TITUS
Svan Chrestomathy (I: Upper Bal): Part No. 40
Text: 30
Line of edition: 12
30. გვა̄̈ლი̄ ლინწირ ი ჰა̄ვდრი ლიჴდე
Line of edition: 13
შვა̈ნისგა გვა̄̈ლჲა̈ნ ზა̈ჲ ლახე ლი, ეჯა მა̄დ ხოსგუვ შვანე გიმს. გჰლობჟი̄ნ გიმ
Line of edition: 14
ჩუ იფრი, დაბისგა ნაჴაწვ-ნალა̄შვ ჩუ იშხი ი ლა̄რაისგა მელვ მა̄̈გ ჟი იცხვლი.
Line of edition: 15
ოდ ი ოდ ოხღელი სოფელ ლიჰა̄ვდა̈რს ი ლახე დო̄მის ჴიდე პილს, ეჩქას ქა
Line of edition: 16
ითშიხ აშხვ მა̄რა და̈რი მჰა̄ვდრად. ამის თვით კარვა ნამშა̈ჲს ჩუ ხობციხ სოფელ
Line of edition: 17
თვით მეზგახა̈ნქა.
Line of edition: 18
სოფლა̈რს ჲერხის ქა ხოთრახ ხოშა ტო̄მბვა̈რ. ეჩხა̄ვთე̄სგა ლახე ნაურწყულა
Line of edition: 19
ჲა̈რ იმის შიდე, ეჩქას შიშდ ჩუ იჰა̄ვდა̈რ ი ხოლა ჭა̈ხ ჴედნი. ეჩნქა და̈რი მჰა̄ვდრა
Line of edition: 20
როქვ ცოდდ ხეხო̄ლი ეჩაბუა̄სდ. ამღა ხამჭირ სოფელს და̈რი ლიჰა̄ვდრე, მარე ლახე
Line of edition: 21
შვა̈ლას დო̄მის ჴიდე გვა̄̈ლი, ეჩქას ჩუ ლეჩვმე ხა̄რხ.
Line of edition: 22
და̈რი მჰა̄ვდრე ქა ღრი ტო̄მბთე. ტო̄მბა̈რმყვ სოფლა̈რხა̈ნქა ხვრვ მაშე̄ნ
Line of edition: 23
შნ იყდა̄̈ნი ციცვს, სგა ხა̈ჲსენი ტო̄მბთე̄სგა ი სგა̄კვა̄ნე. ეჩქანღო კა̄რზა̈რს, ძაგვს
Line of edition: 24
ი იშგენ ვიდრობა̄̈ლსი სგა შიდე. ეჩნქა იშგან ხოლა̄მი იჩო ტო̄მბთე̄სგა. ამი̄ ნაჩომუნღო
Line of edition: 25
ჯა ღვეშგდ ტეხნი.
Line of edition: 26
ტო̄მბ შიშდ როქ ლიფა̄მფუნა̄̈ლს იბნე, ჟი იფვი̄ნი ი კვა̈მს ეშ აჴვშდენი ჟი̄ბა̄ვ.
Line of edition: 27
ჩიჲა̄̈გ ჰე მო̄დე, ტო̄მბა̈ ნა̈ფდია ეში̄ მასა̈რდ იჰა̄ვდა̄̈რ. ლახე სოფელთე̄ჲ ქა ხოჭყრე
Line of edition: 28
ნი, ეჩქას მასა̈რდ ხა̈ხჲა̈დ ალა სოფელს ი მუჟღვერ და̈რი მუჰა̄ვდრა მახა მაჴა̈დხა̈ნ
Line of edition: 29
ქა მა̈გ ჟი ხოზვრი თვით კარვა ნამშა̈ჲს.
Line of edition: 30
აშხვ ლახვისგა ლგ ეშხუ ტო̄მბ. ამის მზა̄̈ ტო̄მბ ხაჟხა. ეჯ ლახვთე მლდღას
Line of edition: 31
ჩიგარ ესყახ ლელდეღ ი ლახე ლალდა̈ღჟი̄ნ ალ ტო̄მბთე̄სგა სგა იმის შიდეხ,
Line of edition: 32
ეჩქას შიშდ ხოლა ჭა̈ხ ჴედნი ი ამღა და̄̈რ მოშ ა̈ბდა̈ვი ეჩხა̄ვთე̄სგა ხოლე̄მი ლიშდეს.
Line of edition: 33
ეჩნქა, ლახე გვა̄̈ლჲანობ ლი, ლაჴვა̈მხა̈ნქა ჯვა̈რს ჴიდეხ. ეჯას ტვიბრაისგა ჩვაბ
Line of edition: 34
ქვეხ ხვა̄̈ჲ ხა̈ნს. შვანა̈რს ხაჯრავახ, ერე ალ ჯვა̈რი ნაბუქვ ი ნაშყოდ ლიც ლახე ძუღვათე̄სგა
Line of edition: 35
სგა̄დჰე̄სგი, ეჩქას ესერ შიშდ ჩუ იჰა̄ვდა̈რ.
Line of edition: 36
გვა̄̈ლჲანობჟი̄ნ სოფელ ჲელსი ხემზირ.
Line of edition: 37
ლენჯა̄̈რ
Copyright TITUS Project
Frankfurt a/M 1999-2000. No parts of this document may be republished in any form
without prior permission by the copyright holder.
