TITUS
Minor Pahlavi Texts
Part No. 7
Previous part

Text: CiD   abar čim ī drōn


Chapter: _  
Paragraph: 1     [ēdōn] paydāg kū drōn [pad] hangōšīdag ī gētīg nihād ēstēd
Paragraph: 2     čiyōn ohrmazd [drōn] ō zarduxšt nimūd ud zarduxšt az ohrmazd pursīd kū ēn čē ast ohrmazd guft kū ēn drōn ast ī ašmā pānagīh ī tan rāy abāyēd kardan
Paragraph: 3     u-š girdīh čiyōn gētīg [ī] [gird ast] u-š kanārag ī pērāmōn čiyōn kōf ī harborz [ī] zmb ī zamīg abzāyišn ī mayān ī drōn čiyōn rōyišn ī mardōmān ud gāwān ud gōspandān ud urwar[ān]
Paragraph: 4     ud gōšodāg pad mayān ī drōn čiyōn čagād ī dāītīg pad mayān [ī] gēhān
Paragraph: 5     ud frasast [pad] hangōšīdag ī ohrmazd xwadāy ud pad ǰudāgīh az drōn nihādan [u-š] čim ēn kū ohrmazd akanārag ud xwābarīg
Paragraph: 6     [may] pad [drōn] āb [ī] zrēh homānāg purr abāyēd kardan čē zrēh purr āb ud ka nē purr nē abāyēd ud nē homānāg nāwsār
Paragraph: 7     ud targ ud +sprahm ō wēšag ī zrēh homānāg abesar mēnōg
Paragraph: 8     ud abārīg xwarišnīg tis ī pēš [ī] drōn abar nihādag usōfrīt ud bahr rādīh ī ō yazdān ud šnāyēnīšn ī mard [ī] ahlaw ī yaštār
Paragraph: 9     ud ēsm ud bōy 3 tāg ō humat hūxt ud huwaršt kē ruwān ī ahlawān ī padiš ō pahlom gēhān šawēd homānāg
Paragraph: 10     [ka drōn yazēnd] har +tan-ē rāy sprahm Page of ed.: 333  tāg pad sprahm-gāh nihādan har kē wāz gīrēd az ān sprahm [ud] ān čāšnīg ī drōn awiš dādan kē ham sprahm andar mēzd ō hamīh nihēd [ud] [čāšnīg +stēd] ān rōz az wināh ī margarzān ēdōn bīm nē dārišn +ud čāšnīg ī az drōn kardan wēš kirbagīh ud hamīh ī mēzd ud hudēnān ēk abāg did ī pad kirbag rāy
Paragraph: 11     ud ka drōn kāmēd yaštan drōn sāzag šustan ud ārāstēnīdan ud gyāg ī drōn kāmēd yaštan ka-iz pāk be ruftan ud bālišn nihādan
Paragraph: 12     ud zanišn ī dēwān ud druzān ud ēzišn ud šnāyišn ud niwēyēnišn [ī] yazdān ō yazišn nērang [ī] frārōn rāy ud ōzōmandīh ud wuzurg zōrīh ud meh +frahixtagīh ī mēnōgān ō tan ī dāmān ī ohrmazd +windāīh rāy
Paragraph: 13     ēn-iz paydāg kū har rōz pas az xwarōfrān dēwān ud druzān az dušōx čiyōn buš ī aspān mōy homānāg abar āyēnd kū anāgīh ī pad dāmān ī ohrmazd kardan rāy be ō gētīg āyēnd
Paragraph: 14     čiyōn ō kōf ī harborz rasēnd mēnōg ī drōn ō padīrag ī ān hamāg dēwān [ud] druzān abāz šawēd u-šān zanēd ud abesīhēnēd ēdōn zanišn kunēd kū tagarg homānāg ōftēnd
Paragraph: 15     u-šān az ō gētīg āmadan ud anāgīh pad dāmān ī ohrmazd kardan [rāy] abāz dārēd ud agar nē mēnōg [ī] drōn rāy [būd] hē hamāg dēwān ud druzān dām ī ohrmazd <rāy> wany ud apaydāg [ud] nizār kard +hē
Paragraph: 16     ēn owōn ōzōmandīh <ī> Page of ed.: 335  drōn rāy bawēd ī dādīhā bowandagīhā yašt ēstēd kē ahlaw mard pad frārōn nērangīhā yazēd
Paragraph: 17     ēn-iz paydāg kū kē ān ī andaktar xwarišnīh tis pad ān ī kehtar nām be yazēd kamist kirbag 550 [stēr]
Paragraph: 18     ēn-iz paydāg kū mēzd sturg yazdān <ud> rāmišn +ud wehān pad [ān pad] hangošīdag ī mēnōg[ān] +nihād ēstēd čē ēdōn čiyōn ohrmazd ud amahraspandān ēk abāg did nišīnēnd ud az amahraspandān tis-iz wāng nē āyēd [ēdōn-iz pad mēzd xāmōš abāyēd +nišastan]

This text is part of the TITUS edition of Minor Pahlavi Texts.

Copyright TITUS Project, Frankfurt a/M, 29.11.2024. No parts of this document may be republished in any form without prior permission by the copyright holder.