmi \

Pada: e     idám ahám̐ yó me samānó yó 'samāno 'rātīyáti tásya grīvā́ ápikr̥ntāmi

Line : 16  Pada: f     br̥hánn asi br̥hádrāyās \

Pada: g     br̥hátīm índrāya vā́cam̐ vada rakṣoháṇam̐ valagahánam̐ vaiṣṇavī́m \

Page: 20  
Line : 1  Pada: h     samrā́ḍ asi sapatnahā́ \

Pada: i     idám aháṃ tā́n valagā́n údvapāmi yā́n me samānó yā́n ásamāno nicakʰā́na yé kulpʰadagʰné

Line : 2  Pada: j     nírasto valagáḥ

Pada: k     svarā́ḍ asy abʰimātihā́ \

Pada: l     idám aháṃ tā́n valagā́n údvapāmi yā́n me sajātó yā́n ásajāto nicakʰā́na yé jānudagʰné

Line : 4  Pada: m     nírasto valagás \

Pada: n     virā́ḍ asi rakṣohā́ \

Pada: o     idám aháṃ tā́n valagā́n údvapāmi yā́n me sábandʰur yā́n ásabandʰur nicakʰā́na yé nābʰidagʰné

Line : 5  Pada: p     nírasto valagáḥ

Pada: q     satrarā́ḍ asy aśastihā́ \

Line : 6  Pada: r     idám aháṃ tā́n valagā́n údvapāmi yā́n me bʰrā́tr̥vyo yā́n ábʰrātr̥vyo nicakʰā́na yé am̐sadagʰné

Line : 7  Pada: s     nírasto valagáḥ

Pada: t     sarvarā́ḍ asy arātīyató hantā́ \

Pada: u     idám aháṃ tā́n valagā́n údvapāmi yā́n me sájanyo yā́n ásajanyo nicakʰā́na yé śīrṣadagʰné

Line : 8  Pada: v     nírasto valagáḥ //

Line : 10  Pada: w     sáṃmr̥śa imā́n ā́yuṣe várcase ca devā́nāṃ nidʰír asi dveṣoyávanaḥ /

Line : 11  Pada: x     yuyodʰy àsmád dvéṣām̐si yā́ni kā́ni ca cakr̥má //

Line : 12  Pada: y     devā́nām idáṃ níhitam̐ yád ásty átʰā́bʰāhi pradíśaś cátasraḥ /

Line : 13  Pada: z     kr̥ṇvānó anyáṃ ádʰarānt sapátnān //



Anuvaka: 11  
Line : 14  Pada: a     pr̥tʰivyaí tvā \

Pada: b     antárikṣāya tvā

Pada: c     divé tvā

Pada: d     śúndʰantāṃ lokā́ḥ pitr̥ṣádanās \

Line : 15  Pada: e     yávo 'si

Pada: f     yaváya dvéṣo asmát \

Pada: g     yaváyā́rātim \

Pada: h     pitr̥ṣádanaṃ tvā lokám ávastr̥ṇāmi //

Line : 17  Pada: i     úñśrayasva vanaspate sajū́r devéna barhíṣā /

Line : 18  Pada: j     nitānás tvā mārutó níhantu mitrā́váruṇau dʰruvéṇa dʰármaṇā //

Page: 21  
Line : 1  Pada: k     brahmavániṃ tvā kṣatravániṃ páryūhāmi

Pada: l     bráhma dr̥m̐ha

Pada: m     kṣatráṃ dr̥m̐ha

Pada: n     rāyáspóṣaṃ dr̥m̐ha

Line : 2  Pada: o     prajā́ṃ dr̥m̐ha

Pada: p     sajātā́n asmaí yájamānāya dr̥m̐ha //

Pada: q     gʰr̥téna dyā́vāpr̥tʰivī́ ā́pr̥ṇa

Line : 3  Pada: r     viśvajanásya cʰāyā́si //

Line : 4  Pada: s     pári tvā girvaṇo gíra imā́ bʰavantu viśvátaḥ /

Line : 5  Pada: t     vr̥ddʰā́yum ánu vŕ̥ddʰayo júṣṭā bʰavantu júṣṭayaḥ //

Line : 6  Pada: u     índrāya tvā \

Pada: v     índrasya syū́r asi \

Pada: w     índrasya dʰruvò 'si \

Pada: x     aindrám asi \

Pada: y     índrāya tvā

Pada: z     rakṣogʰnó vo valagagʰnáḥ prókṣāmi vaiṣṇavā́n

Line : 7  Pada: aa     rakṣoháṇaṃ tvā valagahánam ávasiñcāmi vaiṣṇavám \

Line : 8  Pada: ab     rakṣoháṇaṃ tvā valagahánam ávastr̥ṇāmi vaiṣṇavám \

Pada: ac     rakṣogʰnī́ vām̐ valagagʰnī́ úpadadʰāmi vaiṣṇavī́

Line : 9  Pada: ad     rakṣogʰnī́ vām̐ valagagʰnī́ páryūhāmi vaiṣṇavī́

Line : 10  Pada: ae     rakṣoháṇaṃ tvā valagahánam ā́str̥ṇāmi vaiṣṇavám //



Anuvaka: 12  
Line : 11  Pada: a     vibʰū́r asi pravā́haṇas \

Pada: b     váhnir asi havyavā́hanaḥ

Pada: c     śvātrò 'si prácetās

Line : 12  Pada: d     tutʰò 'si viśvávedās \

Pada: e     avasyúr asi dúvasvān

Pada: f     áṅgʰārir asi bámbʰāris \

Pada: g     uśíg asi kaviḥ

Line : 13  Pada: h     śundʰyúr asi mārjālī́yaḥ

Pada: i     samrā́ḍ asi kr̥śā́nuḥ

Pada: j     pariṣádyo 'sy āstavyàs \

Line : 14  Pada: k     nábʰo 'si pratakvā́ \

Pada: l     ásaṃmr̥ṣṭo 'si havyasū́danaḥ

Pada: m     ságaro 'si viśvávedās \

Line : 15  Pada: n     r̥tádʰāmāsi svàrjyotiḥ

Pada: o     samudrò 'si viśvávyacās \

Line : 16  Pada: p     ajò 'sy ékapāt \

Pada: q     áhir asi budʰnyàḥ

Pada: r     kavyò 'si kavyavā́hanas \

Pada: s     raúdreṇā́nīkena pāhí māgne

Page: 22  
Line : 1  Pada: t     pipr̥hí mā

Pada: u     námas te astu

Pada: v     mā́ mā him̐sīḥ //



Anuvaka: 13  
Line : 3  Pada: a     tvám̐ soma tanūkŕ̥dbʰyo dvéṣobʰyo 'nyákr̥tebʰyaḥ /

Line : 4  Pada: b     urú yantā́si várūtʰam // svā́hā //

Line : 5  Pada: c     juṣāṇó aptúr ā́jyasya vetu // svā́hā //

Line : 6  Pada: d     ágne náya supátʰā rāyé asmā́n víśvāni deva vayúnāni vidvā́n /

Line : 7  Pada: e     yuyodʰy àsmáj juhurāṇám enó bʰū́yiṣṭʰāṃ te námauktim̐ vidʰema //

Line : 8  Pada: f     urú viṣṇo víkramasvorú kṣáyāya nas kr̥dʰi /

Line : 9  Pada: g     gʰr̥táṃ gʰr̥tavane piba prápra yajñápatiṃ tira // svā́hā //

Line : 10  Pada: h     evā́ vandasva váruṇaṃ br̥hántaṃ namasyā́ dʰī́ram amŕ̥tasya gopā́m /

Line : 11  Pada: i     sá naḥ śárma trivárūtʰam̐ víyam̐sat pātáṃ no dyāvāpr̥tʰivī upástʰe //

Line : 12  Pada: j     urv àntárikṣam̐ vī̀hi \

Pada: k     ádityāḥ sádā ā́sīda

Pada: l     déva savitar eṣá te sómas

Pada: m     tám̐ rakṣasva

Line : 13  Pada: n     mā́ tvā dabʰan

Pada: o     duścákṣās te mā́vakśat \

Pada: p     etát tváṃ deva soma devā́n upā́vr̥ta * * * \
      FN < upā́vr̥tas
      FN Correcturen und Conjecturen zu dem ganzen Werk: lies upā́vr̥tta statt upā́vr̥ta
      FN cf. 3.9.1:113.14: upā́vr̥tā íti. avr̥tas sg2 aorist

Line : 14  Pada: q     idám aháṃ manuṣyā̀nt sahá rāyáspóṣeṇa prajáyā copā́varte

Pada: r     námo devébʰyaḥ

Line : 15  Pada: s     svadʰā́ pitŕ̥bʰyas \

Pada: t     nír váruṇasya pā́śād amukṣi

Pada: u     svàr abʰivyàkśaṃ jyótir vaiśvānarám

Line : 16  Pada: v     ágne vratapate yā́ táva tanū́r máyy ábʰūd eṣā́ sā́ tváyi \

Pada: w     ágne vratapate yā́ máma tanū́s tváyy ábʰūd iyám̐ sā́ máyi

Line : 17  Pada: x     púnar nau vratapate vratínor vratā́ni

Line : 18  Pada: y     yatʰāyatʰáṃ nau vratapate vratínor vratā́ni

Pada: z     ví vratā́ni sr̥jāvahai //



Anuvaka: 14  
Page: 23  
Line : 1  Pada: a     áty anyā́n agāṃ nā́nyā́n úpāgām

Pada: b     arvā́k tvā párebʰyaḥ paró 'varebʰyo 'vidam \

Line : 2  Pada: c     táṃ tvā juṣāmahe devayajyā́yai júṣṭam̐ víṣṇave

Pada: d     víṣṇave tvā //

Line : 3  Pada: e     urú viṣṇo víkramasvorú kṣáyāya nas kr̥dʰi /

Line : 4  Pada: f     gʰr̥táṃ gʰr̥tavane piba prápra yajñápatiṃ tira // svā́hā //

Line : 5  Pada: g     óṣadʰe trā́yasvainam̐ svádʰite maínam̐ him̐sīḥ /

Line : 6  Pada: h     yā́ te śivátamā tanū́s táyainam úpaspr̥śa //

Line : 7  Pada: i     yáṃ tvā́m ayám̐ svádʰitis tigmátejāḥ praṇinā́ya mahaté saúbʰagāya /

Line : 8  Pada: j     dívam ágreṇa mā́ him̐sīs \

Pada: k     antárikṣaṃ mádʰyena

Pada: l     pr̥tʰivyā́ sáṃbʰava

Pada: m     bʰrā́jaṃ gacʰa /

Line : 9  Pada: n     vánaspate śatávalśo víroha

Pada: o     sahásravalśā ví vayám̐ ruhema //

Line : 10  Pada: p     pr̥tʰivyaí tvā \

Pada: q     antárikṣāya tvā

Pada: r     divé tvā

Pada: s     śúndʰantāṃ lokā́ḥ pitr̥ṣádanās \

Pada: t     yávo 'si

Line : 11  Pada: u     yaváya dvéṣo asmát \

Pada: v     yaváyā́rātim \

Pada: w     pitr̥ṣádanaṃ tvā lokám ávastr̥ṇāmi //

Line : 12  Pada: x     svāveśò 'sy agregā́ netr̥̄ṇā́m

Pada: y     ádʰi tvā stʰāsyati

Pada: z     tásya vitsva //

Pada: aa     gʰr̥téna dyā́vāpr̥tʰivī́ ā́pr̥ṇa

Line : 13  Pada: ab     devás tvā savitā́ mádʰvānaktu //

Pada: ac     índrasya caṣā́lam asi

Line : 14  Pada: ad     supippalā́ óṣadʰīs kr̥dʰi

Pada: ae     dívam ágreṇóttabʰāna \

Pada: af     antárikṣaṃ mádʰyenā́pr̥ṇa

Line : 15  Pada: ag     pr̥tʰivī́m úpareṇa dr̥m̐ha //

Line : 16  Pada: ah     tā́ te dʰā́māny uśmasi gámadʰyai gā́vo yátra bʰū́riśr̥ṅgā ayā́saḥ /

Line : 17  Pada: ai     átrā́ha tád urugāyásya víṣṇoḥ paramáṃ padám ávabʰāti bʰū́ri //

Line : 18  Pada: aj     víṣṇoḥ kármāṇi paśyata yáto vratā́ni paspaśé /

Line : 19  Pada: ak     índrasya yújyaḥ sákʰā //

Page: 24  
Line : 1  Pada: al     brahmavániṃ tvā kṣatravániṃ páryūhāmi

Pada: am     bráhma dr̥m̐ha

Pada: an     kṣatráṃ dr̥m̐ha

Pada: ao     rāyáspóṣaṃ dr̥m̐ha

Line : 2  Pada: ap     prajā́ṃ dr̥m̐ha

Pada: aq     sajātā́n asmaí yájamānāya dr̥m̐ha //

Line : 3  Pada: ar     tád víṣṇoḥ paramáṃ padám̐ śácyā paśyanti sūráyaḥ /

Line : 4  Pada: as     divī̀va cákṣur ā́tatam //

Line : 5  Pada: at     parivī́r asi

Pada: au     pári tvā daívīr víśo vyayantām \

Pada: av     párīmám̐ yájamānaṃ manuṣyā̀ḥ sahá rāyáspóṣeṇa prajáyā ca vyayantām \

Line : 6  Pada: aw     diváḥ sā́nū́peṣa

Pada: ax     dívaṃ te dʰūmó gacʰatu \

Line : 7  Pada: ay     antárikṣaṃ jyótiḥ

Pada: az     pr̥tʰivī́ṃ bʰásma svā́hā //


Anuvaka: 15  
Line : 8  Pada: a     iṣé tvā \

Pada: b     upāvī́r asi \

Pada: c     úpo devā́n daívīr víśaḥ prā́gur váhnaya uśíjas \

Pada: d     bŕ̥haspate dʰāráyā vásūni

Line : 9  Pada: e     havyā́ te svadam \

Pada: f     déva tvaṣṭar vásu raṇe

Pada: g     révatī rámadʰvam \

Line : 10  Pada: h     devásya tvā savitúḥ prasavè 'śvínor bāhúbʰyāṃ pūṣṇó hástābʰyām ā́dade \

Line : 11  Pada: i     r̥tásya tvā devahaviḥ pā́śena prátimuñcāmi \

Pada: j     amúṣmai tvā júṣṭam \

Pada: k     dʰárṣā mā́nuṣās * \
      FN P: mā́nuṣaḥ

Line : 12  Pada: l     adbʰyás tvaúṣadʰībʰyo júṣṭaṃ prókṣāmi \

Pada: m     ánu tvā mātā́ mányatām ánu pitā́ \

Page: 25  
Line : 1  Pada: n     anu bʰrā́tā ságarbʰyas \

Pada: o     ánu sákʰā sáyūtʰyas \

Pada: p     ánumānā́vaha devā́n devāyaté yájamānāya \

Line : 2  Pada: q     apā́ṃ perúr asi

Pada: r     svāttám̐ sád dʰavír ā́po devī́ḥ svadantu

Pada: s     sáṃ te vāyúr vā́tena gácʰatām \

Line : 3  Pada: t     sám̐ yajátrair áṅgāni

Pada: u     sám̐ yajñápatir āśíṣā

Pada: v     gʰr̥ténāktaú paśū́m̐s trāyetʰām //

Line : 5  Pada: w     yé badʰyámānam ánu badʰyámānā anvaíkṣanta mánasā cákṣuṣā ca /

Line : 6  Pada: x     agníṣ ṭáṃ * ágre prámumoktu deváḥ prajā́patiḥ prajáyā sam̐rarāṇáḥ //
      FN P: tā́n.

Line : 7  Pada: y     révati predʰā́ yajñápatim ā́viśóro antarikṣa sajū́r devéna vā́tena //

Line : 8  Pada: z     tmánāsyá havíṣo yaja sám asya tanvā̀ bʰava /

Line : 9  Pada: aa     várṣīyo várṣīyaso yajñám̐ yajñápatau dʰāḥ //

Line : 10  Pada: ab     svarvíd asi

Pada: ac     svàr vittvā́ svàr ihi

Pada: ad     svàr máhyam \

Pada: ae     svàḥ paśúbʰyas \

Pada: af     lokavíd asi

Line : 11  Pada: ag     lokám̐ vittvā́ lokám ihi

Pada: ah     lokáṃ máhyam \

Pada: ai     lokáṃ paśúbʰyas \

Pada: aj     nātʰavíd asi

Line : 12  Pada: ak     nātʰám̐ vittvā́ nātʰám ihi

Pada: al     nātʰáṃ máhyam \

Pada: am     nātʰáṃ paśúbʰyas \

Pada: an     gātuvíd asi

Line : 13  Pada: ao     gātúm̐ vittvā́ gātúm ihi

Pada: ap     gātúṃ máhyam \

Pada: aq     gātúṃ paśúbʰyaḥ //

Line : 14  Pada: ar     ná vā́ etán mriyáse nótá riṣyasi deváṃ íd eṣi patʰíbʰiḥ śivébʰiḥ /

Line : 16  Pada: as     yátra yánti sukŕ̥to nā́pi duṣkŕ̥tas tátra tvā deváḥ savitā́ dadʰātu //

Line : 17  Pada: at     śámitāra upétana yajñáṃ devébʰir anvitám /

Page: 26  
Line : 1  Pada: au     pā́śāt paśúṃ prámuñcata bandʰā́d yajñápatiṃ pári //

Line : 2  Pada: av     áditiḥ pā́śān prámumoktv etā́n paśóḥ pā́śān paśupáter ádʰi /

Line : 3  Pada: aw     yó no dvéṣṭy ádʰaraḥ sá padyatāṃ tásmin pā́śān pratimuñcāma etā́n * //
      FN Correcturen und Conjecturen zu dem ganzen Werk.



Anuvaka: 16  
Line : 5  Pada: a     námas ta ātāna \

Pada: b     anarvā́ préhi

Pada: c     yájamānāya

Pada: d     gʰr̥tásya kulyā́m ánu sahá rāyáspóṣeṇa

Line : 6  Pada: e     dévīr āpaḥ śuddʰā́ yūyáṃ devā́n yuyudʰvám \

Pada: f     śuddʰā́ vayám̐ súpariviṣṭāḥ pariveṣṭā́ro vo bʰūyāsma

Line : 7  Pada: g     vā́cam asya mā́ him̐sīs \

Pada: h     prāṇám asya mā́ him̐sīs \

Line : 8  Pada: i     cákṣur asya mā́ him̐sīs \

Pada: j     śrótram asya mā́ him̐sīs \

Pada: k     yát te krūrám̐ yád ā́stʰitaṃ tád eténa śundʰasva

Line : 9  Pada: l     devébʰyaḥ śumbʰasva

Pada: m     gā́trāṇy asya mā́ him̐sīs \

Line : 10  Pada: n     carítrān asya mā́ him̐sīs \

Pada: o     nā́bʰim asya mā́ him̐sīs \

Pada: p     méḍʰram asya mā́ him̐sīs \

Line : 11  Pada: q     pāyúm asya mā́ him̐sīs \

Pada: r     śám adbʰyáḥ //

Line : 12  Pada: s     óṣadʰe trā́yasvainam̐ svádʰite maínam̐ him̐sīḥ /

Line : 13  Pada: t     yā́ te śivátamā tanū́s táyainam úpaspr̥śa //

Line : 14  Pada: u     pr̥tʰivyaí tvā

Pada: v     rákṣasāṃ bʰāgò 'si \

Pada: w     idám ahám̐ rákṣó 'vabādʰe \

Pada: x     idám ahám̐ rákṣo 'dʰamáṃ támo nayāmi \

Line : 15  Pada: y     iṣé tvā \

Pada: z     ūrjé tvā

Pada: aa     devébʰyaḥ śundʰasva

Pada: ab     devébʰyaḥ śumbʰasva //

Line : 16  Pada: ac     gʰr̥téna dyā́vāpr̥tʰivī́ prórṇuvātām

Pada: ad     amuṣmai tvā júṣṭam \

Pada: ae     námaḥ sū́ryasya saṃdŕ̥śe //

Line : 17  Pada: af     urv àntarikṣam̐ vī̀hi

Pada: ag     prátyuṣṭam̐ rákṣaḥ prátyuṣṭā́rātis \

Pada: ah     vāyóḥ stokā́nām \

Page: 27  
Line : 1  Pada: ai     práyutā dvéṣām̐si *
      FN cf. 3.10.1:131.2

Pada: aj     svā́hordʰvánabʰasaṃ * mārutáṃ deváṃ gacʰatam //
      FN cf. 3.10.1:131.2


Anuvaka: 17  
Line : 2  Pada: a     júṣṭaṃ devébʰyo havyáṃ gʰr̥tā́vat \

Pada: b     amúṣmai tvā júṣṭam \

Pada: c     réḍ asi \

Pada: d     agníṣ ṭvā śrīṇātu \

Line : 3  Pada: e     ā́pas tvā sámariṇvan

Pada: f     vā́tasya tvā dʰrā́jyai pūṣṇó ráṃhyā ūṣmáṇo 'vyátʰiṣe 'pā́m óṣadʰīnām̐ rásas \

Line : 4  Pada: g     gʰr̥táṃ gʰr̥tapāvānaḥ pibata

Pada: h     vásām̐ vasāpāvānaḥ pibata \

Line : 5  Pada: i     antárikṣasya havír asi

Pada: j     svā́hā tvā vā́tāya

Pada: k     díśaḥ pradíśa ādíśo vidíśa uddíśo díśas \

Line : 6  Pada: l     aindráḥ prāṇó áṅge aṅge nídīdʰyat \

Line : 7  Pada: m     aindrò 'pānó áṅge aṅge níbobʰuvat \

Pada: n     aindró vyānó áṅge aṅge víbobʰuvat //

Line : 9  Pada: o     déva tvaṣṭar bʰū́ri te sát sámetu sálakṣma yád víṣurūpaṃ babʰū́va /

Line : 10  Pada: p     devatrā́ yántam ávase sákʰāyo ánu tvā mātā́ pitáro madantu //


Anuvaka: 18  
Line : 11  Pada: a     samudráṃ gacʰa svā́hā \

Pada: b     antárikṣaṃ gacʰa svā́hā

Pada: c     devám̐ savitā́raṃ gacʰa svā́hā \

Page: 28  
Line : 1  Pada: d     ahorātré gacʰa svā́hā

Pada: e     mitrā́váruṇau gacʰa svā́hā

Pada: f     dyā́vāpr̥tʰívī gacʰa svā́hā

Line : 2  Pada: g     cʰándām̐si gacʰa svā́hā

Pada: h     sómaṃ gacʰa svā́hā

Pada: i     yájñáṃ gacʰa svā́hā

Line : 3  Pada: j     divyáṃ nábʰo gacʰa svā́hā \

Pada: k     agním̐ vaiśvānaráṃ gacʰa svā́hā

Pada: l     máno hā́rdim̐ yacʰa \

Line : 4  Pada: m     óṣadʰībʰyas tvā //

Line : 5  Pada: n     dʰā́mnodʰāmno rājann itó váruṇa no muñca

Pada: o     yád ā́po ágʰnyā váruṇéti śápāmahai /

Line : 7  Pada: p     táto varuṇa no muñca //

Line : 8  Pada: q     úd uttamám̐ varuṇa pā́śam asmád ávādʰamám̐ ví madʰyamám̐ śratʰāya /

Line : 9  Pada: r     átʰā vayám āditya vraté távā́nāgaso áditaye syāma //

Line : 10  Pada: s     sumitrā́ nā ā́pā óṣadʰayaḥ santu durmitrā́s tásmai santu /

Line : 11  Pada: t     yó asmā́n dvéṣṭi yáṃ ca vayáṃ dviṣmáḥ //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.