TITUS Texts: Black Yajur-Veda: Taittiriya-Brahmana

TITUS
Black Yajur-Veda: Taittiriya-Brahmana
Part No. 21

Previous part

Chapter: 5
Paragraph: 1
Verse: 1    {BS 3.5.1.1}
Sentence: 1    satyáṃ prápadye /
Sentence: 2    r̥táṃ prápadye /
Sentence: 3    amŕ̥taṃ prápadye /
Sentence: 4    prajā́pateḥ priyā́ṃ tanúvam ánārtāṃ prápadye /
Sentence: 5    idám aháṃ pañcadaśena vájreṇa /
Sentence: 6    dviṣántaṃ bʰrā́tr̥vyam ávakrāmāmi /
Sentence: 7    yò 'smā́n dvéṣṭi /
Sentence: 8    yáṃ ca vayáṃ dviṣmáḥ /
Sentence: 9    bʰū́r bʰúvaḥ súvaḥ /
Sentence: 10    hím //

Paragraph: 2
Verse: 1    {BS 3.5.2.2}
Sentence: 1    prá vo vā́jā abʰídyavaḥ /
Sentence: 2    havíṣmanto gʰr̥tā́cyā /
Sentence: 3    devā́ñ jigāti sumnayúḥ /
Sentence: 4    ágna ā́yāhi vītáye /
Sentence: 5    gr̥ṇānó havyádātaye /
Sentence: 6    ní hótā satsi barhíṣi /
Sentence: 7    táṃ tvā samídbʰir aṅgiraḥ /
Sentence: 8    gʰr̥téna vardʰayāmasi /
Sentence: 9    br̥hát _śocā yaviṣṭhya /
Sentence: 10    sá naḥ pr̥tʰú śravā́yyam //

Verse: 2    {BS 3.5.2.3}
Sentence: 1    áccʰā deva vivāsasi /
Sentence: 2    br̥hád agne suvī́ryam /
Sentence: 3    īḍényo {AS īḍé'nyo} namasyàs, tiráḥ /
Sentence: 4    támām̐si darśatáḥ /
Sentence: 5    sám agnír idʰyate vŕ̥ṣā /
Sentence: 6    vŕ̥ṣo agníḥ sámidʰyate /
Sentence: 7    áśvo ná devavā́hanaḥ /
Sentence: 8    tám̐ havíśmanta īḍate /
Sentence: 9    vŕ̥ṣaṇaṃ tvā vayaṃ vŕ̥ṣan /
Sentence: 10    vŕ̥ṣāṇaḥ sámidʰīmahi //

Verse: 3    {BS 3.5.2.4}
Sentence: 1    ágne dī́dyataṃ br̥hát /
Sentence: 2    agníṃ dūtáṃ vr̥ṇīmahe /
Sentence: 3    hótāraṃ viśvávedasam /
Sentence: 4    asyá yajñásya sukrátum /
Sentence: 5    samidʰyámāno adʰvaré /
Sentence: 6    agníḥ pāvaká ī́ḍyaḥ /
Sentence: 7    śocíṣkeśas tám īmahe /
Sentence: 8    sámiddʰo agna āhuta /
Sentence: 9    devā́n yakṣi svadʰvara /
Sentence: 10    tvám̐ hí havyavā́ḍ ási /
Sentence: 11    ā́juhota duvasyáta /
Sentence: 12    agníṃ prayaty àdʰvaré /
Sentence: 13    vr̥ṇīdʰvám̐ havyavā́hanam /
Sentence: 14    tváṃ váruṇa utá mitró agne /
Sentence: 15    tvā́ṃ vardʰanti matíbʰir vásiṣṭhāḥ /
Sentence: 16    tvé vásu suṣaṇanā́ni santu /
Sentence: 17    yūyáṃ pāta svastíbʰiḥ sádā naḥ //

Paragraph: 3
Verse: 1    {BS 3.5.3.5}
Sentence: 1    ágne mahā́m̐ asi brāhmaṇa bʰārata /
Sentence: 2    ásāv ásau /
Sentence: 3    deva _íddʰo mánviddʰaḥ /
Sentence: 4    ŕ̥ṣiṣṭuto víprānumaditaḥ /
Sentence: 5    kaviśastó bráhmasam̐śito gʰr̥tā́havanaḥ /
Sentence: 6    praṇī́r yajñā́nām /
Sentence: 7    ratʰī́r adʰvarā́ṇām /
Sentence: 8    atū́rto hótā /
Sentence: 9    tū́rṇir havyavā́ṭ /
Sentence: 10    ā́spā́traṃ juhū́r devā́nām //
{BS 3.5.3.6}
Sentence: 11    camasó devapā́naḥ /
Sentence: 12    arā́m̐ ivāgne nemír devā́m̐s tváṃ paribʰū́r asi /
Sentence: 13    ā́vaha devā́n yájamānāya /
Sentence: 14    agním agna ā́vaha /
Sentence: 15    sómam ā́vaha /
Sentence: 16    agním ā́vaha /
Sentence: 17    prajā́patim ā́vaha /
Sentence: 18    agnī́ṣómāv ā́vaha /
Sentence: 19    indrāgnī́ ā́vaha /
Sentence: 20    índram ā́vaha /
Sentence: 21    mahendrám ā́vaha /
Sentence: 22    devā́m̐ ājyapā́m̐ ā́vaha /
Sentence: 23    agním̐ hotrā́ya _ā́vaha /
Sentence: 24    sváṃ mahimā́nam ā́vaha /
Sentence: 25    ā́ cāgne devā́n váha /
Sentence: 26    suyájā ca yaja jātavedaḥ //

Paragraph: 4
Verse: 1    {BS 3.5.4.7}
Sentence: 1    agnír hótā, vétv {AS véttv} agníḥ /
Sentence: 2    hotráṃ vetv {BS ,AS vettu} prāvitrám /
Sentence: 3    smó vayám /
Sentence: 4    sādʰú te yajamāna devátā /
Sentence: 5    gʰr̥távatīm adʰvaryo srúcam ā́syasva /
Sentence: 6    devāyúvaṃ viśvávārām /
Sentence: 7    ī́ḍāmahai devā́m̐ īḍényān {AS īḍé'nyān} /
Sentence: 8    namasyā́ma namasyā́n /
Sentence: 9    yájāma yajñíyān //

Paragraph: 5
Verse: 1    {BS 3.5.5.8}
Sentence: 1    samídʰo agna ā́jyasya viyantu /
Sentence: 2    tánūnápād agna ā́jyasya vetu /
Sentence: 3    iḍó agna ā́jyasya viyantu /
Sentence: 4    barhír agna ā́jyasya vetu /
Sentence: 5    svā́hā _agním /
Sentence: 6    svā́hā sómam /
Sentence: 7    svā́hā _agním /
Sentence: 8    prajā́patim /
Sentence: 9    svā́hā _agnī́ṣómau /
Sentence: 10    svā́hā _indrāgnī́ /
Sentence: 11    svā́hā _índram /
Sentence: 12    svā́hā mahendrám /
Sentence: 13    svā́hā devā́m̐ ājyapā́n /
Sentence: 14    svā́hā _agním̐ hotrā́j juṣāṇā́ḥ /
Sentence: 15    ágna ā́jyasya viyantu //

Paragraph: 6
Verse: 1    {BS 3.5.6.9}
Sentence: 1    agnír vr̥trā́ṇi jaṅgʰanat /
Sentence: 2    draviṇasyúr vipanyáyā /
Sentence: 3    sámiddʰaḥ śukrá ā́hutaḥ /
Sentence: 4    juṣāṇó agnír ā́jyasya vetu /
Sentence: 5    tvám̐ somāsi sátpatiḥ /
Sentence: 6    tvám̐ rā́jā _utá vr̥trahā́ /
Sentence: 7    tváṃ bʰadró asi krátuḥ /
Sentence: 8    juṣāṇáḥ sóma ā́jyasya havíṣo vetu /
Sentence: 9    agníḥ pratnéna jánmanā /
Sentence: 10    śúmbʰānas tanúvam̐ svā́m /
Sentence: 11    kavír vípreṇa vāvr̥dʰe /
Sentence: 12    juṣāṇó agnír ā́jyasya vetu /
Sentence: 13    sóma gīrbʰíṣ ṭvā vayám /
Sentence: 14    vardʰáyāmo vacovídaḥ /
Sentence: 15    sumr̥ḍīkó na ā́viśa /
Sentence: 16    juṣāṇáḥ sóma ā́jyasya havíṣo vetu //

Paragraph: 7
Verse: 1    {BS 3.5.7.10}
Sentence: 1    agnír mūrdʰā́ diváḥ kakút /
Sentence: 2    pátiḥ pr̥tʰivyā́ ayám /
Sentence: 3    apā́m̐ rétām̐si jinvati /
Sentence: 4    bʰúvo yajñásya rájasaś ca netā́ /
Sentence: 5    yátrā niyúdbʰiḥ sácase śivā́bʰiḥ /
Sentence: 6    diví mūrdʰā́naṃ dadʰiṣe suvarṣā́m /
Sentence: 7    jihvā́m agne cakr̥ṣe havyavā́ham /
Sentence: 8    prájāpate ná tvád etā́ny anyáḥ /
Sentence: 9    víśvā jātā́ni pári tā́ babʰūva /
Sentence: 10    yátkāmās te juhumás tán no astu //

Verse: 2    {BS 3.5.7.11}
Sentence: 1    vayám̐ syāma pátayo rayīṇā́m /
Sentence: 2    sá veda putráḥ pitáram̐ sá mātáram /
Sentence: 3    sá sūnúr bʰuvat sá bʰuvat púnarmagʰaḥ /
Sentence: 4    sá dyā́m áurṇod antárikṣam̐ sá súvaḥ /
Sentence: 5    sá viśvā bʰúvo abʰavat sá ā́bʰavat /
Sentence: 6    ágnīṣomā sávedasā /
Sentence: 7    sáhūtī vanataṃ gíraḥ /
Sentence: 8    sáṃ devatrā́ babʰūvatʰuḥ /
Sentence: 9    yuvám etā́ni diví rocanā́ni /
Sentence: 10    agníś ca soma sákratū adʰattam //

Verse: 3    {BS 3.5.7.12}
Sentence: 1    yuvám̐ síndʰūm̐r abʰíśaster avadyā́t /
Sentence: 2    ágnīṣomāv ámuñcataṃ gr̥bʰītā́n /
Sentence: 3    índrāgnī rocanā́ diváḥ /
Sentence: 4    pári vā́jeṣu bʰūṣatʰaḥ /
Sentence: 5    tád vāṃ ceti prá vīryàm /
Sentence: 6    śnátʰad vr̥trám utá sanoti vā́jam /
Sentence: 7    índrā yó agnī́ sáhurī saparyā́t /
Sentence: 8    irajyántā vasavyàsya bʰū́reḥ /
Sentence: 9    sáhastamā sáhasā vājayántā /
Sentence: 10    ā́_indra sānasím̐ rayím //

Verse: 4    {BS 3.5.7.13}
Sentence: 1    sajítvānam̐ sadāsáham /
Sentence: 2    várṣiṣṭham ūtáye bʰara /
Sentence: 3    prá sasāhiṣe puruhūta śátrūn /
Sentence: 4    jyéṣṭhas te śúṣma ihá rātír astu /
Sentence: 5    índra _ā́bʰara dákṣiṇenā vásūni /
Sentence: 6    pátiḥ síndʰūnām asi revátīnām /
Sentence: 7    mahā́m̐ índro yá ójasā /
Sentence: 8    parjányo vr̥ṣṭimā́m̐ iva /
Sentence: 9    stómair vatsásya vāvr̥dʰe /
Sentence: 10    mahā́m̐ índro nr̥vád ā́ carṣaṇiprā́ḥ //

Verse: 5    {BS 3.5.7.14}
Sentence: 1    utá dvibárhā amináḥ sáhobʰiḥ /
Sentence: 2    asmadríyag vāvr̥dʰe vīryā̀ya /
Sentence: 3    urúḥ pr̥tʰúḥ súkr̥taḥ kartŕ̥bʰir bʰūt /
Sentence: 4    piprīhí devā́m̐ uśató yaviṣṭha /
Sentence: 5    vidvā́m̐ r̥tū́m̐r r̥tupate yaja _ihá /
Sentence: 6    yé dáivyā r̥tvíjas tébʰir agne /
Sentence: 7    tvám̐ hótr̥̄ṇām asy ā́yajiṣṭhaḥ /
Sentence: 8    agním̐ sviṣṭakŕ̥tam /
Sentence: 9    áyāḍ agnír agnéḥ priyā́dʰā́māni /
Sentence: 10    áyāṭ sómasya priyā́ dʰā́māni //

Verse: 6    {BS 3.5.7.15}
Sentence: 1    áyāḍ agnéḥ priyā́ dʰā́māni /
Sentence: 2    áyāṭ prajā́pateḥ priyā́ dʰā́māni /
Sentence: 3    áyāḍ agnī́ṣómayoḥ priyā́ dʰā́māni /
Sentence: 4    áyāḍ indrāgniyóḥ priyā́ dʰā́māni /
Sentence: 5    áyāḍ índrasya priyā́ dʰā́māni /
Sentence: 6    áyāṇ mahendrásya priyā́ dʰā́māni /
Sentence: 7    áyāḍ devā́nām ājyapā́nāṃ priyā́ dʰā́māni /
Sentence: 8    yákṣad agnér hótuḥ priyā́ dʰā́māni /
Sentence: 9    yákṣat sváṃ mahimā́nam /
Sentence: 10    ā́yajatām éjyā íṣaḥ /
Sentence: 11    kr̥ṇótu só adʰvarā́ jātávedāḥ /
Sentence: 12    juṣátām̐ havíḥ /
Sentence: 13    ágne yád adyá viśó adʰvarasya hotaḥ /
Sentence: 14    pā́vakaśoce véṣ ṭvám̐ hí yájvā /
Sentence: 15    r̥tā́ yajāsi mahinā́ ví yád bʰū́ḥ /
Sentence: 16    havyā́ vaha yaviṣṭha yā́ te adyá //

Paragraph: 8
Verse: 1    {BS 3.5.8.16}
Sentence: 1    úpahūtam̐ ratʰaṃtarám̐ sahá pr̥tʰivyā́ /
Sentence: 2    úpa mā ratʰaṃtarám̐ sahá pr̥tʰivyā́ hvayatām /
Sentence: 3    úpahūtaṃ vāmadevyám̐ sahá _antárikṣeṇa /
Sentence: 4    úpa mā vāmadevyám̐ sahá _antárikṣeṇa hvayatām /
Sentence: 5    úpahūtaṃ br̥hát sahá divā́ /
Sentence: 6    úpa mā br̥hát sahá divā́ hvayatām /
Sentence: 7    úpahūtāḥ saptá hótrāḥ /
Sentence: 8    úpa mā saptá hotrā hvayantām /
Sentence: 9    úpahūtā dʰenúḥ sahá _r̥ṣabʰā /
Sentence: 10    úpa mā dʰenúḥ sahá _r̥ṣabʰā hvayatām //

Verse: 2    {BS 3.5.8.17}
Sentence: 1    úpahūto bʰakṣáḥ sákʰā /
Sentence: 2    úpa mā bʰakṣáḥ sákʰā hvayatām /
Sentence: 3    úpahūtā́3ṃ hó /
Sentence: 4    íḍā _úpahūtā /
Sentence: 5    úpahūtā _íḍā /
Sentence: 6    úpo asmā́m̐ íḍā hvayatām /
Sentence: 7    íḍā _úpahūtā /
Sentence: 8    úpahūtā _íḍā mānavī́ gʰr̥tápadī maitrāvaruṇī́ /
Sentence: 9    bráhma devákr̥tam úpahūtam //

Verse: 3    {BS 3.5.8.18}
Sentence: 1    dáivyā adʰvaryáva úpahūtāḥ /
Sentence: 2    úpahūtā manuṣyā̀ḥ /
Sentence: 3    yá imáṃ yajñám ávān /
Sentence: 4    yé yajñápatiṃ várdʰān /
Sentence: 5    úpahūte dyā́vāpr̥tʰivī́ /
Sentence: 6    pūrvajé r̥tā́varī /
Sentence: 7    devī́ deváputre /
Sentence: 8    úpahūto 'yáṃ yájamānaḥ /
Sentence: 9    úttarasyāṃ devayajyā́yām úpahūtaḥ /
Sentence: 10    bʰū́yasi haviṣkáraṇa úpahūtaḥ /
Sentence: 11    divyé dʰā́mann úpahūtaḥ /
Sentence: 12    idáṃ me devā́ havír juṣantām íti tásminn úpahūtaḥ /
Sentence: 13    víśvam asya priyam úpahūtam /
Sentence: 14    víśvasya priyásya _úpahūtasya _úpahūtaḥ //

Paragraph: 9
Verse: 1    {BS 3.5.9.19}
Sentence: 1    deváṃ barhíḥ /
Sentence: 2    vasuváne vasudʰéyasya vetu /
Sentence: 3    devó nárāśám̐saḥ /
Sentence: 4    vasuváne vasudʰéyasya vetu /
Sentence: 5    devó agníḥ sviṣṭakŕ̥t /
Sentence: 6    sudráviṇā mandráḥ kavíḥ /
Sentence: 7    satyámanmā _āyajī́ hótā /
Sentence: 8    hótur _hotur ā́yajīyān /
Sentence: 9    ágne yā́n devā́n ayāṭ /
Sentence: 10    yā́m̐ ápipreḥ /
Sentence: 11    yé te hotré ámatsata /
Sentence: 12    tā́m̐ sasanúṣīm̐ hótrāṃ devaṃgamā́m /
Sentence: 13    diví devéṣu yajñám éraya _imam /
Sentence: 14    sviṣṭakŕ̥c cā́gne hótā _ábʰuḥ /
Sentence: 15    vasuváne vasudʰéyasya namovāké vī́hi //

Paragraph: 10
Verse: 1    {BS 3.5.10.20}
Sentence: 1    idáṃ dyāvāpr̥tʰivī bʰadrám abʰūt /
Sentence: 2    ā́rdʰma sūktavākám /
Sentence: 3    utá namovākám /
Sentence: 4    r̥dʰyā́sma {BS r̥dʰyā́ssma} sūktócyam agne /
Sentence: 5    tvám̐ sūktavā́g asi /
Sentence: 6    úpaśrito diváḥpr̥tʰivyóḥ /
Sentence: 7    ómanvatī te 'smín yajñé yajamāna dyā́vāpr̥tʰivī́ stām /
Sentence: 8    śaṃgayé {AS śaṅgayé} jīrádānū /
Sentence: 9    átrasnū ápravede /
Sentence: 10    urúgavyūtī abʰayaṃkŕ̥tau //

Verse: 2    {BS 3.5.10.21}
Sentence: 1    vr̥ṣṭídyāvā rītyā̀pā /
Sentence: 2    śambʰúvau mayobʰúvau /
Sentence: 3    ū́rjasvatī ca páyasvatī ca /
Sentence: 4    sūpacaraṇā́ ca svadʰicaraṇā́ ca /
Sentence: 5    táyor āvídi /
Sentence: 6    agnír idám̐ havír ajuṣata /
Sentence: 7    ávīvr̥dʰata máho jyā́yo 'kr̥ta /
Sentence: 8    sóma idám̐ havír ajuṣata /
Sentence: 9    ávīvr̥dʰata máho jyā́yo 'kr̥ta /
Sentence: 10    agnír idám̐ havír ajuṣata //

Verse: 3    {BS 3.5.10.22}
Sentence: 1    ávīvr̥dʰata máho jyā́yo 'kr̥ta /
Sentence: 2    prajā́patir idám̐ havír ajuṣata /
Sentence: 3    ávīvr̥dʰata máho jyā́yo 'kr̥ta /
Sentence: 4    agnī́ṣómāv idám̐ havír ajuṣetām /
Sentence: 5    ávīvr̥dʰetāṃ máho jyā́yo 'krātām /
Sentence: 6    indrāgnī́ idám̐ havír ajuṣetām /
Sentence: 7    ávīvr̥dʰetāṃ máho jyā́yo 'krātām /
Sentence: 8    índra idám̐ havír ajuṣata /
Sentence: 9    ávīvr̥dʰata máho jyā́yo 'kr̥ta /
Sentence: 10    mahendrá idám̐ havír ajuṣata //

Verse: 4    {BS 3.5.10.23}
Sentence: 1    ávīvr̥dʰata máho jyā́yo 'kr̥ta /
Sentence: 2    devā́ ājyapā́ ā́jyam ajuṣanta /
Sentence: 3    ávīvr̥dʰanta máho jyā́yo 'krata {AS 'kr̥ta} /
Sentence: 4    agnír hotréṇa _idám̐ havír ajuṣata /
Sentence: 5    ávīvr̥dʰata máho jyā́yo 'kr̥ta /
Sentence: 6    asyā́m ŕ̥dʰad dʰótrāyāṃ devaṃgamā́yām /
Sentence: 7    ā́śāste 'yáṃ yájamāno 'sáu /
Sentence: 8    ā́yur ā́śāste /
Sentence: 9    suprajāstvám ā́śāste /
Sentence: 10    sajātavanasyā́m ā́śāste //

Verse: 5    {BS 3.5.10.24}
Sentence: 1    úttarāṃ devayajyā́m ā́śāste /
Sentence: 2    bʰū́yo haviṣkáraṇam ā́śāste /
Sentence: 3    divyáṃ dʰā́ma _ā́śāste /
Sentence: 4    víśvaṃ priyám ā́śāste /
Sentence: 5    yád anéna havíṣā _ā́śāste /
Sentence: 6    tád aśyāt tád r̥dʰyāt /
Sentence: 7    tád asmai devā́ rāsantām /
Sentence: 8    tád agnír devó devébʰyo vánate /
Sentence: 9    vayám agnér mā́nuṣāḥ /
Sentence: 10    iṣṭáṃ ca vītáṃ ca /
Sentence: 11    ubʰé ca no dyā́vāpr̥tʰivī́ ám̐hasaḥ pātām /
Sentence: 12    ihá gatir vām ásya _idáṃ ca /
Sentence: 13    námo devébʰyaḥ //

Paragraph: 11
Verse: 1    {BS 3.5.11.25}
Sentence: 1    tát _śaṃyór ā́vr̥ṇīmahe /
Sentence: 2    gātúṃ yajñā́ya /
Sentence: 3    gātúṃ yajñápataye /
Sentence: 4    dáivī svastír astu naḥ /
Sentence: 5    svastír mā́nuṣebʰyaḥ /
Sentence: 6    ūrdʰváṃ jigātu bʰeṣajám /
Sentence: 7    śaṃ no astu dvipáde /
Sentence: 8    śáṃ cátuṣpade //

Paragraph: 12
Verse: 1    {BS 3.5.12.26}
Sentence: 1    ā́pyāyasva, sáṃ te, /
Sentence: 2    ihá tváṣṭāram agriyáṃ, tán nas turī́pam, /
Sentence: 3    devā́nāṃ pátnīr uśatī́r avantu naḥ /
Sentence: 4    prā́vantu nas tujáye vā́jasātaye /
Sentence: 5    yā́ḥ pā́rtʰivāso yā́ apā́m ápi vraté /
Sentence: 6    tā́ no devīḥ suhavāḥ śárma yaccʰata /
Sentence: 7    utá gnā́ viyantu devápatnīḥ /
Sentence: 8    indrāṇy àgnā́yy aśvínī rā́ṭ /
Sentence: 9    ā́ ródasī varuṇānī́ śr̥ṇotu /
Sentence: 10    viyántu devī́r yá r̥túr jánīnām //

Verse: 2    {BS 3.5.12.27}
Sentence: 1    agnír hótā gr̥hápatiḥ sá rā́jā /
Sentence: 2    víśvā veda jánimā jātávedāḥ /
Sentence: 3    devā́nām utá yó mártyānām /
Sentence: 4    yájiṣṭhaḥ sá práyajatām r̥tā́vā /
Sentence: 5    vayám u tvā gr̥hapate jánānām /
Sentence: 6    ágne ákarma samídʰā br̥hántam /
Sentence: 7    astʰūríṇo {Dumont astūrí no} gā́rhapatyāni santu /
Sentence: 8    tigména nas téjasā sám̐śiśādʰi //

Paragraph: 13
Verse: 1    {BS 3.5.13.28}
Sentence: 1    úpahūtam̐ ratʰaṃtarám̐ sahá pr̥tʰivyā́ /
Sentence: 2    úpa mā ratʰaṃtarám̐ sahá pr̥tʰivyā́ hvayatām /
Sentence: 3    úpahūtaṃ vāmadevyám̐ sahā́ntárikṣeṇa /
Sentence: 4    úpa mā vāmadevyám̐ sahā́ntárikṣeṇa hvayatām /
Sentence: 5    úpahūtaṃ br̥hat sahá divā /
Sentence: 6    úpa mā br̥hat sahá divā́ hvayatām /
Sentence: 7    úpahūtāḥ saptá hótrāḥ /
Sentence: 8    úpa mā saptá hótrā hvayantām /
Sentence: 9    úpahūtā dʰenúḥ sahá _r̥ṣabʰā /
Sentence: 10    úpa mā dʰenúḥ sahá _r̥ṣabʰā hvayatām //

Verse: 2    {BS 3.5.13.29}
Sentence: 1    úpahūto bʰakṣaḥ sákʰā /
Sentence: 2    úpa mā bʰakṣáḥ sákʰā hvayatām /
Sentence: 3    úpahūtā́3ṃ hó /
Sentence: 4    íḍā _úpahūtā /
Sentence: 5    úpahūtā _íḍā /
Sentence: 6    úpo asmā́m̐ íḍā hvayatām /
Sentence: 7    íḍā _úpahūtā /
Sentence: 8    úpahūtā _íḍā /
Sentence: 9    mānavī́ gʰr̥tápadī maitrāvaruṇī́ /
Sentence: 10    bráhma devákr̥tam úpahūtam //

Verse: 3    {BS 3.5.13.30}
Sentence: 1    dáivyā adʰvaryáva úpahūtāḥ /
Sentence: 2    úpahūtā manuṣyā̀ḥ /
Sentence: 3    yá imáṃ yajñám ávān /
Sentence: 4    yé yajñápatnīṃ várdʰān /
Sentence: 5    úpahūte dyā́vāpr̥tʰivī́ /
Sentence: 6    pūrvajé r̥tā́varī /
Sentence: 7    devī́ deváputre /
Sentence: 8    úpahūtā _iyáṃ yájamānā /
Sentence: 9    indrāṇī́_ivāvidʰavā́ /
Sentence: 10    áditir iva suputrā́ /
Sentence: 11    úttarasyāṃ devayajyā́yām úpahūtā /
Sentence: 12    bʰū́yasi haviṣkáraṇa úpahūtā /
Sentence: 13    divyé dʰā́mann úpahūtā /
Sentence: 14    idáṃ me devā́ havír juṣantām íti tásminn úpahūtā /
Sentence: 15    víśvam asyāḥ priyám úpahūtam /
Sentence: 16    víśvasya priyásya _úpahūtasya _úpahūtā //

Next part

This text is part of the TITUS edition of Black Yajur-Veda: Taittiriya-Brahmana.

Copyright TITUS Project, Frankfurt a/M, 22.4.2012. No parts of this document may be republished in any form without prior permission by the copyright holder.