TITUS
Svan Chrestomathy
Part No. 111
Previous part

Text: 106 
Page of edition: 90 
Line of edition: 36 
106. ჯგჷრა̈̄გი ჟეღა̈რ


Line of edition: 37       ჯვინალდ თხე̄რა̈̄ლ მა̄მ ლჷმა̈რდხ. თხე̄რა̈̄ლ ჯგჷრა̈̄გი ჟეღა̈რხა̈ნქა ალფიშრე̄ლიხ.
Line of edition: 38    ალ' ა̄მჟი̄ნ ლჷმა̈̄რ (მ' ა̄მჟი̄ნ მასმა ხოშა̄ლე ნა̄მბავ ი მა̈ჲ მიხალ, ტკიც ლია
Line of edition: 39    ბა̈ქ. ხოშა̈̄ლს ხოშა̄ლე ნა̄მბვა̄ლ ხასმახ ი მი̄ჲ ხოშა̄ლე ნა̈̄მბვა̄ლს გარ ჯი̄მბვ', ა̄დო
Line of edition: 40    მი დე̄მგვაშ მოშ ხვა̈ქმე. ლიქმე მა̄დეჲ ალაჲ ვედნილდ გარ მაშყიდ).
Line of edition: 41    სემი ლახვბა ლჷმა̈̄რხ. მაჰვრე̄ნე მუხვბე ჯგჷრა̈̄გ ლჷმა̈̄რ. ეჯა მა̈̄ნკვი ამსვა̄ლდ
Line of edition: 42    ლჷმა̈̄რ ი ძღჷდ ლჷჴმა̈შ ი ლამარგ ამსვა̄ლდ ლჷმა̈̄რნე̄ლი. ალ ლახვბა ჩვალჷ̄თე̄ლიხ
Page of edition: 91  Line of edition: 1    ი ჯგჷრა̈̄გს მა̄მგვეშ ხოკვდუნა ნამხუბი. ძღჷდ ლჷჴმა̈შ ერ ლჷმა̈̄რ, ამღა დიდა̈ბი
Line of edition: 2    ლეჴედ ხოშა̄მ ღე̄რბათ ი ქრისდე მაცხვა̈̄რს გუნ ხალტე̄ნახ ი ვეშგიმპილს მინეშთ'
Line of edition: 3    ო̄თჴერნახ მინე გა̈ნხა̈ნ მეგნად ი ამსვა̄ლდა̈ მემშედა̄ლდ ი გა̈ნხა̈ნ მეგნად თჷმი ლად
Line of edition: 4    ა̈ღ, შომვა̈̄ჲ მიჩ ჲა̈რ ლახსე̄მწა̈̄ლი.

Line of edition: 5       ჯგჷრა̈̄გ ერ ქ'ა̄ხე̄თე̄ნა მიჩა ლახვბას ი ღერთა̄რთ' ე̄ლმა̈̄ზ, ეჩქას მიჩა ჟეღ ვეშგიმ
Line of edition: 6    ათჭემა. ქა დე̄მ ღალ მჷრე̄ს ხეყვლენდა მიჩა ფუსდს. ეჩქას ჯგჷრა̈̄გს ხო̄ქვა,
Line of edition: 7    დიდა̈ბი ლეჴედს: "ჰე̄, საბრალ ყურშა̈ჲ! მიჩ ესერ დალ მა̄მ ხაყა მიჩა მენჴრინდ ი
Line of edition: 8    ჩუ ლესედ ესერ ღალ ხა̄რ, მარე ამუნღო̄ნ ესერ მიჩა მა̄რე̄მი ქვინლჷმგენე̄მი მჷლჩე̄ვ
Line of edition: 9    ლიხ ჯა-ჲ მიჩა ნაბერწყ". ეჩქანღო ჟეღ თხე̄რად ელსიპე̄ლი ი ჩვალფიშრელი.
Line of edition: 10    ჯვინალდ მოლჯგჷრა̈̄გი ქვილჷმგენა დე̄მ ხა̈ჩვმინა თხე̄რე დე̄ჲ ლემყა̈ლვ ლჷმა̈̄რლი,
Line of edition: 11    ჰა̄ვე თხე̄რა მავინ მა ხოყრა̈̄ნ მოლჯგჷრა̈̄გი კუმა̈შდ ი მა̈ნცინდ.
Line of edition: 12    მოლჯგჷრა̈̄გი ჭათად ეჯზუმ ხაყვლი̄ნნა ჩი̄, ერე ლახე ქვითრა̈რ მოლჯგჷრა̈̄გი
Line of edition: 13    კუმა̈შს ლჷმქვითინხ უმბილდ, ჩუ ლჷმცხირვინხ, ერე ალ ქვილჷმგენ' ე̄სერ მოლჯგ
Line of edition: 14    ჷრა̈̄გიშ ლი, შიშდ ჩუ ლუმფიშვდინხ ი უფგოვშ ეჩავ ლჷმტიხვინხ, ე, იმვა̈̄ჲხა̈ნ
Line of edition: 15    ქა ლჷმჴიდვინხ. მარ' ა̄თხე დე̄ჲ ჯგჷრა̈̄გ ჲა̈ს ხა̄რ ი დე̄ჲ იშგენ ღერთა̈რ ჲა̈ს მა ხანწა̈მ.
Line of edition: 16    ეჯღა დე̄მის აზა̄რეხ ათხე თხე̄რა̈̄ლ მოლჯგჷრა̈̄გი კუმა̈შს ი მა̈ნცინს, ადო ჯვინალდ
Line of edition: 17    ჰა̈დურდ დე̄მგვაშ ხა̈ჩვმინახ.


Line of edition: 18 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.