TITUS
Svan Chrestomathy
Part No. 76
Previous part

Text: 71 
Page of edition: 65 
Line of edition: 8 
71. კა̈̄რშარეშ ი ლა̈შხა̄ნშა ბა̈კობ


Line of edition: 9       ჯვინალდ ბა̈კარობ ლჷმა̈̄რ. იმვა̈̄ჲ მოშ ლჷმსახვთინხ, დე̄მნოვშ ლჷმზა̄რვინხ
Line of edition: 10    უშხვა̄რ, მა̈̄ მოშ ლა̈თჲა̄ლს ხა̄რახ. ლებეკ ი მებეკ უშხვა̄რი ხოლა̄მ გარ ხაშდბე̄ნახ
Line of edition: 11    ი ხვა̈ჲ ხოლა̄მ ხა̈ჩვმუნახ უშხვა̄რ.

Line of edition: 12       კა̈რშრეშ ი ლა̈შხა̄ნრე უშხვა̄რნე̄სგა̈ ბა̈კობ ბოფშრე ლიკჷნტა̈̄ლს ახფასა. აშხვ
Line of edition: 13    ლადა̈ღ ესნა̈რ ბოფშა̈რ ლალდა̈ღს არიხ ი ლიშდრა̈̄ლ ლა̈ჲბინეხ. ლაშდრა̄ლჟი̄ნ ლიკჷ̄ნტა̈̄ლ
Line of edition: 14    ოხჩდჷხ ესნა̈̄რ ი უშხვა̄რ ჩვახტუფუ̄რეხ მა̈გ ლაკანჭუ̄რას. ლა̈̄შხა̄ნშა ხოშა̄ლე
Line of edition: 15    ბეფშვ ჟი მჷრეს ახწინდა კე̄რშა̈რშა ხოშა̄ლე ბეფშვს ი ხოშე̄ლ ოხკანჭუ̄რა.
Line of edition: 16    ნა̈ბოზს ა̈გით' ა̄ჩა̈დხ ალ ბოფშა̈რ ამჟი მჷჟღჷ̄ლი. კჷ̄რშა̈რშა ბეფშვი დი ხეწა̈დ მიჩა
Line of edition: 17    ბეფშვს ქა ლჷკანჭუ̄რა ი ლახჭვედნა: "მა̈ჲ ესერ ხა̈ყრა, ჲა̈ს ესერ ლოხვგენ'ა̄მჟი
Line of edition: 18    ჩქიმ?" ალ ბეფშვს ლოხვტი̄ხა: "ჲა̈ს ესერ ი ლა̈̄შხა̄ნშე̄რ ბეფშვს". "მიჩ ესერ
Line of edition: 19    ოსკანჭუ̄რა მა̄ ღო?" "მიჩ ესერ ა̄დუ".

Line of edition: 20       ალ ზურა̄ლ ესნა̈რ ხოჩა ზურა̄ლ ლჷმა̈̄რ. ჩვადშა̄რდ' ე̄სნა̈რ გეზალ ი ხა̄ქვ: "ჯ'
Line of edition: 21    ე̄სერ ი̄რო̄ლ ღე̄ვა̈რ, ადო ასცვიდდ ესერ დე̄მის ახკანჭუ̄რი̄ს. ამუნღვ' ე̄სერ ნო̄სუ
Line of edition: 22    ხეკჷ̄ნტა̈̄ლ ი ღვ' ე̄სერ მა̄მ ხე̄რ' ა̄ლა".

Line of edition: 23       ლა̈̄შხა̄ნშა ბეფშვი დი ქა ხა̈წდა მიჩა გეზალს ამჟი ჩქიმა̈რს, ეჩქა ლა̈ხჭვედდა
Line of edition: 24    "მა̈ჲ ესერ ხა̈ყრა ჭყჷტრა?" "მა̈ჲ ესერ ი კჷ̄რშა̈რშე̄რი ბეფშვს ოხკანჭუ̄რა". ალა
Line of edition: 25    ზურა̄ლდ ა̈დვა̈შგდე. კუდა̈ჲ ზურა̄ლ ლჷმა̈̄რ. ბეფშვი ლიშა̄რდე̄ მჷქაფდ ოთშგა̈ბ
Line of edition: 26    კჷ̄რშა̈რშე̄რ ყო̄რთეჟი̄ნ. ლოხვბინე ალ მეზგა ლიწრა̈̄ლ ი შვანე რიჲა̈ლ ჯაჭა̈რჟი̄ნ
Line of edition: 27    ხაჴიდ. ალჲარე ზურა̄ლ ქ'ა̈̄ნსგიდდ' ე̄სნა̈რ ი ლა̈ხჭვედდა: "ჯა ზურა̄ლ, მა̈ჲ ქაჯა̈რ
Line of edition: 28    ესერ ახჭვა̄და? იმნა̈რ ესერ ხა̄რ ამჟი̄ნ მიჰმა̈ნ?" "ხამ'ე̄სერ იმნა̈რ, მინ ბაგრაუ, მინ
Line of edition: 29    ეჯა ი მინ ალა, მინე ხოლა̄მდ ლჷნში̄ლა წოკლა̈ჲ ბეფშვს მა̈გ ჩვოხტუფუ̄რა მიჩა ბეფ
Line of edition: 30    შვდ. ჲა̈რ ესერ ხოხალხ მინს ეჯა?" "ჯა ზურა̄ლ, მიჩა ბეფშვდ ესერ ჰა̈დურდ ხოდრა
Line of edition: 31    ჩქიმ ლოხვგენა მიჩა გეზალს, მარე ჯ'ე̄სერ აჯაღ ეჩხა̄ვ ათცუვე̄ნა, ბეფშვი თველს
Line of edition: 32    ესერ ჲა̈რ ა̈ნჴდე თველია̈ნ, მა̄მ'ე̄სერ ხოშგურა ბოფშრე ლიწე̄ნა̈̄ლ?"
Line of edition: 33    ოხჩჷ̄დხ ალ ზურალა̈̄რს ტე̄ვა ი უშხვა̄რ ლა̈ხწერა̄ლა̈̄ნხ ხოლა̄მდ, კჷ̄რშარშე̄რ
Line of edition: 34    ზურა̄ლდ ხა̈̄ქვ: "ჯ' ე̄სერ ჰერვია ლი. ლა̈̄თშვ ესერ ციცვდ ისპი ი ხოჩა̄მ სიმქა̈რს
Line of edition: 35    ესე გვის ი ყვიჟა ქა ხამა̈მ". "უ̄ჲ, ჯ'ე̄სერ ყა̈ხბა, ჩუ̄ვ ღენ ესერ ესგენე, ამნია̈̄ნდ
Line of edition: 36    ესერ მა̈̄ვ ხა̈ყრის მიჩ მიჩა ჭაშვემ. ჲედ ესერ ესცხირნე ჟი ალ ლიჰურჲალსვ ი მა̄დ'
Line of edition: 37    ე̄სერი იმთ' ო̄თჩედნი?"

Line of edition: 38       ამჟი̄ნ ლა̈წრა̄ლუშ ა̈გით'ა̄ჩა̈დ ლა̈̄შხა̄ნშა ზურა̄ლ. ნა̈ბოზს მიჩა ჭა̈შ ლაშდაბხა̈ნ
Line of edition: 39    ა̈გით'ა̄ნჴა̈დ, ეჩქას ალ ზურალდ ჩვესხვიჲე ა̈გის ალ ამბა̈ვ ი ხა̈̄ქვ: "ჲედ ესერ
Line of edition: 40    ქა̄ვ ამმაწვდე ჯა ამხა̈ნქა, ალ შგვირ ესერ ჟი̄ვ ახღირ ი მა̄დ'ე̄სერ ი ჯა მიჩა ლამვართე
Line of edition: 41    ღჷრი ი ეჯჲა̈რს ესერ ახთხა̈̄ლვნი მიჩა შგურ". ჭაშვემ ესნა̈რ ლახტიხ:"ჯა ზურა̄ლ,
Line of edition: 42    ჟი̄ვ ლახშვა̈მნე კვეტო̄ლ ხა̈ნს ი ღვ'ე̄სერ ეჩქანღო ი̄რ'ა̄ლ გვეშ. მა̄მ' ე̄სერ
Page of edition: 66  Line of edition: 1    ხოსგდია, ვედნილდ გარ ა̈რი, ეჩჟი̄ნ ლახმეშრე̄ნა ლა̈დი ლამშიას". მე̄რმა მეყულფა
Line of edition: 2    დი ათსა̈სტკვნეხ ბა̄ზი ალ ზურა̄ლს ი ჩვადშა̄რდეხ. მე̄რმა ლადა̈ღ შიშდ ლიმცი
Line of edition: 3    ქვილ ლოხვბინეხ ალ ხეხევ-ჭა̈შდ კჷ̄რშა̈რს: "ჲედ ესერ იმვა̄ლეჟი̄ნ ქა̄ვ ანმაწვდეხ
Line of edition: 4    ალ ზურა̄ლ ლიჰურჲალვხა̈ნქა, მა̄დე̄ჲ მა̈̄ღვრა̄ვ ხაყერხ, ადო ამჟი̄ნ ესერ დეშ აჭკრ
Line of edition: 5    ჷნეხ ი ფათრა̈კს ხაფსეხ. ივალადა̈ღ ესერ მინე გვა̈რიში ლიჰურჲალვ და̈̄ს ხასმა".
Line of edition: 6    კჷ̄რშა̈რშე̄რ ღვაჟა̈რს მა̄მაგვეშ ხოხალდახ ამი̄შ ი ეშ ა̈დჷმბაჟეხ. ლა̈ხჭვედდახ
Line of edition: 7    მინე ზურა̄ლს ი ამნე̄მ მა̈გ ქ'ო̄ხუნბავე ღვაჟა̈რს, იმ ახფასეხ მინე ზურალა̈̄რდ ტე̄ვა.
Line of edition: 8    მეცქულა̈რს ლახტიხხ ღვაჟა̈რდ, ერე "მინს ესერ მა̄მგვეშ ხოხახ ხიად, ზურალა̈̄რ
Line of edition: 9    ესერ იმვა̈̄ჲ ღენ ლახწერა̈̄ლი̄სხ უშხვა̄რ. ლა̈̄შხა̄ნშე̄რ ზურა̄ლა̈ ნალფე̄თ' ე̄სერ გიმ
Line of edition: 10    სი გვა̈მი ხა̄რ. მინს ესერ მა̄მა ხოჟიბხ ეჩი̄ ლა̈ჭმინა̄ლდ ი მა̈დილუ ხე̄რახ ი მინს ჰაჯუ
Line of edition: 11    ახკიდხ". მეცქულა̈რდ ქ'ე̄სვტიხხ პასუხვ ი ალ ხეხვ-ჭა̈შ ლა̈ზჷრხოვშ აჩა̈დხ
Line of edition: 12    ქორთე. აშხვ ლადა̈ღ ლახევი̄დ ლა̈̄შხა̄ნშა ზურა̄ლა̈ ჭა̈შ კჷ̄რშა̈რე ზურა̄ლს, ახფხი
Line of edition: 13    ჭე ლუსდიგვს ი ხანჯარშვ ჩვახჭკვერ. ჯვინალდ შვა̈ნისგა მა̄რე̄მი დაგრად ხოშა
Line of edition: 14    ხჷ̄რ ხეყა̈̄დ, ათხე̄ჲ მასა̈რდ შგვირ ლი ლახე ზურა̄ლს ლუსდიგვს ჲა̈რ ახჭკორე. ალა,
Line of edition: 15    მა̈ჲ საკვრელ ლი, ჭაშვემ ი მიჩა მეყულფად მასა̈რდ ა̈დხჷ̄რეხ. "ეჯღა̄ჲ ესერ ოთხი̄
Line of edition: 16    პახ გვი ხოლა̄მ ყა̈ხბა ზურა̄ლა ბა̈დშვ, ყორქა ლაჴა̈დ ესერ ოხვშდი̄ნახ ი სერ ესერ
Line of edition: 17    მინე ლირდე ამუნღო დე̄მნა̈რდ ხაჯეშ".

Line of edition: 18       ალ ზურა̄ლა̈ ჭა̈შდ ლიმშავს ჰაჯ ახკიდ, ყო̄რქა ლიჴედსი დე̄მ იჩომ ი ოხღელი
Line of edition: 19    ტარესვს. აშხვ ლადა̈ღ ოთდარჯე ჩუ ლახვს ლიჭმა̈̄ლისგა ლა̈̄შხა̄ნშე̄რ მა̄რა. ალ მა̄რა
Line of edition: 20    მერჩილ ბარჯს ხა̈̄ზ, თვეფ ჟი ხორიკ ი ესღრი ლა̈ჭმათე. ახფიშვდ კჷ̄რშა̈რშე̄რ მა̄რე̄მ
Line of edition: 21    თვეფ ი შუკვისგა ჟ'ესცვირ ალა. ანჴა̈დ ა̈გითე, ჟ'ა̈ნნა̈ზო̄რე ნა̈თჲა̈რ ი ბა̄ზი ხოჩა
Line of edition: 22    ლა̈ხჲადა̄ლ აჩვმინ, ერე შგვირ ქა ლა̈ჲტიხჲე̄ლე ი ყო̄რქა ლაჴა̈დ ჟ'ა̈ხსყა̈̄ნ.
Line of edition: 23    ეჩქანღო სერ უშხვა̄რ ახბეკე̄ნახ ალ ჲო̄რი თემ ი მასა̈რდ დაგრა̄რობ ხა̄რახ.
Line of edition: 24    თვით ოხვიშდ ღეთ ოთდაგრახ ეჩხა̄ვ-ამხა̄ვ ი ეჩქანღო ვედნილდ გარ ოთსყახ მინე
Line of edition: 25    მესვფელას, მარე ა̈მჩედელი დვრევ ი ალ ჲო̄რი მეზგე ჟ'ა̈მხვეტე̄ლიხ, ეჯჲარე
Line of edition: 26    ნაქურვა̄ლე ნამჴიჩვა̈რ წვირმი̄შ ი ჲელი̄ უშხვა̄რ ნე̄სგა ათხე̄ჲ ზჷმშვ ჩუ სიდხ. ეჯ
Line of edition: 27    ჲარე გვარიში და̈̄რ სიდ ლა̈დი.


Line of edition: 28 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.