TITUS
Black Yajur-Veda: Maitrayani-Samhita
Part No. 53
Previous part

Prapathaka: 13  
Anuvaka: 1  
Page: 199  
Line : 1  Pada: a     prá deváṃ devyā́ dʰiyéty aṣṭaú //

Line : 2  Pada: b     añjánti tvā́m adʰvaré devayánto vánaspate mádʰunā daívyena /

Line : 3  Pada: c     yád ūrdʰvás tíṣṭʰā dráviṇehá dʰattād yád vā kṣáyo mātúr asyā́ upástʰe //

Line : 4  Pada: d     úñśrayasva vanaspate várṣman pr̥tʰivyā́ ádʰi * /
      FN emended. Ed.: adʰi.

Line : 5  Pada: e     súmitī mīyámāno várco dʰā yajñávāhase //

Line : 6  Pada: f     sámiddʰasya śráyamāṇaḥ purástād bráhma vanvānó ajáram̐ suvī́ram /

Line : 7  Pada: g     āré asmád ámatiṃ bā́dʰamānā úñśrayasva mahaté saúbʰagāya //

Line : 8  Pada: h     ūrdʰvá ū ṣú ṇa ūtáye //

Line : 9  Pada: i     ūrdʰvó naḥ pāhy ám̐haso ní ketúnā víśvam̐ sám atríṇaṃ daha /

Line : 10  Pada: j     kr̥dʰī́ na ūrdʰvā́ñ carátʰāya jīváse vidā́ devéṣu no dúvaḥ //

Line : 11  Pada: k     jātó jāyate sudinatvé áhnām̐ samaryá ā́ vidatʰé várdʰamānaḥ /

Line : 12  Pada: l     punánti dʰī́rā apáso manīṣā́ devayā́ víprā údiyarti vā́cam //

Line : 13  Pada: m     yúvā suvā́sāḥ párivītā ā́gāt sá u śréyān bʰavati jā́yamānaḥ /

Line : 14  Pada: n     táṃ dʰī́rāsaḥ kaváyā únnayanti svādʰyò mánasā devayántaḥ //

Line : 15  Pada: o     abʰí tvā deva savitar íti tráyodaśa



Anuvaka: 2  
Page: 200  
Line : 1  Pada: a     hótā yakṣad agním̐ samídʰā suṣamídʰā sámiddʰaṃ nā́bʰā pr̥tʰivyā́ḥ saṃgatʰé vāmásya várṣman divá iḍás padé

Line : 2  Pada: b     vétv ā́jyasya

Pada: c     hótar yája

Pada: d     hótā yakṣat tánūnápātam áditer gárbʰaṃ bʰúvanasya gopā́m \

Line : 3  Pada: e     mádʰvādyá devó devébʰyo devayā́nān patʰó anaktu

Line : 4  Pada: f     vétv ā́jyasya

Pada: g     hótar yája

Pada: h     hótā yakṣan nárāśám̐saṃ nr̥śastáṃ nŕ̥̄m̐ṣpraṇetram \

Line : 5  Pada: i     góbʰir vapā́vānt syā́d vīraíḥ śáktīvān rátʰaiḥ pratʰamayā́vā

Pada: j     híraṇyaiś candrī́

Pada: k     vétv ā́jyasya

Line : 6  Pada: l     hótar yája

Pada: m     hótā yakṣad agním iḍá īḍitó devó deváṃ ā́ ca vakṣat \

Line : 7  Pada: n     dūtó havyavā́ḍ ámūrā úpemám̐ yajñám úpemā́ṃ devó deváhūtim * avatu
      FN emended. Ed.: deváhatim.

Pada: o     vétv ā́jyasya

Line : 8  Pada: p     hótar yája

Pada: q     hótā yakṣad barhíḥ suṣṭárīmórṇamradās \

Pada: r     asmín yajñé ví ca prá ca pratʰatām̐ svāsastʰáṃ devébʰyas \

Line : 9  Pada: s     ém enad adyá vásavo rudrā́ ādityā́ḥ svadantu

Line : 10  Pada: t     priyám índrasyāstu

Pada: u     vétv ā́jyasya

Pada: v     hótar yája

Pada: w     hótā yakṣad dúra r̥ṣvā́ḥ kavaṣyó kóśadʰāvanīs \

Line : 11  Pada: x     úd ā́tābʰir jíhatām̐ ví pákṣobʰiḥ śrayantām \

Pada: y     suprāyaṇā́ asmín yajñé víśrayantām r̥tāvŕ̥dʰas \

Line : 12  Pada: z     vyántv ā́jyasya

Pada: aa     hótar yája

Pada: ab     hótā yakṣad uṣā́sānáktā br̥hatī́ supéśasā nŕ̥̄m̐ṣ pátibʰyo yóniṃ kr̥ṇvāné

Line : 13  Pada: ac     sam̐smáyamāne índreṇa devaír édáṃ barhíḥ sīdatām \

Line : 14  Pada: ad     vītā́m ā́jyasya

Pada: ae     hótar yája

Pada: af     hótā yakṣad daívyā hótārā mandrā́ pótārā kavī́ prácetasā

Line : 15  Pada: ag     svìṣṭam adyā́nyáḥ kárad iṣā́ svabʰigūrtám anyá ūrjā́

Page: 201  
Line : 1  Pada: ah     sátavasemám̐ yajñáṃ diví devéṣu dʰattām \

Pada: ai     vītā́m ā́jyasya

Line : 2  Pada: aj     hótar yája

Pada: ak     hótā yakṣat tisró devī́r apásām apástamas \

Pada: al     ácʰidram adyédám ápas tanvatām \

Line : 3  Pada: am     devébʰyo devī́r devám ápas \

Pada: an     vyántv ā́jyasya

Pada: ao     hótar yája

Pada: ap     hótā yakṣat tváṣṭāram áciṣṭum ápākam̐ retodʰā́m̐ víśravasam̐ yaśodʰā́ṃ pururū́pam akāmakarśanam \

Line : 5  Pada: aq     supóṣaḥ póṣaiḥ syā́t suvī́ro vīraís \

Pada: ar     vétv ā́jyasya

Pada: as     hótar yája

Line : 6  Pada: at     hótā yakṣad vánaspátim upā́vasrakṣad dʰiyó joṣṭā́ram \

Pada: au     śaśáman náraḥ

Pada: av     svádāt svádʰitis \

Line : 7  Pada: aw     r̥tutʰā́dyá devó devébʰyo havyā́vāṭ \

Pada: ax     vétv ā́jyasya

Pada: ay     hótar yája //


Anuvaka: 3  
Line : 8  Pada: a     sámiddʰo adyá mánuṣo duroṇé devó devā́n yajasi jātavedaḥ /

Line : 9  Pada: b     ā́ ca vaha mitramahaś cakitvā́n tváṃ dūtáḥ kavír asi prácetāḥ //

Line : 10  Pada: c     tánūnapāt patʰá r̥tásya yā́nān mádʰvā samañjánt svadayā sujihva /

Line : 11  Pada: d     mánmāni dʰībʰír utá yajñám r̥ndʰán devatrā́ ca kr̥ṇuhy adʰvaráṃ naḥ //

Line : 12  Pada: e     nárāśam̐sasya mahimā́nam eṣām úpastoṣāma yajatásya yajñaíḥ /

Line : 13  Pada: f     yé sukrátavaḥ śúcayo dʰiyaṃdʰā́ḥ svádantu devā́ ubʰáyāni havyā́ //

Line : 14  Pada: g     ājúhvānā ī́ḍyo vándyaś cā́yāhy agne vásubʰiḥ sajóṣāḥ /

Line : 15  Pada: h     tváṃ devā́nām asi yahva hótā sá enān yakṣīṣitó yájīyān //

Page: 202  
Line : 1  Pada: i     prācī́naṃ barhíḥ pradíśā pr̥tʰivyā́ vástor asyā́ vr̥jyate ágre áhnām /

Line : 2  Pada: j     vy ù pratʰate vitarám̐ várīyo devébʰyo áditaye syonám //

Line : 3  Pada: k     vyácasvatīr urviyā́ víśrayantāṃ pátibʰyo ná jánayaḥ śúmbʰamānāḥ /

Line : 4  Pada: l     dévīr dvāro br̥hatīr viśvaminvā devébʰyo bʰavata suprāyaṇā́ḥ //

Line : 5  Pada: m     ā́ suṣváyantī yajaté úpāke uṣā́sānáktā sadatāṃ ní yónau /

Line : 6  Pada: n     divyé yóṣaṇe br̥hatī́ surukmé ádʰi śríyam̐ śukrapíśaṃ dádʰāne //

Line : 7  Pada: o     daívyā hótārā pratʰamā́ suvā́cā mimānā yajñáṃ mánuṣo yájadʰyai /

Line : 8  Pada: p     pracodáyantā vidátʰeṣu kārū́ prācī́naṃ jyótiḥ pradíśā diśántā //

Line : 9  Pada: q     ā́ no yajñáṃ bʰā́ratī tū́yam etv íḍā manuṣvád ihá cetáyantī /

Line : 10  Pada: r     tisró devī́r barhír édám̐ syonám̐ sárasvatī svápasaḥ sadantu //

Line : 11  Pada: s     yá imé dyā́vāpr̥tʰivī́ jántrī rūpaír ápim̐śad bʰúvanāni víśvā /

Line : 12  Pada: t     tám adyá hotar iṣitó yájīyān deváṃ tváṣṭāram ihá yakṣi vidvā́n //

Line : 13  Pada: u     upā́vasr̥ja tmányā samañján devā́nāṃ pā́tʰa r̥tutʰā́ havī́m̐ṣi /

Line : 14  Pada: v     vánaspátiḥ śamitā́ devó agníḥ svádantu havyáṃ mádʰunā gʰr̥téna //


Anuvaka: 4  
Page: 203  
Line : 1  Pada: a     agnír hótā no adʰvaré vājī́ sán páriṇīyate /

Line : 2  Pada: b     devó devéṣu yajñíyaḥ //

Line : 3  Pada: c     pári triviṣṭy àdʰvarám̐ yā́ty agnī́ ratʰī́r iva /

Line : 4  Pada: d     ā́ devéṣu práyo dádʰat //

Line : 5  Pada: e     pári vā́japatiḥ kavíḥ //

Pada: f     ájaid agnír ásanad vā́jam \

Pada: g     ní devó devébʰyo havyā́vāṭ

Line : 6  Pada: h     prā́ñjobʰir hinvānás \

Pada: i     dʰénābʰiḥ kálpamānas \

Pada: j     yajñásyā́yuḥ pratirán \

Pada: k     upapréṣya hotar havyā́ devébʰyas \

Line : 7  Pada: l     daívyāḥ śamitāra utá manuṣyā ā́rabʰadʰvam

Pada: m     úpanayata médʰyā dúras \

Line : 8  Pada: n     āśā́sānā médʰapataye médʰam \

Pada: o     prā́smā agníṃ bʰarata

Pada: p     str̥ṇītá barhís \

Line : 9  Pada: q     ánv enaṃ mātā́ mányatām ánu pitā́nu bʰrā́tā sáṃgarbʰyas \

Pada: r     ánu sákʰā sáyūtʰyas \

Line : 10  Pada: s     udīcī́nām̐ asya padó nídʰattāt

Pada: t     sū́ryaṃ cákṣur gamayatāt\

Pada: u     vā́taṃ prāṇám anvávasr̥jatāt \

Line : 11  Pada: v     antárkṣam ásum \

Pada: w     pr̥tʰivī́m̐ śárīram

Pada: x     ekadʰā́sya tvácam ā́cʰyatāt

Line : 12  Pada: y     purā́ nā́bʰyā apiśáso vapā́m útkʰidatāt \

Pada: z     antár evóṣmā́ṇam̐ vārayatāt \

Line : 13  Pada: aa     śyenám asya vákṣaḥ kr̥ṇutāt

Pada: ab     praśásā bāhū́

Pada: ac     śalā́ doṣáṇī

Pada: ad     kaśyápevā́m̐sā \

Pada: ae     ácʰidre śróṇī

Line : 14  Pada: af     kaváṣorū́

Pada: ag     srekáparṇāṣṭʰīvántā

Pada: ah     ṣáḍvim̐śatir asya váṅkrayas

Pada: ai     tā́ anuṣṭʰuyóccyāvayatāt \

Page: 204  
Line : 1  Pada: aj     gā́traṃgātram asyā́nūnaṃ kr̥ṇutāt \

Pada: ak     ūvadʰyagoháṃ pā́rtʰivaṃ kʰanatāt \

Line : 2  Pada: al     asnā́ rákṣaḥ sám̐sr̥jatāt \

Pada: am     vaniṣṭúm asya mā́ rāviṣṭa \

Pada: an     úrūkaṃ mányamānās \

Line : 3  Pada: ao     néd vas toké tánaye rávitā rávat \

Pada: ap     ádʰrigo śamīdʰvám \

Pada: aq     suśámi śamīdʰvam \

Pada: ar     śamīdʰvám ádʰrigo //

Line : 5  Pada: as     ádʰriguś ca vípāpaś ca devā́nām̐ śamitā́rau /

Line : 6  Pada: at     tā́ enaṃ pravidvā́m̐sau śrapayatam̐ yátʰāsya śrápaṇaṃ tátʰā //


Anuvaka: 5  
Line : 7  Pada: a     juṣásva saprátʰastamam //

Line : 8  Pada: b     imáṃ no yajñám amŕ̥teṣu dʰehīmā́ havyā́ jātavedo juṣasva /

Line : 9  Pada: c     stokā́nām agne médaso gʰr̥tásya hótaḥ prā́śāna pahratʰamó niṣádya //

Line : 10  Pada: d     gʰr̥távantaḥ pāvaka te stokā́ḥ ścotanti médasaḥ /

Line : 11  Pada: e     svádʰarman devávītaye śréṣṭʰaṃ no dʰehi vā́ryam //

Line : 12  Pada: f     túbʰyam̐ stokā́ gʰr̥taścútó 'gne víprāya santya /

Line : 13  Pada: g     ŕ̥ṣiḥ śréṣṭʰaḥ sámidʰyase yajñásya prāvitā́ bʰava //

Line : 14  Pada: h     túbʰyam̐ ścotanty adʰrigo śacīvaḥ stokā́so agne médaso gʰr̥tásya /

Line : 15  Pada: i     kaviśastó br̥hatā́ bʰānúnā́gā havyā́ juṣasva medʰira //

Line : 16  Pada: j     ójiṣṭʰaṃ te madʰyató médā údbʰr̥taṃ prá te vayáṃ dadāmahe /

Page: 205  
Line : 1  Pada: k     ścótanti te vaso stokā́ ádʰi tvací práti tā́n devaśó vihi //

Line : 2  Pada: l     hótā yakṣad agním̐ svā́hā \

Pada: m     ā́jyasya svā́hā

Pada: n     médasaḥ svā́hā

Pada: o     stokā́nām̐ svā́hā

Line : 3  Pada: p     svā́hākr̥tīnām̐ svā́hā

Pada: q     havyásūktīnām̐ svā́hā

Pada: r     devā́ ājyapā́ juṣāṇā́ agnā ā́jyasya vyantu

Line : 4  Pada: s     hótar yája //

Line : 5  Pada: t     sadyó jātó vyàmimīta yajñám agnír devā́nām abʰavat purogā́ḥ /

Line : 6  Pada: u     asyá hótuḥ pradíśy r̥tásya vācí svā́hākr̥tam̐ havír adantu devā́ḥ //

Line : 7  Pada: v     agnír vr̥trā́ṇi jaṅgʰanat //

Pada: w     hótā yakṣad agním ā́jyasya

Pada: x     juṣátām̐ havís \

Pada: y     hótar yája //

Line : 8  Pada: z     tvám̐ somāsi sátpatiḥ //

Pada: aa     hótā yakṣat sómam ā́jyasya

Pada: ab     juṣátām̐ havís \

Line : 9  Pada: ac     hótar yája //

Pada: ad     śúciṃ nú stómam //

Pada: ae     hótā yakṣad indrāgnī́ cʰā́gasya vapā́yā médasas \

Line : 10  Pada: af     juṣétām̐ havís \

Pada: ag     hótar yája //

Pada: ah     śnátʰad vr̥trám

Pada: ai     ubʰā́ vām indrāgnī //

Line : 11  Pada: aj     hótā yakṣad indrāgnī́ puroḍā́śasya

Pada: ak     juṣétām̐ havís \

Pada: al     hótar yája //

Pada: am     prá carṣaṇíbʰyas \

Line : 12  Pada: an     íḍām agne

Pada: ao     hótā yakṣad agníṃ puroḍā́śasya

Pada: ap     juṣátām̐ havís \

Pada: aq     hótar yája //

Line : 13  Pada: ar     agním̐ sudītím̐ sudŕ̥śaṃ gr̥ṇánto namasyā́mas tvéḍyaṃ jātavedaḥ /

Line : 14  Pada: as     tvā́ṃ dūtám aratím̐ havyavā́haṃ devā́ akr̥ṇvann amŕ̥tasya nā́bʰim //

Line : 15  Pada: at     íḍópahūtā \

Pada: au     úpahūtéḍā \

Pada: av     úpāsmáṃ íḍā hvayatām

Pada: aw     íḍópahūtā

Pada: ax     mānavī́ gʰr̥tápadī maitrāvaruṇī́ //

Line : 16  Pada: ay     bráhma devákr̥tam úpahūtam \

Pada: az     daívyā adʰvaryávā úpahūtā * *
      FN < úpahūtās
      FN emended. Ed.: upahūtā.

Pada: ba     úpahūtā manuṣyā̀s \

Page: 206  
Line : 1  Pada: bb     yá imám̐ yajñám ávān yé ca yajñápatim̐ várdʰān

Pada: bc     úpahūte dyā́vāpr̥tʰivī́ pūrvajé r̥tā́varī devī́ deváputre

Line : 2  Pada: bd     úpahūto 'yám̐ yájamānā úttarasyāṃ devayajyā́yām *
      FN emended. Ed.: devayājyā́yām

Line : 3  Pada: be     úpahūto bʰū́yasi haviḥkáraṇe

Pada: bf     divyé dʰā́mann úpahūtas \

Line : 4  Pada: bg     devā́ ma idám̐ havír juṣantām íti

Pada: bh     tásminn úpahūtaḥ //


Anuvaka: 6  
Line : 5  Pada: a     tvám̐ hy àgne pratʰamó manótāsyā́ dʰiyó ábʰavo dasma hótā /

Line : 6  Pada: b     tvám̐ sīm̐ vr̥ṣann akr̥ṇor duṣṭarītu sáho víśvasmai sáhase sáhadʰyai //

Line : 7  Pada: c     ádʰā hótā nyàsīdo yájīyān iḍás padá iṣáyann īḍyaḥ sán /

Line : 8  Pada: d     tvám̐ tvā náraḥ pratʰamáṃ devayánto mahó rāyé citáyanto ánugman //

Line : 9  Pada: e     vr̥téva yántaṃ bahúbʰir vásavyaìs tvé rayíṃ jāgr̥vā́m̐so ánugman /

Line : 10  Pada: f     rúśantam agníṃ darśatáṃ br̥hántam̐ vapā́vantam̐ viśváhā dīdivā́m̐sam //

Line : 11  Pada: g     padáṃ devásya námasā vyántaḥ śravasyávaḥ śráva āpann ámr̥ktam /

Line : 12  Pada: h     nā́māni cid dadʰire yajñíyāni bʰadrā́yāṃ te raṇayanta sáṃdr̥ṣṭau //

Line : 13  Pada: i     tvā́m̐ vardʰanti kṣitáyaḥ pr̥tʰivyā́ṃ tvā́m̐ rā́ya ubʰáyāso jánānām /

Line : 14  Pada: j     tváṃ trātā́ taraṇe cétyo bʰūḥ pitā́ mātā́ sádam ín mā́nuṣāṇām //

Line : 15  Pada: k     saparyéṇyaḥ sá priyó vikṣv àgnír hótā mandró níṣasādā yájīyān /

Page: 207  
Line : 1  Pada: l     táṃ tvā vayáṃ dámā ā́ dīdivā́m̐sam úpa jñubā́dʰo námasā sadema //

Line : 2  Pada: m     táṃ tvā vayám̐ sudʰyò návyam agne sumnāyáva īmahe devayántaḥ /

Line : 3  Pada: n     tvám̐ víśo anayo dī́dyāno divó agne br̥hatā́ rocanéna //

Line : 4  Pada: o     viśā́ṃ kavím̐ viśpátim̐ śáśvatīnāṃ nitóśanam̐ vr̥ṣabʰáṃ carṣaṇīnā́m /

Line : 6  Pada: p     prétīṣaṇim iṣáyantaṃ pāvakám̐ rā́jantam agním̐ yajatám̐ rayīṇā́m //

Line : 7  Pada: q     só agna īje śaśamé ca márto yás tā ā́naṭ samídʰā havyádātim /

Line : 8  Pada: r     yá ā́hutiṃ pári védā námobʰir víśvét sá vāmā́ dadʰate tvótaḥ //

Line : 9  Pada: s     asmā́ u te máhi mahé vidʰema námobʰir agne samídʰotá havyaíḥ /

Line : 10  Pada: t     védī sūno sahaso gīrbʰír uktʰaír ā́ te bʰadrā́yām̐ sumataú yatema //

Line : 11  Pada: u     ā́ yás tatántʰa ródasī ví bʰāsā́ śrávobʰiś ca śravasyàs tárutraḥ /

Line : 12  Pada: v     br̥hádbʰir vā́jaiḥ stʰávirebʰir asmé revádbʰir agne vitarám̐ víbʰāhi //

Line : 13  Pada: w     nr̥vád vaso sádam íd dʰehy asmé bʰū́ri tokā́ya tánayāya paśváḥ /

Line : 14  Pada: x     pūrvī́r íṣo br̥hatī́r āréagʰā asmé bʰadrā́ sauśravasā́ni santu //

Line : 15  Pada: y     purū́ṇy agne purudʰā́ tvāyā́ vásūni rājan vasútā te aśyām /

Line : 16  Pada: z     purū́ṇi hí tvé puruvāra sánty ágne vásu vidʰaté rā́jani tvé //


Anuvaka: 7  
Page: 208  
Line : 1  Pada: a     ā́ vr̥trahaṇā vr̥trahábʰiḥ śúṣmair índra yātáṃ námobʰir agne arvā́k /

Line : 2  Pada: b     yuvám̐ rā́dʰobʰir ákavebʰir indrā́gne asmé bʰavatam uttamébʰiḥ //

Line : 3  Pada: c     hótā yakṣad indrāgnī́ cʰā́gasya havíṣā ā́ttām adyá madʰyató médā údbʰr̥taṃ purā́ dvéṣobʰyaḥ purā́ paúruṣeyyā gr̥bʰó gʰastā́ṃ nūnáṃ gʰāséajrāṇām̐ yávasapratʰamānām̐ sumátkṣarāṇām̐ śatárudriyāṇām agniṣvāttā́nāṃ pī́vopavasanānāṃ pārśvatáḥ śroṇitáḥ śitāmatá utsādató 'ṅgādaṅgād ávattānāṃ kárata evéndrāgnī́ juṣétām̐ havís \

Line : 7  Pada: d     hótar yája //

Line : 8  Pada: e     gīrbʰír vípraḥ prámatim icʰámānā ī́ṭṭe rayím̐ yaśásaṃ pūrvabʰā́jam /

Line : 9  Pada: f     índrāgnī vr̥trahaṇā suvajrā prá no návyebʰis tirataṃ deṣṇaíḥ //

Line : 10  Pada: g     devébʰyo vanaspate havī́m̐ṣi híraṇyaparṇa pradívas te ártʰam /

Line : 11  Pada: h     pradakṣiṇíd raśanáyā niyū́ya r̥tásya vakṣi patʰíbʰī rájiṣṭʰaiḥ //

Line : 12  Pada: i     hótā yakṣad vánaspátim

Pada: j     abʰí hí piṣṭátamayā rábʰiṣṭʰayā raśanáyā́dʰita

Pada: k     yátrāgnér ā́jyasya priyā́ dʰā́māni

Line : 13  Pada: l     yátra sómasyā́jyasya havíṣaḥ priyā́ dʰā́māni

Line : 14  Pada: m     yátrendrāgnyóś cʰā́gasya havíṣaḥ priyā́ dʰā́māni

Pada: n     yátra vánaspáteḥ priyā́ pā́tʰām̐si

Line : 15  Pada: o     yátra devā́nām ājyapā́nāṃ priyā́ dʰā́māni

Pada: p     yátrāgnér hótuḥ priyā́ dʰā́māni

Line : 16  Pada: q     tátraitáṃ prastútyevopastútyevopā́vasrakṣat \

Pada: r     rábʰīyām̐sam iva kr̥tvī́ kárad eváṃ devó vánaspátir juṣátām̐ havís \

Line : 17  Pada: s     hótar yája //

Page: 209  
Line : 1  Pada: t     vánaspate raśanáyā niyū́ya piṣṭátamayā vayúnāni vidvā́n /

Line : 2  Pada: u     váhā devatrā́ dadʰiṣo havī́m̐ṣi prá ca dātā́ram amŕ̥teṣu vocaḥ //

Line : 3  Pada: v     piprīhí devā́n //

Pada: w     hótā yakṣad agním̐ sviṣṭakr̥tam

Pada: x     áyāḍ agnír agnéḥ priyā́ dʰā́māni \

Line : 4  Pada: y     áyāṭ sómasyā́jyasya havíṣaḥ priyā́ dʰā́māni \

Pada: z     áyāḍ indrāgnyóś cʰā́gasya havíṣaḥ priyā́ dʰā́māni \

Line : 5  Pada: aa     áyāḍ vánaspáteḥ priyā́ pā́tʰām̐si \

Pada: ab     áyāḍ devā́nām ājyapā́nāṃ priyā́ dʰā́māni

Line : 6  Pada: ac     yákṣad agnér hótuḥ priyā́ dʰā́māni

Pada: ad     yákṣat sváṃ mahimā́nam

Line : 7  Pada: ae     ā́yajatām éjyā íṣaḥ

Pada: af     kr̥ṇótu só adʰvarā́ñ jātávedās \

Pada: ag     juṣátām̐ havís \

Line : 8  Pada: ah     hótar yája //

Pada: ai     ágne yád adyá \

Pada: aj     íḍópahūtā //


Anuvaka: 8  
Line : 9  Pada: a     deváṃ barhíḥ sudeváṃ devaíḥ syā́t

Pada: b     suvī́ram̐ vīraís \

Pada: c     vástor vr̥jyéta \

Pada: d     aktóḥ prábʰriyeta \

Line : 10  Pada: e     áty anyā́n rāyā́ barhíṣmato madema

Pada: f     vasuváne vasudʰéyasya vetu

Pada: g     yája

Pada: h     deváṃ barhír

Line : 11  Pada: i     vasuváne vasudʰéyasya vetu

Pada: j     devī́r dvā́raḥ saṃgʰāté vīḍvī́r yā́mañ śitʰirā́ dʰruvā́ deváhūtau

Line : 12  Pada: k     vatsá īm enās táruṇā ā́mimīyāt kumāró vā návajātas \

Pada: l     maínā árvā reṇúkakāṭaḥ práṇak \

Line : 13  Pada: m     vasuváne vasudʰéyasya vyantu

Pada: n     yája

Pada: o     devī́r dvā́ras \

Line : 14  Pada: p     vasuváne vasudʰéyasya vyantu

Pada: q     devī́ uṣā́sānáktādyā́smín yajñé prayaty àhvetām

Pada: r     ápi nūnáṃ daívīr víśaḥ prā́yāsiṣṭām̐ súprīte súdʰite

Line : 15  Pada: s     vasuváne vasudʰéyasya vītām \

Page: 210  
Line : 1  Pada: t     yája

Pada: u     devī́ uṣā́sānáktā

Pada: v     vasuváne vasudʰéyasya vītām \

Pada: w     devī́ jóṣṭrī vásudʰitī yáyor anyā́gʰā́ dvéṣām̐si yū́yavad ā́nyā́ vakṣad vásu vā́ryāṇi yájamānāya

Line : 3  Pada: x     vasuváne vasudʰéyasya vītām \

Pada: y     yája

Pada: z     devī́ jóṣṭrī

Pada: aa     vasuváne vasudʰéyasya vītām \

Line : 4  Pada: ab     devī́ ūrjā́hutī íṣam ū́rjam anyā́ vákṣat ságdʰim̐ sápītim anyā́

Line : 5  Pada: ac     návena pū́rvaṃ dáyamānāḥ syā́ma purāṇéna návam \

Line : 6  Pada: ad     tā́m ū́rjam ūrjā́hutī ūrjáyamāne adʰātām \

Pada: ae     vasuváne vasudʰéyasya vītām \

Line : 7  Pada: af     yája

Pada: ag     devī́ ūrjā́hutī

Pada: ah     vasuváne vasudʰéyasya vītām \

Pada: ai     devā́ daívyā hótārā pótārā néṣṭārā hatā́gʰaśam̐sā ābʰarádvasū

Line : 8  Pada: aj     vasuváne vasudʰéyasya vītām \

Line : 9  Pada: ak     yája

Pada: al     devā́ daívyā hótārā

Pada: am     vasuváne vasudʰéyasya vītām \

Pada: an     devī́s tisrás tisró devī́r íḍā sárasvatī bʰā́ratī

Line : 10  Pada: ao     dyā́ṃ bʰā́raty ādityaír aspr̥kṣat

Pada: ap     sárasvatīmám̐ rudraír yajñám āvīt \

Line : 11  Pada: aq     ihaívéḍayā vásumatyā sadʰamā́daṃ madema

Pada: ar     vasuváne vasudʰéyasya vyantu

Line : 12  Pada: as     yája

Pada: at     devī́s tisrás tisró devī́s \

Pada: au     vasuváne vasudʰéyasya vyantu

Line : 13  Pada: av     devó nárāśám̐sas triśīrṣā́ ṣaḍakṣáḥ

Pada: aw     śatám íd enam̐ śitipr̥ṣṭʰā́ ā́dadʰati

Line : 14  Pada: ax     sahásramīṃ právahanti

Pada: ay     mitrā́váruṇéd asya hotrám árhatas \

Pada: az     bŕ̥haspátiḥ stotrám

Line : 15  Pada: ba     aśvínā́dʰvaryavam \

Pada: bb     vasuváne vasudʰéyasya vetu

Pada: bc     yája

Pada: bd     devó nárāśám̐sas \

Line : 16  Pada: be     vasuváne vasudʰéyasya vetu

Pada: bf     devó vánaspátir varṣáprāvā gʰr̥tánirṇig dyā́m ágreṇā́spr̥kṣat \

Line : 17  Pada: bg     ā́ntárikṣaṃ mádʰyenāprāḥ

Pada: bh     pr̥tʰivī́m úpareṇādr̥m̐hīt \

Pada: bi     vasuváne vasudʰéyasya vetu

Line : 18  Pada: bj     yája

Pada: bk     devó vánaspátir

Pada: bl     vasuváne vasudʰéyasya vetu

Pada: bm     deváṃ barhír vā́ritīnāṃ nidʰédʰāsi prácyutīnām ápracyutaṃ nikāmadʰáraṇaṃ puruṣaspārhám̐ yáśasvat \

Page: 211  
Line : 2  Pada: bn     enā́ barhíṣānyā́ barhī́m̐ṣy abʰíṣyāma

Pada: bo     vasuváne vasudʰéyasya vetu

Pada: bp     yája

Pada: bq     deváṃ barhír vā́ritīnām \

Line : 3  Pada: br     vasuváne vasudʰéyasya vetu

Pada: bs     devó agníḥ sviṣṭakŕ̥t \

Pada: bt     yája

Pada: bu     devó agníḥ sviṣṭakŕ̥t //


Anuvaka: 9  
Line : 5  Pada: a     agním adyá hótāram avr̥ṇītāyám̐ yájamānaḥ pácan paktī́ḥ pácan puroḍā́śaṃ gr̥hṇánn agnáyā ā́jyaṃ gr̥hṇánt sómāyā́jyaṃ badʰnánn índrāgníbʰyāṃ cʰā́gam \

Line : 7  Pada: b     sūpastʰā́ adyá devó vánaspátir abʰavad agnáyā ā́jyena sómāyā́jyenéndrāgníbʰyāṃ cʰā́gena \

Line : 8  Pada: c     ágʰastāṃ tám \

Pada: d     medastáḥ prátipacata \

Pada: e     ágrabʰīṣṭām

Pada: f     ávīvr̥dʰetāṃ puroḍā́śena

Line : 9  Pada: g     tvā́m adyá r̥ṣa ārṣeya r̥ṣīṇāṃ napād avr̥ṇītāyám̐ yájamānas \

Line : 10  Pada: h     bahúbʰyā ā́ sáṃgatebʰya eṣá me devéṣu vásu vā́ryā́yakṣyatā íti

Pada: i     tā́ yā́ devā́ devadā́nāny ádus tā́ny asmā ā́ ca śā́svā ca gurasva \

Line : 11  Pada: j     iṣitáś ca hotar * ási bʰadravā́cyāya préṣito mā́nuṣaḥ sūktavākā́ya
      FN P. Ed.: hótar. cf. TB.3.6.15.1

Line : 12  Pada: k     sūktā́ brūhi \

Pada: l     idáṃ dyāvāpr̥tʰivī bʰadrám abʰūt \

Line : 13  Pada: m     ā́rdʰma sūktavākám utá namovākám

Pada: n     r̥dʰyā́sma sūktócyam

Line : 14  Pada: o     ágne tvám̐ sūktávāg ásy úpaśruti divás pr̥tʰivyós \

Pada: p     ómanvatī te 'smín yajñé yajamāna dyā́vāpr̥tʰivī́ stām \

Page: 212  
Line : 1  Pada: q     śaṃgavī́ jīrádānū

Pada: r     átrasnū ápravede asáṃbādʰe

Line : 2  Pada: s     urúgavyūtī abʰayaṃkŕ̥tau

Pada: t     vr̥ṣṭídyāvā rītyā̀pā

Pada: u     śaṃbʰúvau mayobʰúvau \

Line : 3  Pada: v     ū́rjasvatī ca páyasvatī ca

Pada: w     sūpacaraṇā́ ca svadʰicaraṇā́ ca

Line : 4  Pada: x     táyor āvídi \

Pada: y     agnír idám̐ havír ajuṣata \

Pada: z     ávīvr̥dʰata

Pada: aa     máho jyā́yo 'kr̥ta

Pada: ab     sóma idám̐ havír ajuṣata \

Line : 5  Pada: ac     ávīvr̥dʰata

Pada: ad     máho jyā́yo 'kr̥ta \

Pada: ae     indrāgnī́ idám̐ havír ajuṣetām

Line : 6  Pada: af     ávīvr̥dʰetām \

Pada: ag     máho jyā́yo 'krātām \

Pada: ah     vánaspátir idám̐ havír ajuṣata \

Pada: ai     ávīvr̥dʰata

Line : 7  Pada: aj     máho jyā́yo 'kr̥ta

Pada: ak     devā́ ājyapā́ ā́jyam ajuṣanta \

Pada: al     ávīvr̥dʰanta

Line : 8  Pada: am     máho jyā́yo 'krata

Pada: an     agnír hotréṇedám̐ havír ajuṣata \

Pada: ao     ávīvr̥dʰata

Pada: ap     máho jyā́yo 'kr̥ta \

Line : 9  Pada: aq     asyā́m r̥dʰad dʰótrāyāṃ devaṃgamā́yām

Pada: ar     ā́śāste 'yám̐ yájamānas \

Pada: as     ā́yur ā́śāste

Line : 10  Pada: at     suprajāstvám ā́śāste

Pada: au     víśvaṃ priyám ā́śāste

Pada: av     yád anéna havíṣāśāsté tád aśyāt

Line : 11  Pada: aw     tád r̥dʰyāt

Pada: ax     tád asmai devā́ rāsantām \

Pada: ay     tád agnír devó devébʰyo vanutām \

Line : 12  Pada: az     vayám agnér mā́nuṣās \

Pada: ba     iṣṭáṃ ca vītáṃ ca \

Pada: bb     ubʰé ca no dyā́vāpr̥tʰivī́ ám̐hasas pātām

Line : 13  Pada: bc     éhá gátir vāmásya \

Pada: bd     idáṃ námo devébʰyaḥ //


Anuvaka: 10  
Line : 14  Pada: a     táñ śám̐yór ā́vr̥ṇīmahe gātúm̐ yajñā́ya gātúm̐ yajñápataye

Pada: b     daívī svastír astu naḥ savastír mā́nuṣebʰyaḥ /

Page: 213  
Line : 1  Pada: c     ūrdʰváṃ jigātu bʰeṣajám̐ śáṃ no astu dvipáde śáṃ cátuṣpade //

Line : 2  Pada: d     ā́pyāyasva

Pada: e     sáṃ te páyām̐si //

Line : 3  Pada: f     ihá tváṣṭāram agriyám̐ viśvárūpam úpahvaye /

Line : 4  Pada: g     asmā́kam astu kévalaḥ //

Line : 5  Pada: h     tán nas turī́pam ádʰa poṣayitnú déva tvaṣṭar ví rarāṇáḥ syasva /

Line : 6  Pada: i     yáto vīráḥ karmaṇyàḥ sudákṣo yuktágrāvā jā́yate devákāmaḥ //

Line : 7  Pada: j     devā́nāṃ pátnīr uśatī́r avantu naḥ prā́vantu nas tujáye vā́jasātaye /

Line : 8  Pada: k     yā́ḥ pārtʰivāso yā́ apā́m ápi vraté tā́ no devīḥ suhavāḥ śárma yacʰata //

Line : 10  Pada: l     utá gnā́ vyantu devápatnīr indrāṇy àgnā́yy aśvínī rā́ṭ /

Line : 11  Pada: m     ā́ ródaṣī varuṇānī́ śr̥ṇotu vyántu devī́r yá r̥túr jánīnām //

Line : 12  Pada: n     rākā́m ahám \

Pada: o     yā́s te rāke

Pada: p     sínīvāli

Pada: q     yā́ supāṇíḥ

Pada: r     kuhū́m ahám \

Pada: s     kuhū́r devā́nām //

Line : 14  Pada: t     agnír hótā gr̥hápatiḥ sá rā́jā víśvā veda jánimā jātávedāḥ /

Line : 15  Pada: u     devā́nām utá yó mártyānām̐ yájiṣṭʰaḥ sá práyajatām r̥tā́vā //

Page: 214  
Line : 1  Pada: v     havyavā́ḍ agnís \

Pada: w     íḍópahūtā //


Next part


This text is part of the TITUS edition of Black Yajur-Veda: Maitrayani-Samhita.

Copyright TITUS Project, Frankfurt a/M, 9.5.2016. No parts of this document may be republished in any form without prior permission by the copyright holder.