TITUS
Collection: MPT 
Minor Pahlavi Texts


On the basis of the edition by
Bīžān Ġeybī,
Davāzdah Matn-e Bāstānī (2nd ed.),
Tehran: Entešārāt-e Doktor Maḥmūd-e Afšār 1397/ 2017

electronically prepared by Behnam Ataei,
Berlin, March 2022;
TITUS version by Jost Gippert,
Frankfurt a/M, 23.4.2022




Page of ed.: 90 
Text: MYF   mādayān ī yōšt ī friyān


Paragraph: 1     ēn mādayān ī yōšt ī friyān farrox bawād pad yazdān ayārīh


Chapter: I   I


Paragraph: 2     ēdōn gōwēnd kū andar ān +hang[ām] ka axt ī ǰādūg abāg haft bēwar spāh ō šahr ī frašn-wizārān šud
Paragraph: 3     u-š drāyīd kū šahr ī frašn-wizārān pīl xwast be kunam
Paragraph: 4     ud ka ō ānōh mad u-š mardōm xwāst +kē-šān dād freh az pānzdah sāl nē bawēd
Paragraph: 5     u-š frašn aziš pursīd
Paragraph: 6     har kē nē tuwān būd wizārdan u-š frāz grift ud be ōzad
Paragraph: 7     ud pas andar ān šahr ī frašn-wizārān mard-1 būd māraspand nām
Paragraph: 8     u-š ō axt ī ǰādūg guft kū šahr ī frašn-wizārān pīl xwast ma kun ud ēn mardōm ī abē wināh ma ōzan
Paragraph: 9     kē andar ēn šahr ī frašn-wizārān mard-1 ast yōšt ī friyān nām kē[-š] dād freh az pānzdah sāl nēst
Paragraph: 10     ud har ān frašn ī tō az ō[y] pursē u-t be wizārēd
Paragraph: 11     ud pas axt ī ǰādūg ō yōšt ī friyān paygām frēstād
Paragraph: 12     kū frāz ō dar ī man āy tā sih ud sē frašn az tō pursam
Paragraph: 13     ud agar passox nē dahē ayāb gōwē kū nē dānam ēg-it pad ham-zamān be ōzanam
Paragraph: 14     ud yōšt ī friyān ō dar ī axt ī ǰādūg āmad
Paragraph: 15     ud az ān čiyōn axt ī ǰādūg nasā ī mardōmān azēr ī wistarag dāšt andar nē šud
Paragraph: 16     u-š ō axt ī ǰādūg paygām frēstīd
Paragraph: 17     kū ašmā nasā ī mardōmān azēr ī wistarag dārēd
Paragraph: 18     ud <ka man andar āyam> amahraspandān pēš ī man hēnd andar ān gyāg kū nasā ī mardōmān bawēd man andar āyam
Paragraph: 19     ēg-im amahraspandān az panāhīh ī man abāz ēstand
Paragraph: 20     ud pas ān frašn ī tō az man pursē man wizārdan nē tuwān
Paragraph: 21     ud pas axt ī ǰādūg framūd ān wistarag ud ǰāmag abar dāštan ud wistarag ī nōg āwurdan ud abgandan
Paragraph: 22     ud u-š yōšt ī friyān rāy andar xwāst [ud] guft
Paragraph: 23     kū be āy abar ēn ǰāmag ud bāliš be nišīn ud frašn ī-t pursam rāst be wizār
Paragraph: 24     yōšt ī friyān guft kū mar ī druwand sāstār aber ēn bāliš nē nišīnam čē andar ēn bāliš nasā ī mardōmān ast
Paragraph: 25     ud abāg man yazdān ud amahraspandān hēnd pānāgīh ī man hēnd
Paragraph: 26     ud [ka] man abar ēn bāliš nišīnam ēg-im mēnōgān az pānāgīh ī man abāz ēstēnd
Paragraph: 27     pas frašnīha ī tō az man pursē man wizārdan nē tuwān bawēd
Paragraph: 28     ud pas axt ī ǰādūg framūd ān bāliš abar dāštan [ud bāliš ī] nōg āwurdan
Paragraph: 29     yōšt ī friyān abar ān bāliš ī nōg nišast



Next part


This text is part of the TITUS edition of Minor Pahlavi Texts.

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.