TITUS
Svan Chrestomathy
Part No. 105
Previous part

Text: 100 
Page of edition: 85 
Line of edition: 34 
100. ტიტიშე̄რ ჯახვი̄ თვეფ

Line of edition: 35    ჯახუ ნიშგვეჲ ეჯგვა̈რ მეთხვჲა̈რ ლჷმა̈̄რ, ერე შვა̈ნისგა ტველ და̈̄რ ხარდე̄ნა.
Line of edition: 36    მეკვშდე კუთხვ თვეფ გარ ხაღვე̄ნა ჩიგარ ი ეჩჷნქა იშგან თვეფს დე̄მ ლჷმჲა̈̄სგვინ.
Line of edition: 37    ალ თვეფს ლეგვმი ფინდიხ ხასგუვე̄ნა ი ჯახუ ქა დე̄მგვაშვ ხაქდუნა. ობა̈შ ნა̈თხვჲარე
Line of edition: 38    ი მჷყე̄ლი ი ქათალ ხადგარე̄ნა ალ თოფშვ. აშხვ ზავ ლაღა̈მს ჟა̈მ ალთენე̄ლ
Line of edition: 39    ი ეჩჟი̄ნ ლჷჴმაშვდ ლჷმა̈რდ, ერე მე̄სმე ნა̈̄თი̄ დეშ ოთცვი̄რა. აშხვ ლადა̈ღ ესნა̈რ
Line of edition: 40    ჰა̈ნდრაშა ხოშა ი ჯახუ მჷლდეღ ლიხ ი ლახვთ' ა̄დჲეხ ლელდეღ. ჟ'აჩა̈დხ კალვა̈რთ',
Page of edition: 86  Line of edition: 1    ე̄ჩქას ჯახუდ ხა̈ქვ ჰა̈ნდრაშე̄რ ხოშა̄მ: "მა̈დილუ ესერ ხე̄რი ი მიჩა ლიჴდა̈̄ლდ
Line of edition: 2    თე̄ვ ლაჲე ლელდეღთე ! ჯ'ესერ ფოშდელთე ღჷრი ი ნო̄თავ ესერ ლაჭვდია̄ლს ჲა̈ს
Line of edition: 3    ხეწა̈დ ი მინე ლა̈მბა̈̄შნა̈შ ა̈ნმეჴრე მა̄ლე გვეშ". ამნე̄მ ესნა̈რ დერვა მა̄მ ხა̈ქვ. ანჷ̄გა̈ნ
Line of edition: 4    ღალ ესნა̈რ ჯახუ, ჟ'აჩა̈დ ფოშდელთე ი ლახე ეჩე დო̄ს ხეწა̈დ მჷმსტივს, ჩვაჩა̈დ
Line of edition: 5    ცხა̈კვზაგა̈რთეჩუ̄ნ, ამხა̈ნქა ლა̈ჲსგიდდა ირღულდთეჩუ̄ნ ი ამეჩუ̄ნ მა̄რა̈̄ლ ესწვე̄ნე.
Line of edition: 6    ლოხვბინე ლიტუ̄ლი: "ჲა̈რ ესერ ლიხ ეჩეჩუ̄ნ მერდე!" "ჲა̈რ ესერ ი ჯა ლი
Line of edition: 7    ბა̈დი ბაშვშა". "ჲაღვ' ე̄სერ ლაღა̈მს ალ ი ალ მეზგა ა̈თსედენმა̄ ქვინ ი მა̄დე, მა̈დილუ
Line of edition: 8    ხე̄რა ი ქა̄ვ ხა̈̄ქვ ჰე̄სამა ხასმა! "

Line of edition: 9       ლოხვბინეხ ესნა̈რ ამჟი̄ნ უშხვა̄რ ლიჭვდიე̄ლ. ალ მა̄რ' ე̄სნა̈რ ბა̈დიშა ბადი
Line of edition: 10    ლი ი ბაშვშა მა̄დე, მარე თხუმ ხავჰმი. ბა̈დიდ ხა̈̄ქვ ესნა̈რ მიჩ' ა̄ფხნეგა̈რს: ალ'
Line of edition: 11    ე̄სერ ჯახუ ლი ტიტიშა. ამგვა̈რ მეთხვჲა̈რ ესერ შვა̈ნისგა ჩუ და̈რ ა̈რი ი ამი̄ თვეფ
Line of edition: 12    ესერ ეზერ მა̄დ ი̄რა! ჩუვ ესერ ადგა̈რხ ი ღო თვეფი მინს ხე̄რიხ ი ჟახე ქამასად ხეღვე̄ნიხ".
Line of edition: 13    ეჩქა̄ დვრევჟი̄ნ მა̄რე̄მი დაგრა ჩი̄ ჟახად ხაბჟე̄ნა ი ჩუ და̈̄რ ლუმჰომინ.
Line of edition: 14    ანჴა̈დ ესნა̈რ, ჟაჴვრა̈ აშხალ ა̈ნნიკვ ი ამექა უფგოშვ (\\ უფგოვშ) ქ'ა̄ფვიშდ ჲო̄რი
Line of edition: 15    მა̄რე ჯახვი̄ ღვეშგიმხა̈ნ ლაცხა̈პდ ი ღო ჩუ მჷდგა̈რიდ. ბა̈დ' ე̄სნა̈რ ლა̄მბვა̄ლს
Line of edition: 16    ისდუნე ჯახუს ი მჷდგარა ესჴვისგხ. ჯახუს ხოჩა ჟეღ მირ ხარდე̄ნა ი ჩიჲა̈̄გ სგა ხა̈ნჴრინა.
Line of edition: 17    ა̈დბა̈ჟ ესნა̈რ ალ ჟაღვემ ი ლიჰევ ლა̈ჲბინე. ამჟი̄ნ ჲარვ მა̄რე̄მ სგა̈̄ნსკინეხ
Line of edition: 18    ჯახვი̄შთე̄სგა მჷკა̈ჩ თოფარშვ. ჯახუს ესნა̈რ ათხა̄დ: "დედეს მინეშ, მა̈ჲ ესერ ხაგა̈დ
Line of edition: 19    ა დაგრას, ადო მიჩ ესერ ხოჩა ლახვბა ხოსდენი ი უწვრად დე̄მის ცვირეხ". ალ
Line of edition: 20    მა̄რა̈̄ლ ესნა̈რ თოფა̈რს აჩხა̈̄ნკვინეხ, მარე ქა დეხდა̈̄შ ხოშყდენიხ. ლა̈ჲკაჩ' ე̄სნა̈რ
Line of edition: 21    თვეფ ჯახუდ ი ეშხუ მჷმსტივ ჩვადგა̈რ. ლახა̄დ თვეფს ენასდ ლასყე̄ნას, მარე ალ
Line of edition: 22    თვეფს ლეგვმი ფინდიხ ხასგუვე̄ნა ი ისგთეჩუ̄ნ ჩუ ლჷზზე ხა̄რა ფინდიხ, ეჩქას
Line of edition: 23    ჩხირ სგა ლახკვეშა. თვეფ მა̄მ ხა̄დ სერ ლამარგ. ეჩქას ლა̈ჲბინე ლი̄ზი. ღვეშგიმ
Line of edition: 24    მჷმსტივ ახჭიმ ი თვეფს აჩხა̈̄ნკვინე. აშხუნღო ქ'ო̄თშყა̈დ ესნა̈რ ი ფოყისგა ღალ
Line of edition: 25    ხაჴიდ ჯახუს. ამნემ მა̄მ ადჩარვ' ე̄სნა̈რ ლი̄ზი. თვეფ ლაბეჯგიდ ლა̄ჲე ი ზაგა̈რს ამხა̈ნჩუ̄ნ
Line of edition: 26    ანღრი. მჷმსტივ ღვეშგიმ ახჭიმ. ლახვემ ღალ ესნა̈რ გვი: "თვეფი გუღ'
Line of edition: 27    ე̄სერ ნო̄ს' ა̄ხჭიმდე̄დს ალ მჷმსტივ". ანჴა̈დ ესნა̈რ ი ლეშგო̄რას ლახჩიხნე ჩუქვა̄ნჟი̄ნ
Line of edition: 28    ი მიჩნე̄მ ლი̄ზი ლა̈ჲბინე კალვა̈რთეჩუ̄ნ. ალ თვეფი ლიშხვნის ქა ხეწა̈დ მჷმსტივ.
Line of edition: 29    ჯახუს ჰაჯ ახკიდ, თვეფ ჟ'ა̈ნკიდ ლეშგო̄რაისგა ი ა̈გით' ა̄დჲე. ჯახუ სგ' ა̄ნჴა̈დ
Line of edition: 30    ესნა̈რ ჰა̈ნდრიაშე̄რ ხოშა̄მთეჩუ̄ნ. ამეჩუ̄ნ ლჷქა̈ჩ ჩვადჯალშე ი ა̈გით'ა̄ნჴა̈დ ნა̈ბოზს,
Line of edition: 31    მარე თვეფი მატკლაბშვ გვი ხა̈ხპა̈ნვნა. ეჩქანღო ჩიგარ ლჷმა̈̄ზ ლა̈თხვჲარე ი ობა̈ შსჷდ
Line of edition: 32    ლჷმდაგრვინ, მარე ეჯ თვეფი ნამსმიდვინ მე̄რმე ხოჩა თოფა̈რ დე̄მნა̈რ ხაბჟენა.
Line of edition: 33    ჩიგარ ლუმშგურა̄ნვინ მიჩა ხოხვრა̈̄ლს: "შომვა̈̄ჲ ესერ მიჩა თვეფ ცხას ა̈ნკვა̈რიხ
Line of edition: 34    ი ჯა მო̄მ არდე̄დს, ეჩქას ესერ საფლა̈ვი თხურმა̈̄შ წამუ ათჴალეხ ი ეჩელექვა
Line of edition: 35    ჩუ̄ვ ლახტვი̄ლხ მიჩა თვეფი სგა ლიტხე". აშხვ ლადა̈ღ ესნა̈რ აჩა̈დ ჴაშერთე ლა̈თხვიართე
Line of edition: 36    ი ამე თვეთნე ნა̈თხვჲარე ხათხე̄ნა. ალა ჩ'ოთშდაბვნა ი ყვიჟე-პე̄რშვდა
Line of edition: 37    ი გვი ჟ'ოხტყაბა, ჟი ლოხვმა̈ზრა ი ჩუ ლოხვმამა, ეჩქას ჩუ ლახუ̄ჟნე̄ნა. მა̈̄ჲ ესამა
Line of edition: 38    მიჩ ნა̈თხვჲარე ი მემპვე̄რ ჩუ ხადგარე̄ნა, მა̈გ გჷრკიდ ლანგენე̄ნახ ი ჩ' ოთგვანიხ.
Line of edition: 39    ნა̈ბოზს ესნა̈რ ა̈გით' ა̄ნჴიდ ნა̈თხვჲარე ი მიჩა მეყულფას ქ'ო̄ხუმბავე მიჩა ლა̈დი̄
Line of edition: 40    ი̄ცნავ. ბა̄ზ' ე̄სნა̈რ ნა̈თხვჲარე̄მი კუბდა̄რა̈რ ანნაყა̄ლეხ. მა̈გ ი მა̈გ ხოჩვმინახ ი ქა
Line of edition: 41    დე̄მჟი̄ნ მოშ ოხვჭა̄ლახ. ამ ლე̄თ ესნა̈რ და̈დავშა ხოშა̈̄ლ ანჴა̈დხ ი ხა̈̄ქვხ: "ოთარშ'
Line of edition: 42    ე̄სერ ხემცოქვილხ სოლა̈რს. ლექვა̄ვ აჩა̈დხ ი ეშხუ მინე აფხნეგ ჩუ̄ვ ადირმხ ი ა̈გითე̄ვ
Line of edition: 43    ანჴიდხ". ალ' ე̄სნა̈რ ზურალა̈̄რდ ა̈დსა̈სტკეხ მასა̈რდ. ჯახუს ღალ ათხა̄რა: "ხოლა
Page of edition: 87  Line of edition: 1    ი̄ცნავ ი ლა̈ნშანა̈რ ესერ ლაჰოდე̄ნა ლა̈დი. მინს ესერ ბა̄ზი ლჷმა̈რჯვ გზა̄ვრობ
Line of edition: 2    მა̄მ ხა̄რხ ი ჰაჯუ ახკიდხ ბა̄ზ' ე̄ჩხა̄ვ ლი̄ზის".

Line of edition: 3       ალ' ე̄სნა̈რ და̈დავშე̄რ ი სოლთანშე̄რ ღვაჟა̈რდ ეშ ა̈დჷნბაჟეხ. დემჟ' ა̄ხკიდხ
Line of edition: 4    ესნა̈რ ჯახუს ღალ ჰაჯ ოდედო ლექვ' ა̈̄დჴერნეხ სოლთე. ანჴა̈დხ ესნა̈რ ალჲა̈რ ბა̄ზი
Line of edition: 5    ი მიქლა̈ჲშე̄რ გიერგი ქორისგა ჩვა̈თპა̈ჟხ. ამჟი̄ნ ესნა̈რ ამხა̄ვთე̄'სგა ნუაშა
Line of edition: 6    ფა̈რჯია̄ნ ანღრი. ამი̄ ლირმი ხაკუხ ესნა̈რ ნიშგუ̄რა̈̄ ღვაჟა̈რს ი ჯახუს, მარე ფა̈რჯია̄ნდ
Line of edition: 7    ესნა̈რ ჟ'ო̄ხჩვიშ ი ჯახუ ღალ ამეჩუ̄ნ ჩვადგა̈რ. მე̄რმა̈̄ლ ესნა̈რ ქ'ა̈დი̄ტვხ ამხა̈ნქა.
Line of edition: 8    აჩა̈დ დვრევ, მარე თვეფ დე̄მჟი მოშ ა̈ნტიხხ ესნა̈რ ნიშგვეჲდ. ჯახუ ღალ ესნა̈რ
Line of edition: 9    ჩვა̈დწვერხ ნიშგვეჲდ. აშხვ ლადა̈ღ ესნა̈რ ნუვაშე̄რ შამერთვს ჴანა̈რ ხაყა
Line of edition: 10    ზაქვ. ალა ნიშგვეჲდ ჟ'ა̈ნმეჴრეხ, ოთდარჯეხ ჩუ ი ალა ჩვადგა̈რხ ამეჩუ̄ნ. ეჩქანღო
Line of edition: 11    რიგბა ნა̄რა ი ნა̈ ი ნუაშა ჩ'ოლსყე̄ხვიშდ. ამ დვრევჟი̄ნ ესნა̈რ ჯახვი̄ თვეფ ხუღვეხ,
Line of edition: 12    ალა მეზგე̄მ სოლა თათაშა გუვ' ა̄დირმ, ს'გა̄დჲეხ ქორთე ი ჴულ ათდეხ.
Line of edition: 13    ჩუ ხორიხ ამჟი̄ნ ი საჴსა̈რს ოხღველიხ. ალ მეზგა სიმაქ ხარდე̄ნახ, მა̈რიამ ხაჟხე̄ნა
Line of edition: 14    ი ალ დინ' ე̄სნა̈რ მასა̈რდ ხო̄ზნა̈ნი გუვას. აშხვ ღჷნ ლე̄თ ესნა̈რ ხეხვ-ჭაშ მაშდმა̈რ
Line of edition: 15    უშხვა̄რ ხოყვრეხ. ანჴა̈დ ესნა̈რ გუა, ა̈ნკიდ ჟი ლჷქჷლბჷნე კა̄და ი ალ ხეხვ-ჭა̈შს
Line of edition: 16    თხუმა̈რ ჩ'ოთხჷპჷ̄რე. მა̈რჲამჷლ ესნა̈რ ლედგა̈რიდ დეშ ა̈დსერ ი ჩუ გარ ადბაჟვრე.
Line of edition: 17    ჟ'ა̈ნკიდ ალა̄, ჯახვი̄ თვეფ, ჴულ ქა დეშ ა̈დკიდ ამჟი̄ნ ლა̈ჲბინე ა̈გითე ლიჴედ.
Line of edition: 18    ცაგდრი ბოგქა ქ'აჩა̈დ ფა̄და̈სი მაყალვშ ი შგედრუშ ლა̈ჲბინე ლიჴედ. ამჟი̄ნ ესნა̈რ
Line of edition: 19    მაშგვლა̈რჩუ̄ნ ჲო̄რი სოლა̈რ ესღრიხ მესტჲათე გუვა̈̄ საჴსრი ლა̈მჴერდ. გუად
Line of edition: 20    ჩვათირ ესნა̈რ ალჲა̈რ ი ლიტუ̄ლი ლოხვბინე, მარე დეშ ღალ ათსიმნე. ალ ჲო̄რი
Line of edition: 21    მა̄რე სგ' ა̄ჩა̈დხ მესტჲათე. მესტჲა̄ლა̈რს ათხი̄დჷნხ სოლრე ლი̄ზი. ალჲა̈რ ჩვადგა̈რხ
Line of edition: 22    ი მინე ლჷდგარუ ჩვა̈დწვერხ. ალ ლჷდგარუ ლექვ' ა̄ნჴიდხ სოლთე ი ლაშდღვა̄ლ
Line of edition: 23    ლადა̈ღ ჯახვი̄ თვეფ გუად ალჲარე კუბვა̈რჟი̄ნ ესდე. ხეწა̈დხ ამის ნიშგვეჲ
Line of edition: 24    ღვაჟა̈რ ი ქა ლიღე̄შგა̈̄ლ ხა̈კვდახ, მარე ალა ნიშგვეჲ ჩი̄ჟა, ანტროშე̄რ მჷრზას,
Line of edition: 25    ოთსა̈სტკა. "ამის ესერ ლახე მინ ლა̈დი ჩუ იჩომხ, ლენჯა̈̄რ ესერ უშხვა̄რ ხეხვტენი
Line of edition: 26    ი ნომა̄ვ ჩვემინხ ალ გვეშ".

Line of edition: 27       ალ' ა̈̄დკვიჰ ესნა̈რ გუად, ეშხუ მანთიშ ჰარა̈ყ ესყედა̄ნე, ალ თვეფი შუნ ლა̄ჲე
Line of edition: 28    ი სგ' ო̄ხჴიდ ესნა̈რ ნიშგვეჲს. ნიშგვეჲს მასა̈რდ ათბაჟჷნხ ალა. მაჩენე ჴა̈ნ ჟი
Line of edition: 29    ლა̈ჲფიშვდხ ესნა̈რ ი გუას ქა ხასჩუქვრეხ ამნია̈̄ნიდ. ამ დვრევჟი̄ნ მესტჲას ლჷმა̈რდ
Line of edition: 30    ეზერ ვა̈რგ, გელა ყანსავშა. ამის ესნა̈რ ალ მა̈რიამჷლა̈შდ გუ ხა̄რ ლელატვდ ი გუნ
Line of edition: 31    ხემციქვილ. მა̈რიამჷლდ ოხვჭირე: "მიჩა თხვიმ ესერ ჰე გუ ხა̄რ, თათაშა გუვა სგა̄ვ
Line of edition: 32    ოხჴიდ მიჩეშთე̄'სგა ლედგა̈რიდ ი ეჩქას ესერ მა̈̄ჲ ხეცხე̄ნი, ჩი̄მი ნა̈ბ ესერ ხეღვე̄ნი
Line of edition: 33    მიჩაცახა̈ნ". ა̈დდ'ე̄სნა̈რ ალა გუთე გელად ი ლენჯა̈̄რთე ლითი̄ლა̈̄ლ ლა̈ჲბინე. ხაკუჩ
Line of edition: 34    ერე გუა იმვა̄ლაჟი̄ნ ჩვადჷრმის ი ს'გა̄დჲას მესტჲათე.

Line of edition: 35       აშხვ ლადა̈ღ უშხვა̄რ ლა̈ხნა̈ზო̄რა̈̄ნხ ესნა̈რ ლემსჲა ლექვა̈̄ნჩუ̄ნ, ლა̈ჲბინეხ უშხუდ
Line of edition: 36    ლი̄ზი, ლჷჴა̈ნთე̄'სგა სგ'ა̄ჩა̈დხ, ეჩქას ხაფხეჭ გელად ი გუა შიშდ ჩუქვა̄ნ ა̈ნნა̈ხ.
Line of edition: 37    გუად ხანჯა̈რ ლა̈ჲშგვინ, ხაძგერ ჩუქვა̄ნჟი̄ნ ჴადვისგა გელას ი ფაშა̈რ ქამენჩუ
Line of edition: 38    ე̄სდე. გელად ლიყუ̄ლი ლა̈ჲბინე. ა̈დბინ'ე̄სნა̈რ ჩუქვა̄ნისგა ლი̄ზი ი სგა ლა̈ხჴა̈დჷ̄ნ
Line of edition: 39    ფა̈ფიშე̄რთე̄'სგა ი ამეჩუ ჩვადგან. ანჴა̈დხ ესნა̈რ ფა̈ფიშა, ჟ'ანკიდხ ლჷდგა̈რ
Line of edition: 40    ი მინე ლექვა̈̄ნ ქუ̄რე̄ლ ჰუყვჟი̄ნ ჩვესდეხ. ა̈დკვიჰხ ესნა̈რ ალა ყანსავშე̄რემ, ლჷდგა̈რ
Line of edition: 41    ლეჟ' ა̄დჲეხ ი ჩვაშდიღვხ. ლოხვბინეხ ესნა̈რ გუას ლიდრა̈̄ლ, მარე დეშ ა̈ნდარეხ
Line of edition: 42    ლედგა̈რიდ. ეჩქა ხა̈̄ქვხ ფა̈ფიშე̄რს: "ედ ესერ ერვა̄ლე მუსველუ ლახდარეხ
Line of edition: 43    ლედგა̈რიდ, მა̄დ' ე̄სერი მინს ადგა̈რიხ". ფა̈ფიშერემ ესნა̈რ მინე ნიბა̈შინ შაგუშა
Page of edition: 88  Line of edition: 1    მა̄რე ა̈ნღორვეხ ქორთე ი ქა ლახვე̄მხ ყანსავშე̄რს. ალჲა̈რდ ესნა̈რ ალ შაგუშე̄რ
Line of edition: 2    მა̄რა დაშნა̈ჲშვ კინჩხ ჟ'ახქვიცხ, თხვიმს შამფვირ ოთსვეხ ი ეჩჟი̄ნ ადჲეხ
Line of edition: 3    მესტჲათე.


Line of edition: 4 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.