TITUS
Svan Chrestomathy
Part No. 93
Previous part

Text: 88 
Page of edition: 76 
Line of edition: 14 
88. დადა̈ში ჯაფრა̄ნ


Line of edition: 15       ჯვინალდ ლატლა̈რს ი მესტჲა̄ლა̈რს გუნ დაგრობ ხა̄რახ უშხვა̄რ ნე̄სგა. ლატლა̈რ
Line of edition: 16    ხოშა̄მ ლაღა̈ლ ჟი ხა̈წნო̄ლნახ. დადა̈ში ჯაფრა̈ნს ეშდ ღეთ ხა̄რა ლჷდგა̈რ ლატლა̈რ
Line of edition: 17    მარე გვი დეშჷდ ხა̄რა ლუჴვე. ლატლი̄შ ი მესტია̈̄ ლისყა̈̄ლ ესნა̈რ შვა̈ნდი ა̈ნგუ̄შე.
Line of edition: 18    ეჩქას ლანზო̄რა̄ლ წვირმის ლჷმა̈̄რ, ეჯღ' ე̄რე ყანსავ ყიფია̄ნ ლჷმა̈̄რ შვანე
Line of edition: 19    მახვში ი ეჯა წვირმის ლჷმზიგ. ჟიბე შვანე ლჷთიშ მა̄რე ჟ'ა̈ნნა̈ზო̄რა̈̄ნ ესნა̈რ წვირმის
Line of edition: 20    ი მესტჲა̄ლა̈რ ი ლატლა̈რი ჟ'ა̈დჰერხ. ამეჩუ̄ნ ლოხკაფვნახ ლისყა̈̄ლ ი მა̈გ
Line of edition: 21    ყაბულს ახჴა̈დახ, მარე დადა̈შის ხო̄ქვა: "მიჩ ესერ ლეკე̄შჷრითექაჲ ჲო̄რი ღველჲა̄ქა̈̄
Line of edition: 22    ტუფ ხოკლი, ეჯჲა̈რს ესერ ჩვადთიმნე, ეჩქას ესერ სგა̈̄თსყო̄ლი ლატლა̈რს".
Line of edition: 23    ალა ლატლა̈რღა ხა̄რა: "ჲარვ ესერ ჩუ̄დ ადგა̈რი ი ეჩქას ესერ სგა ხესყა̈̄ლ". ამჟი̄ნ
Line of edition: 24    ჩვა̈დჟომა̄ნ ესნა̈რ მესტია̄შ ი ლატლი̄ ლისყა̈̄ლ. აშხვ ლადა̈ღ ესლოთმე დადა̈შიდ.
Line of edition: 25    ლახსგურდა ჩა̄ჟვ ი აჩა̈დ ლატლითე. ლატლი̄ სვიფისგა ბოფშა̈რ იშდრა̈̄ლხ. ანჴა̈დ
Line of edition: 26    ესნა̈რ დადა̈ში ი მჷდრა̈'ჴ ჩვადკვა̈რ ჩა̄ჟვხა̈ნჩუ̄ნ, ეჩქას ლახტვი̄ლ ბოფშა̈რს:
Line of edition: 27    "მალატი̄ლა̈რ, ჟი̄ვ ესერ ლახბიშეხ მჷდრა̈ჴ!" "ანჴა̈დ ესნა̈რ ეშხუ ბეფშვ ი ჟი ლახბი
Line of edition: 28    შე მჷდრა̈ჴ. დადა̈შიდ ალ ბეფშვ ჟ'ა̈დი̄ყე ჩა̄ჟვთეჟი̄ნ ი მჷდრა̈ჴ ჩუ̄დ ადკვა̈რ.
Line of edition: 29    ეჩქას მე̄რმა ბეფშვდ ლახბიშე ჟი. ალ ბეფშვი ჟ'ა̈დი̄ყე ჩა̈ჟვთეჟი̄ნ. ლახფხიჭე
Line of edition: 30    ი ლეჟ' ა̄ნჴიდ ალჲა̈რ ესნა̈რ მესტჲათე. ეჩქანღო ლახპა̈რვნე ი ქ'ა̄ჰვედ სა̈ვს. ამნოვშ
Line of edition: 31    ეშდჲარვმუყვ ქ'ა̄დსურლე ლატლარე დაგრა ი ლირმი. ალა, მა̈ჲ საკვრელ, ა̈თჴჷ̄რო̄ლხ
Line of edition: 32    ლატლა̈რს. აშხვ ლადა̈ღ ესნა̈რ ფუშყვრი ლექვე̄რისგა ჩვოთდარჯეხ დადა̈შის.
Line of edition: 33    ნა̈ბოზს ესნა̈რ ჯა̄ჲ მინე ყანსავ ანღრიხ მიჩა ძიძჲა̈რხა̈ნ. ბოჷქა ქ'ა̄ნჴა̈დხ, ეჩქას
Line of edition: 34    ოთცა̄დვნეხ ლატლა̈რდ, თოფა̈რს ი დადა̈ში ჩვადგა̈რხ ამეჩუ̄ნ. ყანსავს ეშხუ
Line of edition: 35    მჷლტა̈ლ ჩვოთდაგრა ეჩეჩუ̄ნ, მე̄რმა̈̄ლს მჷქაშე̄რთე̄' სგ' ო̄თო̄ტვახ ი ეჯჲა̈რმჷყ
Line of edition: 36    ათპეჟახ ჩუ.


Line of edition: 37 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.