TITUS
Slovo o polku Igoreve (diplomatic ed.)
Part No. 26
Previous part

Chapter: 26   Link to slovigor
Verse: 557     на Дунаи Ярославнынъ гласъ ся слышитъ,
Verse: 558     зегзицею незнаема рано кычеть:
Verse: 559     "полечю, -- рече -- зегзицею по Дунаеви,
Verse: 560     омочю бебрянъ рукавъ въ Каялѣ рѣцѣ,
Verse: 561     утру князю кровавыя его раны
Verse: 562        на жестоцѣмъ его тѣлѣ."

Page of ed.: 57 
Verse: 563     Ярославна рано плачетъ
Verse: 564     въ Путивлѣ на забралѣ, аркучи:
Verse: 565     "о вѣтрѣ, вѣтрило!
Verse: 566     чему, господине, насильно вѣеши?
Verse: 567     чему мычеши хиновьскыя стрѣлкы
Verse: 568        на своею нетрудною крилцю
Verse: 569        на моея лады вои?
Verse: 570     мало ли ти бяшетъ горѣ подъ облакы вѣяти,
Verse: 571        лелѣючи корабли на синѣ морѣ?
Verse: 572     чему, господине, мое веселие
Verse: 573        по ковылию развѣя?"

Verse: 574     Ярославна рано плачеть
Verse: 575        Путивлю городу на заборолѣ, аркучи:
Verse: 576     "о Днепре Словутицю!
Verse: 577     ты пробилъ еси каменныя горы
Verse: 578        сквозѣ землю Половецкую.
Verse: 579     ты лелѣялъ еси на себѣ Святославли насады
Verse: 580     до плъку Кобякова.
Verse: 581     възлелѣй, господине, мою ладу къ мнѣ,
Verse: 582     а быхъ не слала къ нему слезъ
Verse: 583        на море рано."

Verse: 584     Ярославна рано плачетъ
Verse: 585        въ Путивлѣ на забралѣ, аркучи:
Verse: 586     "свѣтлое и тресвѣтлое слънце!
Verse: 587     всѣмъ тепло и красно еси:
Verse: 588     чему, господине, простре горячюю свою лучю
Verse: 589        на ладѣ вои?
Verse: 590     въ полѣ безводнѣ жаждею имь лучи съпряже,
Verse: 591        тугою имъ тули затче?"

Next part


This text is part of the TITUS edition of Slovo o polku Igoreve (diplomatic ed.).

Copyright TITUS Project, Frankfurt a/M, 10.12.2008. No parts of this document may be republished in any form without prior permission by the copyright holder.