TITUS
Svan Chrestomathy (I: Upper Bal): Part No. 39
Text: 29
Line of edition: 23
29. ლილდეღ ი მლდღა̄̈ ლიზვრი
Line of edition: 24
ლილდეღ ივანღო ლმა̄̈რ შვა̈ნისგა ი ათხე̄ჲ ლი.
Line of edition: 25
ზავლადეღ ხოშა̄მ ლაღა̈ლს ლახვთე ხელდეღ მა̈გ. მუჟღვერ, ლა̄რა̄̈ლ ლჭმანღო
Line of edition: 26
ი დაბა̈რ ლთანღო, სგა ლუკკოვანღო, დაბა̈რთე̄-ჲ ლა̄რა̄̈ლთე ფიშვდე მა̈გ
Line of edition: 27
ლელდაღვ.
Line of edition: 28
ქვინლმგენა̄̈ლს პა̈რპო̄ლდშია̄რვ ლაჯოგთ' ა̄̈იხ მა̈გ. ლიჯოგ ლახვს ხა̈მთქვახ,
Line of edition: 29
ესვა̄̈ჲ ქვინლმგენე, მეზვ-მანგა̈რ: ხაბნა̈რ ი დეკა̈ვლა̈რ ჩუ ხორი, ეჯას ჩი̄ ლახვთ'
Line of edition: 30
ა̄̈გნე მა̈გ პა̈რპო̄ლდშჲარვ. პა̈რპო̄ლდა̈შუნღო ლიჭმა̄̈ლ ი ლითჲე̄ლ იბნი, ეჩქა მა̈გ
Line of edition: 31
ჩუ იტხე ლაჯოგხა̈ნ ქვინლმგენა, ეჯღ' ე̄რე ლაჯოგდ და̄̈ს ხოჟიბ. ლიჯოგ ხერასვშ
Line of edition: 32
ლი. ოშვა̄̈ჲდ ქვინლმგენე ჲა̈ს ხაყა, ეჩშელდ ლე̄თ ხა̄რ ლეჯვეგ. მეჯვგა ხეკვეს ერე
Line of edition: 33
სემი̄-ჲ ო̄შთხვ ხონჴერდე̄დხ უშხვა̄რ, ეჯაჲ მახეღვაჟ ლუთოფდ, ადო ნა̈დირდ ი
Line of edition: 34
ქვითდ ლემყა̈ლვ ლი ლახვისგა.
Line of edition: 35
ლაჯოგთე მე̄ზა ქა ხეჭმენიხ მინე უბა̈ნს, ჟი იზვრიხ ფექს ი თა̈შს ი ეჩჟი̄ნ
Line of edition: 36
ა̈იხ ლახვთე. ეჩე მინოვშ ირბიე̄ლხ ჩიგარ. ჯვეგ ლა̈ტხაჟი̄ნ მეჯგვას მუმურჯა ხეზა̈ზხ
Line of edition: 37
ლახვთე ი აშხუდ იტხეხ ჯვეგს. სოფელთე̄სგა იჰა̄̈ლხ, ეჩქას თოფა̈რს აკვა̄ნეხ ლა̈
Line of edition: 38
ხჲადა̄ლდ, ერე "შვიდებდ ესერ ა̈მტეხე̄ლიხ ლეჯვეგ ი მეჯვეგ".
Line of edition: 39
ლახვხა̈ნ გუნ ლულგვარე ტეხნიხ ქვინლმგენა̄̈ლ. ნეცინ მანგა̈რს: დაჴლს,
Line of edition: 40
ღველჲა̄ქს ი მე̄შგს ჩი ლადა̈ღ ხელდეღხ მლდღა. ჰამს ქ'ა̄̈იხ მლდღა ნა̈ბოზს
Line of edition: 41
აგითე იტხეხ.
Page of edition: 32Line of edition: 1
ობა̈შინ მლდღა ქა იზვრიხ თა̈შს ი დიჲა̈რს ი ქა ირბჲე̄ლხ ლალდა̈ღს.
Line of edition: 2
ღველჲა̄ქა̈რს, ხამა̈რს ი ღუნვა̈რს ხოხვრა დი̄ნა̄̈ლ ხელდეღხ, ჩიქე ჰამს ქ'ა̄̈ჲე̄ს
Line of edition: 3
გიხ ლელდეღს ლალდღჲა̈რთე ი ხელდეღხ ისგლადაღვ. ჟი იჲთვ, ე̄ჩქას ღველჲა̄ქა̈რს
Line of edition: 4
ლისღვა̈დი ხაკუხ, ეჯღ' ე̄რე ა̈თუისგა დე̄მ იგნიხ ღველჲა̄ქა̈რ. ა̈გითე იტხეხ
Line of edition: 5
ი აშხვ მეზგე̄მი ლამნგართე სგ'ა̄̈ჭბიდეხ. ხამა̈რსი ღუნვა̈რს ჩუ ცვირეხ ლალდღია̈რს.
Line of edition: 6
ნა̈ბოზს, ჟი ინქვე̄რი ეჩქას, ქა̄დ იტხეხ ღველჲა̄ქა̈რს ლალდა̈ღთე ი ხელდეღხ
Line of edition: 7
გაწკა̈მ ნა̈ბოზდ.
Line of edition: 8
დი̄ნა̄̈ლ აშხვ ქა იზვრიხ ჩიგარ დოშდულმახაისგა მინე მეზგა̄̈ლხა̈ნქა თა̈შს ი
Line of edition: 9
ფექს, ქ'ა̄̈ჲე̄სგიხ ლალდა̈ღთე ი ეჩე კასგვილაქა ქა ინყა̄̈ლიხ ქუთვა̈რს ი ჭიშდვარა̈რს,
Line of edition: 10
მარე ლირბჲე̄ლ მა̄მ ხოხალხ ი ეშ ატრტყი̄ნეხ.
Line of edition: 11
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
