TITUS
Svan Chrestomathy
Part No. 79
Previous part

Text: 74 
Page of edition: 68 
Line of edition: 15 
74. ლენჯა̈̄რა̈შ ი ჩა̈რკვია̄ნრე ბა̈კა̄რობ


Line of edition: 16       მჷლხა̈ ქურდა̄ნა̈რს ი მინე ლაშგა̈რს ხეშკილ ჩ' ოთჴაცახ. ეჩქას ეჩი̄ ლასხა̈თს
Line of edition: 17    ჩა̈რკვია̄ნა̈რი̄ ხაჩჷდახ, მარე ქურდა̄ნა̈რს ჟ'ოხვჩი̄შახ ხეშკლა̈ ლიღლა̈ტი. ეჯჲა̈რ
Line of edition: 18    ლენჯა̈̄რს ქო̄თვა̈̄ტვნა, ერხი ჟ'ოხხვი̄ტა. კეთილ ი ეშხვი ლჷრმ ბეფშვ ღვეშგ ოხვტი̄ხახ.
Line of edition: 19    ღო ჩა̈რკვია̄ნა̈რს ხეშკილ ხაკვდახ, მარე ეჯა ლენჯა̈̄რს მა̄დ ოთნება ი ჩა̈რკვი
Line of edition: 20    ა̄ნა̈რ ჩი̄ვშ მა̄მაჟი̄ნ ი ჰა̈რიდ ა̈მსედხ ალ გვეშხა̈ნქა. ეჩქას ოხვა̈ზრახ, ერე "იმვა̄ლეჟ
Line of edition: 21    ი̄ნ ესერ ლატლი̄ გუვა̈რდ ლენჯა̈̄რი̄ ჩუ̄ვ ა̈დხვიეხ ლეფსვნად. ჲარვ სოფლი ფუსდ
Line of edition: 22    ესერ ი̄რახ ი ჯვინელ ხჷრსი ქა ლა̈ჲტიხჲე̄ლიხ ალ სოფელხა̈ნქა". ჩა̈რკვია̄ნა̈რს ეჩქას
Line of edition: 23    ლაჩჟი̄რ ი ჰილვრე ლარდა მაშა̈რჭალი ლექვა̈̄ პილს ცხეკი ლა̈ბნამჷყ ხა̄რახ.
Line of edition: 24    ლოხვბინეხ ესნა̈რ ლიმციქვილ ლენჯა̄რა̈რს ხოჩ-ხოჩა თხვიმ ლატლიისგა̈ მა̄რა̄ლშვ
Line of edition: 25    ი ხოჭრეხ, ერე "მინუ ესერ ა̈ნცხე̄ნეხ ფუსდდ ი მა̈გ ესერ ხოჩა̄მდ ოხჴედნიხ მინე
Line of edition: 26    შჷნჩუქვა̄ნ. მინე მაყალშვესერ მა̈̄ჲ სოფელთე დო ი̄ზნიხ, ლირმის ესერ და̈̄რ მოშ
Line of edition: 27    ხობდავნიხ, ბეგა̈რს კვეტო̄ლ გარ ხეკვდა̈ნვნიხ. მა̈̄ნკვი̄ ლე̄თს ესერ მინე სიმქა̈რა̈ნქა
Line of edition: 28    დე̄მის იშგვმინნიხ" ი ამკა̈ლიბ ხოჩა̄მ ხობციხ ესნა̈რ: "ადო ედ ესერ მესტიჲა̈̄
Line of edition: 29    ვარგა̈რ ესფუსნიხ, მა̄დე̄ი ქურდა̄ნა̈რ ესერ ეში̄ ლჷხრინე ლიხ. ანჴდენიხ ესერ იმვა̄ლე
Line of edition: 30    ლაშგარშვ მჷლახხა̈ნ, მესტჲახა̈ნი̄ ესერ ლოხვმა̈რჯვიხ, ლექვა̈̄ნისგ' ე̄სერ მინი
Line of edition: 31    ლოხვმა̈რჯვნეხ ი ეჩქას ესერ მა̈გ ხოლა̄მდ ოხვჴედნიხ". ლენჯა̈̄რა̈̄ ხოშა̈̄ლდ ესნა̈რ
Line of edition: 32    გუნ ა̈ჰი̄ჭვხ ალჲარე ნა̈ჭირვ ამბა̈ვ. გუნ ლასკო̄რათე̄სგ' ა̄შყა̈დხ ი ღეეშგმე პილს
Line of edition: 33    მეცქულა̈რს ლახტიხხ:"მინს ესერ ვიბია̄ნშ'ე̄ჯღ'ო̄ხხვი̄ტახ, ერე ფუსდ მა̄დ ხა̈კვდახ,
Line of edition: 34    დე̄ჲ ესერ ლა̈დი ხაკუხ ფუსდ ი ჰაჯუ ახკიდხ". მეცქულა̈რდ ქ'ე̄სტვიხხ ალა
Line of edition: 35    ჩა̈რკვია̄ნა̈რს. ანჴა̈დხ ესნა̈რ აშხვ ლადა̈ღ ჩა̈რკვია̄ნა̈რ ი სოლმუყვ ახჭვა̈̄დხ მინე
Line of edition: 36    ლელდეღ დაბა̈რს ი მინ ი მინე ლაშგა̈რ ღვეშგიმ ახჭიმხ. ა̈დკვიჰ ალა ლენჯა̈̄რდ,
Line of edition: 37    ადშჷმეხ სანყვირ. ა̈ნნა̈ზო̄რა̈̄ნხ ჟი, ესხვი̄დხ სგვებინხა̈ნ ჩა̈რკვია̄ნა̈რს, ჟ'ახწინდახ,
Line of edition: 38    ხვა̈ჲ ადგა̈რხ ი ქ'ა̄და̄ტუნეხ. ეჩქანღო აჩა̈დხ ერხი მაშარჭალა̈ჲთე ალჲარე ჩა̄ჟა̈რ
Line of edition: 39    ი ჰულა̈რ ლეჟ' ა̄ნჴიდხ. ეჩქანღო დეშ იმის ლჷმბა̈დვინხ სერ.


Line of edition: 40 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.