TITUS
White Yajur-Veda: Vajasaneyi-Samhita (Madhyandina)
Part No. 40
Previous part

Paragraph: 40 
Verse: 1    {IsUp MK1}
Sentence: a    īśā́ vāsyàm idám̐ sárvaṃ yát kíṃ ca jágatyāṃ jágat \
Sentence: b    téna tyakténa bʰuñjītʰā mā́ gr̥dʰaḥ kásya svid dʰánam \\

Verse: 2    {IsUp MK2}
Sentence: a    kurvánn evéhá kármāṇi jijīviṣéc cʰatám̐ sámāḥ \
Sentence: b    eváṃ tváyi nā́nyátʰetò sti ná kárma lipyate náre \\

Verse: 3    {IsUp MK3}
Sentence: a    asuryā̀ nā́ma te lokā́ andʰéna támasā́vr̥tāḥ \
Sentence: b    tā́m̐s té prétyā́pi gaccʰanti yé ké cātmaháno jánāḥ \\

Verse: 4    {IsUp MK4}
Sentence: a    ánejad ékaṃ mánaso jávīyo náinad devā́ āpnuvan pū́rvam árśat \
Sentence: b    tád dʰā́vato nyā́n áty eti tíṣṭʰat tásminn apó mātaríśvā dadʰāti \\

Verse: 5    {IsUp MK5}
Sentence: a    tád ejati tán náijati tád dūré tád v antiké \
Sentence: b    tád antár asya sárvasya tád u sáravasyāsya bāhyatáḥ \\

Verse: 6    {IsUp MK6}
Sentence: a    yás tú sárvāṇi bʰūtā́ny ātmánn evā́nupáśyati \
Sentence: b    sarvabʰūtéṣu cātmā́naṃ táto ná ví cikitsati \\

Verse: 7    {IsUp MK7}
Sentence: a    yásmint sárvāṇi bʰūtā́ny ātmáivā́bʰūd vijānataḥ \
Sentence: b    tátra kó móhaḥ káḥ śóka ekatvám anupáśyataḥ \\

Verse: 8    {IsUp MK8}
Sentence: a    sá páry agāc cʰukrám akāyám avraṇám asnāvirám̐ śuddʰám ápāpaviddʰam \
Sentence: b    kavír manīṣī́ paribʰū́ḥ svayaṃbʰū́r yātʰātatʰyató rtʰān vy àdadʰāc cʰāśvatī́bʰyaḥ sámābʰyaḥ \\

Verse: 9    {IsUp M9/K12}
Sentence: a    andʰáṃ támaḥ prá viśanti yé saṃbʰūtim upā́sate \
Sentence: b    táto bʰū́ya iva té támo yá u sáṃbʰūtyām̐ ratā́ḥ \\

Verse: 10    {IsUp M10/K13}
Sentence: a    anyád evā́húḥ saṃbʰavā́d anyád āhur ásaṃbʰavāt \
Sentence: b    íti śuśruma dʰī́rāṇāṃ yé nas tád vicacakṣiré \\

Verse: 11    {IsUp M11/K14}
Sentence: a    sáṃbʰūtiṃ ca vināśáṃ ca yás tád védobʰáyam̐ sahá \
Sentence: b    vināśéna mr̥tyúṃ tīrtvā́ sáṃbʰūtyāmŕ̥tam aśnute \\

Verse: 12    {IsUp M12/K9}
Sentence: a    andʰáṃ támaḥ prá viśanti yé vidyām upā́sate \
Sentence: b    táto bʰū́ya iva té támo yá u vidyā́yām̐ ratā́ḥ \\

Verse: 13    {IsUp M13/K10}
Sentence: a    anyád evā́húr vidyā́yā anyád āhur ávidyāyāḥ \
Sentence: b    íti śuśruma dʰī́rāṇāṃ yé nas tád vicacakṣiré \\

Verse: 14    {IsUp M14/K11}
Sentence: a    vidyā́ṃ cā́vidyāṃ ca yás tád védobʰáyam̐ sahá \
Sentence: b    ávidyayā mr̥tyúṃ tīrtvā́ vidyáyāmŕ̥tam aśnute \\

Verse: 15    {IsUp M15}
Sentence: a    vāyúr ánilam amŕ̥tam átʰedáṃ bʰásmāntam̐ śárīram \
Sentence: b    ó3m kráto smara klibé smara kr̥tám̐ smara \\

Verse: 16    {IsUp M16/K18}
Sentence: a    ágne naya supátʰā rāyé asmā́n víśvāni deva vayúnāni vidvā́n \
Sentence: b    yuyodʰy àsmáj juhurāṇám éno bʰúyiṣṭʰāṃ te námaüktiṃ vidʰema \\

Verse: 17    {IsUp M17/K15}
Sentence: a    hiraṇmáyena pā́treṇa satyásyā́pihitaṃ múkʰam \
Sentence: b    yò sā́v ādityé púruṣaḥ sò sā́v ahám \

Sentence: c    ó3m kʰáṃ bráhma \\

This text is part of the TITUS edition of White Yajur-Veda: Vajasaneyi-Samhita (Madhyandina).

Copyright TITUS Project, Frankfurt a/M, 2.11.2013. No parts of this document may be republished in any form without prior permission by the copyright holder.