TITUS
Svan Chrestomathy
Part No. 74
Previous part

Text: 69 
Page of edition: 63 
Line of edition: 7 
69. ლატლარეშ ი მესტია̄ლრე ლიჲმახვა̈̄ლ


Line of edition: 8       ჯვინალდ მესტჲა-ჲ ლატლი უშხვა̄რ ხა̈ბკე̄ნახ ი ჩი̄ ხოლა̄მ გარ ხა̄ჩვმინახ უშხვა̄რ.
Line of edition: 9    მა̈ჲ მესტჲა̄ლა̈რს ხა̈წნო̄ლახ ღალ ლატლა̈რ, მა̈ჲ ლატლა̈რს ხა̈წნო̄ლნახ მესტჲ
Line of edition: 10    ა̄ლა̈რ. გუნ ბა̈კა̄რობ ი ლიჲმახვა̈̄ლ ხა̄რახ უშხვა̄რნე̄სგა. ჲეს-ჲეს ლჷმდაგვრინხ უშ
Line of edition: 11    ხვა̄რ, ჲეს-ჲესინ ჩუ ლჷმჷრმინხ ი ღო საჴსა̈რს ხა̈კდინახ. დე̄მჟი̄ნ ლჷმზა̄რვინხ უშხ
Line of edition: 12    ვა̄რ ხოლე̄მი ლეჩვმად.

Line of edition: 13       აშხვჟი̄ნ ესნა̈რ მესტიას ჟა̈მ ა̈მჴედე̄ლი ი ჩი̄ ქა ლექა̈̄ბი ხა̄რა მა̈ზგი ნამა̈̄ტვ. ლატ
Line of edition: 14    ლის მა̄მ ა̈მჴედე̄ლი ჟა̈მ ი დეჲ ხაყვლი̄ნნახ ეჯღ', ე̄რე ეჩე ქელეფა̈ნ ხა̄მთქვე̄ნა ი ქელეფნი
Line of edition: 15    მა̈ზიგთე̄'სგა ფისრა̈ჲ ჟა̈მ როქვ დე̄მ ღჷრი.

Line of edition: 16       ლატლა̈რ ჩიგარ ლჷმჴა̈დვინხ მესტიათე ი ესღვე̄ნახ კეთილ ი ხოჩე̄რობა. "იმღა
Line of edition: 17    დო̄მ ადჲა̈̄სგდახ, ლახე მუდურვა̈ნი დო̄რ ხეყა̈̄ნო̄ლხ?! "

Line of edition: 18       ჟა̈მს მესტჲა მერხა̈ლდ გარ ოთცვი̄რა ი ჩვა̈მთვეფ, ეჩქას ღალ ჩუ ნამსა̈დვ მიჩა-მიჩა
Line of edition: 19    ქორს ლახტეხა მა̈გ, ხოშა̄მ ნაღა̈ლს ქა ლჷბა̄რგე ხა̈ხვო̄ლნახ ქორა̈რ.
Line of edition: 20    მესტჲა̈ლრე ქორთე ლიჴედ ჩ' ოთკვიჰახ ლატლა̈რს. აშხვ ლადა̈ღ ესნა̈რ ჩვა̈დნა̈ზო̄რა̈̄ნხ
Line of edition: 21    ი ჩვასკიბხ, ერე ხეკვეს სგა̄ჩეხ მესტჲათე ი ჲერვა̈̄ჲ ესამა ჩუ ჲა̈რ არდე̄დს,
Line of edition: 22    მა̈გ ჟ'ანხუტახ. ამჟი̄ნ ესნა̈რ ლეჟა ლიჴედ ლა̈ჲბინეხ მესტჲათე. ეჩქას, დიდა̈ბი
Line of edition: 23    ლეჴედ ჯგჷრა̈̄გი მონზვერ მიტულჲა̄ნშა ლჷმა̈̄რხ. ა̈დკვიჰ ესნა̈რ ალჲარე ზურა̄ლდ
Line of edition: 24    ლატლარე ლიჴედ, ჟ'ა̈ნკიდ ჰანწა̈̄რ მარდ ი რა̈̄ქვ:"ჰე̄, ჯგჷრა̈̄გ! მიჩა მემზირ მესტჲას
Line of edition: 25    ესერ ლატლა̈რს ჩუ ჰე ხა̈ნბე ლეჴცად, ეჩქას ესერ ალ მარდს ა̈ჲე̄სგი ი მიჩ ჟ,
Line of edition: 26    ანჴვემ".

Line of edition: 27       ანჴა̈დ ესნა̈რ დიდა̈ბი ლეჴედ ჯგჷრა̈̄გ ი მიჩა ლეზგჷრჟი ვერბ ანფიშვდ. ალ
Line of edition: 28    ვერბ ესნა̈რ ქ'ა̄თა̄სდ ჲელ ლენჯა̈̄რისშ ი ხა̈̄ქვ: "ლატლა̈რს ესერ შუკუ ოხვჟომე
Line of edition: 29    მესტჲათე ლაჴა̈დ, ადო ეჩურ ესერ მა̄მ ხოყა, ალ' ე̄სერ ოხვჭირა ჯგჷრა̈̄გს".
Line of edition: 30    ანჴა̈დ ესნა̈რ ჲელ ლენჯა̈̄რიშ, დიდა̈ბი ლეჴედ, ი ეჯკა̈ლიბ სკარხალ ი ჭა̈ხ ქ'ა̄ნფიშვდ
Line of edition: 31    ლატლა̈რთ', ე̄რე ალჲა̈რს ესნა̈რ ჟი ლეჭვენი ხა̄რახ ი ა̈გითე ლეტეხ. ეჩქანღო
Line of edition: 32    სერ დე̄სამა მოშ ოთბა̈დვახ მესტჲა̈̄ ლაღლა̈ტთე ლიჴედ ლატლა̈რს. ალა როქ
Line of edition: 33    მა̈გ დიდა̈ბი ლეჴედ ჯგჷრა̈̄გი ჴამშოშვ ლჷმა̈̄რ, მა̈̄ჲ მესტჲა ღალა̈ტს ქ'ა̄ხსედა
Line of edition: 34    ეჯდვრევჟი̄ნ.


Line of edition: 35 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.