TITUS
Svan Chrestomathy
Part No. 92
Previous part

Text: 87 
Page of edition: 75 
Line of edition: 17 
87. სორთმან ჯაფრა̄ნ


Line of edition: 18       აშხვ ზავ ა̈მჩედე̄ლი სორთმან ჯაფრა̄ნ ქაშა̈გთე ლა̈ქმათე. ამე სგა̄თჴედჷ̄ნე̄ნა
Line of edition: 19    ქაშგი მეფეთე̄სგა, ამი̄ დი̄ნას ესნა̈რ გუნ ლახლატჷნდა ალ სორთმან ი ხა̈̄ქვ:"ჰ'ე̄სერ
Line of edition: 20    ხაკუჩ, ქა ხონჴრი მიჩ ხახვდ შვა̈ნთე, შომვა̈̄ჲ ესერ ხოცხა̈̄ნდეს, ეჩქას". სორთმანს
Line of edition: 21    ხო̄ქვა: "მინე ჯვრილიშ ესერ ქრისდია̄ნს ხახვ დე̄მის ხაჰვდი, მარე ჯ' ე̄სერ იშგან
Line of edition: 22    ანსათხი: მიჩა მუს ესერ ქორა̈ ლიგემდ გუ ხა̄რ. ჯ'ე̄სერ ქ'ა̄დრინე შვა̈ნთე, ეჩხა̈ნ
Line of edition: 23    ჴელვანა̈რს ა̈ნჴდე ი ქორა̈ ნაგა̈მუნღო იგებს ესერ ქა ლახო̄მეხ მინეშდ მიჩა
Line of edition: 24    თხვიმ".

Line of edition: 25       ალ სორთმან სგა̈̄მჴედ შვა̈ნთე, სგა ლოხჴერნა უსგვა ჴელვა̈ნ ი ქა̈̄მტეხ ამჟი̄ნ
Line of edition: 26    ქაშა̈გთე. ალ ჴელვანა̈რს, მა̈ჲ საკვრელ ლი, მა̈ნკვი ლა̈კირ ოთგახ ი ა̈შხიხ. სორთმანს
Line of edition: 27    ი მიჩ' ა̄ფხნეგა̈რს ესნა̈რ მასა̈რდ პა̈ტივს ხა̈ჩოხ ქაშგა̈რ. ქორა̈ ლიგემ ქ'ა̄დსურლეხ,
Line of edition: 28    ეჩქას, მიჩ' ა̄ფხნეგა̈რ ი ნა̈ჴჷლვანვი̄რ სგვებინ ანფიშვდ ი ჯა ზურა̄ლცახა̈ნ
Line of edition: 29    ასა̈დ. ხაკუჩ, ერე უფგოვშ იმვა̄ლეჟი̄ნ ქ'ა̄ნჴჷდეს შვა̈ნთე ხახვდ ალ ზურა̄ლ. აშხვ
Line of edition: 30    ლე̄თ ლოხჴერდახ უშხვა̄რ ი ლა̈ჲბინეხ ლიჴედ, მარე ჟ'ახბა̈ჟხ ი ფა̄და̈ს ა̈ხღვა̈ჭ ვეშგიმ
Line of edition: 31    ი ვეშგდ ახჭო̄ნნეხ. სორთმანს ხოქვა: "მიჩ ესერ ძალოვშ მა̄მ ესყა მინე დი̄ნა
Line of edition: 32    ი ლა̈ხჭვედდახუ ამის". ალ დი̄ნას ლახჭვედნახ ი ლახე ჩუ ხაცხე̄ნა სორთმანი
Line of edition: 33    ლინჴრი, ხა̈კვდახ სორთმანი დაგრა, მარე სორთმანდ ესნარ სგ'ა̄დსკინე ქორთე̄'სგა,
Line of edition: 34    ჩვესჷ̄გა̈ნ ყო̄რ სგა̈̄ნ ი ჲერვა̈ჲ სგა ხედო̄ლი ჩი ხანჯარშვ ჩვაცლჷ̄რე. ამჟი̄ნ, ესნა̈რ
Line of edition: 35    ეშდჲო̄რი მა̄რე ჩვადგა̈რ, ეჩქანღო ქ'ოხსკინა ქა̈̄მთე, მარე ჯა̄ჲ ჩვოთქაჩახ ფოყისგა.
Line of edition: 36    ლჷქა̈რ სორთმანდ ეში̄ ლი̄ტვ ლა̈ჲბინ' ე̄სნა̈რ, ღვეშგიმ ფა̄და̈ს ახღვიჭ. ამჟი̄ნ
Line of edition: 37    სორთმან სგ'ა̄ხჩედა ჯეგა̈მთე. ამეჩუ̄ნ სგ'ა̈̄დსკინ' ე̄სნა̈რ ბა̄ვთე̄'სგა. ამე̄'სგა
Line of edition: 38    ჩვა̈თპა̈ჟ. ისკო̄რ' ე̄სნა̈რ: "ეშდჲო̄რი მა̄რ' ე̄სერ ჩვოთდაგრა, ჲარვ ღეთს ესერ ჩუ̄დ
Line of edition: 39    ადდაგრი, ეჩქანღვ' ე̄სერ მიჩა დაგრაღაი̄ ჩუ ი̄რი. მარე ანჴა̈დ ესნა̈რ მჷჯგემ ა̈ლიმჷ რზა
Line of edition: 40    სვინჩშა, სგ'ა̄ჩა̈დ სორთმანიშთ'ე̄სგა. ამეჩუ̄ნ ალა ჩვადშა̄რდე ი ხა̈̄ქვ: "ნომმა̄ვ
Line of edition: 41    ღედ ხა̄რ, ბა̄ზ' ე̄სერ ჯა მიჩ ჩუ ხოწა". ანჴა̈დ ესნა̈რ გაცხა̈დ ა̈ლიმჷრზა, ბა̄ზი
Line of edition: 42    უფგოვშ ჩა̈̄ჟ ოხჴიდ სორთმანს, ჟი ლახსგურე ი თანღი ძირდ ქ'ა̄ნგენე. ამეჩუ̄ნ სერ
Line of edition: 43    სორთმანდ ჟ'ესჭო̄ნნე ა̈ლიმჷრზას ი ჯა ქ'ა̄ნჴა̈დ მჷჟა̄ლვა̈ თანღა̈ქა. ამექა ლაჴა̈დს
Page of edition: 76  Line of edition: 1    ჲარვ ლადა̈ღ ახკვედა, მარე მჷჟა̄ლთე̄'სგ' ე̄ში სგ'ა̈̄მჴედე̄ლი. ამეჩუ̄ნ მჷჟა̄ლვს ა̈ქიმ
Line of edition: 2    ხოთრახ ი ალ ა̈ქიმს ჟ'ოხხოჩვა სორთმან. ა̈გითე ნაჴა̈დუღო ჟ'ა̈ნშვემ. ეჩქანღვ'
Line of edition: 3    ა̄ჩა̈დ ჩო̄ლირთე. ამეჩუ ეშხუ ზურა̄ლ ხოთხა ი ქ'ა̄ნჴიდ შვა̈ნთე. მე̄რმე ზურა̄ლ
Line of edition: 4    შვა̈ნს ხოთხა ი ალჲა̈რ ესნა̈რ სგ'ო̄თჴიდ ა̈ლიმჷრზას საჩქვა̈რდ ჯეგა̈მთე. ალ ზურა ლა̄რე
Line of edition: 5    ნა̈თსა̈ვ როქვ ლიხ ათხე მალვა̈ნგს ჯაფრია̄ნა̈რს ხაყლეხ ეჯჲა̈რ.
Line of edition: 6    სორთმანი დაგრობ ამჟი̄ნ ლჷმა̈̄რ: აშხვჟი̄ნ ესნა̈რ მუშგვრიდ აჩა̈დ ოთარშე̄რთე.
Line of edition: 7    ამეჩუ̄ნ ესნა̈რ ხოშა ლა̈კვჰა̄ლვნა ლაკა̈დ ბა̈ჩ ა̈რი ი ამი̄ ლიკედ ლახკაფვნეხ.
Line of edition: 8    ოთარშე̄რს მა̄მ ხალტე̄ნახ სორთმან ი ჟ'ოხვა̈ზრახ ლა̈დ' ა̄მი̄ დაგრა. სორთმან ბა̈ჩს
Line of edition: 9    იკედ, ამჟი̄ნ ა̄ნჴა̈დხ ესნა̈რ ოთარშა ი ჯაჭა̈რისგა თვეფ ხაჴიდხ. სორთმანს ხანჯა̈რ
Line of edition: 10    ლოხვცხვაპა ი ოთარშე̄რ ვა̈რგი დაგრა ხა̈კვდა, მარე მუზვად ოთარშა ფა̈მლიჲა̈რ
Line of edition: 11    ახჭვა̄დახ ი მა̄დ ოთნებახ ლიცლჷ̄რე. ამჟი̄ნ ანჴა̈დ ესნა̈რ სორთმან, ლახე მა̄დ აფიშ
Line of edition: 12    ვდხ, ჲო̄რი ფა̈მლჲა̈რ ჩვადგა̈რ ამეჩუ.


Line of edition: 13 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.