TITUS
Black Yajur-Veda: Maitrayani-Samhita
Part No. 54
Previous part

Prapathaka: 14  
Anuvaka: 1  
Line : 2  Pada: a     sómo dʰenúm̐ sómo árvantam āśúm̐ sómo vīráṃ karmaṇyàṃ dadāti /

Line : 3  Pada: b     sādanyàm̐ vidatʰyàm̐ sabʰéyaṃ pitr̥śrávaṇam̐ yó dádāśad asmai //

Line : 4  Pada: c     áṣāḍʰam̐ yutsú pŕ̥tanāsu páprim̐ svarṣā́m apsā́m̐ vr̥jánasya gopā́m /

Line : 5  Pada: d     bʰareṣujā́m̐ sukṣitím̐ suśrávasaṃ jáyantaṃ tvā́m ánumadema soma //

Line : 6  Pada: e     tvám̐ soma krátubʰiḥ sukrátur bʰūs tváṃ dákṣaiḥ sudákṣo viśvávedāḥ /

Line : 7  Pada: f     tvám̐ vŕ̥ṣā vr̥ṣatvébʰir mahitvā́ dyumnébʰir dyumny àbʰavo nr̥cákṣāḥ //

Line : 8  Pada: g     yā́ te dʰā́māni diví yā́ pr̥tʰivyā́m //

Line : 9  Pada: h     tvám imā́ óṣadʰīḥ soma víśvās tvám apó ajanayas tváṃ gā́ḥ /

Line : 10  Pada: i     tvám ā́tatantʰorv àntárikṣaṃ tváṃ jyótiṣā ví támo vavartʰa //

Line : 11  Pada: j     yā́ te dʰā́māni havíṣā yájanti

Pada: k     sómāpūṣaṇā \

Pada: l     imaú devaú //

Page: 215  
Line : 1  Pada: m     sómāpūṣaṇā rájaso vimā́nam̐ saptácakram̐ rátʰam áviśvaminvam /

Line : 2  Pada: n     viṣūvŕ̥taṃ mánasā yujyámānaṃ táṃ jinvatʰo vr̥ṣaṇā páñcaraśmim //

Line : 3  Pada: o     divy ànyáḥ sádanaṃ cakrá uccā́ pr̥tʰivyā́m anyó ádʰy antárikṣe /

Line : 4  Pada: p     tā́ asmábʰyaṃ puruvā́raṃ purukṣúm̐ rāyás póṣam̐ víṣyatāṃ nā́bʰim asmé //

Line : 5  Pada: q     dʰíyaṃ pūṣā́ jinvatu viśvaminvó rayím̐ sómo rayipátir dadʰātu //

Line : 6  Pada: r     ávatu devy áditir anarvā́ br̥hád vadema vidátʰe suvī́rāḥ //

Line : 7  Pada: s     víśvāny anyó bʰúvanā jajā́na viśvam anyó abʰicákṣāṇa eti /

Line : 8  Pada: t     sómāpūṣaṇā ávataṃ dʰíyaṃ me yuvā́bʰyām̐ víśvāḥ pŕ̥tanā jayema //

Line : 9  Pada: u     prájāpate nahí tvát tā́ny anyó víśvā jātā́ni pári tā́ babʰūva /

Line : 10  Pada: v     yásmai káṃ juhumás tán no astu vayám̐ syāma pátayo rayīṇā́m //

Line : 11  Pada: w     rayīṇā́ṃ pátim̐ yajatáṃ br̥hántam asmín bʰáre nŕ̥tamam̐ vā́jasātau /

Line : 12  Pada: x     prajā́patiṃ pratʰamajā́m r̥tásya yájāma devám ádʰi no bravītu //

Line : 13  Pada: y     prájāpate tváṃ nidʰipā́ḥ purāṇó devā́nāṃ pitā́ janitā́ prajā́nām /

Line : 14  Pada: z     pátir víśvasya jágataḥ paraspā́ havír no deva vihavé juṣasva //

Line : 15  Pada: aa     távemé lokā́ḥ pradíśo díśaś ca parāváto niváta udvátaś ca /

Line : 16  Pada: ab     prájāpate viśvasŕ̥g jīvádʰanya idáṃ no deva prátiharya havyám //

Line : 17  Pada: ac     prajā́patiṃ pratʰamám̐ yajñíyānāṃ devā́nām ágre yajatám̐ yajadʰvam /

Page: 216  
Line : 1  Pada: ad     sá no dadātu śrávaṇaṃ pitr̥̄ṇā́ṃ tásmai te deva havíṣā vidʰema //

Line : 2  Pada: ae     yó rāyá ī́śe śatadāyá uktʰyò yáḥ paśūnā́m̐ rakṣitā́ víṣṭʰitānām /

Line : 3  Pada: af     prajā́patiḥ pratʰamajā́ r̥tásya sahásradʰāmā juṣatām̐ havír naḥ //


Anuvaka: 2  
Line : 4  Pada: a     vā́yo śatám̐ hárīṇām̐ yuvásva póṣyāṇām /

Line : 5  Pada: b     utá vā te sahasríṇo rátʰā ā́yātu pā́jasā //

Line : 6  Pada: c     īśānā́ya práhutim̐ yás tā ā́naṭ śúcim̐ sómam̐ śucipās túbʰyam̐ vāyo /

Line : 8  Pada: d     kr̥ṇóṣi táṃ mártyeṣu praśastáṃ jātójāto jāyate vājy àsya //

Line : 9  Pada: e     yukṣvā́ hí tvám̐ ratʰāsáhā yuvásva póṣyā vaso /

Line : 10  Pada: f     ā́n no vāyo mádʰu pibāsmā́kam̐ sávanā́gahi //

Line : 11  Pada: g     kuvíd aṅgá námasā yé vr̥dʰā́saḥ purā́ devā́ anavadyā́sā ā́san /

Line : 12  Pada: h     té vāyáve mánave bādʰitā́yā́vāsayann uṣásam̐ sū́ryeṇa //

Line : 13  Pada: i     ā́ no vāyo mahé táne yāhí makʰā́ya pā́jase /

Line : 14  Pada: j     vayám̐ hí te cakr̥mā́ bʰū́ri dāváne sadyáś cin máhi dāváne //

Line : 15  Pada: k     sáṃ te vāyúḥ //

Line : 16  Pada: l     pī́voannam̐ rayivŕ̥dʰaḥ sumedʰā́ḥ śvetáḥ siṣakti niyútām abʰiśrī́ḥ /

Page: 217  
Line : 1  Pada: m     té vāyáve sámanaso vítastʰur víśvén náraḥ svapatyā́ni cakruḥ //

Line : 2  Pada: n     rāyé nú yáṃ jajñátū ródasīmé rāyé devī́ dʰiṣáṇā dʰāti devám /

Line : 3  Pada: o     ádʰa vāyúṃ niyútaḥ saścata svā́ utá śvetám̐ vásudʰitiṃ nireké //

Line : 4  Pada: p     ā́ vāyo

Pada: q     prá vāyúm \

Pada: r     prá yā́bʰiḥ //

Line : 5  Pada: s     ā́ no niyúdbʰiḥ śatínībʰir adʰvarám̐ sahasríṇībʰir úpayāhi yajñám /

Line : 6  Pada: t     vā́yo asmínt sávane mādayasva yūyáṃ pāta svastíbʰiḥ sádā naḥ //

Line : 7  Pada: u     devā́nāṃ bʰadrā́ sumatír r̥jūyatā́ṃ devā́nām̐ rātír abʰí no nívartatām /

Line : 9  Pada: v     devā́nām̐ sakʰyám úpasedimā vayáṃ devā́ nā ā́yuḥ prátirantu jīváse //

Line : 11  Pada: w     bʰadráṃ kárṇebʰiḥ śr̥ṇuyāma devā bʰadráṃ paśyemākṣábʰir yajatrāḥ /

Line : 12  Pada: x     stʰiraír áṅgais tuṣṭuvā́m̐sas tanū́bʰir vyàśema deváhitam̐ yád ā́yuḥ //

Line : 13  Pada: y     śatám ín nú śarádo ánti devā yátrā naś cakrā́ jarásaṃ tanū́nām /

Line : 14  Pada: z     putrā́so yátra pitáro bʰávanti mā́ no madʰyā́ rīriṣatā́yur gántoḥ //

Line : 15  Pada: aa     ā́ vo devāsa īmahe //

Line : 16  Pada: ab     utá devā ávahitaṃ dévā únnayatʰā púnaḥ /

Page: 218  
Line : 1  Pada: ac     utā́gaś cakrúṣaṃ devā dévā jīváyatʰā púnaḥ //

Line : 2  Pada: ad     yajñéna yajñám ayajanta devā́ḥ //


Anuvaka: 3  
Line : 3  Pada: a     ágne náya //

Line : 4  Pada: b     prá vaḥ śukrā́ya bʰānáve bʰaradʰvam̐ havyáṃ matíṃ cāgnáye súpūtam /

Line : 5  Pada: c     yó daívyāni mā́nuṣā janū́m̐ṣy antár víśvāni vidmánā jígāti //

Line : 6  Pada: d     ágne tváṃ pāraya //

Line : 7  Pada: e     ácʰā gíro matáyo devayántīr agním̐ yanti dráviṇaṃ bʰíkṣamāṇāḥ /

Line : 8  Pada: f     susaṃdŕ̥śam̐ suprátīkam̐ sváñcam̐ havyavā́ham aratíṃ mā́nuṣāṇām //

Line : 9  Pada: g     ágne tvám asmád yuyodʰy ámīvā ánagnitrā abʰyámanta kr̥ṣṭī́ḥ /

Line : 10  Pada: h     púnar asmábʰyam̐ suvitā́ya deva kṣā́m̐ víśvebʰir amŕ̥tebʰir yajatra //

Line : 11  Pada: i     prá kāravo mananā́ vacyámānā devadrī́cīṃ nayata devayántaḥ /

Line : 12  Pada: j     dakṣiṇāvā́ḍ vājínī prā́cy eti havír bʰáranty agnáye gʰr̥tā́cī //

Line : 13  Pada: k     úd uttamám

Pada: l     ástabʰnād dyā́m

Pada: m     imā́ṃ dʰíyam //

Line : 14  Pada: n     kitavā́so yád riripúr ná dīví yád vā gʰā satyám utá yán ná vidmá /

Page: 219  
Line : 1  Pada: o     sárvā tā́ víṣya śitʰiréva devā́tʰā te syāma varuṇa priyā́saḥ //

Line : 2  Pada: p     áva te héḍo varuṇa

Pada: q     tát tvā yāmi //

Line : 3  Pada: r     pā́vīravī kanyā̀ citrā́yuḥ sárasvatī vīrápatnī dʰíyaṃ dʰāt /

Line : 4  Pada: s     gnā́bʰir ácʰidram̐ śaraṇám̐ sajóṣā durādʰárṣaṃ gr̥ṇaté śárma yam̐sat //

Line : 5  Pada: t     ā́ no diváḥ //

Line : 6  Pada: u     imā́ júhvānā yuṣmád ā́ námobʰiḥ práti stómam̐ sarasvati juṣasva /

Line : 7  Pada: v     táva śárman priyátame dádʰānā úpastʰeyāma śaraṇáṃ ná vr̥kṣám //

Line : 8  Pada: w     yás te stánaḥ śaśayó yó mayobʰū́r yéṇa víśvā púṣyasi vā́ryāṇi /

Line : 9  Pada: x     yó ratnadʰā́ vasuvíd yáḥ sudátraḥ sárasvati tám ihá dʰā́tave kaḥ //

Line : 10  Pada: y     sárasvaty abʰí no neṣi vásyas \

Pada: z     idáṃ te havyám //


Anuvaka: 4  
Line : 11  Pada: a     ā́ vedʰásaṃ nī́lapr̥ṣṭʰaṃ br̥hántaṃ bŕ̥haspátim̐ sádane sādayadʰvam /

Line : 12  Pada: b     sādádyoniṃ dámā ā́ dīdivā́m̐sam̐ híraṇyavarṇam aruṣám̐ sapema //

Line : 13  Pada: c     sá hí śúciḥ śatápatraḥ sá śundʰyúr híraṇyavāśīr iṣiráḥ svarṣā́ḥ /

Page: 220  
Line : 1  Pada: d     bŕ̥haspátiḥ sá svāveśá r̥ṣváḥ purū́ sákʰibʰya āsutíṃ káriṣṭʰaḥ //

Line : 2  Pada: e     bŕ̥haspátiḥ

Pada: f     sá suṣṭúbʰā //

Line : 3  Pada: g     bŕ̥haspate áti yád aryó árhād dyumád vibʰā́ti krátumaj jáneṣu /

Line : 4  Pada: h     yád dīdáyañ śávasa r̥taprajāta tád asmā́su dráviṇaṃ dʰehi citrám //

Line : 5  Pada: i     evā́ pitré viśvádevāya vŕ̥ṣṇe //

Line : 6  Pada: j     sū́ryo devī́m uṣásam̐ rócamānāṃ máryo ná yóṣām abʰyèti paścā́ /

Line : 7  Pada: k     yátrā náro devayánto yugā́ni vitanvaté práti bʰadrā́ya bʰadrám //

Line : 8  Pada: l     bʰadrā́ áśvās

Pada: m     tát sū́ryasya //

Line : 9  Pada: n     tán mitrásya váruṇasyābʰicákṣe sū́ryo rūpáṃ kr̥ṇute dyaúr upástʰe /

Line : 10  Pada: o     anantám anyád rúśad asya pā́jaḥ kr̥ṣṇám anyád dʰarítaḥ sáṃbʰaranti //

Line : 11  Pada: p     adyā́ devā úditā sū́ryasya nír ám̐hasaḥ pipr̥tā́ nír avadyā́t /

Line : 12  Pada: q     tán no mitró váruṇo māmahantām áditiḥ síndʰuḥ pr̥tʰivī́ utá dyaúḥ //

Line : 13  Pada: r     citráṃ devā́nām údagād ánīkam \

Pada: s     sutrā́māṇam \

Pada: t     mahī́m ū ṣu \

Pada: u     áditiḥ pā́śān //

Page: 221  
Line : 1  Pada: v     áditir dyaúr áditir antárikṣam áditir mātā́ sá pitā́ sá putráḥ /

Line : 2  Pada: w     víśve devā́ áditiḥ páñca jánā áditir jātám áditir jánitvam //

Line : 3  Pada: x     viṣṭambʰó diváḥ

Pada: y     stīrṇáṃ barhíḥ //


Anuvaka: 5  
Line : 4  Pada: a     víṣṇor nú kam \

Pada: b     tád asya

Pada: c     prá tád víṣṇuḥ //

Line : 5  Pada: d     paró mā́trayā tanvā̀ vr̥dʰāna ná te mahitvám ánvaśnuvanti /

Line : 6  Pada: e     ubʰé te vidma rájasī pr̥tʰivyā́ víṣṇo deva tváṃ paramásya vitse //

Line : 7  Pada: f     vícakrame pr̥tʰivī́m eṣá etā́ṃ kṣétrāya víṣṇur mánuṣe daśasyán /

Line : 8  Pada: g     dʰruvā́so asya kīráyo jánāsa urukṣitím̐ sujánimā cakāra //

Line : 9  Pada: h     trír deváḥ pr̥tʰivī́m eṣá etā́m̐ vícakrame śatárcasaṃ mahitvā́ /

Line : 10  Pada: i     prá víṣṇur astu tavásas távīyām̐s tveṣám̐ hy àsya stʰávirasya nā́ma //

Line : 11  Pada: j     índraṃ náro nemádʰitā

Pada: k     yujé rátʰam //

Line : 12  Pada: l     jagr̥hmā́ te dákṣiṇam indra hástam̐ vasūyávo vasupate vásūnām /

Line : 13  Pada: m     vidmā́ hí tvā gópatim̐ śūra gónām asmábʰyaṃ citrám̐ vŕ̥ṣaṇam̐ rayíṃ dāḥ //

Line : 15  Pada: n     távedám̐ víśvam abʰítaḥ paśavyàm̐ yát páśyasi cákṣasā sū́ryasya /

Page: 222  
Line : 1  Pada: o     gávām asi gópatir éka indra bʰakṣīmáhi te práyatasya vásvaḥ //

Line : 2  Pada: p     sám indra naḥ //

Line : 3  Pada: q     ārā́ñ śátrum ápabādʰasva dūrám ugró yáḥ śámbaḥ puruhūta téna /

Line : 4  Pada: r     asmé dʰehi yávamad gómad indra kr̥dʰī́ dʰíyaṃ jaritré vā́jaratnām //

Line : 5  Pada: s     índro balám̐ rakṣitā́raṃ dúgʰānāṃ karéṇeva vícakartā ráveṇa /

Line : 6  Pada: t     svédāñjibʰir āśíram icʰámāno 'rodayat paṇím ā́ gā́ amuṣṇāt //

Line : 7  Pada: u     ádʰvaryavo yó dŕ̥bʰīkaṃ jagʰā́na yó gā́ udā́jad ápi hí balám̐ vaḥ /

Line : 8  Pada: v     tásmā etám antárikṣe ná vā́tam índram̐ sómair órṇuta jū́r ná vástraiḥ //

Line : 9  Pada: w     índrā óṣadʰīr asanod áhāni vánaspátīm̐r asanod antárikṣam /

Line : 10  Pada: x     bibʰéda valáṃ nunudé vívācó 'tʰābʰavad damitā́bʰíkratūnām //

Line : 11  Pada: y     yó hatvā́him áriṇāt saptá síndʰūn yó gā́ udā́jad apadʰā́ valásya /

Line : 12  Pada: z     yó áśmanor antár agníṃ jajā́na sam̐vŕ̥k samátsu sá janāsā índraḥ //

Line : 13  Pada: aa     abʰí svávr̥ṣṭim //

Line : 14  Pada: ab     bʰinád valám áṅgirobʰir gr̥ṇānó ví párvatasya dr̥m̐hitā́ny airat /

Line : 15  Pada: ac     riṇág ródʰām̐si kr̥trímāny eṣām̐ sómasya tā́ mádā índraś cakāra //


Anuvaka: 6  
Page: 223  
Line : 1  Pada: a     víṣṇuṃ devám̐ váruṇam ūtáye bʰágaṃ médasā devā́ vapáyā yajadʰvam /

Line : 2  Pada: b     tā́ no yajñám ā́gatam̐ viśvadʰenā prajā́vad asmé dráviṇehá dʰattam //

Line : 3  Pada: c     médasā devā́ vapáyā yajadʰvam̐ víṣṇuṃ ca devám̐ váruṇaṃ ca rātím /

Line : 4  Pada: d     tā́ no ámīvām apabā́dʰamānā imám̐ yajñáṃ juṣámāṇā úpetam //

Line : 5  Pada: e     víṣṇūvaruṇā yuvám adʰvarā́ya no viśé jánāya máhi śárma yacʰatam /

Line : 6  Pada: f     dīrgʰáprayajyū havíṣā vr̥dʰānā́ jyótiṣā́rātīr dahataṃ támām̐si //

Line : 7  Pada: g     yáyor ójasā skabʰitā́ rájām̐si vīrébʰir vīrátamā śáviṣṭʰā /

Line : 8  Pada: h     yā́ pátyete ápratītā sáhobʰir víṣṇū agan váruṇā pūrváhūtim //

Line : 9  Pada: i     víṣṇūvaruṇā abʰiśastipā́vā devā́ yajanta havíṣā gʰr̥téna /

Line : 10  Pada: j     ápā́mīvām̐ sedʰatam̐ rakṣásaś cā́tʰā dʰattam̐ yájamānāya śám̐ yóḥ //

Line : 11  Pada: k     am̐homúcā vr̥ṣabʰā́ suprátūrtī devā́nāṃ devátamā śáviṣṭʰā /

Line : 12  Pada: l     víṣṇūvaruṇā prátiharyataṃ na idáṃ nárā práyatam ūtáye havíḥ //

Line : 13  Pada: m     ā́ devó yāti savitā́ surátno 'ntarikṣaprā́ váhamāno áśvaiḥ /

Line : 14  Pada: n     háste dádʰāno náryā purū́ṇi niveśayañ ca prasuváñ ca bʰū́ma //

Line : 15  Pada: o     abʰī́vr̥taṃ kŕ̥śanair viśvárūpam̐ híraṇyaśamyam̐ yajató br̥hántam /

Line : 16  Pada: p     ā́stʰād rátʰam̐ savitā́ citrábʰānuḥ kr̥ṣṇā́ rájām̐si táviṣīṃ dádʰānaḥ //

Line : 17  Pada: q     sá gʰā no deváḥ savitā́ sahā́vā́sāviṣad vásupatir vásūni /

Line : 18  Pada: r     viśráyamāṇo amátim urūcī́ṃ martabʰójanam ádʰa rāsate naḥ //

Page: 224  
Line : 1  Pada: s     ā́ kr̥ṣṇéna rájasā

Pada: t     vāmám adyá //

Line : 2  Pada: u     bʰágaṃ dʰíyam̐ vājáyantaḥ púraṃdʰiṃ nárāśám̐so gnā́spátir no avyāt /

Line : 3  Pada: v     āyé vāmásya saṃgatʰé rayīṇā́ṃ priyā́ devásya savitúḥ syāma //

Line : 4  Pada: w     yā́ óṣadʰayas \

Pada: x     aśvāvatī́m

Pada: y     óṣadʰīr íti mātaras \

Pada: z     áti víśvāḥ pariṣṭʰā́s \

Line : 5  Pada: aa     yád óṣadʰayaḥ saṃgácʰante \

Pada: ab     anyā́ vo * anyā́m //
      FN emended. Ed.: vó


Anuvaka: 7  
Line : 6  Pada: a     mahī́ dyā́vāpr̥tʰivī́ ihá jyéṣṭʰe rucā́ bʰavatām̐ śucáyadbʰir arkaíḥ /

Line : 7  Pada: b     yát sīm̐ váriṣṭʰe br̥hatī́ viminván ruvád dʰokṣā́ papratʰānebʰir évaiḥ //

Line : 8  Pada: c     prá pūrvajé //

Line : 9  Pada: d     sá ít svápā bʰúvaneṣv āsa yá imé dyā́vāpr̥tʰivī́ jajā́na /

Line : 10  Pada: e     urvī́ gabʰīré rájasī suméke avam̐śé dʰī́raḥ śácyā sámairat //

Line : 11  Pada: f     bʰū́ri dvé ácarantī cárantaṃ padvántaṃ gárbʰam apádī dadʰāte /

Line : 12  Pada: g     nítyaṃ ná sūnúṃ pitrór upástʰe dyā́vā rákṣataṃ pr̥tʰivī no ábʰvāt //

Line : 13  Pada: h     idáṃ dyāvāpr̥tʰivī satyám astu pítar mā́tar yád ihópabruvé vām /

Line : 14  Pada: i     bʰūtáṃ devā́nām avamé ávobʰir vidyā́meṣám̐ vr̥jánaṃ jīrádānum //

Page: 225  
Line : 1  Pada: j     urvī́ pr̥tʰvī́ bahulé dūréante úpabruve námasā yajñé asmín /

Line : 2  Pada: k     dadʰā́te yé subʰáge suprátūrtī dyā́vā rákṣataṃ pr̥tʰivī no ábʰvāt //

Line : 3  Pada: l     índro bʰūtásya bʰúvanasya rā́jéndro dādʰāra pr̥tʰivī́m utémā́m /

Line : 4  Pada: m     índre ha víśvā bʰúvanā śritā́nī́ndraṃ manye pitáraṃ mātáraṃ ca //

Line : 5  Pada: n     índraḥ pr̥ṇántaṃ pápuriṃ céndrā índraḥ stuvántam̐ stavitā́ram índraḥ /

Line : 6  Pada: o     dádʰāti śakráḥ sukr̥tásya loká índraṃ manye pitáraṃ mātáraṃ ca //

Line : 7  Pada: p     índro dyaúr urvy ùtá bʰū́mir índrā índraḥ samudró abʰavad gabʰīráḥ /

Line : 8  Pada: q     urv àntárikṣam̐ sá janāsā índrā índraṃ manye pitáraṃ mātaráṃ ca //

Line : 9  Pada: r     índro vr̥trám̐ vájreṇāvadʰīd dʰī́ndro vyàm̐sam utá śúṣṇam índraḥ /

Line : 10  Pada: s     índraḥ púraḥ śámbarasyābʰinad dʰī́ndraṃ manye pitáraṃ mātáraṃ ca //

Line : 11  Pada: t     índro babʰūva bráhmaṇā gabʰīrá índrā ā́bʰūtaḥ paribʰū́ṣv índraḥ /

Line : 12  Pada: u     índro bʰaviṣyád utá bʰūtám índrā índraṃ manye pitáraṃ mātáraṃ ca //

Line : 13  Pada: v     índro 'smáṃ avatu vájrabāhur índre bʰūtā́ni bʰúvanānī́ndre /

Line : 14  Pada: w     asmā́kam índro bʰavatu prasāhá índraṃ manye pitáraṃ mātáraṃ ca //

Line : 15  Pada: x     utá syā́ naḥ sárasvatī juṣāṇópaśruvat subʰágā yajñé asmín /

Line : 16  Pada: y     dyutádyubʰir namasyaìr iyāṇā́ rāyā́ yujā́ cid úttarā sákʰibʰyaḥ //

Line : 17  Pada: z     prá kṣódasā dʰā́yasā sasra eṣā́ sárasvatī dʰarúṇam ā́yasī pū́ḥ /

Page: 226  
Line : 1  Pada: aa     prá bā́dʰamānā ratʰyèva yāti víśvā apó mahinā́ síndʰur anyā́ḥ //

Line : 2  Pada: ab     ékācetat sárasvatī nadī́nām̐ śúcir yatī́ giríbʰyā ā́ samudrā́t /

Line : 3  Pada: ac     rāyáś cétantī bʰúvanasya bʰū́rer gʰr̥táṃ páyo duduhe nā́huṣāya //

Line : 4  Pada: ad     idám adadād rabʰasám r̥ṇacyútaṃ dívodāsam̐ vadʰrīyaśvā́ya dāśúṣe /

Line : 5  Pada: ae     yā́ śásvantam ācakʰā́dāvasáṃ paṇíṃ tā́ te dātrā́ṇi taviṣā́ sarasvati //

Line : 7  Pada: af     ayám u te sarasvati vásiṣṭʰo dvā́rā r̥tásya subʰage vyā̀vaḥ /

Line : 8  Pada: ag     várdʰa śubʰre stuvaté rāsi vā́jān yūyáṃ pāta svastíbʰiḥ sádā naḥ //

Line : 9  Pada: ah     iyám̐ śúṣmebʰir bisakʰā́ ivārujat sā́nu girīṇā́ṃ taviṣébʰir ūrmíbʰiḥ /

Line : 10  Pada: ai     pārāvatagʰnī́m ávase suvr̥ktíbʰiḥ sárasvatīm ā́vivāsema dʰītíbʰiḥ //


Anuvaka: 8  
Line : 11  Pada: a     śúciṃ nú stómam \

Pada: b     śnátʰad vr̥trám

Pada: c     ubʰā́ vām indrāgnī

Pada: d     prá carṣaṇibʰyas \

Line : 12  Pada: e     ā́ vr̥trahaṇās \

Pada: f     gīrbʰír vípras

Pada: g     tváṣṭā dádʰat

Pada: h     tán nas turī́pam \

Pada: i     tváṣṭā vīrám //

Page: 227  
Line : 1  Pada: j     piśáṅgarūpaḥ subʰáro vayodʰā́ḥ śruṣṭī́ vīró jāyate devákāmaḥ /

Line : 2  Pada: k     prajā́ṃ tváṣṭā víṣyatu nā́bʰim asmé ádʰā devā́nām ápyetu pā́tʰaḥ //

Line : 3  Pada: l     déva tvaṣṭaḥ //

Line : 4  Pada: m     ā́viṣṭyo vardʰate cā́rur āsu jihmā́nām ūrdʰváḥ sváyaśā upástʰe /

Line : 5  Pada: n     ubʰé tváṣṭur bibʰyatur jā́yamānāt pratīcī́ sim̐háṃ práticetayete //

Line : 6  Pada: o     jagr̥hmā́ te dákṣiṇam indra hástam //

Line : 7  Pada: p     subráhmāṇaṃ devávantaṃ mahā́ntam urúṃ gabʰīráṃ pr̥tʰúbudʰnam indra /

Line : 8  Pada: q     śrutár̥ṣim ugrám abʰimātiṣā́ham asmábʰyaṃ citrám̐ vŕ̥ṣaṇam̐ rayíṃ dāḥ //

Line : 9  Pada: r     vánīvāno máma dūtā́sā índram̐ stómāś caranti sumatī́r iyāṇā́ḥ /

Line : 10  Pada: s     hr̥dispŕ̥śo mánasā vacyámānā asmábʰyaṃ citrám̐ vŕ̥ṣaṇam̐ rayíṃ dāḥ //

Line : 11  Pada: t     svāyudʰám̐ svávasam̐ sunītʰáṃ cátuḥsamudraṃ dʰarúṇam̐ rayīṇā́m /

Line : 12  Pada: u     carkŕ̥tyam̐ śám̐syaṃ bʰū́rivāram ugrám asmábʰyaṃ citrám̐ vŕ̥ṣaṇam̐ rayíṃ dāḥ //

Line : 13  Pada: v     áśvāvantam̐ ratʰínam̐ vīrávantam̐ sahasríṇam̐ śatínam̐ vā́jam indra /

Line : 14  Pada: w     bʰadrávrātam̐ vípravīram̐ svarṣā́m asmábʰyaṃ citrám̐ vŕ̥ṣaṇam̐ rayíṃ dāḥ //

Line : 15  Pada: x     sanádvājam̐ vípravīraṃ tárutraṃ dʰanuspŕ̥tam̐ śūśuvā́m̐sam̐ sudákṣam /

Line : 16  Pada: y     dasyuhánaṃ pūrbʰídam indra satyám asmábʰyaṃ citrám̐ vŕ̥ṣaṇam̐ rayíṃ dāḥ //


Anuvaka: 9  
Page: 228  
Line : 1  Pada: a     tváṣṭā pátnībʰir ihá naḥ sajóṣā devó devī́bʰir havíṣo juṣāṇáḥ /

Line : 2  Pada: b     úpo rayíṃ bahulám̐ víṣyatā naḥ śr̥ṇóta naḥ sumatím̐ yajñiyāsaḥ //

Line : 3  Pada: c     retodʰā́ yásya bʰúvanasya deváḥ sasā́da yónau janitā́ jániṣṭʰaḥ /

Line : 4  Pada: d     rūpā́ṇi kr̥ṇván vidádʰad vápūm̐ṣi tváṣṭā pátnībʰiś carati prajānán //

Line : 5  Pada: e     tváṣṭā pátnībʰir ánu mam̐hánevāgreyā́vā dʰiṣáṇe yáṃ dadʰā́te /

Line : 6  Pada: f     víśvā vásu hástayor ādádʰāno 'ntár mahī́ ródasī yāti sā́dʰan //

Line : 7  Pada: g     ā́ no vīrébʰir janitā́ matīnā́ṃ góbʰir áśvebʰir vásubʰir vasūyán /

Line : 8  Pada: h     samañjānó dʰā́mabʰir viśvárūpais tváṣṭā pátnībʰiś carati prajānán //

Line : 9  Pada: i     tváṣṭā réto bʰúvanasya pátnīr vikr̥ṇvānā́s tánayaṃ bʰū́ri paśváḥ /

Line : 10  Pada: j     gnā́ vo devī rodasī táñ śr̥ṇotā́ no rayíṃ janata viśvávāram //

Line : 11  Pada: k     yajñáṃ ca nas tanvàṃ ca prajā́ṃ ca rayíṃ ca no janata viśvárūpam /

Line : 12  Pada: l     yónau réto dádʰad asmé nú tváṣṭā devī́ḥ pátnīr janata jīváse naḥ //

Line : 13  Pada: m     ví máñ śratʰāya raśanā́m ivā́ga r̥dʰyā́ma te varuṇa kʰā́m r̥tásya /

Line : 14  Pada: n     mā́ tántuś cʰedi váyato dʰíyaṃ me mā́ mā́trā śāry apásaḥ purá r̥tóḥ //

Line : 15  Pada: o     pára r̥ṇā́ sāvīr ádʰa mátkr̥tāni mā́hám̐ rājann anyakr̥tena bʰojam /

Line : 16  Pada: p     ávyuṣṭā ín nú bʰū́yasīr uṣā́sā ā́ no vīrā́n varuṇa tā́su śādʰi //

Page: 229  
Line : 1  Pada: q     ápo ṣú myakṣa varuṇa bʰiyásaṃ mát sámrāḍ r̥tāvó 'nu no gr̥bʰāya /

Line : 2  Pada: r     dā́meva vatsā́d vímumugdʰy * ám̐ho nahí tvád āré nimíṣaś canéśe //
      FN emended. Ed.: vimumugdʰy.

Line : 3  Pada: s     yó me rājan yújyo vā sákʰā vā svápne bʰayáṃ bʰīráve máhyam ā́ha /

Line : 4  Pada: t     stenó vā yó dípsati no vŕ̥ko vā tváṃ tásmād varuṇa pāhy asmā́n //

Line : 5  Pada: u     mā́ no vadʰaír varuṇa yé ta iṣṭā́ énaḥ kr̥ṇvántam aruṇa bʰrīṇánti /

Line : 6  Pada: v     mā́ jyótiṣaḥ pravasatʰā́ni ganma ví ṣū́ mŕ̥dʰaḥ śiśratʰo jīváse naḥ //

Line : 7  Pada: w     kvà tyā́ni nau sakʰyā́ babʰūvuḥ sácāvahai yád avr̥káṃ purā́ cit /

Line : 8  Pada: x     br̥hántaṃ mā́nam̐ varuṇa svadʰāvaḥ sahásradvāraṃ jagamā gr̥háṃ te //

Line : 9  Pada: y     mūrdʰā́naṃ diváḥ

Pada: z     pr̥ṣṭó diví

Pada: aa     vaiśvānarásya sumataú syāma

Pada: ab     tvám agne śocíṣā śóśucānas \

Line : 10  Pada: ac     agníḥ prātáḥ sávanāt \

Pada: ad     víśvam̐ vivyāca //


Anuvaka: 10  
Line : 11  Pada: a     ā́ vāṃ rátʰo ródasī badbadʰānó hiraṇyáyo vŕ̥ṣabʰir yātv áśvaiḥ /

Line : 12  Pada: b     gʰr̥távartaniḥ pavíbʰī rucāná iṣā́m̐ voḍʰā́ nr̥pátir vājínīvān //

Line : 13  Pada: c     sá papratʰānó abʰí páñca bʰū́mā trivandʰuró mánasā́yātu yuktáḥ /

Line : 14  Pada: d     víśo yéna gácʰatʰo devayántīḥ kútrā cid yā́mam aśvinā dádʰānā //

Line : 15  Pada: e     sváśvā yaśásā́yātam arvā́g dásrā nidʰíṃ mádʰumantaṃ pibātʰaḥ /

Page: 230  
Line : 1  Pada: f     ví vām̐ rátʰo vadʰvā̀ yā́damānó 'ntān divó bādʰate vartaníbʰyām //

Line : 3  Pada: g     yó ha syá vām̐ ratʰirā vásta usrā́ rátʰo yujānáḥ pariyā́ti vartíḥ /

Line : 4  Pada: h     téna naḥ śám̐ yór uṣáso vyùṣṭau ny àśvinā vahatam̐ yajñé asmín //

Line : 5  Pada: i     yuvóḥ śríyaṃ pári yóṣāvr̥ṇīta sū́ro duhitā́ páritakmyāyām /

Line : 6  Pada: j     yád devayántam ávatʰaḥ śácībʰiḥ pári gʰram̐sám ománā vām̐ váyo gāt //

Line : 7  Pada: k     yuváṃ bʰujyúm ávaviddʰam̐ samudrá údūhatʰur árṇaso ásridʰānaiḥ /

Line : 8  Pada: l     patatríbʰir aśramaír avyatʰíbʰir dam̐sánābʰir aśvinā pāráyantā //

Line : 9  Pada: m     bráhmaṇaspate tvám asyá yantā́ //

Line : 10  Pada: n     sá īm̐ satyébʰiḥ sákʰibʰiḥ śucádbʰir gódʰāyasam̐ ví dʰanasaír adardaḥ /

Line : 11  Pada: o     bráhmaṇaspátir vŕ̥ṣabʰir varā́hair gʰarmásvedebʰir dráviṇam̐ vyā̀naṭ //

Line : 12  Pada: p     bráhmaṇaspáter abʰavad yatʰāvaśám̐ satyó mányur máhi kármā kariṣyatáḥ /

Line : 13  Pada: q     yó gā́ udā́jat sá divé ví cābʰajan mahī́va rītíḥ śávasāsarat pŕ̥tʰak //

Line : 15  Pada: r     índʰāno agním̐ vanavad vanuṣyatáḥ kr̥tábrahmā śūśuvad rātáhavyā ít /

Line : 16  Pada: s     jāténa jātám áti sá prásarsr̥te yám̐yam̐ yújaṃ kr̥ṇuté bráhmaṇaspátiḥ //

Page: 231  
Line : 1  Pada: t     bráhmaṇaspate sūyámasya viśváhā //

Line : 2  Pada: u     sá íj jánena sá viśā́ sá jánmanā sá putraír vā́jaṃ bʰarate dʰánā nŕ̥bʰiḥ /

Line : 3  Pada: v     devā́nām̐ yáḥ pitáram āvívāsati śraddʰā́manā havíṣā bráhmaṇaspátim //

Line : 5  Pada: w     ā́yātaṃ mitrāvaruṇā suśasty úpa priyā́ námasā hūyámānā /

Line : 6  Pada: x     sám̐ yā́ apnaḥstʰó apáseva jánāñ śrudʰīyatáś cid yatatʰo mahitvā́ //

Line : 7  Pada: y     yuvám̐ vástrāṇi pīvasā́ vasātʰe yuvór ácʰidrā mántavo ha sárgāḥ /

Line : 8  Pada: z     ávātiratam ánr̥tāni víśva r̥téna mitrāvaruṇā sacetʰe //

Line : 9  Pada: aa     kó nú vāṃ mitrāvaruṇā r̥tāyán divó vā maháḥ pā́rtʰivasya vā dé /

Line : 10  Pada: ab     r̥tásya vā sádasi trā́sītʰāṃ no yajñāyaté vā paśuṣó nú vā́jān //

Line : 12  Pada: ac     tát sú vāṃ mitrāvaruṇā mahitvám īrmā́ tastʰúṣīr áhabʰir duduhre /

Line : 13  Pada: ad     víśvāḥ pinvatʰaḥ svásarasya dʰénā ánu vām ékaḥ pavír ā́vavarta //

Line : 14  Pada: ae     yád bám̐hiṣṭʰaṃ nā́tivídʰe sudānū ácʰidram̐ śárma bʰuvanasya gopā * /
      FN Ben, Pada. H, Bb: gopā́ḥ

Line : 15  Pada: af     téna no mitrāvaruṇā aviṣṭam̐ síṣāsanto jigīvā́m̐saḥ syāma //

Page: 232  
Line : 1  Pada: ag     prá bāhávā //


Anuvaka: 11  
Line : 2  Pada: a     ā́ no víśvā ā́skrā gamanta devā́ mitró aryamā́ váruṇaḥ sajóṣāḥ /

Line : 4  Pada: b     bʰúvan yátʰā no víśve vr̥dʰā́saḥ kárant suṣā́hā vitʰuráṃ ná śávaḥ //

Line : 5  Pada: c     śáṃ no devā́ viśvádevā bʰavantu śám̐ sárasvatī sahá dʰībʰír astu /

Line : 6  Pada: d     śám abʰiṣā́caḥ śám u rātiṣā́caḥ śáṃ no divyā́ḥ pā́rtʰivāḥ śáṃ no ápyāḥ //

Line : 8  Pada: e     yé savitúḥ satyásavasya víśve mitrásya vraté váruṇasya devā́ḥ /

Line : 9  Pada: f     té saúbʰagam̐ vīrávad gómad ápno dádʰātana dráviṇaṃ citrám asmé //

Line : 10  Pada: g     sugā́ vo devās \

Pada: h     víśve devāḥ //

Line : 11  Pada: i     dyaúḥ * pítaḥ pŕ̥tʰivi mā́tar ádʰrug ágne bʰrātar vasavo mr̥ḍátā naḥ /
      FN Ed.: dyaùḥ. cf. note 10

Line : 12  Pada: j     víśva ādityā adite sajóṣā asmábʰyam̐ śárma bahulám̐ víyanta //

Line : 13  Pada: k     ī́ḍe agním̐ svávasaṃ námobʰir ihá prasattó vícayat kr̥táṃ naḥ /

Line : 14  Pada: l     rátʰair iva prábʰare vājayádbʰiḥ pradakṣiṇín marútām̐ stómam aśyām //

Line : 15  Pada: m     tvíṣīmanto adʰvarásyeva didyút triṣucyávaso juhvò nā́gnéḥ /

Page: 233  
Line : 1  Pada: n     arcátrayo dʰúnayo ná vīrā́ bʰrā́jajjanmāno marúto ádʰr̥ṣṭāḥ //

Line : 2  Pada: o     ágne yāhí dūtyàṃ mā́ riṣaṇyo deváṃ ácʰā brahmakŕ̥tā gaṇéna /

Line : 3  Pada: p     sárasvatīṃ marúto aśvínāpó yákṣi devā́n ratnadʰéyāya víśvān //

Line : 4  Pada: q     prá citrám arkáṃ gr̥ṇaté turā́ya //

Line : 5  Pada: r     yé agnáyo ná śóśucann idʰānā́ dvír yát trír marúto vāvr̥dʰánta /

Line : 6  Pada: s     areṇávo hiraṇyáyāsa eṣām̐ sākáṃ nr̥mṇaíḥ paúm̐syebʰiś ca bʰūvan //

Line : 7  Pada: t     ā́ vo yantūdavāhā́so adyá //

Line : 8  Pada: u     satyáṃ br̥hád r̥tám ugráṃ dīkṣā́ tápo bráhma yajñā́ḥ pr̥tʰivī́ṃ dʰārayanti /

Line : 9  Pada: v     sā́ no bʰūtásya bʰúvanasya pátny urúṃ lokáṃ pr̥tʰivī́ naḥ kr̥ṇotu //

Line : 10  Pada: w     asaṃbādʰā́ yā́ madʰyató mānavébʰyo yásyā udvátaḥ pravátaḥ samáṃ mahát /

Line : 11  Pada: x     nā́nārūpā óṣadʰīr yā́ bibʰárti pr̥tʰivī́ naḥ pratʰatām̐ rā́dʰyatāṃ naḥ //

Line : 12  Pada: y     yā́m̐ rákṣanty asvapnā́ viśvadā́nīṃ devā́ bʰū́miṃ pr̥tʰivī́m ápramādam /

Line : 13  Pada: z     sā́ no mádʰu gʰr̥táṃ dúhām átʰo ukṣatu várcasā //

Line : 14  Pada: aa     yásyāṃ pū́rve pūrvajanā́ vicakriré yásyāṃ devā́ ásurān abʰyávartayan /

Line : 15  Pada: ab     yā́ bibʰárti bahudʰā́ prāṇád éjat sā́ no bʰū́miḥ pūrvapéyaṃ dadʰātu //

Line : 16  Pada: ac     yā́s te prā́cīḥ pradíśo yā́ údīcīr yā́ś ca bʰūmy adʰarā́g yā́ś ca paścā́ /

Line : 17  Pada: ad     śivā́s tā́ máhyaṃ cárate bʰavantu mā́ nípaptaṃ bʰúvane śiśriyāṇáḥ //

Page: 234  
Line : 1  Pada: ae     viśvaṃbʰarā́ vasudʰā́nī purukṣúd dʰíraṇyavarṇā jágataḥ pratiṣṭʰā́ /

Line : 2  Pada: af     vaiśvānaráṃ bíbʰratī bʰū́mir agním índra r̥ṣabʰā́ dráviṇaṃ no dadʰātu //


Anuvaka: 12  
Line : 3  Pada: a     ā́ vāṃ mitrāvaruṇā havyádātiṃ námasā devā ávasā vavr̥tyām /

Line : 4  Pada: b     asmā́kaṃ bráhma pŕ̥tanāsu sahyā asmā́kam̐ vr̥ṣṭír divyā́ supārā́ //

Line : 5  Pada: c     ŕ̥tasya gopā ádʰitiṣṭʰatʰo rátʰam̐ sátyadʰarmāṇā paramé vyòman /

Line : 6  Pada: d     yám átra mitrāvaruṇā́vatʰo yuváṃ tásmai vr̥ṣṭír mádʰumat pinvate diváḥ //

Line : 7  Pada: e     vā́cam̐ sú mitrāvaruṇā ŕ̥tāvarīṃ parjányaś citrā́m̐ vadati tvíṣīmatīm /

Line : 9  Pada: f     abʰrā́ vasata * marútaḥ sú māyáyā dyā́m̐ varṣayatam aruṇām arepásam //
      FN Pada. Ed.: vasatʰa

Line : 10  Pada: g     samrā́jā asyá bʰúvanasya rājatʰo mítrāvaruṇā vidátʰe svardŕ̥śā /

Line : 11  Pada: h     vr̥ṣṭím̐ vām̐ rā́dʰo amr̥tatvám īmahe dyā́vāpr̥tʰivī́ vícaranti tanyávaḥ //

Line : 12  Pada: i     ā́ no mitrāvaruṇā havyájuṣṭiṃ gʰr̥taír gávyūtim ukṣatam íḍābʰiḥ /

Line : 13  Pada: j     práti vām átra váram ā́ jánāya pr̥ṇītám udnó divyásya cā́roḥ //

Line : 14  Pada: k     samrā́jā ugrā́ vr̥ṣabʰā́ divás pátī pr̥tʰivyā́ mitrā́váruṇā vícarṣaṇī /

Page: 235  
Line : 1  Pada: l     citrébʰir abʰraír úpatiṣṭʰato rávaṃ dyā́ṃ varṣayato ásurasya māyáyā //

Line : 2  Pada: m     ā́ te mahás \

Pada: n     yó jātá evá \

Pada: o     abʰí gotrā́ṇi //

Line : 3  Pada: p     ā́bʰiḥ spŕ̥dʰo mitʰatī́r áriṣaṇyann amítrasya vyatʰayā manyúm indra /

Line : 4  Pada: q     ā́bʰir víśvā abʰiyújo víṣūcīr ā́ryāya víśó 'vatārīr dā́sīḥ //

Line : 5  Pada: r     ayám̐ śr̥ṇve ádʰa jáyann utá gʰnánn ayám utá prákr̥ṇute yudʰā́ gā́ḥ /

Line : 6  Pada: s     yadā́ satyáṃ kr̥ṇuté manyúm índro víśvaṃ dr̥ḍʰáṃ bʰayatā éjad asmāt //

Line : 7  Pada: t     ánu svadʰā́m akṣarann ā́po asyā́vardʰata mádʰyā ā́ nāvyā̀nām /

Line : 8  Pada: u     sadʰrīcī́nena mánasā tám índrā ójiṣṭʰena hánmanāhann abʰí dyū́n //

Line : 9  Pada: v     índras tárasvān abʰimātihógró híraṇyavarṇa iṣiráḥ svarṣā́ḥ /

Line : 10  Pada: w     tásya vayám̐ sumataú yajñíyasyā́pi bʰadré saumanasé syāma //

Line : 11  Pada: x     híraṇyavarṇo ábʰayaṃ kr̥ṇotv abʰimātihéndraḥ pŕ̥tanāsu jiṣṇúḥ /

Line : 12  Pada: y     sá naḥ śárma trivárūtʰam̐ víyam̐sad yūyáṃ pāta svastíbʰiḥ sádā naḥ //

Line : 13  Pada: z     índram̐ stuhi vajríṇam̐ sómapr̥ṣṭʰaṃ puroḍā́śasya juṣatām̐ havír naḥ /

Line : 14  Pada: aa     hatvā́bʰímātīḥ pŕ̥tanāḥ sáhasvān átʰā́bʰayaṃ kr̥ṇuhi viśváto naḥ //

Line : 15  Pada: ab     stuhí śū́ram̐ vajríṇam ápratīkam̐ vr̥traháṇaṃ puruhūtám índram /

Line : 16  Pada: ac     yá ékā íñ śatápatir jáneṣu tásmā índrāya havíṣā juhota //

Line : 17  Pada: ad     índro devā́nām adʰipā́ḥ puróhito viśā́ṃ pátir abʰavad vājínīvān /

Page: 236  
Line : 1  Pada: ae     abʰimātihā́ taviṣás túviṣmān asmábʰyaṃ citrám̐ vŕ̥ṣaṇam̐ rayíṃ dāt //

Line : 2  Pada: af     yá imé dyā́vāpr̥tʰivī́ mahitvā́ bálenā́dr̥m̐had abʰimātihéndraḥ /

Line : 3  Pada: ag     sá no havíḥ prátigr̥bʰṇātu rātáye devā́nāṃ devó nidʰipā́ no avyāt //


Anuvaka: 13  
Line : 4  Pada: a     índro vr̥trám atarad vr̥tratū́rye 'nādʰr̥ṣyó magʰávā śū́rā índraḥ /

Line : 5  Pada: b     ánv enam̐ víśo amadanta pūrvī́r ayám̐ rā́jā jágataś carṣaṇīnā́m //

Line : 6  Pada: c     sá evá vīráḥ sá u vīryā̀vānt sá ekarājó jágataḥ paraspā́ḥ /

Line : 7  Pada: d     yadā́ vr̥trám átarañ śū́rā índro átʰaikarājó abʰavaj jánānām //

Line : 8  Pada: e     índro yajñám̐ vardʰáyan viśvávedāḥ puroḍā́śasya juṣatām̐ havír naḥ /

Line : 9  Pada: f     vr̥tráṃ tīrtvā́ dānavám̐ vájrabāhur díśo 'dr̥m̐had dr̥m̐hitā́ dŕ̥m̐haṇena //

Line : 10  Pada: g     imám̐ yajñám̐ vardʰáyan viśvávedāḥ puroḍā́śaṃ prátigr̥bʰṇātv índraḥ /

Line : 11  Pada: h     yadā́ vr̥trám átarañ śū́rā índro átʰābʰavad damitā́bʰíkratūnām //

Line : 12  Pada: i     áhan vr̥trám //

Line : 13  Pada: j     índro devā́ñ śambarahátya āvad índro devā́nām abʰavat purogā́ḥ /

Line : 14  Pada: k     índro yajñé havíṣā vāvr̥dʰānó vr̥tratū́r no ábʰayam̐ śárma yam̐sat //

Page: 237  
Line : 1  Pada: l     índrasya vŕ̥ṣṇas \

Pada: m     jániṣṭʰā ugrás \

Pada: n     índra eṣāṃ netā́

Pada: o     bʰū́ri cakartʰa //

Line : 2  Pada: p     tváṃ mā́nebʰya indra viśvájanyā rádā marúdbʰiḥ śurúdʰo góagrāḥ /

Line : 3  Pada: q     stávānebʰiḥ stavasa indra devaír vidyā́meṣám̐ vr̥jánaṃ jīrádānum //

Line : 4  Pada: r     yáḥ saptá síndʰūm̐r ádadʰāt pr̥tʰivyā́m̐ yáḥ saptá lokā́n ákr̥ṇod díśaś ca /

Line : 5  Pada: s     índro havíṣmānt ságaṇo marúdbʰir vr̥tratū́r no yajñám ihópayāsat //

Line : 6  Pada: t     sámiddʰā índras \

Pada: u     ánavas te //

Line : 7  Pada: v     índrasya nú vīryā̀ṇi právocam̐ yā́ni cakā́ra pratʰamā́ni vajrī́ /

Line : 8  Pada: w     áhann áhim ánv apás tatarda prá vakṣáṇā abʰinat párvatānām //

Line : 9  Pada: x     áhann áhiṃ párvate śiśriyāṇáṃ tváṣṭāsmai vájram̐ svaryàṃ tatakṣa /

Line : 10  Pada: y     vāśrā́ iva dʰenávaḥ syándamānā áñjaḥ samudrám ávajagmur ā́paḥ //

Line : 11  Pada: z     índro yātó 'vasitasya rā́jā śámasya ca śr̥ṅgíṇo vájrabāhuḥ /

Line : 12  Pada: aa     séd u rā́jā kṣayati carṣaṇīnā́m arā́n ná nemíḥ pári tā babʰūva //

Line : 13  Pada: ab     abʰí sidʰmó ajigād asya śátrūn ví tigména vr̥ṣabʰéṇā púro 'bʰet /

Line : 15  Pada: ac     sám̐ vájreṇābʰinad vr̥trám índraḥ prá svā́ṃ matím atirañ śā́śadānaḥ //


Anuvaka: 14  
Page: 238  
Line : 1  Pada: a     tvám apó ví dúro víṣūcīr índra dr̥ḍʰám arujaḥ párvatasya /

Line : 2  Pada: b     rā́jābʰavo jágataś carṣaṇīnā́m̐ sākám̐ sū́ryaṃ janáyan dyā́m uṣā́sam //

Line : 3  Pada: c     índro rā́jā jágataś carṣaṇīnā́m ádʰi kṣámi víṣurūpam̐ yád ásti /

Line : 4  Pada: d     táto dadāti dāśúṣe vásūni códad rā́dʰa úpastutaś cid arvā́k //

Line : 5  Pada: e     svādór ittʰā́ viṣūváto mádʰvaḥ pibanti gauryàḥ /

Line : 6  Pada: f     yā́ índreṇa sayā́varīr dásrā mádanti śobʰáse

Pada: g     vásvīr ánu svarā́jyam //

Line : 7  Pada: h     yudʰmásya te vr̥ṣabʰásya svarā́jña ugrásya yū́naḥ stʰávirasya gʰŕ̥ṣveḥ /

Line : 8  Pada: i     ájūryato vajríṇo vīryā̀ṇī́ndraḥ śrutásya maható mahā́ni //

Line : 9  Pada: j     idáṃ námo vr̥ṣabʰā́ya svarā́jña uktʰáśuṣmāya tavasé 'vāci /

Line : 10  Pada: k     asmínn indra vr̥jáne sárvavīrāḥ smát sūríbʰis táva śármant syāma //

Line : 11  Pada: l     asmā́kam índraḥ sámr̥teṣu dʰvajéṣu //

Line : 12  Pada: m     ādityā́nām ávasā nū́tanena sakṣīmáhi śármaṇā śáṃtamena /

Line : 13  Pada: n     anāgāstvé adititvé turā́sa imám̐ yajñáṃ dadʰatu śróṣamāṇāḥ //

Line : 14  Pada: o     ná dakṣiṇā́ vícikite ná savyā́ ná prācī́nam ādityā nótá paścā́ /

Line : 15  Pada: p     pākyā̀ cid vasavo dʰīryā̀ cid yuṣmā́nīto ábʰayaṃ jyótir aśyām //

Page: 239  
Line : 1  Pada: q     dʰāráyantaḥ //

Line : 2  Pada: r     tisró bʰū́mīr dʰārayam̐s trī́nr utá dyū́m̐s trī́ṇi vratā́ vidátʰe antár eṣām /

Line : 3  Pada: s     r̥ténādityā máhi vo mahitváṃ tád aryaman varuṇa mitra cā́ru //

Line : 4  Pada: t     yajñó devā́nāṃ prátyetu sumnám //

Line : 5  Pada: u     śúcir apáḥ sūyávasā ádabdʰā úpakṣayanti vr̥ddʰávayāḥ suvī́raḥ /

Line : 6  Pada: v     nákiṣ ṭáṃ gʰnanty ántito ná dūrā́d yá ādityā́nāṃ bʰávati práṇītau //

Line : 7  Pada: w     ādityó devá údagāt purástād víśvā bʰūtā́ni práti modámānaḥ /

Line : 8  Pada: x     tásya devā́ḥ prasavám̐ yanti sárve yátrāsya nā́ma paramáṃ gúhā vidúḥ //

Line : 9  Pada: y     yásya bʰā́nti ketávo yásya raśmáyo yásyemā́ víśvā bʰúvanāni sárvā /

Line : 10  Pada: z     tásyādityásya prasaváṃ manāmahe yás téjasā pratʰamajā́ vibʰā́ti //

Line : 11  Pada: aa     víbʰāti ketúr aruṇáḥ purástād ādityó víśvā bʰúvanāni sárvā /

Line : 12  Pada: ab     sugáṃ nú pántʰām ánveti prajānán pitā́ devā́nām ásuro vipaścít //

Line : 13  Pada: ac     vraténa yám̐ vratíno vardʰáyanti devā́ manuṣyā̀ḥ pitáraś ca sárve /

Line : 14  Pada: ad     tásyādityásya prasaváṃ manāmahe yás téjasā pratʰamajā́ vibʰā́ti //

Line : 15  Pada: ae     ādityáḥ śukrá údagāt purástāj jyótiḥ kr̥ṇván ví támo bā́dʰamānaḥ /

Line : 16  Pada: af     ābʰā́samānaḥ pradíśo nú sárvā bʰadrásya kartā́ rócamānā ā́gāt //

Line : 17  Pada: ag     yadéd enam ádadʰur yajñíyāso diví devā́ḥ sū́ryam āditeyám /

Line : 18  Pada: ah     yadā́ cariṣṇū́ mitʰunā́ ábʰūtām ā́d ít prā́paśyan bʰúvanāni víśvā //


Anuvaka: 15  
Page: 240  
Line : 1  Pada: a     vayám u tvā gr̥hapate janānām ágne ákarma samídʰā br̥hántam /

Line : 2  Pada: b     astʰūrí no gā́rhapatyāni santu tigména nas téjasā sám̐śiśādʰi //

Line : 3  Pada: c     ágne sá kṣeṣad r̥tapā́ r̥tejā́ urú jyótir naśate devayúṣ ṭe /

Line : 4  Pada: d     yáṃ tváṃ mitréṇa váruṇaḥ sajóṣā déva pā́si tyájasā mártam ám̐haḥ //

Line : 5  Pada: e     téjiṣṭʰā yásyāratír vanerā́ṭ todó ádʰvan ná vr̥dʰasānó adyaut /

Line : 6  Pada: f     adrogʰó ná dravitā́ cetati tmánn ámartyo 'vartrá óṣadʰīṣu //

Line : 7  Pada: g     ā́ yád iṣé nr̥pátiṃ téjā ā́naṭ śúci réto níṣiktaṃ dyaúr abʰī́ke /

Line : 8  Pada: h     agníḥ śárdʰam anavadyám̐ yúvānam̐ svādʰyàṃ janayat sūdáyac ca //

Line : 9  Pada: i     sá téjīyasā mánasā tvóta utá śikṣa svapatyásya śikṣóḥ /

Line : 10  Pada: j     ágne rāyó nŕ̥tamasya prábʰūtau bʰūyā́ma te suṣṭutáyaś ca vásvaḥ //

Line : 11  Pada: k     sá íd ásteva prátidʰād asiṣyáñ śíśīta téjó 'yaso ná dʰā́rām /

Line : 12  Pada: l     citrádʰrajatir aratír yó aktór vér ná druṣádvā ragʰupátmajam̐hāḥ //

Line : 13  Pada: m     havyavā́ḍ agnír ajáraḥ pitā́ naḥ //

Line : 14  Pada: n     mátʰīd yád īm̐ viṣṭó mātaríśvā hótāram̐ viśvā́psum̐ viśvádevyam /

Page: 241  
Line : 1  Pada: o     ní yáṃ dadʰúr manuṣyā̀su vikṣú svàr ṇá citrám̐ vápuṣe vibʰā́vam //

Line : 2  Pada: p     ayám̐ sá yásya śármann ávobʰir agnér édʰate jaritā́bʰíṣṭau /

Line : 3  Pada: q     jyéṣṭʰebʰir yó bʰānúbʰir r̥bʰūṇā́ṃ paryéti párivīto vibʰā́vā //

Line : 4  Pada: r     ádidyutat sv ápāko vibʰā́vā́gne yájasva ródasī urūcī́ /

Line : 5  Pada: s     āyúṃ ná yáṃ námasā rātáhavyā añjánti suprayásaṃ páñca jánāḥ //

Line : 6  Pada: t     sá no vibʰā́vā cakṣáṇir ná vástor agnír vandā́ru védyaś cáno dʰāt /

Line : 7  Pada: u     viśvā́yur yó amŕ̥to mártyeṣu páry ábʰūd átitʰir jātávedāḥ //

Line : 8  Pada: v     yó bʰānúbʰir vibʰā́vā vibʰā́ty agnír devébʰir r̥tā́vājasraḥ /

Line : 9  Pada: w     ā́ yó vivā́ya sakʰyā́ sákʰibʰyó 'parihvr̥to átyo ná sáptiḥ //

Line : 10  Pada: x     yád agna eṣā́ sámitir bʰávāti devī́ devéṣu yajatā́ yajatra /

Line : 11  Pada: y     rátnā ca yád vibʰájāsi svadʰāvo bʰāgáṃ no átra vásumantam̐ vītāt //

Line : 13  Pada: z     etā́ te agna ucátʰāni védʰo júṣṭāni santu mánase hr̥dé ca /

Line : 14  Pada: aa     śakéma rāyáḥ sudʰúro yámaṃ té 'dʰi śrávo devábʰaktaṃ dádʰānāḥ //

Line : 15  Pada: ab     ví pŕ̥kṣo agne magʰávāno aśyur ví sūráyo dádato víśvam ā́yuḥ /

Page: 242  
Line : 1  Pada: ac     sanéma vā́jam̐ samitʰéṣv aryó bʰāgáṃ devéṣu śrávase dádʰānāḥ //

Line : 2  Pada: ad     ā́ no gahi sakʰyébʰiḥ śivébʰir mahā́n mahī́bʰir ūtíbʰiḥ saraṇyán /

Line : 3  Pada: ae     asmé rayíṃ bahulám̐ sáṃtarutram̐ suvā́caṃ bʰāgám̐ yaśásaṃ kr̥dʰī naḥ //

Line : 4  Pada: af     kurmás tā ā́yur ajáram̐ yád agne yátʰā yuktó jātavedo ná ríṣyāḥ /

Line : 5  Pada: ag     átʰā vahāsi sumanasyámāno bʰāgáṃ devébʰyo havíṣaḥ sujāta //

Line : 6  Pada: ah     havíṣīva bʰájamāno nā ā́bʰāg devébʰyaḥ śikṣann utá mā́nuṣebʰyaḥ /

Line : 7  Pada: ai     tváṃ devā́nām asi yahva hótā sá enān yakṣīṣitó yájīyān //


Anuvaka: 16  
Line : 8  Pada: a     ágne dā́s \

Pada: b     dā́ no agne \

Pada: c     agnír dadāti \

Pada: d     ánnapate ánnasya no dehi \

Pada: e     agnínā rayím aśnavat

Line : 9  Pada: f     sám̐sam íd yuvase vr̥ṣan

Pada: g     yā́s te //

Line : 10  Pada: h     yamó no gātúṃ pratʰamó viveda naíṣā́ gávyūtir ápabʰartavā́ u /

Line : 11  Pada: i     yátrā naḥ pū́rve pitáraḥ pareyúr enā́ jajñānā́ḥ patʰyā̀ ánu svā́ḥ //

Line : 12  Pada: j     préhi préhi patʰíbʰiḥ pūrvébʰir yátrā naḥ pū́rve pitáraḥ páretāḥ /

Line : 13  Pada: k     ubʰā́ rā́jānā svadʰáyā mádantā yamáṃ paśyāsi váruṇaṃ ca devám //

Line : 14  Pada: l     áṅgirobʰir ā́gahi yajñíyebʰir yáma vairūpaír ihá mādayasva /

Page: 243  
Line : 1  Pada: m     vívasvantam̐ huve yáḥ pitā te 'smín yajñé barhíṣy ā́ niṣádya //

Line : 2  Pada: n     imám̐ yama prastarám ā́ hí sīdā́ṅgirobʰiḥ pitŕ̥bʰiḥ sam̐vidānáḥ /

Line : 3  Pada: o     ā́ tvā mántrāḥ kaviśastā́ vahantv enā́ rājan havíṣā mādayasva //

Line : 4  Pada: p     mā́talī kavyaír yamó áṅgirobʰir bŕ̥haspátir ŕ̥kvabʰir vāvr̥dʰānáḥ /

Line : 5  Pada: q     yā́m̐ś ca devā́ vāvr̥dʰúr yé ca devā́nt svā́hānyé svadʰáyānyé madanti //

Line : 6  Pada: r     pareyivā́m̐saṃ praváto mahī́r ánu bahúbʰyaḥ pántʰām anupaspaśānám /

Line : 7  Pada: s     vaivasvatám̐ saṃgámanaṃ jánānām̐ yamám̐ rā́jānam̐ havíṣā duvasya //

Line : 8  Pada: t     yā́s te pūṣan nā́vo antáḥ samudré hiraṇyáyīr antárikṣe cáranti /

Line : 9  Pada: u     tā́bʰir yāsi dūtyàm̐ sū́ryasya kā́mena kr̥táḥ śráva icʰámānaḥ //

Line : 10  Pada: v     śukráṃ te anyád yajatáṃ te anyát //

Line : 11  Pada: w     pūṣémā́ ā́śā ánuveda sárvāḥ só asmáṃ ábʰayatamena meṣat /

Line : 12  Pada: x     svastidā́ ā́gʰr̥ṇiḥ sárvavīró 'prayucʰan purá etu prajānán //

Line : 13  Pada: y     prápatʰe patʰā́m ájaniṣṭa pūṣā́ prápatʰe diváḥ prapatʰe pr̥tʰivyā́ḥ /

Line : 14  Pada: z     ubʰé abʰí priyátame sadʰástʰe ā́ ca párā ca carati prajānán //

Line : 15  Pada: aa     pūṣā́ subándʰur divá ā́ pr̥tʰivyā́ iḍás pátir magʰávā dasmávarcāḥ /

Page: 244  
Line : 1  Pada: ab     yáṃ devā́so ádaduḥ sūryā́yai kā́mena kr̥táṃ tavásam̐ sváñcam //

Line : 2  Pada: ac     ajā́śvaḥ paśupā́ vā́japastyo dʰiyaṃjinvó bʰúvane víśve árpitaḥ /

Line : 3  Pada: ad     áṣṭrāṃ pūṣā́ śitʰirā́m udvárīvr̥jat saṃcákṣāṇo bʰúvanā devá īyate //


Anuvaka: 17  
Line : 4  Pada: a     yád devā devahéḍanam̐ yád vācā́nr̥tam ódima /

Line : 5  Pada: b     ādityā́s tásmān muñcatártasya tv ènam ā́mútaḥ //

Line : 6  Pada: c     devā́ jīvánakāmyā yád vācā́nr̥tam ódima /

Line : 7  Pada: d     tásmān na ihá muñcata víśve devāḥ sajoṣasaḥ //

Line : 8  Pada: e     r̥téna dyā́vāpr̥tʰivī́ r̥téna tvám̐ sárasvati /

Line : 9  Pada: f     kr̥tā́n naḥ pāhy ám̐haso yát kiṃcā́nr̥tam ódima //

Line : 10  Pada: g     indrāgnī́ mitrā́váruṇau sómo dʰātā́ bŕ̥haspátiḥ /

Line : 11  Pada: h     té no muñcantv énaso yát kiṃcā́nr̥tam ódima //

Line : 12  Pada: i     sajātaśam̐sā́d utá jāmiśam̐sā́j jyā́yasaḥ śam̐sā́d utá vā kánīyasaḥ /

Line : 14  Pada: j     ánādʰr̥ṣṭaṃ devákr̥tam̐ yád énas tásmāt tvám asmā́n jātavedo mumugdʰi //

Page: 245  
Line : 1  Pada: k     yád antárikṣaṃ pr̥tʰivī́m utá dyā́m̐ yán mātáraṃ pitáram̐ vā jihim̐simá /

Line : 2  Pada: l     agnír nas tásmād énaso gā́rhapatyaḥ prámuñcatu duritā́ni yā́ni kā́ni ca cakr̥má //

Line : 4  Pada: m     yéna tritó arṇavā́n nírbabʰūva yéna sū́ryaṃ támaso níramoci /

Line : 5  Pada: n     yénéndro víśvā ájahād árātīs ténāháṃ jyótiṣā jyótir ānaśāná ayākṣi //

Line : 7  Pada: o     yád daívyam ŕ̥ṇam aháṃ babʰū́va dʰípsyam̐ vā sáṃcakara janébʰyaḥ /

Line : 8  Pada: p     agnír nas tásmād índraś ca sam̐vidānaú prámuñcatām //

Line : 9  Pada: q     yát kúsīdam ápratītaṃ máyehá yéna yamásya nidʰínā cárāvaḥ /

Line : 10  Pada: r     etát tád agne ánr̥ṇo bʰavāmi jī́vann evá práti hastā́nr̥ṇāni //

Line : 11  Pada: s     yád dʰástābʰyāṃ cakará kílbiṣāny akṣā́ṇām̐ vagmúm ávajigʰram ā́paḥ /

Line : 12  Pada: t     ugráṃ paśyā́c ca rāṣṭrabʰŕ̥c ca tā́ny apsarásām ánudattā́nr̥ṇāni //

Line : 13  Pada: u     ugráṃ paśyéd rāṣṭabʰŕ̥t kílbiṣāni yád akṣávr̥ttam ánudattam etát /

Line : 14  Pada: v     ném na r̥ṇā́n r̥ṇávān ī́psamāno yamásya loké nidʰír ájarāya //

Page: 246  
Line : 1  Pada: w     imáṃ me varuṇa śrudʰī hávam adyā́ ca mr̥ḍaya /

Line : 2  Pada: x     tvā́m avasyúr ā́cake //

Line : 3  Pada: y     tát tvā yāmi bráhmaṇā vándamānas tád ā́śāste yájamāno havírbʰiḥ /

Line : 4  Pada: z     áheḍamāno varuṇehá bodʰy úruśam̐sa mā́ nā ā́yuḥ prámoṣīḥ //

Line : 5  Pada: aa     úd uttamám̐ varuṇa pā́śam asmád ávādʰamám̐ ví madʰyamám̐ śratʰāya /

Line : 6  Pada: ab     átʰā vayám āditya vraté távā́nāgaso áditaye syāma //

Line : 7  Pada: ac     áva te héḍo varuṇa námobʰir áva yajñébʰir īmahe havírbʰiḥ /

Line : 8  Pada: ad     kṣáyann asmábʰyam asura pracetā rā́jann énām̐si śiśratʰaḥ kr̥tā́ni //

Line : 9  Pada: ae     tváṃ no agne váruṇasya vidvā́n devásya héḍó 'vayāsisīṣṭʰāḥ /

Line : 10  Pada: af     yájiṣṭʰo váhnitamaḥ śóśucāno víśvā dvéṣām̐si prámumugdʰy asmát //

Line : 11  Pada: ag     sá tváṃ no agne 'vamó bʰavotī́ nédiṣṭʰo asyā́ uṣáso vyùṣṭau /

Line : 12  Pada: ah     ávayakṣva no váruṇam̐ rárāṇo vīhí mr̥ḍīkám̐ suhávo na edʰi //

Line : 13  Pada: ai     sáṃkasuko víkasuko nírr̥to yáś ca nísvanaḥ /

Line : 14  Pada: aj     té 'smad yakṣmám ánāgaso dūrā́d dūrám acīcatam //

Line : 15  Pada: ak     nír yákṣmam ácīcate kr̥tyā́ṃ nírr̥tiṃ cakāra /

Page: 247  
Line : 1  Pada: al     téna yó 'smat samr̥cʰā́tai tám asmaí prásuvāmasi //

Line : 2  Pada: am     duḥśam̐sānuśam̐sā́bʰyāṃ gʰanénānugʰanéna ca /

Line : 3  Pada: an     téna yó 'smat samr̥cʰā́tai tám asmaí prásuvāmasi //

Line : 4  Pada: ao     sám̐ várcasā páyasā sáṃ tanū́bʰir áganmahi mánasā sám̐ śivéna /

Line : 5  Pada: ap     tváṣṭā sudátro vídadʰātu rā́yó 'nu no mārṣṭu tanvò yád víriṣṭam //


Anuvaka: 18  
Line : 6  Pada: a     śúcī vo havyā́ marutaḥ śúcīnām̐ śúcim̐ hinomy adʰvarám̐ śúcibʰyaḥ /

Line : 7  Pada: b     r̥téna satyám r̥tasā́pa āyañ śúcijanmānaḥ śúcayaḥ pāvakā́ḥ //

Line : 8  Pada: c     yā́ vaḥ śárma śaśamānā́ya sánti //

Line : 9  Pada: d     ám̐seṣv ā́ marutaḥ kʰādáyo vo vákṣaḥsu rukmā́ upaśiśriyāṇā́ḥ /

Line : 10  Pada: e     ví vidyúto ná vr̥ṣṭíbʰī rucānā́ ánu svadʰā́m ā́yudʰair yácʰamānāḥ //

Line : 11  Pada: f     r̥ṣṭáyo vo maruto ám̐sayor ádʰi //

Line : 12  Pada: g     imé turáṃ marúto rāmayantīmé sáhaḥ sáhasā ā́namanti /

Line : 13  Pada: h     imé śám̐sam̐ vanuṣyató nípānti gurú dvéṣo áraruṣe dadʰanti //

Line : 14  Pada: i     arā́ ivéd ácaramā áheva práprajāyante ákavā máhobʰiḥ //

Line : 15  Pada: j     pŕ̥śneḥ putrā́ upamā́so rábʰiṣṭʰāḥ sváyā matyā́ marútaḥ sáṃmimikṣuḥ //

Page: 248  
Line : 1  Pada: k     ágnīṣomā imám \

Pada: l     yuvám etā́ni //

Line : 2  Pada: m     ágnīṣomā yó adyá vām idám̐ vácaḥ saparyáti /

Line : 3  Pada: n     tásmai dʰattam̐ suvī́ryaṃ gávāṃ póṣam̐ sváśvyam //

Line : 4  Pada: o     ā́nyáṃ divó mātaríśvā jabʰārā́matʰnād anyáṃ pári śyenó ádreḥ /

Line : 5  Pada: p     ágnīṣomā bráhmaṇā vāvr̥dʰānórúm̐ yajñā́ya cakratʰur ulokám //

Line : 6  Pada: q     ágnīṣomā yá ā́hutim̐ yó vāṃ dā́śād dʰavíṣkr̥tim /

Line : 7  Pada: r     sá prajáyā suvī́ryam̐ víśvam ā́yur vyàśnavat //

Line : 8  Pada: s     ágnīṣomā havíṣaḥ prástʰitasya vītám̐ háryatam̐ vr̥ṣaṇā juṣétʰām /

Line : 9  Pada: t     suśármāṇā svávasā hí bʰūtám átʰā dʰattam̐ yájamānāya śám̐ yóḥ //

Line : 10  Pada: u     ā́ carṣaṇiprā́ vr̥ṣabʰó jánānām̐ rā́jā kr̥ṣṭīnā́ṃ puruhūtá índraḥ /

Line : 11  Pada: v     stutáḥ śravasyánn ávasópa madríg yuktvā́ hárī vŕ̥ṣaṇā́yāhy arvā́k //

Line : 12  Pada: w     vivéṣa yán mā dʰiṣáṇā jajā́na //

Line : 13  Pada: x     tám̐ sadʰrī́cīr ūtáyo vŕ̥ṣṇyāni paum̐syāni niyútaḥ saścur índram /

Line : 14  Pada: y     samudráṃ ná síndʰava uktʰáśuṣmā uruvyácasaṃ gírā ā́viśanti //

Line : 15  Pada: z     satyám ít tán ná tvā́vaṃ anyò 'stī́ndra devó ná mártyo jyā́yān /

Line : 16  Pada: aa     áhann áhiṃ pariśáyānam árṇó 'vāsr̥jo apó ácʰā samudrám //

Line : 17  Pada: ab     prásasāhiṣe puruhūta śátrūn //

Page: 249  
Line : 1  Pada: ac     sá śévr̥dʰam ádʰidʰā dyumnám asmé máhi kṣatráṃ janāṣā́ḍ indra távyam /

Line : 2  Pada: ad     rákṣā ca no magʰónaḥ pāhí sūrī́n rāyé ca naḥ svapatyā́ iṣé dʰāḥ //



This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.