TITUS
Svan Chrestomathy
Part No. 112
Previous part

Text: 107 
Page of edition: 91 
Line of edition: 19 
107. ჯგჷრა̈̄გ მესტჲა̈̄შ


Line of edition: 20       მესტჲა̈̄ ჯგჷრა̈̄გჟი̄ნ ერ ხახტავახ, ჯგჷრა̈̄გ მჷჩა̈̄ჟის ჩუქვა̄ნ ხელწიფ ხონხა,
Line of edition: 21    ეჩხა̈ნ-ამხა̈ნ ჲო̄რი ლჷჩა̈̄ჟ ერ ხა̄გ, ამი̄ ბედჟი̄ნ ამჟი̄ნ მასმა მიშგვა ბიძა̈ჲხა̈ნქა: ქრის
Line of edition: 22    დე ვირჲა̈ჲა̈რს როქვ ოთდაგრახ ი ჩ' ოთშდუღვახ. ჩუ ნაშდუღუნღო ღალ ქრისდე
Line of edition: 23    ჟი დეშ ლჷმგენა̈̄ლ ი ჩუ ლჷმა̈რდ საფლა̈ვისგა. მასა̈რდ თჷმი ღალ ხა̄რა ი გუნ
Line of edition: 24    გუ̄შ ხა̄რა ჟი ლიგნა̈̄ლ. ქრისდიანა̈რ ი მიჩა მეცქვილ აფხნეგა̈რ ახმაღლინახ ქრის
Line of edition: 25    დე̄ ჟი ლიგნა̈̄ლს, მარე ლახე დვრევ ა̈მჩედე̄ლი, ქა დე̄სა ხა̈წდახ ჟი ლჷგნა ქრისდეს,
Line of edition: 26    ეჩქას ლაჭკვა̈რთე̄სგ'ა̈̄მშყედხ. ამჟი̄ნ დიდა̈ბი ლეჴედ ჯჷჷრა̈̄გს ლახი̄ცნავა ქრისდე
Line of edition: 27    ი ხო̄ქვა: -- ჯ'ე̄სერ ჟი დეშ იგნა̈̄ლ, ოდე მიჩა მჷდგა̈რი ვირჲა̈ჲრე ხელწიფს ჩუ დო
Line of edition: 28    ჲა̈რ ადდაგრ'ე̄ჩქად. ალ ხელწიფი დაგრ'ე̄სერ მიჩ გარ ხა̈მჲე̄და. ეჯა ჩუ̄ვ ადგა̈რ,
Line of edition: 29    ჯ'ე̄სერ ჟ'ა̄ნგენი ი ეჩქანღვ' ე̄სერ ჯა მიჩ განხა̈ნ ლა̈ჲჴერნი ი ამსვა̄ლდა̈ ლიმშედა̄
Line of edition: 30    ლე ჟჷრს ესერ ლაჰვედნე". ჯგჷრა̈̄გ ამღა მა̄მ აფა̈შ, ა იცნავღა. მე̄რმაჟი̄ნ აჯაღჷდ
Line of edition: 31    ლა̈ხი̄ცნავ, აჯაღჷდ მა̄მ აფა̈შ. მე̄სმაჟი̄ნ აჯაღჷდ ლა̈ხი̄ცნავ ამკა̈ლიბდ ი ეჩქას
Line of edition: 32    სერ ჩვა̈დჯჷრვ', ე̄რე გაცხა̈ჲდ ქრისდეს თჷმი ხა̄რა ი მიჩა ლიმშედა̈̄ლ ხა̈კვდა. ანჷ̄გა̈ნ
Line of edition: 33    ესნა̈რ ჯგჷრა̈̄გ ი მიჩა ლახვბათ' ა̄ჩა̈დ. ალჲა̈რს ქ'ო̄ხუ̄მბავე იმვა̈̄ჲჟი̄ნ ლა̈ხისნავ
Line of edition: 34    ი ხა̈̄ქვ: "სგა̄ვ ესერ ლოხვჴერდახ ი ხელწიფ ჩუ̄ვ ადგა̈რხ". ლახვბად ხა̈̄ქვხ: "მინ
Line of edition: 35    სემი გარ ესერ იმჟი̄ნ ა̈ხწინიხ ხელწიფს ი მიჩა ჯა̈რს?" "ეჯღ' ე̄სერ მინ ნომა̄ვ აფ
Line of edition: 36    ა̈შხ ი ხონჴერდახუ! "

Line of edition: 37       ლა̈ჲჴერნე სგა მიჩა ლახვბა, ჟ'ა̈ნმა̄რა̈̄ნხ მინე ჲარა̈ღვშ ი ნახოვშ. ჟი ლახსგურდახ
Line of edition: 38    ჩა̄ჟა̈რს ი აჩა̈დხ ხელწიფიშთე. ხელწიფდ ლიშჲა̈̄ლ ლოხბინე, მარე ჯგჷრა̈̄გ
Line of edition: 39    ი მიჩა ლახვბა ჟ'ახწინდახ. ჯგჷრა̈̄გდ ხელწიფ ჩუქვა̄ნ ა̈ნნა̈ხ მიჩა ჩა̄ჟვშ, შუბ ათჴალე
Line of edition: 40    თხუმქა ი ჩვადგა̈რ. ალ ხელწიფი დაგრანღო ქრისდე ჟ'ალგენე̄ლი, ჯგჷრა̈̄გ
Line of edition: 41    მიჩ'ა̄ფხნეგდ ლოხვჴერნა ი ამსვა̄ლდა̈ ლიმშედა̄ლე ჰაჯ ლოჰოდა.


Line of edition: 42 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.