TITUS
Minor Pahlavi Texts
Part No. 4
Previous part

Chapter: IV   IV


Paragraph: 1     pas yōšt ī friyān guft kū sīh ud sē frašn tō az man pursīd hamāg rāstīhā wizārd [ham]
Paragraph: 2     nun man az tō sē frašn pursam agar passox nē dahē pad ham-zamān be ōzanam
Paragraph: 3     ud axt ī ǰādūg guft kū purs tā wizāram
Paragraph: 4     ud yōšt ī friyān guft kū zamīg-1 dast tohm arz čand
Paragraph: 5     ud dudīgar ēn pursīd kū gāw-1 warzā arz čand
Paragraph: 6     ud sidīgar ēn pursīd kū xwēdōdah<-1>; kār ud kirbag čand
Paragraph: 7     axt ī ǰādūg [passox] nē dānist u-š guft kū pešyār āyēd frašn pursēnd nē ēwēn wizārdan
Paragraph: 8     yōšt ī friyān guft kū šaw ud pad nazdīk gyāg be nišīn ud pēšyār be kun ud zūd be āy ud ēn sē frašn rāst be wizār
Paragraph: 9     čē agar gōwēd kū nē dānam ēg-it pad ham-zamān be ōzanam
Paragraph: 10     axt ī ǰādūg pad ǰādūgīh andar dušox dwārist
Paragraph: 11     u-š ō ahreman drāyīd kū gizistag zamīg ē dast tōhm arz čand
Paragraph: 12     ud dudīgar <kū> gāw-1 warzāg arz čand
Paragraph: 13     ud sidīgar xwēdōdah kār ud kirbag arz čand
Paragraph: 14     gizistag ahreman ō axt ī ǰādūg drāyīd kū man ēn frašnīhā ī tō passox nē tuwānam kardan
Paragraph: 15     čē agar be gōwam dām ī man hamāg bērōn šawēd abāg dēwān ud druzān ud parīgān
Paragraph: 16     ud man tō rāy dōsttar nē dāram kū dām ī xwēš rāy
Paragraph: 17     ēn frašnīhā ī tō az man pursīd hē +agar-it passox daham
Paragraph: 18     hamāg dām ī man agār be bawēd ud [az] petyārag tis-iz be ne mānēd
Paragraph: 19     <az abar> dām ī ohrmazd be kār āyēd ud pad ham-zamān rist-āxēz ud tan ī pasēn bawēd
Paragraph: 20     šaw ud gardan pēš kun mihr-drōzīh rāy ka kardag dārēd
Paragraph: 21     ud ka zamān frāz mad wardēnīdan nē tuwān
Paragraph: 22     čē gyāg ī tō dušox ud pādifrāh ī tō saxttar kū hamāg druwandān
Paragraph: 23     ud axt ī ǰādūg abar dwārist az dušox anummēd ud oš ī ōy rāy hamē awurd tā pēš ī yōšt ī friyān
Paragraph: 24     ud axt ī ǰādūg ō yōšt ī friyān guft
Paragraph: 25     kū farroxīhā Page of ed.: 84  ī tō yōšt ī friyān kē ohrmazd ud amahraspandān abāg tō būd hēnd ān ī nē dānist hē tō rāy be guft hēnd
Paragraph: 26     ud man kē ummēd be ō ahreman ud dēwān ēstād sē frašn az ahreman ud dēwān pursīd man rāy passox nē dād hēnd
Paragraph: 27     u-š pas yōšt ī friyān axt ī ǰādūg rāy pad ham-zamān [pad] kārd ī barsom-čīn [ud] pad nērang ī dēnīg agār be kard ud druz [ī] andar tan ī ō[y] agār be kard



Next part


This text is part of the TITUS edition of Minor Pahlavi Texts.

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.