TITUS
Svan Chrestomathy
Part No. 78
Previous part

Text: 73 
Page of edition: 67 
Line of edition: 16 
73. მაქსიშა ლიხვტე


Line of edition: 17       ვიბია̄ნშა ლენჯა̈̄რს ჟ'ოხხვიტახ. ეჩქანღო გვიანდქა ქედუშ ალზიგე̄ლიხ ი
Line of edition: 18    ეზერ მეზგე ლჷმა̈̄რხ. ალჲა̈რს ლერდიდ ოთხვიახ ნიშგვეჲ გიე ი სოლთანშე̄რ სოლთანი
Line of edition: 19    გეზალ. ალ ქორს მეჩი ბაბა ხარდე̄ნახ ჩუ ლუთურე ი ზურალა̈̄რს სურუ ხოლა̄მდ
Line of edition: 20    ხა̈ჩვმუნახ. აშ ღერთია̈̄ნიდ, მეხვრი ახანახა სგვებნე ლე̄თ (ლიგვირკე ლე̄თ)
Line of edition: 21    გიე ნიშგვეჲს ა̈გით'ო̄ხვტი̄ხახ ი მე̄რმა ლადა̈ღ ესნა̈რ ლეღვჟმა̄რე მა̈გ მეხვირთ'ა̄ჩა̈დ
Line of edition: 22    ლა̈ჭმათე. ანჴა̈დ ესნა̈რ ქედუშა ბაბა ი სოლთანი გეზალს ი მინე ბეფშვს ჰაკვნა̈რთ
Line of edition: 23    ე̄'სგა ყია̈̄რ ქ'ო̄ხვხანე ი ჩვადგა̈რ ამეჩუ̄ნ. მა̈ჲ ი̄რო̄ლ მიზეზ, ლა̈კი̄ლჲა̄ლ მო̄დ
Line of edition: 24    ა̈ნსყო̄ლ ალ ქორისგა.

Line of edition: 25       ანჴა̈დ ესნა̄რ გიე̄ დი, ჟ'აჩა̈დ მეხვირთე ი ქედუშა ღვაჟა̈რ ჩვადბა̈ჟნე. ალჲა̈რს,
Line of edition: 26    მა̈ჲ ი̄რო̄ლ მიზეზ, სოლთანიშდ ი ნიშგვეჲ გვა̈რდ ათყალვი̄ნდახ ი აჩა̈დხ ლა̄ტვს
Line of edition: 27    მესტჲა̈ხა̈ნჩუ̄ნ, ჟ'ა̈მჩედხ ჭო̄ლა̈შთე ი ამეჩუ̄ნ ჩვალზიგე̄ლიხ. მასა̈რდ ხა̈დრა̄ლახ
Line of edition: 28    ნიშგვე გვა̈რშია̈̄დუ ქედუშე̄რ ღვაჟა̈რს, მარე დეშ ოხვდარახ. ქედუშე̄რ ნა̈რშავს,
Line of edition: 29    მა̈ჲ საკვრელ ლი, აშ ხათრო̄ნა მა̈გ ნე̄სგუნა გიმ-მეგემ. მასა̈რდ ხატკლებე̄ნა
Line of edition: 30    მიჩა ქორ ი ლიზგე-ლირდე ჩუ ლეცვრად. აშხვ ლადა̈ღ ლოხვჴერდახ ესნა̈რ მინ
Line of edition: 31    ლახვბა უშხვა̄რ ი ანჴა̈დხ ლენჯა̈̄რთე. ლეჟ' ა̄ჩა̈დხ ტვიბნა̈რთე ი ამეჩუ̄ნ ლა̈ქნი̄ლა̈
Line of edition: 32    ცხეკისგა ჩვა̈თპა̈ჟხ. ხაკუხ, ერე ეშხუ გარ ერვა̈̄ჲ ლა̈ხდო̄ლახ ლახვხა̈ნ მჷნე̄სგვინ,
Line of edition: 33    ალა ჩვადჷრმახ. ლეჟ'ა̄დიახ მჷლახთე ი ამი̄ საჴსა̈რ ა̈ნკჷდეხ. მა̈გ ჩვა̈მჴედე̄ლი ლახვხა̈ნ
Line of edition: 34    ი ლერმიდ და̈̄რმოშ ოხვდარახ. ჟი ლიჭვე̄ნის ხამურჯა̄ლახ, ამჟი̄ნ ესნა̈რ ხეწა̈დხ
Line of edition: 35    ლა̈̄ქვთე̄რი̄ლჩუ̄ნ მეჴედ აშხვ გარ მა̄რა. ალა ღალ ესნა̈რ გაგუ ლი ქაუშა. ქა მირ
Line of edition: 36    ლახქეხა̈̄ნ ლახვს ი ჯა გარ ალმა̈̄ზ. ესხვი̄დხ ესნა̈რ სგვებინჩუ̄ნ ალჲა̈რ ი ჩუ ლირმი
Line of edition: 37    ხაკუხ, მარე გაგუდ ესნა̈რ თხვიმ ლერმიდ მა̄დ ათნებე. ლა̈ჲშგვინ ხანჯა̈რ ი ნა̈რშავს
Line of edition: 38    ხაძგერ, მარ' ე̄ჩქად კვეტო̄ლ ლუვრე ხანჯრი̄ლა̈რ გარ ლჷმწვე̄ნხ ი მა̄მ გვეშ
Line of edition: 39    მოშ ხაყერ ღალ ესნა̈რ. ახჭვა̄დხ ამის ლახვბა, ჩვადბა̈რხ ი მინ ჩვა̈დი̄ტვხ. ეჩქანღო
Line of edition: 40    ჩიგარ ლჷმა̈̄ზხ ნიშგვეჲ ღვაჟა̈რ, ქაუშა ი სოლთანშა, მარე და̈̄ს მოშ იდრენდახ
Line of edition: 41    ესნა̈რ. აშხვჟი̄ნ ოხვლოთმა̈̄ნხ ლექვა̈̄ მჷლახს მაქსიშა ლეღლა̈ტიდ. ლოხვჴერდახ
Line of edition: 42    ესნა̈რ უშხვა̄რ სოლთან, გიო ქაუშა, ბაბში ი კვეტო ნიშგვეჲ, გურმაჩშა გურმაჩ,
Page of edition: 68  Line of edition: 1    ჲო̄რი ღეთ აჯაღ ი აჩა̈დხ ბა̄ზი მჷლახთე. სგ' ე̄სჭვა̄დხ მაქსიშე̄რ ლაყვრა̈̄ლთე̄'სგა
Line of edition: 2    ი მა̈გ ჟ'ანხვიტხ ხოშა ი ხოხვრა. ეჩქანღო ქ'ა̈ნსკინა̄ლეხ ი შგედრუშ ა̈გითე ლიჴედ
Line of edition: 3    ლა̈ჲბინეხ. ლა̈ჲსგიდახ ი გიო დე̄სა ხონჴრიხ. ვა̈̄ჲ ღალ ა̈დშიდხ. ჟი დეშ ხოჭვე̄ნიხ
Line of edition: 4    ფა̄და̈̄სი მაყალშვ ი სოლთანს ლოხვბინეხ ლიმჯა̈̄ლ: "დო̄ვ ესერ გიო ლახცილვა̈̄ნ
Line of edition: 5    მიჩ ლეცლჷ̄რად". ალა ხა̈ტხ' ე̄სნა̈რ: "მინ მა̄რა̈̄ლ, მიჩ ესერ ლაყვრათე̄'სგა
Line of edition: 6    ოთცჷლჷრა მა̄რა̈̄ლ ი გიოს ესერ დეშ ათა̈რდაჲა?" ესნა̈რ გიოს ქორისგა ფოყ ესსიპდა,
Line of edition: 7    იმ დო̄მ იჩო, მარე ყო̄რა̈რს დე̄მჟი მოშ ხეხოლი ი სგა ხასიდ ქორთე. ა̈დკვიჰ
Line of edition: 8    ესნა̈რ ალა ბა̄ზი მჷლახდ ი ქ'ა̈̄დფადას. სგა̄ჩა̈დხ ესნა̈რ მა̈̄ნკვი მაქსიშე̄რ ქორთე̄'სგა,
Line of edition: 9    ლჷდგარუ ჟ'ა̈ნწვე̄ნეხ ესნა̈რ ი ეჩქანღო აჩა̈დხ ფა̄და̈̄სდ. გივ' ე̄სნა̈რ ნე̄სგაქა ლოხვჴერდა
Line of edition: 10    მუბვირისგა ფა̄და̈̄სს ი ქ'ა̄ნჴა̈დხ ქა̈̄მთე. ესვთიშ ფოყ, ფა̄და̈̄სს ქა̈̄ხყვა̈ლ ი
Line of edition: 11    მიჩა შუკვს აჩა̈დ. ლა̈ჲბინ' ე̄სნა̈რ შგედრუშ ლი̄ზი ი მიჩ' ა̄ფხნეგა̈რს ბოგჷლდჟინ
Line of edition: 12    სგვებინ ესხვი̄დ. ალჲა̈რდ მასა̈რდ ა̈დხი̄დეხ ი ლა̈ხჲადა̄ლა̈ თოფა̈რ ეჩქანღო გარ
Line of edition: 13    ოთკვარახ.


Line of edition: 14 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.