TITUS
Svan Chrestomathy
Part No. 96
Previous part

Text: 91 
Page of edition: 79 
Line of edition: 25 
91. ლა̈ჭმათე ლი̄ზი


Line of edition: 26       აშხვ ზავ, მი ხოხვრა გარ ხვა̈სვ, ეჩქას რუსე̄თთ' ო̄ჩა̈დდ ლა̈ჭმათე ერვეშდ
Line of edition: 27    ღეთ მა̄რე ნიშგვეჲ სოფელხა̈ნქა. აშხვ ნაგზანღო, იმ ი დო ლა̈სვ, სგ'ო̄ჩადდ ნარსანთე
Line of edition: 28    (ნარსანას კისლოვოდსკს ხაყლეხ). შუკვს ლეზიზ ჩვა̈ნშდა̈ხ ი ქაშა̈გ ლექვა
Line of edition: 29    მჷჟეგის (ფეტვრა̈̄ ჭკჷტს) ხვიზვერდად მეზგა̈̄ლხა̈ნქა ი ი̄ჯა ნუღვა̈̄ნ ლეზობდ. ნარსანთე
Line of edition: 30    ჩ' ოჩა̈დდ, ეჩქას დი̄რი ლიშგვმა̈̄ნი ლა̈ხვბინედ ი ამჟი̄ნ ხვიზვერდად დია̈რს
Line of edition: 31    ი ეჯას ხვიზობდად. სერ ჩ' ოჩა̈დდ აშხვ ხოშა̄მ სოფელთე. ამეჩუნ მიშ ლადა̈ღ ყაზა̄ყა̈რდ
Line of edition: 32    ჟ'ა̈ნგენეხ. ერ იმთ' ა̄ნჲეხ ი ერ იმთე მჷჭმად. დესეტი̄ნას სამ აბა̈ზღა ხოჭმად.
Line of edition: 33    მიჲ მიშგვ ა̄ფხნეგა̈რ დროგშვ ანჲეხ აშხვ ლადღი ლე̄ზნა ი ჩვანსადგვმეხ აშხვ მინდვერისგა.
Line of edition: 34    ამეჩუ̄ნ ბალაგან ლჷ̄გა̈ნ ი ლარდ' ა̄მე̄სგა ნა̄დ. ლეთრე ლიც ბოჭკოშ
Line of edition: 35    ანჴიდხ. ეჯა ქა̄მენჩუ̄ნ ესგეხ. მე̄რმა ლადა̈ღ ლა̈ხვბინედ ლიჭმე ოხვიშდ მა̄რე̄მ ი
Line of edition: 36    ხვა̈ჭმედ ჰამუნღვე̄ ნა̈ბოზდ. ნიშგვეჲ ხაზა̈ინდ სამ ლადღი ქა მა̄რა დია̈რ ი ტარან
Line of edition: 37    ენცვირ ი ჯ'ა̄ჩა̈დ. ნა̈ჲ ხვა̈ჭმედ ამ სამ ლადა̈ღ, მარე ლიცი ნავღვე̄ნი ნიჴდა თჷმის.
Line of edition: 38    ლჷჯიმ ტარან ი ფურნე̄ დია̈რ ლიცს ნაფვნუნა. ლიც ბოჭკაისგა ლჷგა̈ნ, მარე ნაფვი̄ნშა̄ლ
Line of edition: 39    ა̈თუ ლა̈სვ, ჟიქა̄ნქა ლჷდგა̈რ მე̄რშვ ი კუღუნშვ გვეში ლა̈სვ ი ლეთრად
Line of edition: 40    მა̄მ ხეყა̈̄დ, მარე სურუს ლახე ნითლჷ̄რა ლიცი მაფჷნ, ეჩქას ღალ დეშ ხვაჭკრჷნად
Line of edition: 41    ი ჩუ ლეთრე ნა̄დ ყა̈რშვ. მე̄სმა̄მ ლადა̈ღჟი̄ნ აჯაღ ანჴიდ ლიც ი ხა̈რჯ ი ჯა აჩა̈დჷდ.
Page of edition: 80  Line of edition: 1    ამჟი̄ნ ჟ'ანა̄დ ჲო̄რი ნაგზი ი ლიჭმე̄ჲ ქ'ო̄თსურლედ. ჟ'ა̈ხვზჷმა̄ლედ ნაჭა̈მ, მარე
Line of edition: 2    ნა̈ჲ ღალ მა̈ჲ ნიხალდა ლიზმა̈̄ლი̄შ, მიჩა სვინდდ ოფიშვდდ ყაზა̈̄ყ. ა̈ხუნგრიშედ ქა
Line of edition: 3    ვარჩხილ ი თვით არა მანა̈თ ნა̈ხვი̄დ. ალ' ე̄ზერ ნა̈ქიმვდ ლანბაჟჷნ. ლა̈ნსგურე
Line of edition: 4    დროგს ყაზა̈̄ყდ ი სგა̄ნჴიდ ბაზა̈რთე. ამეჩუ̄ნ თვით ჭიქ ოტკა ჩუ ლანა̈̄შ ი
Line of edition: 5    ჯ'ა̄ჩა̈დ.

Line of edition: 6       ამ ლადა̈ღ ნა̈ჲ ოხვიშდ-ოხვიშდ აშხვ ყაზა̈̄ყდჷდ ა̈ნეგნე მჷჭმად ი ანჲე ლა̈ჭმათე.
Line of edition: 7    ამეჩუ̄ნი ჲო̄რი ნაგზ' ა̄ნრა̄გჷნ, მარე ვარჩხილ თვით იშგვიდ მანა̈თ გარ ნა̈ხვიდ.
Line of edition: 8    მიშლადა̈ღ ბაზა̈რთე̄დ ონჴვა̈დდ ი ამე ჟი გვეში̄დ ლა̈სვ ჩიე̄სგიშდ. ამ ლადა̈ღ აშხვ
Line of edition: 9    მჷქშა̈გდ ყვარვილ ჩა̄ჟვ ლახსკინა̈̄ვნე ბაზა̈რთე̄'სგა ი უსურმანრე ლა̈დჲარა̄ლ სგვებინჩუ̄ნ
Line of edition: 10    ჩვესა̈ბ, ღა̈რთ ი ბაშლჷყ ჟიქა̄ნ ესთხიფ ი ჯა დუქვა̈ნთე̄'სგ' ა̄ჩა̈დ, ეჯგვა̈რ
Line of edition: 11    ლუშდბუნე ჰჷნგირ-ჰა̈ღვირ სგა ხეჴმარა̈̄ნ, ერე მა̈გ ალ ჩა̄ჟვ ხოსგიდდა. ანჴა̈დ იმვა̄ლეხა̈ნ
Line of edition: 12    იშგენ მა̄რე, ღა̈რთ სგა ლა̈ჲქვე, ბაშლჷყ ჟე̄სგე, ლახსგურდა ჟი ჩა̄ჟვ, ლა̈ჲრეყ
Line of edition: 13    ი წკვა̈მ აშ ადჰელა̈̄ნ. ჩა̈̄ჟ ესნა̈რ ქ'ა̄დჲე მიჩ' ა̈̄გითე ქ'ა̄თყიდ ვა̈რგს. ანჴა̈დ ქა
Line of edition: 14    მჷქშა̈გ, ხეთხე̄ლი ჩა̄ჟვ, მარე იმ' ა̈̄ნთხა̈̄ლნა. ამ ლადა̈ღ ქუჩაისგა აშხვხა̈ნ წვირმა̈რ
Line of edition: 15    ი იფარა̈რ იქეიფხ ი მე̄რმახა̈ნ ყაზა̄ყა̈რ. ჩვა̈დშდჷმა̈̄ნხ. ეჩქას ყაზა̄ყა̈რდ დიე
Line of edition: 16    ლიწრა̈̄ლ ლოხვბინეხ შვანა̈რს. ამღა ლიყა̄რჲე̄ლ ოხჩჷდხ ამეჩუნ ყაზა̄ყა̈რს ი
Line of edition: 17    შვანა̈რს.

Line of edition: 18       ლა̈დ'ამეჩუნ ოსა̈დდ ი ოხვღელდად: "ნოთავ როქვ ქა ჲა̈რდ ანჲე ლა̈ჭმათე".
Line of edition: 19    ლახე დო̄რდ ანჲ' ე̄ჩქას დია̈რ ჟი̄დ ა̈ხვზვერდ ჲარვ მა̄რაჟი̄ნ თვით შაურდ გიცრი
Line of edition: 20    თხუმა̈რ ა̈ხვყიდდ მჷჯა̈ბ ი ამნოვშ გუნ ეზერდ ათვხარჯა̈̄ნდ. ბა̄ზი დუქნარე ჩალდყა̈რჟი̄ნ
Line of edition: 21    ოთყურდად, ეჩეჟი̄ნ ლიყვნა̈̄ლს დე̄მის ნიდურვა̈ნდახ ლა̈̄თშვ. მე̄რმა ლადა̈ღ
Line of edition: 22    ეშხუ ყაზა̈̄ყჷდ ა̈ნთხანა̈̄ნ ი ლა̈ნბინე ლირგვივა̈̄ლ. დესეტინაისგა ეშდ შაურჷნქა
Line of edition: 23    მა̄დ ა̈̄დჴიდ.

Line of edition: 24       ნაჲ ი დამ ი ყაბულს ოხვჴა̈დდ. ჲარვ ნაგზაისგა თვით ოხვიშდ მანა̈თ სგა̄დ ლა̈ხვქიმდ
Line of edition: 25    ი თვით ერვეშდ მანა̈თ ჩ' ოთყვაბედ მა̈გ. ალა ეჩქას ეზერ ნა̈ქიმ ლა̈სვ. მიშლადა̈ღ
Line of edition: 26    ჟ'ა̈ხვღვაჭრედ ქალა̈ქისგა ჩაფჷლ ი ბარდან მაზუმვა̈̄ჲ ჲა̈ს ნაწხჷნ. სგ'ო̄ჩვა̈დდ
Line of edition: 27    დუქვა̈ნთე ი ამეჩუნ თვით ოხვიშდ შაურ ღალ ჩვა̈თვსერდ ი ჲარვ მა̄რაჟი̄ნ თვით
Line of edition: 28    ბოთლიკ ოტკ'ა̈̄ხვყიდდ.


Line of edition: 29 
იფა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.