TITUS
Svan Chrestomathy
Part No. 77
Previous part

Text: 72 
Page of edition: 66 
Line of edition: 29 
72. ეცრიშ ი ფა̈რი ოთარშე̄რრე ბა̈კა̄რობ


Line of edition: 30       ჯა̈ნსუხვი ნაბერწყ ეცერ იზგახ ი ლაზგად ბა̈რშისგა იზგახ. ალჲარე შჷნჩუქვა̄ნ
Line of edition: 31    არდახ ეცერ-ცხჷმა̈რ ი ბეჩვი. ფა̈რს იზგა ციოყ ი მიჩა ნა̈თსა̈ვ. ალჲა̈რს ჩიგარ
Line of edition: 32    ხა̈სგჷნხ უშხვა̄რე თხვიმ ი ჩიგარ ბა̈კა̄რობ ხა̄დხ.

Line of edition: 33       ხა̈ლხცახა̈ნ ი ლუზორ-მაზორჟი̄ნ უშხვა̄რე მა̈სისგს ქა დე̄მ ითნახ ი ხეყხა̄ლხ
Line of edition: 34    უშხვა̄რ, მარე გუისგა ეჯას გარ ხესკო̄რა̄ლხ, ე, უშხვა̄რეშდ მა̄ლე ლედვრე̄ჴი მოშ
Line of edition: 35    ესვდე̄ნხ. მინე ლეფსვნა გლეხა̈რს ი ჟი ლჷჟა̈ხ ხა̄დხ მინეშდ ქა ლჷკჷლპოტე ჟახე:
Line of edition: 36    "ჩინოვშ უმჴა̄და ოთარშა".

Line of edition: 37       ალ ჲო̄რი ოთარშა ჲეს ეშხუ ხა̈წრახ აშხვჟი̄ნ ი ჲეს -- მე̄რმე, შვა̈ლას დე̄მჟი
Line of edition: 38    ხოჴდახ უშხვა̄რ ი გუ ხა̄დხ, ერე ჟი იმჟი მოშ ოხხვი̄ტე̄ნხ ი ღო ეჯჲარე ნამსა̈დვ მინს
Line of edition: 39    ესსედე̄ნხ, ალა ჲექჷრდა̈შ ჩუ ხოხალდახ ი ჩიგარ ხეფჷრთხილდახ უშხვა̄რ.
Line of edition: 40    ალჲა̈რს მჷსმი̄ნეჲ ხვა̈ჲ ხორდახ, ამნოვშ აშ გარ ხოკვი̄ლცხა̈̄ლდახ უშხვა̄რ ნესგა
Line of edition: 41    თე̄ ხოლე̄მი ლიჩვემს. აშხვჟი̄ნ ფა̈რი ოთარშა ლეჟ'ა̄ხშგებახ ეცრი ოთარშე̄რს,
Line of edition: 42    შომვა̈̄ჲ ღვაჟა̈რ ქორს მა̄მ არდახ, ეჩქას ჟ'ოხვბიდნახ ეცრი ოთარშე̄რდ ი ხვა̈ჲ
Page of edition: 67  Line of edition: 1    წყა̈ნ ოთჩვემნახ. ქორთე ნაჴა̈დუნღო ლჷღლატად ესხვიე̄ნახ მა̈გ, მარე ქა მა̄მ ლოხ
Line of edition: 2    თენახ, ახმა̈ღლინახ, ერე მინს ესერი ოხვჴედნიხ იმვა̄ლე დვრევ ი გა̄მს ლახტიხეხ.
Line of edition: 3    ფა̈რი მახვში ციოყ ჩვალდაგა̈რ, ეჩქას ეჯას ხეხვ ი ოხვიშდ ჭყინტ გეზალ ათსედა.
Line of edition: 4    ალ ჭყჷნტა̈რ ხოხვრა გარ ლჷმა̈̄რხ ი ეცრი ოთარშე̄რ მაყალშვ ქ'ოთქა̄მვნა
Line of edition: 5    ზა̈ნთე მინე დი დიგორხანს. ქორს ჯაჲ მიჩა ფა̈მლია̈რ გარ ა̈მსედე̄ლიხ.
Line of edition: 6    ათხე აშხვ ლე̄თ ეცრი ოთარშე̄რ ჯანსუხვს ი მიჩა ლახვბას დვრევ ესვთიშახ
Line of edition: 7    ი ჩვათშგებახ ფა̈რთე, ამეჩუ̄ნ ჟ'ოხვმეჴრახ ი დიგორხან ი მიჩა ფა̈მლი დი̄ნა̈̄ლ მურ
Line of edition: 8    ყვამთეჟი̄ნ ა̈მჩედე̄ლიხ ლა̄ტვთე. ეცრა̈რ სგა̄თშგებახ, მა̈̄ჲ ესამა კეთილ ი ბა̈რგ-ნაბა̈
Line of edition: 9    რგ ი გა̈ნზ ჩუ ხარდე̄ნახ მა̈გ ჟ'ოხხუ̄პახ ი ქა̄მენჩუ̄ნ ოხვჴი̄დახ, ეჩქანღო ქორდი
Line of edition: 10    მურყვამდ ჟ'ოხვბიდნახ ი მინ ა̈მჩედე̄ლიხ.

Line of edition: 11       ლემასგვ ჟ'ოთჰა მურყვამთეჟი̄ნ, ეჩქას დიგორხანს ქ'ოთჭო̄ნა ლაყვრა̈̄ ლერქვა̈რ,
Line of edition: 12    ჲერ შიჲა̈რჟი̄ნ ესვყედა̄ნა ი ამჟი̄ნ ქ'ო̄ხვსკინა მურყვამხა̈ნქა. ლერქვა̈რ ქ'ა̄ლბჷლბა̈ი
Line of edition: 13    ნე̄ლიხ ი ჩუქვა̄ნთე ლჷსკნანღო მამგვეშ ხა̈ყრა, -- ქა̄ხსედა, მარე მიჩეშუნღო
Line of edition: 14    მიჩა ფა̈მლის ოხვსკინა, ჟიქა̄ნ ხა̈ჲხა ი ჩვალდაგა̈რლიხ.


Line of edition: 15 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.