TITUS
Svan Chrestomathy
Part No. 73
Previous part

Text: 68 
Page of edition: 62 
Line of edition: 6 
68. ყიფია̄ნრე ლაშგრი ლიხვტე უშგვლა̈რხა̈ნქა


Line of edition: 7       ლა̈̄შხი სოფელ შგედს ლჷმზიგხ ყიფია̄ნა̈რ. ალჲა̈რს ხა̈კვდახ უშგვლა̈ შჷ̄ნთე̄სგა
Line of edition: 8    ლიკვა̄ნე ი ჟი ლიფსვნე. ჩი ნუკვჟი̄ნ ჩი ლჷმსკო̄რინხ ყიფია̄ნა̈რ ალ გვეში ქა
Line of edition: 9    ლიზგჷრეს ი ღვეშგმე პილს ოხსკო̄რახ.: "ქა̄ვ ესერ ა̈ტსეხ (\\ ა̈წსეხ) უშგვლა̈რ,
Line of edition: 10    უშგვლა̈ მახვში̄ გეზალ მინე მახვშისუ ოთგენეხ გეზალდ. ეჩქას ესერ უშგვლა̈რ
Line of edition: 11    ქ'ა̄დრიხ მინეშთე ლჷწსად ი ეჩქას ჩუ̄ვ ადღალტეხ უშგვლა̈რ.
Line of edition: 12    ალ' ა̄მჟი̄ნ ჩვასკიბხ ი ქ'ო̄თთო̄ნეხ უშგულთე მჷწსი მა̄რა. უშგვლა̈რ ქა ხეწსა̈̄ნხ.
Line of edition: 13    ყიფია̄ნა̈რ გუნ ხოჩა̄მდ ესხვი̄დხ. ჴამშოშ ლოხვბინეხ ჰარყი ლიჭრა̈ჟი. უშგვლა̈რ
Line of edition: 14    გუდ ა̈მჴედხ, ერე ყიფია̄ნა̈რ მინს ჩვაღლა̈ტიხ. ჟ'ანჷგა̈ნხ ესნა̈რ ი ლა̈ჲბინეხ
Line of edition: 15    ა̈გითე ლიჴედ. ღვეშგიმ ყიფია̄ნ ი მიჩა ჯა̈რ ა̈ხღვა̈ჭ. უშგვლა̈რ ხეჴჷ̄რა̈̄ლხ ესნა̈რ:
Line of edition: 16    "მა̈დილუ ხე̄რახ, ჰაჯუ ახკიდხ ი ქა̄ვ აფვიშდხ შუკვს". მარე ყიფია̄ნა̈რ ეში̄ ახღვიჭხ
Line of edition: 17    ესნა̈რ. ხაკუხ, ერე ჟ'ა̈ნჷრმა̄ლახ ი ჩვადჷნტყოვი̄ნახ. ამჟი̄ნ სგ'ო̄ჰახ უშგვლა̈რს
Line of edition: 18    ნაქლაქო̄ლა̈ მურყვამ მჷყვ. ამეჩუ̄ნი ესბეცახ უშგვლა̈რ: "მახვში ყიფია̄ნ, ჰაჯუ
Line of edition: 19    ახკიდ ი ნომუ ახღვიჭ!"მარე ეჯღა̄ჲ ახღვიჭნინახ ღვეშგიმ. ამჟი̄ნ ჟ'ოჰახ ზაგრიერე
Line of edition: 20    მურყვამთე (ცა̈̄ნს). ამეჩუ̄ნ ლჷმზიგ ეშხუ მეზგე. ალჲარე მახვშის გიერგ ხაჟხე̄ნა
Line of edition: 21    ი ამის ხახლე̄ნა ცხვივშ ლიშჲა̈̄ლ ეჩქას თოფა̈რ მა̄მ ლუმწვე̄ნხ. ალ გიერგს ესბა̈ცხ
Line of edition: 22    ესნა̈რ უშგვლა̈რ: "მა̈დილუ ხე̄რა, თხვიმუ ახმარგე მიჩე̄მი!" ამნე̄მ ესნა̈რ
Line of edition: 23    ლოხვმარჯვე, ლოხვბინეხ ყიფია̄ნა̈რს უშგვლა̈რდ ლიხვტე. ალჲა̈რ მა̈გ ჟ'ანხვიტხ
Line of edition: 24    ი მუ̄მბვიდ ეშხვი მა̄რე გარ აფვიშდხ. ყიფია̄ნა̈ ვა̈რგს დიჲე ლუმჰოდე ქ'ა̄ხჭკვერხ,
Line of edition: 25    სგ' ე̄სდეხ გუდრათე ი მიჩა ხახვ ოთზჷზეხ. ალ ზურა̄ლს ხახლე̄ნ", ე̄რე "მიჩა
Line of edition: 26    ჭაშვ ესერ კეთილ მჷრე̄ს ოთზჷზა". ხეწა̈დ ჩალდა̈ყხა̈ნქა მიჩა ჭა̈შმი "ბარგა̈რს" ,
Line of edition: 27    ქ'ა̄ნსკინ' ე̄სნა̈რ ჩალდა̈ყხა̈ნქა ი ჩუქვა̄ნ ჟ'ესბა̈ჭკვ. ალ ზურა̄ლ ღანავი ლჷმა̈̄რ ი,
Line of edition: 28    მა̈ჲ საკვრელ ლ', ე̄რე ქვინ მა̄მ ა̈თსედენ ჩალდა̈ყხა̈ნქა ნაშყა̈დვს. ალ ზურა̄ლ ქურდა̄ნშა
Line of edition: 29    ჰასვიშ ლჷმა̈̄რლი. ქურდა̄ნა̈რ მჷლახს ლჷმზიგხ. ალჲა̈რდ ესნა̈რ ლირმ' ო̄ხვბინეხ
Line of edition: 30    უშგვლა̈რს. უშგვლა̈რდ ესნა̈რ მეცქულა̈რს ოთთო̄ნეხ გელაშე̄რთე ი ლისყა̈̄ლ
Line of edition: 31    ლახკაფვნეხ:"ფუსდ გელაშა, ჩუ̄ვ ესერ ა̈დსყა̈̄ნხ ი ა̈დგილს ესერ მინს ლაჰვედნეხ! "
Line of edition: 32    გელაშე̄რ (\\ გელაშერს) ლოხვჭირახ: "უშგვლა̈ მათხუმი̄ გეზალ ესერ
Line of edition: 33    ქა̄ვ ლახვე̄მხ ძევა̈ლდ ი ეჩქას ეგებას სგ' ა̈̄თსყე̄ნხ". ალ უშგვლა̈ მახვშის ეშხუ გეზალ
Line of edition: 34    გარ ხარდე̄ნა ი ქა და̈̄რ მოშ ხაკვშა̈ნვნა ალ ამბა̈ვს. მარე ალ ამბა̈ვ ეში̄ ჟ'ა̈ნმეჴრ'
Line of edition: 35    ე̄სნა̈რ უშგვლა̈ მახვიშდ ი ხა̈̄ქვ სოფლა̈რს: ჯ' ე̄სერ სოფლი გუ̄ღა დე̄მის
Line of edition: 36    აზა̄რე მიჩა გეზალს. იმვა̈̄ჲთ' ე̄სერ ხოცხე̄ნხ, ეჩხა̄ვ ადზიზნე ძევა̈ლდ. ალ ბეფშვ
Line of edition: 37    ქ'ა̄დჲეხ ქურდა̄ნა̈რდ ძევა̈ლდ, მარე გელაშე̄რემ ალ ბეფშვ ჩვადჷნტყოვი̄ნეხ. ეჩქას
Line of edition: 38    ა̈მჴედე̄ლიხ უშგვლა̈რ ი ლატლიდ ოთზჷზახ მეცქვლა̈რ: "სგა̄ვ ესერ ლა̈ხნაბნა̈̄ნხ
Line of edition: 39    უშხვა̄რს ნა̈ჲჷრთგვილაჟი̄ნ". ამი̄ ვარ ლატლა̈რსი̄ მა̄მ ხო̄ქვახ ი სგა ლა̈ხნაბნა̈̄ნხ
Line of edition: 40    ესნა̈რ ალ ჲორი უშხვა̈რ ნა̈ჲჷრთგულაჟი̄ნ. გელაშე̄რემ ესნარ იშგვმინხ უშგვლა̈რხა̈ნქა
Line of edition: 41    მინე მახვში̄ გეზლა საჴსა̈რდ ნაქალაქო̄ლა̈ ადგილხა̈ნქა ი ცა̈̄ნმუყვ. ამი̄
Page of edition: 63  Line of edition: 1    ყაბულს უშგულ მა̄მ ა̈მჴედ. ეჩქას ლატლა̈რს ოხვსკო̄რახ:"ჲაღვ' ე̄სერ უშგვლა̈რდ
Line of edition: 2    ლიბჷრგიე̄ლუ ხაშგვმინხ ქურდა̄ნა̈რს. ეჯჲა̈რ ესერ სამგვი ჩაფლა̈რს ლა̈ჲდი̄ნეხ ი
Line of edition: 3    მინდ ჯაბრა̈რუ ლა̈ჲდა̄ლეხ. ეჩი̄ ქა̄მენჩუ̄ნ ესერ ლაბჷრგა̄ლ ლა̄რა ჩუ̄ვ ადჷლცე̄რეხ,
Line of edition: 4    ეჩქ' ე̄სერ ქურდა̄ნა̈რს ქა ხოგბუნიხ ჭჷშხა̈რ ი მჷნწირ ესერ უშგვლა̈რ ი̄რახ."
Line of edition: 5    ალ' ა̄მჟი̄ნ ხოჩვმინახ ი ლაბჷრგია̄ლს ჟ'ახწინე̄ნახ უშგვლა̈რ ი ბეფშვი ქ'ო̄ხტი̄ხახ.


Line of edition: 6 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.