TITUS
Black Yajur-Veda: Maitrayani-Samhita
Part No. 6
Previous part

Prapathaka: 6  
Anuvaka: 1  
Line : 14  Pada: a     prá vo vā́jā abʰídyavo havíṣmanto gʰr̥tā́cyā /

Line : 15  Pada: b     devā́n jigāti sumnayúḥ //

Page: 85  
Line : 1  Pada: c     úpa tvā juhvò máma gʰr̥tā́cīr yantu haryata /

Line : 2  Pada: d     ágne havyā́ juṣasva naḥ //

Line : 3  Pada: e     úd agne táva tád gʰr̥tā́d arcī́ rocatā ā́hutam /

Line : 4  Pada: f     ním̐sānaṃ juhvò múkʰe //

Line : 5  Pada: g     prajā́ agne sám̐vāsayehā́śāś ca paśúbʰiḥ sahá /

Line : 6  Pada: h     rāṣṭrā́ṇy asmin dʰehi yā́ny ā́sant savitúḥ savé //

Line : 7  Pada: i     ayáṃ te yónir r̥tvíyo yáto jātó árocatʰāḥ /

Line : 8  Pada: j     táṃ jānánn ágnā ā́roha táto no vardʰayā rayím //

Line : 9  Pada: k     ā́yáṃ gauḥ pŕ̥śnir akramīd ásadan mātáraṃ puráḥ /

Line : 10  Pada: l     pitáraṃ ca prayánt svàḥ //

Line : 11  Pada: m     trim̐śáddʰāmā vírājati vā́k pataṃgā́ya hūyate /

Line : 12  Pada: n     vyàkśan mahiṣó dívam //

Line : 13  Pada: o     antáś caraty arṇavé asyá prāṇā́d apānatáḥ /

Line : 14  Pada: p     práti vām̐ sū́ro áhabʰiḥ //

Line : 15  Pada: q     itó jajñe pratʰamám̐ svā́d yóner ádʰi jātávedāḥ /

Line : 16  Pada: r     sá gāyatryā́ triṣṭúbʰā jágatyānuṣṭúbʰā ca devébʰyo havyā́ vahatu prajānán //

Line : 18  Pada: s     yó no agníḥ pitaro hr̥tsv àntár ámartyo mártyaṃ āvivéśa /

Page: 86  
Line : 1  Pada: t     tám ātmáni párigr̥hṇīmasīhá néd eṣó asmā́n avahā́ya parā́yat //

Line : 2  Pada: u     dóhyā ca te dugdʰabʰŕ̥c corvárī

Pada: v     té te bʰāgadʰeyaṃ práyaccʰāmi

Pada: w     tā́bʰyāṃ tvādadʰe

Line : 3  Pada: x     gʰarmáḥ śiras

Pada: y     tád ayám agníḥ sáṃpriyaḥ paśúbʰir bʰava

Pada: z     púrīṣam asi

Pada: aa     yát te śukra śukráṃ jyótis téna rucā́ rúcam aśītʰāḥ //

Line : 5  Pada: ab     máyi gr̥hṇāmy ahám ágre agním̐ sahá prajáyā várcasā dʰánena /

Line : 6  Pada: ac     máyi kṣatráṃ máyi rā́yo dadʰāmi mádema śatáhimāḥ suvī́rāḥ //

Line : 7  Pada: ad     bʰū́r bʰúvas \

Pada: ae     áṅgirasāṃ tvā devā́nām̐ vraténā́dadʰe \

Pada: af     agnéṣ ṭvā devásya vraténā́dadʰe \

Line : 8  Pada: ag     índrasya tvā marútvato vraténā́dadʰe

Pada: ah     mánoṣ ṭvā grāmaṇyò vraténā́dadʰe //

Line : 9  Pada: ai     ācʰádi tvā cʰándo dadʰe dyaúr mahnā́si bʰū́mir bʰūnā́ /

Line : 10  Pada: aj     tásyās te devy adita upástʰe 'nnādám agním ánnapatyāyā́dadʰe //

Line : 11  Pada: ak     ágnā ā́yūm̐ṣi pavase \

Pada: al     agnír ŕ̥ṣis \

Pada: am     ágne pávasva //


Anuvaka: 2  
Line : 12  Pada: a     yā́ vājinn agnéḥ pávamānā priyā́ tanū́s tā́m ā́vaha

Pada: b     yā́ vājinn agnéḥ pāvakā́ priyā́ tanū́s tā́m ā́vaha

Line : 13  Pada: c     yā́ vājinn agnéḥ śúciḥ priyā́ tanū́s tā́m ā́vaha //

Line : 15  Pada: d     yád ákrandaḥ pratʰamáṃ jā́yamāna udyánt samudrā́d utá vā púrīṣāt /

Line : 16  Pada: e     śyenā́ te pakṣā́ hariṇótá bāhū́ upastútyaṃ jánima tát te arvan //

Line : 17  Pada: f     ójase bálāya tvódyaccʰe vŕ̥ṣṇe śúṣmāya

Pada: g     sapatnatū́r asi vr̥tratū́ḥ //

Line : 18  Pada: h     prā́cīm ánu pradíśaṃ préhi vidvā́n agnér agne puró agnír bʰavehá /

Line : 19  Pada: i     víśvā ā́śā dī́dyad víbʰāhy ū́rjaṃ no dʰehi dvipáde cátuṣpade //

Page: 87  
Line : 1  Pada: j     abʰyàstʰām̐ víśvāḥ pŕ̥tanā árātīs tád agnír āha tád u sóma āha /

Line : 2  Pada: k     bŕ̥haspátiḥ saviténdras tád āha pūṣā́ nā ā́dʰāt sukr̥tásya loké //

Line : 3  Pada: l     bʰúvaḥ svàr

Pada: m     áṅgirasāṃ tvā devā́nām̐ vraténā́dadʰe \

Pada: n     agnéṣ ṭvā devásya vraténā́dadʰe \

Line : 4  Pada: o     índrasya tvā marútvato vraténā́dadʰe

Pada: p     mánoṣ ṭvā grāmaṇyò vraténā́dadʰe //

Line : 5  Pada: q     ācʰádi tvā cʰándo dadʰe dyaúr mahnā́si bʰū́mir bʰūnā́ /

Line : 6  Pada: r     tásyās te devy adita upástʰe 'nnādám agním ánnapatyāyā́dadʰe //

Line : 7  Pada: s     yát te śukra śukráṃ jyótiḥ śukráṃ dʰā́mā́jasraṃ téna tvā́dadʰe //

Line : 8  Pada: t     íḍāyās tvā padé vayáṃ nā́bʰā pr̥tʰivyā́ ádʰi /

Line : 9  Pada: u     jā́tavedo nídʰīmahy ágne havyā́ya vóḍʰave //

Line : 10  Pada: v     samrā́ṭ ca svarā́ṭ cā́gne yé te tanvaù tā́bʰyāṃ mā ū́rjam̐ yacʰa

Pada: w     virā́ṭ ca prabʰū́ś cā́gne yé te tanvaù tā́bʰyāṃ mā ū́rjam̐ yacʰa

Line : 11  Pada: x     vibʰū́ś ca paribʰū́ś cā́gne yé te tanvaù tā́bʰyāṃ mā ū́jram̐ yacʰa //

Line : 13  Pada: y     samudrā́d ūrmír mádʰumaṃ údārad úpām̐śúnā sám amr̥tatvám ānaṭ /

Line : 14  Pada: z     gʰr̥tásya nā́ma guhyám̐ yád ásti jihvā́ devā́nām amŕ̥tasya nā́bʰiḥ //

Line : 15  Pada: aa     vayáṃ nā́ma prábravāmā gʰr̥tásyāsmín yajñé dʰārayāmā námobʰiḥ /

Line : 16  Pada: ab     úpa brahmā́ śr̥ṇavañ śasyámānaṃ cátuḥśr̥ṅgo 'vamīd gaurá etát //

Line : 17  Pada: ac     catvā́ri śŕ̥ṅgā tráyo asya pā́dā dvé śīrṣé saptá hástāso asya /

Line : 18  Pada: ad     tredʰā́ baddʰó vr̥ṣabʰó roravīti mahó devó mártyaṃ ā́tatāna //

Page: 88  
Line : 1  Pada: ae     yé agnáyaḥ sámanasā óṣadʰīṣu vánaspátiṣu práviṣṭʰāḥ /

Line : 2  Pada: af     té virā́jam abʰisám̐yantu sárvā ū́rjaṃ no dʰehi dvipáde cátuṣpade //

Line : 3  Pada: ag     saptá te agne samídʰaḥ saptá jihvā́ḥ saptá ŕ̥ṣayaḥ saptá dʰā́ma priyā́ṇi /

Line : 5  Pada: ah     saptá r̥tvíjaḥ saptadʰā́ tvā yajanti saptá hótrā r̥tutʰā́ nu vidvā́nt

Pada: ai     saptá yónīr ā́pr̥ṇasva gʰr̥téna svā́hā //

Line : 7  Pada: aj     yé agnáyo divó yé pr̥tʰivyā́ḥ samāgácʰantī́ṣam ū́rjam̐ vásānāḥ /

Line : 8  Pada: ak     té asmā́ agnáye dráviṇaṃ dattvéṣṭā́ḥ prītā́ āhutibʰā́jo bʰūtvā́

Line : 9  Pada: al     yatʰālokáṃ púnar ástaṃ páreta svā́hā //

Line : 10  Pada: am     níṣasāda dʰr̥távrato váruṇaḥ pastyā̀sv ā́ /

Line : 11  Pada: an     sā́mrājyāya sukrátuḥ //

Line : 12  Pada: ao     utá nó 'hir budʰnyàḥ śr̥ṇotv ajá ékapāt pr̥tʰivī́ samudráḥ /

Line : 13  Pada: ap     stutā́ mántrāḥ kaviśastā́ avantu na enā́ rājan havíṣā mādayasva //

Line : 15  Pada: aq     prá nūnáṃ bráhmaṇaspátir mántram̐ vadaty uktʰyàm /

Line : 16  Pada: ar     yásminn índro váruṇo mitró aryamā́ devā́ ókām̐si cakriré //

Line : 17  Pada: as     gʰarmáḥ śiras

Pada: at     tád ayám agníḥ sáṃpriyaḥ paśúbʰir bʰava

Pada: au     púrīṣam asi

Pada: av     yácʰā tokā́ya tánayāya śám̐ yós \

Line : 18  Pada: aw     arkó jyótis

Pada: ax     tád ayám agníḥ sáṃpriyaḥ paśúbʰir bʰava

Page: 89  
Line : 1  Pada: ay     púrīṣam asi

Pada: az     yácʰā tokā́ya tánayāya śám̐ yós \

Pada: ba     vā́taḥ prāṇás

Pada: bb     tád ayám agníḥ sáṃpriyaḥ paśúbʰir bʰava

Line : 2  Pada: bc     púrīṣam asi

Pada: bd     yácʰā tokā́ya tánayāya śám̐ yóḥ //

Line : 3  Pada: be     aviṣáṃ naḥ pitúṃ páca //

Line : 4  Pada: bf     kálpetāṃ dyā́vāpr̥tʰivī́ kálpantām ā́pā óṣadʰayaḥ /

Line : 5  Pada: bg     kálpantām agnáyaḥ pŕ̥tʰaṅ máma jyaíṣṭʰyāya sávratāḥ //

Line : 6  Pada: bh     yé agnáyaḥ sámanasā óṣadʰīṣu vánaspátiṣu práviṣṭāḥ /

Line : 7  Pada: bi     té virā́jam abʰisám̐yantu sárvā ū́rjaṃ no dʰatta dvipáde cátuṣpade //


Anuvaka: 3  
Line : 8  Pada: a     prajā́patir vā́ idám ágra āsīt

Pada: b     tám̐ vīrúdʰo 'bʰyàrohan \

Pada: c     asuryò vā́ etā́ yád óṣadʰayas

Line : 9  Pada: d     tā́ atitiṣṭígʰiṣann atiṣṭígʰaṃ nā́śaknot

Pada: e     sò 'śocat

Pada: f     sò 'tapyata

Line : 10  Pada: g     táto 'gnír asr̥jyata

Pada: h     tám agním̐ sr̥ṣṭám̐ vīrúdʰāṃ téjo 'gacʰat

Pada: i     tā́ aśuṣyan

Pada: j     ná tátaḥ purā́śuśyan \

Line : 11  Pada: k     sá prajā́patir agním ā́dʰatta \ imā́ evā́sahā íti

Pada: l     tā́ asahata

Line : 12  Pada: m     tát sā́ḍʰyai vā́vaíṣá ā́dʰīyate

Pada: n     tád yátʰādó vasantāśiśirè 'gnír vīrúdʰaḥ sáhata evám̐ sapátnaṃ bʰrā́tr̥vyam ávartim̐ sahate yá evám̐ vidvā́n agním ādʰatté \

Line : 14  Pada: o     etā́vad vā́ asyā́ ánabʰimr̥tam̐ yā́vad védiḥ párigr̥hītā

Pada: p     tā́m uddʰátyāpá upasŕ̥jyāgním ā́dʰatte *
      FN M2. Ed (M1, H, Bb): ādʰatté

Line : 15  Pada: q     yajñíyām evaínāṃ médʰyāṃ kr̥tvā́dʰatte \

Pada: r     agnér vā́ iyám̐ sr̥ṣṭā́d abibʰet \

Page: 90  
Line : 1  Pada: s     áti mā dʰakṣyatī́ti

Pada: t     yád apá upasŕ̥jyāgním ādʰatté \

Pada: u     asyā́ ánatidāhāya \

Line : 2  Pada: v     eṣā́ vaí prajā́pateḥ sárvatā tanū́r yád ā́paḥ

Pada: w     sarváta enaṃ prajā́ḥ sarvátaḥ paśávo 'bʰí púṇyena bʰavanti yá evám̐ vidvā́n apá upasŕ̥jyāgním ādʰatté

Line : 4  Pada: x     yā́vad vaí varāhásya caṣā́laṃ tā́vatīyám ágra āsīt \

Pada: y     yád varāhávihatam upā́syāgním ādʰatté \

Line : 5  Pada: z     imā́m evá tán nā́pārāṭ \

Pada: aa     asyā́ enaṃ mā́trāyām ádʰyā́dʰatte

Line : 6  Pada: ab     tásmād eṣā́ varāhā́ya vímradate \

Pada: ac     eṣá hy àsyā́ mā́trāṃ bibʰárti

Line : 7  Pada: ad     devapāṇáyo vaí nā́mā́surā āsan \

Pada: ae     té devagavī́r ápājan \

Pada: af     tā́ ánvagacʰan \

Line : 8  Pada: ag     tā́ abʰyā́jan \

Pada: ah     tā́sāṃ páyo 'hīyata

Pada: ai     tè 'bruvan

Pada: aj     yád vā́ āsām̐ váram ábʰūt tád ahāstéti

Line : 9  Pada: ak     tád varāhó bʰūtvā́surebʰyó 'dʰi devā́n ā́gacʰat

Pada: al     tásmād varāháṃ gā́vó 'nudʰāvanti sváṃ páyo jānānā́s

Line : 10  Pada: am     tád yā́vatpriyam evá paśūnā́ṃ dvipádāṃ cátuṣpadāṃ páyas tā́vatpriyaḥ paśūnā́ṃ dvipádāṃ cátuṣpadāṃ bʰavati yá evám̐ vidvā́n varāhávihatam upā́syāgním ādʰatté \

Line : 12  Pada: an     etád vā́ asyā́ ánabʰimr̥tam̐ yád valmī́kas \

Line : 13  Pada: ao     yád valmīkavapā́m upakī́ryāgním ādʰatté \

Pada: ap     asyā́ evaínam ánabʰimr̥té 'dʰyā́dʰatte

Line : 14  Pada: aq     ráso vā́ eṣò 'syā́ údaiṣad yád valmī́kas \

Pada: ar     yád valmīkavapā́m upakī́ryāgním ādʰatté \

Line : 15  Pada: as     asyā́ evaínam̐ rásé 'dʰyā́dʰatte \

Pada: at     ū́rg vā́ eṣò 'syā́ údaiṣad yád valmī́kas \

Line : 16  Pada: au     yád valmīkavapā́m upakī́ryāgním ādʰatté \

Pada: av     asyā́ evaínam ūrj ádʰyā́dʰatte

Line : 17  Pada: aw     prajā́pater vā́ eṣá stáno yád valmī́kas \

Pada: ax     yád valmīkavapā́m upakī́ryāgním ādʰatté

Line : 18  Pada: ay     prajā́patir evā́smai stánam ápidadʰāti \

Pada: az     annā́dyam asmā ávarunddʰe \


Page: 91  
Line : 1  Pada: ba     ákṣudʰyatām̐ svā́nāṃ puraḥstʰātā́ bʰavati yá evám̐ véda \

Line : 2  Pada: bb     etā́vad vā́ amúṣyā ihá yajñíyam̐ yád ū́ṣās \

Pada: bc     yád ū́ṣān upakī́ryāgním ādʰatté \

Line : 3  Pada: bd     amúṣyā evaínam̐ yajñíyé 'dʰyā́dʰatte

Pada: be     ná vā́ ánūṣarihaḥ paśávo réto dadʰatte

Line : 4  Pada: bf     yád ū́ṣān upakī́ryāgním ādʰatté

Pada: bg     réta evaítád dadʰāti

Pada: bh     paśūnā́ṃ púṣṭyai prájātyai \

Line : 5  Pada: bi     eṣá vā́ agnír vaiśvānaró yád asā́ ādityáḥ

Pada: bj     sá yád ihā́sīt tásyaitád bʰásma yát síkatās \

Line : 6  Pada: bk     yát síkatā upakī́ryāgním ādʰatté

Pada: bl     svá evaínam̐ yónau své bʰásmann ā́dʰatte

Line : 7  Pada: bm     śitʰirā́ vā́ iyám ágra āsīt

Pada: bn     tā́ṃ prajā́patiḥ śárkarābʰir adr̥m̐hat \

Line : 8  Pada: bo     yáñ śárkarā upakī́ryāgním ādʰatté \

Pada: bp     imā́m evá tád dr̥m̐hati

Line : 9  Pada: bq     dʰŕ̥tyai

Pada: br     tád yátʰemā́ṃ prajā́patiḥ śárkarābʰir ádr̥m̐had evám asmin paśávo dr̥m̐hante yá evám̐ vidvā́ñ śárkarā upakī́ryāgním ādʰatté \

Line : 10  Pada: bs     índro vaí vr̥trā́ya vájraṃ prā́harat

Line : 11  Pada: bt     tásya yā́ viprúṣā ā́sam̐s tā́ḥ śarkarā abʰavan

Pada: bu     yáñ śárkarā upakī́ryāgním ādʰatté

Line : 12  Pada: bv     vájram evá sapátnāya bʰrā́tr̥vyāya práharati

Pada: bw     yáṃ dviṣyā́t tám tárhi mánasā dʰyāyet \

Line : 13  Pada: bx     vájram evā́smai práharati

Pada: by     str̥ṇutá evá

Pada: bz     purīṣī́ti vaí gr̥hamedʰínam āhuḥ

Line : 14  Pada: ca     púrīṣasya kʰálu vā́ etán nírūpam̐ yád ākʰukirís \

Pada: cb     yád ākʰukirím upakī́ryāgním ādʰatté

Line : 15  Pada: cc     purīṣī́ gr̥hamedʰī́ bʰavati //


Anuvaka: 4  
Line : 16  Pada: a     agním̐ vaí devā́ vibʰā́jaṃ nā́śaknuvan

Pada: b     yát prā́ñcam áharant sárvaḥ purò 'bʰavat \

Line : 17  Pada: c     yát pratyáñcam áharant sárvaḥ paścā́bʰavat

Pada: d     tám áśvena pūrvavā́hódavahan \

Pada: e     tád áśvasya pūrvavā́haḥ pūrvavāṭtvám

Line : 13  Pada: f     agnér vaí víbʰaktyā áśvo 'gnyādʰéye dīyate \

Pada: g     ávibʰakto vā́ etásyāgnír ánāhito yó 'śvam agnyādʰéye ná dádāti \

Page: 92  
Line : 1  Pada: h     átʰa yó 'śvam agnyādʰéye dádāti

Line : 2  Pada: i     víbʰaktyai

Pada: j     vibʰā́jyaivaínam ā́dʰatte

Pada: k     stómapurogavā vaí devā́ ásurān abʰyàjayan \

Line : 3  Pada: l     eṣá kʰálu stómo yád áśvas \

Pada: m     yád áśvaṃ purástān náyanti \

Pada: n     abʰíjitvai \

Line : 4  Pada: o     abʰijítyaivaínam ā́dʰatte

Pada: p     prajā́pater vaí cákṣur aśvayat

Pada: q     tásya yáḥ śvayátʰā ā́sīt só 'śvo 'bʰavat \

Line : 5  Pada: r     yád áśvaṃ purástān náyanti

Pada: s     yájamānāyaivá cákṣur dadʰāti

Line : 6  Pada: t     ná parā́ṅ avasr̥jyas \

Pada: u     yát parā́ñcam avasr̥jed yájamānaṃ cákṣur jahyāt \

Pada: v     andʰáḥ syāt

Line : 7  Pada: w     pratyavagŕ̥hyādʰéyas \

Pada: x     yájamānāyaivá cákṣuḥ pratyávāgrahīt \

Pada: y     ná padá ādʰéyas \

Line : 8  Pada: z     vāstavyàṃ kuryāt \

Pada: aa     rudrò 'sya paśū́n abʰimā́nukaḥ syāt

Pada: ab     pārśvatá itó vetó vādʰéyas \

Line : 9  Pada: ac     ná vāstavyàṃ karoti * \
      FN H, Bb. Ed (M1, M2): karóti. cf. 1.6.4:92.8

Pada: ad     ágʰātuko 'sya paśupátiḥ paśū́n bʰavati

Line : 10  Pada: ae     gāyatrī́m̐ vaí devā́ yajñám ácʰa prā́hiṇvan \

Pada: af     sā́ riktā́gacʰat

Pada: ag     tásyā agnís téjaḥ prā́yacʰat

Line : 11  Pada: ah     sò 'jò 'bʰavat \

Pada: ai     yád ajám agnyādʰéye dádāti

Pada: aj     téja evā́varunddʰe \

Pada: ak     agnī́dʰe déyas \

Line : 12  Pada: al     yajñamukʰám̐ vā́ agnī́t \

Pada: am     yajñamukʰénaivá yajñamukʰám̐ sámardʰayati

Pada: an     dʰenúṃ cānaḍvā́haṃ ca dádāti

Line : 13  Pada: ao     tát sárvam̐ váyó 'varunddʰe \

Pada: ap     etád vaí sárvam̐ váyo yád dʰenúś cānaḍvā́m̐ś ca \

Line : 14  Pada: aq     etaú vai yajñásya mātā́ ca pitā́ ca yád dʰenúś cānaḍvā́m̐ś ca \

Pada: ar     ā́jyaṃ ca páyaś ca dʰenvā́ḥ puroḍāśaś ca carúś cānaḍúhas

Line : 15  Pada: as     tád āhuḥ

Pada: at     kāmadúgʰām̐ vā́ eṣó 'varunddʰe yò 'gnyādʰéye dʰenúṃ cānaḍvā́haṃ ca dádātī́ti

Line : 16  Pada: au     tád yéṣāṃ paśūnā́ṃ bʰū́yiṣṭʰaṃ púṣṭiṃ kāmáyeta téṣāṃ dityauhī́m̐ váyaso dadyād dityavā́haṃ ca muṣkarám \

Line : 18  Pada: av     tán mitʰunáṃ paśūnā́ṃ púṣṭyai prájātyai

Pada: aw     vā́g vaí somakráyaṇī

Line : 19  Pada: ax     dityauhī́ váyasaḥ somakráyaṇī

Pada: ay     yád dityauhī́m̐ váyaso dádāti

Line : 20  Pada: az     vā́cam evā́varunddʰe

Pada: ba     cā́ru vadati yá evám̐ véda \

Pada: bb     upabárhaṇam̐ sárvasūtraṃ déyam \

Line : 21  Pada: bc     cʰándasām̐ vā́ etán nírūpam̐ yád upabárhaṇam̐ sárvasūtram \

Page: 93  
Line : 1  Pada: bd     yád upabárhaṇam̐ sárvasūtraṃ dádāti

Pada: be     cʰándām̐sy evā́varunddʰe

Pada: bf     paśávo vaí cʰándām̐si

Line : 2  Pada: bg     paśū́n evā́varunddʰe \

Pada: bh     ayajñiyó vaí amedʰyá āhanásyāj jā́yate puruṣakṣīráṃ dʰayati

Line : 3  Pada: bi     híraṇyaṃ dadāti \

Pada: bj     ātmā́nam evá téna punīte

Pada: bk     śatámānaṃ bʰavati

Line : 4  Pada: bl     śatā́yur vaí púruṣaḥ śatávīryas \

Pada: bm     ā́yur evá vīryàm āpnoti

Pada: bn     pū́rvayor havíṣor dvé trim̐śánmāne déye

Line : 5  Pada: bo     úttarasmim̐ś catvārim̐śánmānam \

Pada: bp     tád enam údagrahīt

Line : 6  Pada: bq     téna sá uttarám̐ vásīyāñ śréyān bʰavati \

Pada: br     ájāto vaí tā́vat púruṣo yā́vad agníṃ nā́dʰatté

Line : 7  Pada: bs     sá tárhy evá jāyate yárhy agním ādʰatté

Pada: bt     kṣaúme vásānā agním ā́dadʰīyātām \

Line : 8  Pada: bu     té adʰvaryáve déye

Pada: bv     úlbasya vā́ etán nírūpam̐ yát kṣaúmam

Pada: bw     úlbam evā́palumpete

Line : 9  Pada: bx     híraṇyam̐ suvarṇam upā́syāgnír ādʰéyas \

Pada: by     híraṇyam̐ vā́ agnés téjaḥ

Line : 10  Pada: bz     sátejasam evaínam ā́dʰatte

Pada: ca     tán ná nírastavaí

Pada: cb     yatʰā́nuhitaṃ nirásyed eváṃ tát \

Pada: cc     yán nirásyed anudʰyāyī́ kṣódʰukaḥ syāt

Line : 11  Pada: cd     tán ná nírastavaí \

Pada: ce     ánanudʰyāyy ákṣodʰuko bʰavati //


Anuvaka: 5  
Line : 13  Pada: a     yó vā́ asyāyáṃ manuṣyò * 'gnír etám upā́sīnó 'nnam atti * \
      FN emended. Ed.: manuṣò
      FN emended. Ed.: upā́sītónnamati. M2: upā́sīnónna- . M1: upāsīnonna-. Bb: úpā́sītónna-. Amano, p.223, n.477

Line : 13  Pada: b     etám upā́sīnaḥ prajā́m̐ vindate \

Line : 14  Pada: c     etám upā́sīnaṃ paśávā úpatiṣṭʰante

Pada: d     yád etám abʰāgadʰeyám utsādáyeta tásmā ā́vr̥śceta \

Line : 15  Pada: e     anudʰyāyī́ kṣódʰukaḥ syāt

Pada: f     tád yé vánaspátaya āraṇyā́ ādyàṃ pʰálaṃ bʰū́yiṣṭʰaṃ pacyánte tásya parṇā́bʰyām̐ yavamáyaś cāpūpó vrīhimáyaś ca saṃgŕ̥hyopā́syādʰéyas

Line : 17  Pada: g     tád enaṃ dvayáṃ bʰāgadʰéyam abʰyutsādayā́m akar grāmyáṃ cāraṇyáṃ ca

Line : 18  Pada: h     téna tásmai nā́vr̥ścate \

Pada: i     ánanudʰyāyy ákṣodʰuko bʰavati

Line : 19  Pada: j     yávo vaí pū́rva r̥tumukʰé pacyate \

Pada: k     itáḥ kʰálu vā́ etáṃ prā́ñcam úddʰaranti

Page: 94  
Line : 1  Pada: l     tásmād yavamáyaḥ paścópāsyó vrīhimáyaḥ purás

Pada: m     tád yásyértsed yavamáyam evá tásya paścópā́syed vrīhimáyaṃ puráḥ

Line : 2  Pada: n     prajā́pater vā́ etaú stánau

Line : 3  Pada: o     yajñám asya devā́ upajī́vanti varṣáṃ manuṣyā̀s \

Pada: p     annā́dyam asmā ávarunddʰe \

Line : 4  Pada: q     ákṣudʰyatām̐ svā́nāṃ puraḥstʰātā́ bʰavati yá evám̐ véda \

Pada: r     etád dʰa sma vā́ āha keśī́ sā́tyakāmiḥ keśínaṃ dārbʰyám

Line : 5  Pada: s     annādáṃ janátāyai \

Pada: t     evám iva vayám etásmā agnyādʰéyé 'nnam ávārudʰma yátʰaiṣó 'nnam átti

Line : 6  Pada: u     tád āhuḥ

Line : 7  Pada: v     sárvam̐ vā́vaításyedám ánnam \

Pada: w     yájamānaṃ tv èvā́syaitád āsánn ápidadʰāti

Pada: x     tád evám̐ véditor ná tv èváṃ kártavā́ íti

Line : 8  Pada: y     trír vā́ idáṃ prajā́patiḥ satyám̐ vyā́harat //

Line : 9  Pada: z     bʰū́r bʰúvaḥ svàḥ // íti \

Pada: aa     idám̐ vā́vá bʰū́r idáṃ bʰuvó 'dáḥ svàr \

Pada: ab     tád yó brāhmaṇá āṅgirasáḥ syā́t tásyā́dadʰyāt \

Line : 10  Pada: ac     bʰū́r bʰúvas \

Pada: ad     áṅgirasāṃ tvā devā́nām̐ vraténā́dadʰā íti paścā́

Line : 11  Pada: ae     bʰúvaḥ svàr íti purás \

Pada: af     dvíḥ paścā́ dvíḥ purás

Pada: ag     tád dvedʰā́ yajñáḥ satyé pratyáṣṭʰād dvedʰā́ yajñápatis \

Line : 12  Pada: ah     átʰa yó brāhmaṇó vaiśvānaráḥ syā́t tásyā́dadʰyāt \

Pada: ai     bʰū́r bʰúvas \

Line : 13  Pada: aj     agnéṣ ṭvā devásya vraténā́dadʰā íti paścā́

Pada: ak     bʰúvaḥ svàr íti purás \

Pada: al     dviḥ paścā́ dvíḥ purás

Line : 14  Pada: am     tád dvedʰā́ yajñáḥ satyé pratyáṣṭʰād dvedʰā́ yajñápatis \

Pada: an     átʰa rājanyàsyā́dadʰyāt \

Line : 15  Pada: ao     bʰū́r bʰúvas \

Pada: ap     índrasya tvā marútvato vraténā́dadʰā íti paścā́

Pada: aq     bʰúvaḥ svàr íti purás \

Line : 16  Pada: ar     dvíḥ paścā́ dvíḥ purás

Pada: as     tád dvedʰā́ yajñáḥ satyé pratyáṣṭʰād dvedʰā́ yajñápatis \

Line : 17  Pada: at     aindró vaí rājanyò devátayā mārutī́ víṭ \

Pada: au     viśā́ kʰálu vaí rājanyò bʰadró bʰavati

Line : 18  Pada: av     víśam asmā ávarunddʰe \

Pada: aw     átʰa vaíśyasyā́dadʰyāt \

Pada: ax     bʰū́r bʰúvas \

Line : 19  Pada: ay     mánoṣ ṭvā grāmaṇyò vraténā́dadʰā íti paścā

Pada: az     bʰúvaḥ svàr íti purás \

Pada: ba     dvíḥ paścā́ dvíḥ purás

Line : 20  Pada: bb     tád dvedʰā́ yajñáḥ satyé pratyáṣṭʰād dvedʰā́ yajñápatis \

Pada: bc     grā́maṇītʰyena kʰálu vaí vaíśyo bʰadró bʰavati

Page: 95  
Line : 1  Pada: bd     grā́maṇītʰyam asmā ávarunddʰe \

Pada: be     agnír vaí sr̥ṣṭá úlbam apalúmpaṃ nā́śaknot

Line : 2  Pada: bf     tásya prajā́patir āgneyapāvamānī́bʰir úlbam ápālumpat \

Line : 3  Pada: bg     yád āgneyapāvamānī́bʰir ā́śvattʰīḥ samídʰa ā́dadʰāti \

Pada: bh     úlbam evā́syā́palumpati

Line : 4  Pada: bi     punā́ty enam \

Pada: bj     yátʰā śiśuṃ mātā́ réḍʰi vatsám̐ vā gaúr evám enam̐ reḍʰi \

Pada: bk     agnér vaí sr̥ṣṭásya téjā údadīpyata

Line : 5  Pada: bl     tád aśvattʰáṃ prā́viśat \

Pada: bm     yád āśvattʰīḥ samídʰa ādádʰāti

Line : 6  Pada: bn     téja evā́varunddʰe \

Pada: bo     agnír vaí sr̥ṣṭó bibibābʰávann atiṣṭʰad ásamidʰyamānaḥ

Line : 7  Pada: bp     sá prajā́patir abibʰet \

Pada: bq     mā́m̐ vā́vā́yám̐ him̐siṣyatī́ti

Pada: br     tám̐ śamyā́ sámaindʰat

Line : 8  Pada: bs     tám aśamayat

Pada: bt     táñ śamyā́ḥ śamītvám \

Pada: bu     yáñ cʰamīmáyīḥ samídʰa ādádʰāti

Line : 9  Pada: bv     sám enam inddʰe

Pada: bw     śamáyaty evá

Pada: bx     sá śám̐ yájamānāya bʰavati śáṃ paśúbʰyas \

Pada: by     devā́ yátrórjam̐ vyábʰajanta táta udumbárā údatiṣṭʰat \

Line : 10  Pada: bz     yád aúdumbarīm̐ samídʰam ādádʰāti \

Line : 11  Pada: ca     ū́rjam evā́varunddʰe //


Anuvaka: 6  
Line : 12  Pada: a     vípriyo vā́ eṣá paśúbʰir ā́dʰīyate \

Pada: b     eṣá hí rudró yád agnís

Pada: c     tád vācayét \

Line : 13  Pada: d     gʰarmáḥ śiras

Pada: e     tád ayám agníḥ sáṃpriyaḥ paśúbʰir bʰava

Pada: f     púrīṣam asī́ti

Pada: g     tád enam̐ sáṃpriyaṃ paśúbʰiḥ purīṣiṇam akar

Line : 14  Pada: h     yát te śukra śukráṃ jyotís téna rucā́ rúcam aśītʰā íti

Line : 15  Pada: i     rúcam evaínam ajīgamat \

Pada: j     eṣá vā́ agnír vaiśvānaró yád asā́ ādityás \

Line : 16  Pada: k     yád uttarató háred eṣó 'taḥ syā́t \

Pada: l     ayám itó jī́vantam evaínaṃ prádahet

Pada: m     sá dakṣiṇatá evá hāryàḥ

Line : 17  Pada: n     sá yadā́ samayādʰváṃ gácʰed átʰa yájamāno váraṃ dadyāt

Line : 18  Pada: o     tád virā́jaṃ madʰyató 'dʰita

Pada: p     virā́ḍ evā́syāgnī́n vídadʰate

Pada: q     paśávo vaí virā́ṭ

Page: 96  
Line : 1  Pada: r     paśū́n vā́ etán madʰyató 'dʰita \

Pada: s     ásr̥ṣṭo vā́ agnír āsīt \

Pada: t     átʰa prajā́patiḥ prajā́ asr̥jata

Line : 2  Pada: u     tā́ andʰé tamasīmā́ṃl lokān anuvyànaśyan \

Pada: v     sò 'śocat

Pada: w     sò 'tapyata

Line : 3  Pada: x     táto 'gnír asr̥jyata

Pada: y     tám agním̐ sr̥ṣṭám adʰó vyàdadʰāt

Pada: z     tám̐ yā́ asmíṃl loká ā́sam̐s tā́ abʰisamā́vartanta

Line : 4  Pada: aa     táṃ kulpʰadagʰnám údagr̥hṇāt

Pada: ab     tám̐ yā́ úttarasmiṃl loká ā́sam̐s tā́ abʰisamā́vartanta

Line : 5  Pada: ac     táṃ jānudagʰnáṃ táṃ nābʰidagʰnáṃ tám am̐sadagʰnáṃ táṃ karṇadagʰnám údagr̥hṇāt

Line : 6  Pada: ad     tám̐ yā́ úttarasmiṃl loká ā́sam̐s tā́ abʰisamā́vartanta

Line : 7  Pada: ae     táṃ karṇadagʰnáṃ nā́tyudgr̥hyas \

Pada: af     yát karṇadagʰnám atyudgr̥hṇīyā́d yájamāno várṣiṣṭʰaḥ paśūnā́ṃ yájamānam upáriṣṭād agnír abʰyávadahet

Line : 8  Pada: ag     tád āhuḥ

Pada: ah     katʰám adyaítám bráhmaṇā́hitaṃ prácyāvayeyuḥ

Line : 9  Pada: ai     śitʰirám̐ vā́vaínam etád akaḥ

Pada: aj     párainam̐ vapatī́ti

Line : 10  Pada: ak     tám ánidʰāyaivā́tʰa jānudagʰnám údgr̥hṇīyād átʰa nābʰidagʰnám átʰām̐sadagʰnám \

Line : 11  Pada: al     tád yátʰaivá prajā́patiṃ prajā́ ebʰyó lokébʰyo 'bʰisamā́vartantaivám evá yájamānaṃ paśáva ebʰyó lokébʰyo 'bʰisamā́vartante yá evám̐ vidvā́n agním ādʰatté \

Line : 13  Pada: am     agnínā vaí devátayā víṣṇunā yajñéna devā́ ásurān pravlī́ya vájreṇānvávāsr̥jan

Line : 14  Pada: an     yáḥ sapátnavān bʰrā́tr̥vyavān vā syā́t tásya ratʰacakráṃ trír anupárivartayeyus

Line : 15  Pada: ao     tád yátʰaivá devā́ ásurān agnínā devátayā víṣṇunā yajñena pravlī́ya vájreṇānvavā́sr̥jann evám evá yájamānaḥ sapátnaṃ bʰrātr̥vyam agnínā devátayā víṣṇunā yajñena pravlī́ya vájreṇānvávasr̥jati yá evám̐ vidvā́n agním ādʰatté //


Anuvaka: 7  
Line : 19  Pada: a     eṣá vaí prajā́patī rūpéṇa yát pūrṇā́ srúk \

Pada: b     yát pūrṇā́m̐ srúcaṃ juhóti

Line : 20  Pada: c     prajā́patim evā́pnoti

Pada: d     saptá te agne samídʰaḥ saptá jihvā́ íti \

Pada: e     etā́vatīr vā́ agnés tanvàḥ ṣoḍʰā́ saptásapta

Line : 21  Pada: f     yó vā́ asyaitā́ agním ādádʰāno vitarṣáyati ví ha tr̥ṣyati

Page: 97  
Line : 1  Pada: g     tā́ evā́sya tarpayati

Pada: h     śamīmáyīs tisráḥ samídʰā ā́dadʰāti gʰr̥tānvaktā́ gʰr̥tastomyā́bʰiḥ

Line : 2  Pada: i     sám enam inddʰe

Pada: j     śamáyaty evá

Line : 3  Pada: k     sá śám̐ yájamānāya bʰávati sáṃ paśúbʰyas \

Pada: l     yé vā́ eṣú triṣú lokéṣv agnáyas té samā́gaccʰanti \

Line : 4  Pada: m     asyá dráviṇam ā́dadāmahe * \
      FN ā́dadāmahai is also possible

Pada: n     áti no 'kramīt \

Pada: o     havyavā́ḍ bʰavatī́ti táj juhuyāt //

Line : 6  Pada: p     yé agnáyo divó yé pr̥tʰivyā́ḥ samāgácʰantī́ṣam ū́rjam̐ vásānāḥ /

Line : 7  Pada: q     té asmā́ agnáye dráviṇaṃ dattvéṣṭā́ḥ prītā́ āhutibʰā́jo bʰūtvā́

Line : 8  Pada: r     yatʰālokáṃ púnar ástaṃ páreta // svā́héti

Line : 9  Pada: s     tád imám evá dráviṇavantaṃ kr̥tvéṣṭā́ḥ prītā́ āhutibʰā́jo bʰūtvā́ yatʰālokáṃ púnar ástaṃ párāyanti

Line : 10  Pada: t     tád vācayet \

Pada: u     gʰarmáḥ śíras

Pada: v     tád ayám agníḥ sáṃpriyaḥ paśúbʰir bʰava

Line : 11  Pada: w     púrīṣam asī́ti

Pada: x     tád enam̐ sáṃpriyaṃ paśúbʰiḥ purīṣíṇam akar

Line : 12  Pada: y     yát te śukra śukráṃ jyótiḥ śukráṃ dʰā́mā́jasráṃ téna tvā́dadʰā íti

Pada: z     sátejasam evaínam ā́dʰatte //

Line : 14  Pada: aa     íḍāyās tvā padé vayáṃ nā́bʰā pr̥tʰivyā́ ádʰi /

Line : 15  Pada: ab     jā́tavedo nídʰīmahy ágne havyā́ya vóḍʰave //

Line : 16  Pada: ac     íti

Pada: ad     havyāvā́ham evaínam akar

Pada: ae     agnér vaí sr̥ṣṭásya paśávo 'kṣyā̀ avakśā́ya prā́patan \

Line : 17  Pada: af     sá prajā́patir vāravantī́yam asr̥jata

Pada: ag     tā́n avārayata \

Pada: ah     etárhi kʰálu vā́ eṣá sr̥jyate yárhy ādʰīyáte

Line : 18  Pada: ai     tád yátʰaitásmāt sr̥ṣṭā́t paśávaḥ prā́patann evám asmād ā́hitātpaśávaḥ prápatanti \

Page: 98  
Line : 1  Pada: aj     eṣá hí rudró yád agnís

Pada: ak     tád yá evám̐ vidvā́n vāravantī́yaṃ gā́yate paśū́n evá vārayate

Line : 2  Pada: al     vāravantī́yam̐ vaí sr̥ṣṭvā́ prajā́patir yáṃ kā́mam ákāmayata tám ārdʰnot

Line : 3  Pada: am     tám evá kā́mam r̥dʰnoti yájamāno yáṃ kā́maṃ kamáyamāno 'gním ādʰatté yá evám̐ vidvā́n vāravantī́yaṃ gā́yate \

Line : 4  Pada: an     agnír vaí kravyā́d viśvadāvyà imā́ṃl lokā́n adahat

Line : 5  Pada: ao     táṃ prajā́patir vāravantī́yaṃ gā́yamāno varaṇaṃ bíbʰrat prátyait

Line : 6  Pada: ap     tám aśamayat \

Pada: aq     yád evā́sya kravyā́d yád viśvadāvyàṃ táñ śamayati yá evám̐ vidvā́n vāravantī́yaṃ gā́yate

Line : 7  Pada: ar     tásmād varaṇó yajñāvacaráḥ syāt \

Pada: as     ná tv ènena juhuyāt \

Line : 8  Pada: at     yád vā́ idám̐ sád yád bʰūtám̐ yád bʰávad yád bʰaviṣyád yád imé antarā́ dyā́vāpr̥tʰivī́ tád vāmadevyáṃ tád evā́varunddʰe yá evám̐ vidvā́n vāmadevyáṃ gā́yate

Line : 10  Pada: au     bráhmaṇo vā́ eṣá ráso yád yajñāyajñíyam \

Pada: av     yád yajñāyajñíyaṃ gā́yate

Line : 11  Pada: aw     bráhmaṇy evá rásaṃ dadʰāti //


Anuvaka: 8  
Line : 12  Pada: a     agním̐ vaí sr̥ṣṭáṃ prajā́patiḥ pávamānenā́grā úpādʰamat \

Pada: b     yát pávamānāya nirvápati \

Line : 13  Pada: c     upaivaínaṃ tád dʰamati

Pada: d     yát pāvakā́ya

Pada: e     punā́ty enam \

Pada: f     yáñ śúcaye

Pada: g     yád evā́syā́pūtaṃ tád eténa punāti

Line : 14  Pada: h     yát pávamānāya nirvápati

Pada: i     paśávo vaí pávaṃanaḥ

Line : 15  Pada: j     paśū́n evā́varunddʰe

Pada: k     yát pāvakā́ya \

Pada: l     ánnam̐ vaí pāvakám

Pada: m     ánnam evā́varunddʰe

Pada: n     yáñ śúcaye

Line : 16  Pada: o     pūtá evā́smin rúcaṃ dadʰāti

Pada: p     yáṃ kāmáyeta \ apataráṃ pā́pīyānt syād íti tásyaikamekam̐ havī́m̐si nírvapet

Line : 17  Pada: q     tád enam ápāgrahīt

Pada: r     téna sò 'pataráṃ pā́pīyān bʰavati \

Line : 18  Pada: s     átʰa yáṃ kāmáyeta ná vásīyānt syā́n ná pā́pīyān íti tásya sárvāṇi sākám̐ havī́m̐ṣi nírvapet

Line : 19  Pada: t     tád enam̐ sám̐ruṇaddʰi

Pada: u     téna sá ná vásīyān ná pā́pīyān bʰavati \

Line : 20  Pada: v     átʰa yáṃ kāmáyed uttarám̐ vásīyāñ śréyānt syād íti tásyāgnáye pávamānāya nirúpyā́tʰa pāvakā́ya ca śucaye cóttare havíṣī samānábarhiṣi nírvapet

Page: 99  
Line : 1  Pada: w     tád enam údagrahīt

Pada: x     téna sá uttarám̐ vásīyāñ śréyān bʰavati \

Line : 2  Pada: y     átʰa yásya triṣṭúbʰau vānuṣṭúbʰau vā jágatī vā sam̐yājyè syā́tām áti gāyatráṃ krā́med arvā́k cʰándobʰyó 'vapadyeta

Line : 3  Pada: z     tád yásyértsed gāyatryā̀ evá tásya sam̐yājyè kuryāt \

Line : 4  Pada: aa     gāyatró hy àgnír gāyatrácʰandāḥ

Pada: ab     svá evaínam̐ yónau své cʰándasi prátiṣṭʰāpayati \

Line : 5  Pada: ac     āgnāvaiṣṇavám ékādaśakapālaṃ nírvapet \

Line : 6  Pada: ad     agnír vaí sárvā devátās \

Pada: ae     víṣṇur yajñás \

Pada: af     devátāś caivá yajñáṃ cā́labdʰa

Line : 7  Pada: ag     víṣṇave śipiviṣṭā́ya tryùddʰau gʰr̥té carúṃ nírvapet \

Pada: ah     yád víṣṇave

Pada: ai     víṣṇur vaí yajñás \

Line : 8  Pada: aj     yajñám evā́labdʰa

Pada: ak     yáñ śipiviṣṭám \

Pada: al     paśavo vaí śipiviṣṭám \

Pada: am     paśū́n evā́varunddʰe

Line : 9  Pada: an     yát tryùddʰau

Pada: ao     tráyo vā́ imé lokā́s \

Pada: ap     imā́n evá lokā́n āpnoti

Pada: aq     yád gʰr̥té

Line : 10  Pada: ar     téjo vaí gʰr̥tám \

Pada: as     téja evā́varunddʰe \

Pada: at     ādityáṃ gʰr̥té carúṃ nírvapet paśúkāmas \

Line : 11  Pada: au     dʰenvā́ vaí gʰr̥táṃ páyo 'naḍúhas taṇḍulā́s

Pada: av     tán mitʰunám \

Pada: aw     paśūnā́ṃ púṣṭyai prájātyai \

Line : 12  Pada: ax     agnīṣomī́yaṃ puroḍā́śaṃ dvitī́yam anunírvapet

Pada: ay     tád bʰū́yo havyám upā́gāt \

Line : 13  Pada: az     nó asyānyá īśe

Pada: ba     yárhi vā́ etáṃ purā́ brāhmaṇā́ nirávapam̐s tarhy eṣāṃ ná káś canaíśa

Line : 14  Pada: bb     ná hí vā́ etám idā́nīṃ nirvápanti \

Pada: bc     átʰaiṣām̐ sárva īśe

Pada: bd     yád āgneyás

Line : 15  Pada: be     téjo vā́ agnís

Pada: bf     téja evā́varunddʰe

Pada: bg     yát saumyáḥ

Pada: bh     sómo vaí śukró brahmavarcasám \

Line : 16  Pada: bi     brahmavarcasám evā́varunddʰe

Pada: bj     tád yò 'sā́ ādityó gʰr̥té carús táṃ brahmáṇe párihareyus

Line : 17  Pada: bk     táṃ catvā́raḥ prā́śnīyus

Pada: bl     tébʰyaḥ samānó váro déyas \

Pada: bm     catúr vā́ idám ágre mitʰunám aúdyata \

Page: 100  
Line : 1  Pada: bn     ékaś caíkā ca

Pada: bo     dvaú ca dvé ca

Pada: bp     tráyaś ca tisráś ca

Pada: bq     catvā́raś ca cátasraś ca

Line : 2  Pada: br     tán mitʰunám \

Pada: bs     paśūnā́ṃ púṣṭyai prájātyai //


Anuvaka: 9  
Line : 3  Pada: a     pʰalgunīpūrṇamāsé brāhmaṇásyā́dadʰyāt

Pada: b     pʰalgunīpūrṇamāsó vā́ r̥tūnā́ṃ múkʰam

Line : 4  Pada: c     agnír devátānām \

Pada: d     brāhmaṇó manuṣyā̀ṇām \

Pada: e     grīṣmé rājanyàsyā́dadʰyāt \

Line : 5  Pada: f     grīṣmé vā́ índro vr̥trám ahan

Pada: g     vr̥tráṃ kʰálu vaí rājanyò búbʰūṣan jigʰām̐sati

Line : 6  Pada: h     śarádi vaíśyasyā́dadʰyāt \

Pada: i     ánnam̐ vaí śarát \

Pada: j     ánnena vaíśyo bʰadró bʰavati \

Pada: k     annā́dyam asmā ávarunddʰe

Line : 7  Pada: l     yády anyásminn r̥tā́ ādádʰīta yádi vā́ asmai sá éka r̥túḥ śiváḥ syā́d átʰāsmā ítaré 'śivā duryoṇā́ bʰaveyus

Line : 8  Pada: m     tád yásyértset pʰalgunīpūrṇamāsá evá tásyā́dadʰyāt

Line : 9  Pada: n     tád asmai sárva r̥távaḥ śivā́ bʰavanti

Pada: o     sárva enam r̥távo jinvanti

Line : 10  Pada: p     sam̐vatsarásya vā́ etád āsyàm̐ yát pʰalgunīpūrṇamāsyàm áhar

Line : 11  Pada: q     yát pʰalgunīpūrṇamāsyàm áhar ādadʰyā́t sam̐vatsarásyainam āsánn ápidadʰyāt \

Line : 12  Pada: r     dvyahé vā puraíkāhé vādʰéyas \

Pada: s     tád dvitī́yasya r̥tór abʰigr̥hṇā́ti

Pada: t     naínam̐ sam̐vatsarásyāsánn ápidadʰāti

Line : 13  Pada: u     tád yád dvitī́yasya r̥tór abʰigr̥hṇā́ti dvitī́yam evá sapátnasya bʰrā́tr̥vyasyendriyáṃ paśū́n kṣétram̐ vr̥ñjāná eti

Line : 14  Pada: v     kŕ̥ttikāsu brāhmaṇásyā́dadʰyāt \

Line : 15  Pada: w     āgneyī́ḥ kŕ̥ttikās \

Pada: x     āgneyó brāhmaṇáḥ

Pada: y     svá evaínam̐ yónau své 'hann ā́dʰatte

Line : 16  Pada: z     prajā́pater vā́ etáñ śiro yát kŕ̥ttikās \

Pada: aa     agnír āsyám \

Line : 17  Pada: ab     śīrṣṇā́nnam adyate \

Pada: ac     annā́dyam asmā ávarunddʰe

Pada: ad     saptá kŕ̥ttikāḥ

Pada: ae     saptá śīrṣán prāṇā́ḥ

Line : 18  Pada: af     prāṇā́n asmin dadʰāti

Pada: ag     rohiṇyā́ṃ paśukāmasyā́dadʰyāt

Pada: ah     sómasya vā́ etán nákṣatram̐ yád rohiṇī́

Line : 19  Pada: ai     sómo retodʰā́s \

Pada: aj     réto 'smin dadʰāti \

Pada: ak     r̥kṣā́ vā́ iyám ágra āsīt

Line : 20  Pada: al     tásyāṃ devā́ rohiṇyā́m̐ vīrúdʰo 'rohayan \

Pada: am     tád yátʰemā́ asyā́m̐ vīrúdʰo rūḍʰā́ evám asmin paśávo rohanti yá evam̐ vidvā́n rohiṇyā́m agním ādʰatté

Line : 22  Pada: an     rohiṇyā́m̐ svargákāmasyā́dadʰyāt \

Pada: ao     rohiṇyā́m̐ vaí devā́ḥ svàr āyan \

Page: 101  
Line : 1  Pada: ap     svàr evaíti

Pada: aq     kālakāñjā́ vā́ ásurā íṣṭakā acinvata

Pada: ar     dívam ā́rokṣyāmā íti

Line : 2  Pada: as     tā́n índro brāhmaṇó bruvāṇá úpait

Pada: at     sá etā́m íṣṭakām ápy úpādʰatta

Line : 3  Pada: au     pratʰamā́ iva dívam ā́kramanta \

Pada: av     átʰa sá tā́m ā́br̥hat

Pada: aw     té 'surāḥ pā́pīyām̐so bʰávantó 'pābʰram̐śanta

Line : 4  Pada: ax     yā́ uttamā́ ā́stāṃ taú yamaśvā́ ábʰavatām \

Line : 5  Pada: ay     yé 'dʰare tá ūrṇāvā́bʰayas \

Pada: az     yā́ṃ tā́m íṣṭakām ā́br̥hat sā́ citrā́bʰavat \

Pada: ba     yáḥ sapátnavān bʰrā́tr̥vyavān vā syā́t sá citrā́yām agním ā́dadʰīta

Line : 6  Pada: bb     tád yátʰaitásyām ā́vr̥ḍʰāyām ásurāḥ pā́pīyām̐so bʰávanto 'pābʰram̐śantaivám asya sapátno bʰrā́tr̥vyaḥ pā́pīyān bʰávann ápabʰram̐śate yá evám̐ vidvā́m̐ś citrā́yām agním ādʰatté

Line : 9  Pada: bc     yáḥ kāmáyeta bʰagy ànnādáḥ syām íti sá pū́rvāsu pʰálgunīṣv agním ā́dadʰīta

Line : 10  Pada: bd     bʰágasya vā́ etád áhar yát pū́rvāḥ pʰálgunīs \

Pada: be     bʰagy ànnādó bʰavati \

Line : 11  Pada: bf     átʰa yáḥ kāmáyeta dánakāmā me prajā́ḥ syur íti sá úttarāsu pʰálgunīṣv agním ā́dadʰīta \

Line : 12  Pada: bg     aryamṇó vā́ etád áhar yád úttarāḥ pʰálgunīs \

Pada: bh     dā́nam aryamā́

Line : 13  Pada: bi     dā́nakāmā asmai prajā́ bʰavanti

Pada: bj     tā́su rājanyàsyādadʰyāt \

Pada: bk     dā́nam̐ hy èṣá prajā́nām upajī́vati

Line : 14  Pada: bl     dā́nam aryamā́

Pada: bm     dā́nakāmā asmai prajā́ bʰavanti

Line : 15  Pada: bn     prajā́pater vā́ etaú stánau yát paurṇamāsī́ cāmāvāsyā̀ ca

Pada: bo     yát paurṇamāsyā̀m̐ vāmāvāsyā̀yām̐ vāgním ādʰatté

Line : 16  Pada: bp     prajā́patim evá práttaṃ duhe

Pada: bq     devā́nām̐ vā́ eté sadohavirdʰāné yát paurṇamāsī́ cāmāvāsyā̀ ca

Line : 17  Pada: br     yát paurṇamāsyā̀m̐ vāmāvāsyā̀yām̐ vāgním ādʰatté \

Line : 18  Pada: bs     ubʰé puṇyāhé ubʰé yajñíye //


Anuvaka: 10  
Page: 102  
Line : 1  Pada: a     ná purā́ sū́ryasyódetor mántʰitavaí \

Pada: b     asuryò vídevā ā́dʰīyate \

Pada: c     udyátsu raśmíṣu mátʰyas

Line : 2  Pada: d     tát sádevaḥ séndra ubʰáyor áhno rūpá ā́dʰīyate

Pada: e     cáturvim̐śatyāṃ prakraméṣv ādʰéyas \

Line : 3  Pada: f     cáturvim̐śatyakṣarā vaí gāyatrī́

Pada: g     gāyatrám agnéś cʰándaḥ

Line : 4  Pada: h     svá evaínam̐ yónau své cʰándasy ā́dʰatte

Pada: i     tád yásyértsed áparimita evá tásyā́dadʰyāt

Line : 5  Pada: j     kṣeṣṇú vaí párimitam

Pada: k     áparimitam evā́smai jī́vanam ávarunddʰe

Line : 6  Pada: l     agnír vaí sr̥ṣṭáḥ prajā́pater ádʰy údakrāmat

Pada: m     sá prajā́patir abibʰet \

Pada: n     adá evā́sā́ ábʰūd idám ahám íti

Line : 7  Pada: o     tásminn anuniṣkrámyājuhot \

Pada: p     etárhi kʰálu vā́ eṣá sr̥jyate yárhy ādʰīyáte

Line : 8  Pada: q     tád āhus \

Pada: r     amṇá evā́nudrútyā́tʰāgnihotrám̐ hotavyàm íti

Pada: s     tán naíváṃ kártavaí \

Line : 9  Pada: t     áyataṃ tát kuṇḍyāgrī́yaṃ tád yajñásya kriyate

Pada: u     yád yóneḥ páram ávaraṃ kuryā́d áprajaniṣṇuḥ syāt \

Line : 10  Pada: v     havī́m̐ṣy evá pū́rvāṇi nirúpyā́tʰa sāyám agnihotráṃ juhuyāt //

Line : 11  Pada: w     agnír jyótir jyótir agníḥ svā́hā // íti

Pada: x     tát sāyáṃ jyótiṣā réto madʰyato dadʰāti //

Line : 12  Pada: y     sū́ryo jyótir jyótiḥ sū́ryaḥ svā́hā // íti prā́tas //

Line : 13  Pada: z     tát sāyáṃ jyótiṣā réto madʰyató hitáṃ // prātáḥ prajanayā́m akar

Pada: aa     devā́ś ca vā́ ásurāś ca sám̐yattā ā́san \

Line : 14  Pada: ab     átʰéndro 'gním ā́dʰatta

Pada: ac     té devā́ abibʰayus \

Line : 15  Pada: ad     adá evā́sā́ agníṃ gopāyámāno 'gnihotráṃ gopāyámāno bʰaviṣyáti

Line : 16  Pada: ae     ná nā úpaiṣyati \

Pada: af     abʰí no jeṣyantī́ti

Pada: ag     tè 'bruvan

Pada: ah     yád evá tváṃ kíṃca karávo yád dʰánā yáj jinā́ yád vindā́sai tát te 'gnihotráṃ kurmas \

Line : 17  Pada: ai     átʰehī́ti

Pada: aj     sá vā́ aít

Line : 18  Pada: ak     tásmād rājanyàsyāgnihotrám ahotavyàm \

Pada: al     yád dʰy èvaíṣá kíṃca karóti yád dʰánti yáj jinā́ti yád vindáte yád enam̐ víśa upatíṣṭʰante tád rājanyàsyāgnihotrám̐ hotavyàm \


Page: 103  
Line : 1  Pada: am     rājanyàsyāgnihotrā́3n ná hotavyā́3m íti mīmām̐sante

Pada: an     yád dʰutvā́ ná juhuyā́d ví yajñáṃ cʰindyā́j jīyéta vā prá vā mīyeta

Line : 2  Pada: ao     paurṇamāsī́m amāvāsyā̀m̐ vā práti hotavyàm

Line : 3  Pada: ap     átʰo agnyupastʰā́nam̐ vā cayitavyás

Line : 4  Pada: aq     ténāsya darśapūrṇamāsaú sáṃtatā ávicʰinnau bʰavataḥ //


Anuvaka: 11  
Line : 5  Pada: a     yáṃ kāmáyeta paśumā́nt syād íti yó bahupuṣṭás tásya gr̥hā́d agním ā́hareyus \

Line : 6  Pada: b     yátʰā vā́ etám̐ sr̥jyámānaṃ paśávo 'nvásr̥jyantaivám enam āhriyámāṇaṃ paśávo 'nvā́yanti \

Line : 7  Pada: c     eṣá hí rudró yád agnís \

Pada: d     átʰa yáṃ kāmáyeta \ annādáḥ syād íti tásya bʰráṣṭrād dakṣiṇāgním ā́hareyus \

Line : 8  Pada: e     eṣá vā́ agnīnā́m annādás \

Pada: f     annakáraṇaṃ bʰráṣṭram

Page: 10  

Line : 9  Pada: g     annā́dyam asmā ávarunddʰe


Page: 103  
Line : 9  Pada: h     tád āhus \

Pada: i     yátʰā vr̥ṣaló nijáḥ púklakaś cíkitsed evám̐ sá íti

Line : 10  Pada: j     sá mátʰya evá

Pada: k     sá śám̐ yájamānāya bʰávati śáṃ paśubʰyas \

Line : 11  Pada: l     yáḥ sómenā́yakṣyamāṇo 'gním ādádʰīta ná purā́ sam̐vatsarā́d dʰávīm̐ṣi nírvapet \

Line : 12  Pada: m     rudrò 'sya paśū́n abʰimā́nukaḥ syāt \

Pada: n     eté vaí paśávo yád vrīháyaś ca yávāś ca

Line : 13  Pada: o     téṣāṃ cátuḥśarāvam odanáṃ paktvā́ brāhmaṇebʰyo jīvátaṇḍulam ivópaharet

Line : 14  Pada: p     tád yā́bʰyo devátābʰyo 'gním ādʰatté yát tā́bʰyo ná juhuyā́t tā́bʰyā ā́vr̥śceta \

Line : 15  Pada: q     anudʰyāyī́ kṣódʰukaḥ syāt

Pada: r     tā́bʰyā ā́jyasya hotavyàm \

Line : 16  Pada: s     téna tā́bʰyo nā́vr̥ścate \

Pada: t     ánanudʰyāyy ákṣodʰuko bʰavati

Pada: u     sam̐vatsaré havī́m̐ṣi nírvapati

Line : 17  Pada: v     tád asya sam̐vatsarā́ntarhito rudráḥ paśū́n ná hinasti

Line : 18  Pada: w     sam̐vatsarám agnihotrám ahauṣīt

Pada: x     tát tápo 'vidat

Pada: y     sá sárveṇa sākám̐ svargáṃ lokám̐ samā́rukṣat

Line : 19  Pada: z     trír vā́ idám̐ virā́ḍ vyàkramata gā́rhapatyam āhavanī́yam̐ sábʰyam \

Page: 104  
Line : 1  Pada: aa     tád virā́jam āpat \

Pada: ab     ánnam̐ vaí virā́ṭ \

Pada: ac     ánnam̐ vā́vaítád āpat \

Pada: ad     madʰyādʰidevané rājanyàsya juhuyād vāruṇyà r̥cā́

Line : 2  Pada: ae     váruṇo vaí devā́nām̐ rā́jā

Line : 3  Pada: af     rājyám asmā ávarunddʰe

Pada: ag     híraṇyaṃ nidʰā́ya juhoti \

Pada: ah     agnimáty evá juhoty āyátanavati \

Line : 4  Pada: ai     andʰò 'dʰvaryúḥ syād yád anāyatané juhuyā́t \

Pada: aj     śatám asmā akṣā́n práyaccʰet

Pada: ak     tā́n vícinuyāt \

Line : 5  Pada: al     śatā́yur vaí púruṣaḥ śatávīryas \

Pada: am     ā́yur evá vīryàm āpnoti

Line : 6  Pada: an     gā́m asya tád áhaḥ sabʰā́yāṃ dīvyeyus

Pada: ao     tásyāḥ párūm̐ṣi ná him̐syus

Pada: ap     tā́m̐ sabʰāsádbʰyā úpaharet

Line : 7  Pada: aq     táyā yád gr̥hṇīyā́t tád brāhmaṇébʰyo déyam \

Pada: ar     tát sábʰyam ánnam ávarunddʰe //


Anuvaka: 12  
Line : 9  Pada: a     yásyā rātryāḥ prātár agním ādʰāsyámānaḥ syā́t tā́m̐ rā́trīṃ cátuḥśarāvam odanáṃ paktvā́ brāhmaṇébʰyo jīvátaṇḍulam ivópaharet \

Line : 10  Pada: b     áditir vaí prajā́kāmaudanám apacat

Line : 11  Pada: c     sóñśiṣṭam āśnāt

Pada: d     tásyā dʰātā́ cāryamā́ cājāyetām \

Pada: e     sā́param apacat

Line : 12  Pada: f     sóñśiṣṭam āśnāt

Pada: g     tásyā mitráś ca váruṇaś cājāyetām \

Pada: h     sā́param apacat

Line : 13  Pada: i     sóñśiṣṭam āśnāt

Pada: j     tásyā ám̐śaś ca bʰágaś cājāyetām \

Pada: k     sā́param apacat

Pada: l     saíkṣatóñśiṣṭaṃ me 'śnatyā́ dvaúdvau jā́yete itó nūnáṃ me śréyaḥ syād yát purástād aśnīyā́m íti

Line : 15  Pada: m     sā́ purástād aśitvópāharat

Pada: n     tā́ antár evá gárbʰaḥ sántā avadatām

Line : 16  Pada: o     āvám idáṃ bʰaviṣyāvo yád ādityā́ íti

Pada: p     táyor ādityā́ nirhantā́ram aicʰan \

Line : 17  Pada: q     tā́ ám̐śaś ca bʰágaś ca nírahatām \

Pada: r     tásmād etaú yajñéna yajante \


Page: 105  
Line : 1  Pada: s     am̐śaprāsó 'm̐śasya bʰāgadʰéyam \

Pada: t     jánaṃ bʰágo 'gacʰat

Pada: u     tásmād āhur jáno gantavyàs tátra bʰágena sáṃgacʰatā íti

Line : 2  Pada: v     sá vā́ índra ūrdʰvá evá prāṇámaṃ * udáśrayata
      FN Correcturen und Conjecturen zu dem ganzen Werk: prāṇámān.

Line : 3  Pada: w     mr̥tám ítaram āṇḍám ávāpadyata

Pada: x     sá vā́vá mārtāṇḍó yásyemé manuṣyā̀ḥ prajā́

Line : 4  Pada: y     sā́ vā́ áditir ādityā́n úpādʰāvat \

Pada: z     ástv evá ma idáṃ mā́ ma idáṃ mogʰé párāpaptad íti

Line : 5  Pada: aa     tè 'bruvan \

Pada: ab     átʰaiṣò 'smā́kam evá bravātai ná nó 'timanyātā íti

Line : 6  Pada: ac     sá vā́vá vívasvān ādityó yásya mánuś ca vaivasvató yamáś ca

Line : 7  Pada: ad     mánur evā́smiṃl loké yamò 'múṣmin \

Pada: ae     eté vaí devayā́nān patʰó gopāyanti yád ādityā́s

Line : 8  Pada: af     tá íyakṣamāṇaṃ prátinudante

Pada: ag     yó vā́ etébʰyó 'procyāgním ādʰatté tám eté svargā́l lokā́t prátinudante \

Line : 9  Pada: ah     úñśiṣṭabʰāgā vā́ ādityā́s \

Line : 10  Pada: ai     yád úñśiṣṭe vivartayitvā́ samídʰa ādádʰāti

Pada: aj     tád ādityébʰyo 'gnyādʰéyaṃ prā́ha

Line : 11  Pada: ak     naínam̐ svargā́l lokā́t prátinudante

Pada: al     sam̐vatsarám útsr̥jetāgním ādʰāsyámānas \

Line : 12  Pada: am     nā́syāgníṃ gr̥hā́d dʰareyus \

Pada: an     nā́nyátā ā́hareyus \

Pada: ao     saṃvatsaré vr̥ddʰā́ gárbʰāḥ prájāyante

Line : 13  Pada: ap     prájātam enam̐ vr̥ddʰám ā́dʰatte

Pada: aq     dvā́daśa rā́trīr útsr̥jeta

Line : 14  Pada: ar     dvā́daśa vaí rā́trayaḥ sam̐vatsarásya pratimā́

Pada: as     sam̐vatsaré vr̥ddʰā́ gárbʰāḥ prájāyante

Line : 15  Pada: at     prájātam enam̐ vr̥ddʰám ā́dʰatte

Pada: au     tisrá útsr̥jeta

Pada: av     tráyo vā́ imé lokā́s \

Line : 16  Pada: aw     imā́n evá lokā́n āpnoti \

Pada: ax     ékām útsr̥jeta \

Pada: ay     éko vaí prajā́patis \

Pada: az     prajā́patim evā́pnoti


Page: 106  
Line : 1  Pada: ba     purūrávā vā́ aiḍá urváśīm avindata devī́m \

Pada: bb     tásyā āyúr ajāyata

Line : 2  Pada: bc     sá devā́nt svargáṃ lokám̐ yattò 'nū́dait

Pada: bd     tè 'bruvan \

Pada: be     tád vayáṃ devā́ imáḥ kvā̀yáṃ manuṣyò gamiṣyatī́ti

Line : 3  Pada: bf     sò 'bravīt \

Pada: bg     bahávo vaí me samānā́s

Pada: bh     té mā vakṣyanti

Line : 4  Pada: bi     kím ayáṃ devyā́ḥ putro devébʰyo māturbʰrātrébʰyā * ā́hārṣīt \
      FN Correcturen und Conjecturen zu dem ganzen Werk.

Pada: bj     ástv evá me kíṃcid íti

Line : 5  Pada: bk     tásmā agnír yajñíyāṃ tanvàṃ prā́yacʰat

Pada: bl     tā́m utsaṅgè 'vadʰā́yā́harat

Pada: bm     tā́m ukʰā́yām ávādadʰāt

Line : 6  Pada: bn     sò 'śvattʰá ārohò 'bʰavat \

Pada: bo     yókʰā́ sā́ śamī́

Pada: bp     tásmād etaú yajñāvacaraú

Line : 7  Pada: bq     púṇyajanmānau hí \

Pada: br     agnír vaí váruṇaṃ brahmacáryam ā́gacʰat pravásantam \

Line : 8  Pada: bs     tásya jāyā́m̐ sámabʰavat

Pada: bt     táṃ purástād āyántaṃ pratikśā́ya pratyáṅ níradravat

Line : 9  Pada: bu     sò 'vet sárvam̐ vā́ indriyáṃ nr̥mṇám̐ réto nirlúpya haratī́ti

Pada: bv     tád anuparāhā́ya níralumpat \

Line : 10  Pada: bw     yád rétā ā́sīt sò 'śvattʰá ārohò 'bʰavat \

Pada: bx     yád úlbam̐ sā́ śamī́

Line : 11  Pada: by     tásmād etaú yajñāvacaraú

Pada: bz     púṇyajanmānau hí

Pada: ca     prajā́patiḥ prajā́ḥ sr̥ṣṭvā́ riricānò 'manyata

Line : 12  Pada: cb     sò 'śvo bʰūtvā́ sam̐vatsaráṃ nyàṅ bʰū́myām̐ śíraḥ pratinidʰā́yātiṣṭʰat

Line : 13  Pada: cc     tásyāśvattʰó mūrdʰná údabʰinat

Pada: cd     tád aśvattʰásyāśvattʰatvám \

Line : 14  Pada: ce     tásmād eṣá yajñāvacaráḥ

Pada: cf     prājāpatyó hí //


Anuvaka: 13  
Line : 15  Pada: a     mánur vaí prajā́kāmo 'gním ādʰāsyámāno devátāyaidevatāyā ajuhot

Line : 16  Pada: b     táto mitrā́váruṇayor ā́hutyā prapʰarvy údatiṣṭʰat *
      FN Correcturen und Conjecturen zu dem ganzen Werk.

Pada: c     tásyā gʰr̥táṃ padór akṣarat

Line : 17  Pada: d     sā́ mitrā́váruṇā aít

Pada: e     tā́ ábrūtām

Pada: f     ā́hutyā vaí tvám āváyor ájaniṣṭʰā

Pada: g     mános tvaí tvám asi

Page: 107  
Line : 1  Pada: h     táṃ párehī́ti

Pada: i     sā́ mánum ait

Pada: j     sò 'bravīt \

Pada: k     ásurā vā́ imé puṇyamanyā́ agním ā́dadʰate

Line : 2  Pada: l     tā́n párehī́ti

Pada: m     sā́ párait

Pada: n     tè 'múm ágrā ā́dadʰatā́tʰemám átʰemám \

Line : 3  Pada: o     sā́ púnar aít

Pada: p     tā́m apr̥cʰat

Pada: q     kím abʰyàgann íti

Pada: r     sā́bravīt \

Pada: s     amúm evā́grā ā́dʰiṣatā́tʰemám átʰemám íti

Line : 4  Pada: t     sò 'bravīt

Pada: u     sakŕ̥d vā́vā́surāḥ śriyó 'ntam águḥ

Line : 5  Pada: v     párā tú bʰaviṣyantī́ti

Pada: w     sò 'bravīt \

Pada: x     devā́ vā́ imé puṇyamanyā́ agním ā́dadʰate

Line : 6  Pada: y     tā́n párehī́ti

Pada: z     sā́ párait

Pada: aa     tá imám ágrā ā́dadʰata \

Pada: ab     átʰāmúm átʰemám \

Line : 7  Pada: ac     sā́ púnar aít

Pada: ad     tā́m apr̥cʰat

Pada: ae     kím abʰyàgann íti

Pada: af     sā́bravīt \

Pada: ag     imám evā́grā ā́dʰiṣatā́tʰāmúm átʰemám íti

Line : 8  Pada: ah     sò 'bravīt

Pada: ai     sakŕ̥d vā́vá devā́ḥ sárveṇa sākám̐ svargáṃ lokám̐ samā́rukṣan \

Line : 9  Pada: aj     itáḥpradānāt * tú yajñám úpajīviṣyantī́ti
      FN Correcturen und Conjecturen zu dem ganzen Werk.

Pada: ak     yáḥ sarvavedasáṃ dāsyánt syā́t sá imám ágrā ā́dadʰītā́tʰāmúm átʰemám \

Line : 10  Pada: al     tád yátʰaivá devā́ḥ sárveṇa sākám̐ svargáṃ lokám̐ samā́rohann evám evá yájamānaḥ sárveṇa sākám̐ svargáṃ lokám̐ samā́rohati yá evám̐ vidvā́n agním ādʰatté

Line : 12  Pada: am     sò 'bravīt \

Pada: an     ŕ̥ṣayo vā́ imé puṇyamanyā́ agním ādádʰate

Line : 13  Pada: ao     tā́n párehī́ti

Pada: ap     sā́ párait

Pada: aq     tá imám ágrā ā́dadʰatā́tʰemám átʰāmúm \

Line : 14  Pada: ar     sā́ púnar aít

Pada: as     tā́m apr̥cʰat

Pada: at     kím abʰyàgann íti

Pada: au     sā́bravīt \

Line : 15  Pada: av     imám evā́grā ā́dʰiṣata \

Pada: aw     átʰemám átʰāmúm íti

Pada: ax     sò 'bravīt \

Pada: ay     ahám̐ vā́vā́gnyādʰéyam̐ vidā́ṃcakāra

Line : 16  Pada: az     sárveṣu vā́ eṣú lokéṣv ŕ̥ṣayaḥ prátyaṣṭʰur íti

Pada: ba     práti prajáyā ca paśúbʰiś ca tiṣṭʰati yá evám̐ vidvā́n agním ādʰatté

Line : 17  Pada: bb     yád amúm ādʰā́yemám ādadʰyā́d ápa tád ā́dadʰyāt \

Line : 18  Pada: bc     yád vā́vémám ādʰā́yāmúm ādadʰyā́d ápa tád ā́dadʰyāt

Line : 19  Pada: bd     tád imám evā́dʰā́yā́tʰemám átʰāmúm \

Pada: be     tátʰā sámr̥ddʰā ā́dʰīyate

Pada: bf     prācī́napravaṇa ādʰéyas

Line : 20  Pada: bg     tátʰā sámr̥ddʰā ā́dʰīyate

Pada: bh     prācī́naṃ madʰyamā́d vam̐śā́d ādʰéyas

Pada: bi     tátʰā sámr̥ddʰā ā́dʰīyate


Page: 108  
Line : 1  Pada: bj     yā́ vaí sā́ prapʰarvy ā́sīt sā́ gaúr abʰavat séḍā sā́ mānavī́ gʰr̥tápadī maitrāvaruṇī́ //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.