TITUS
Svan Chrestomathy
Part No. 114
Previous part

Text: 109 
Page of edition: 92 
Line of edition: 30 
109. ხეშკილ


Line of edition: 31       ხეშკილ (\\ჰეშკილ) აშხვ ჩიქქა ეზერ სოფელ ლჷმა̈̄რ ი ჲო̄რი გვა̈რ ლჷმზიგ:
Line of edition: 32    გა̄გა̄ნ ი ბა̈რვა̄ნ. ბა̈რვა̄ნშა ბა̈რვა̄ნ ძღჷდ ლჷკთილ მეზგე ლჷმა̈̄რლი. ეშხუ მამილვ
Line of edition: 33    ხარდე̄ნა ი ეჯკა̈ლიბ ჰერ სგა ხა̄დენ' ე̄რე ხეშკილ ლახე ლიყლეს ლჷმბინვინ, ჰერ
Line of edition: 34    ლახმჷლდმუყვ ჩუ ლჷმსჷმო̄ლნე̄ლი.

Line of edition: 35       აშხვჟი̄ნ ესნა̈რ ოთარშა მა̄რე ი მიჩ' ა̄ფხნეგა̈რ ლა̈ხმუშგვარ ალ ბა̈რვა̄ნს. ალ
Line of edition: 36    ბა̈რვა̄ნ ხოჩა̄მდ ესხვი̄დ ი ლა̈ხჭვედდა: "მახვში, ხედ' ე̄სერ ხოცხა ლა̈ჲსად: ჩხარა
Line of edition: 37    ლჷნგა̈ზ ღუნ ჰა ეშხუ მამილვ?" ალ ოთარშე̄რ ვა̈რგდ ადსკორ' ე̄სნარ ი ხა̈̄ქვ:
Line of edition: 38    "მა̈ჲ ესერ ამგვა̈რ მამილვ (\\ მამვილ) ხორი, ეჯა̄ვ ოთზიჰ". ანჴა̈დ ესნა̈რ ბა̈რვა̄ნ,
Line of edition: 39    ღუნი ჩუ ოთზიჰ ი მამვილი̄, მარე მამვილს ჟ'ოხვსერა ღუნდ, ამგვა̈რ მეზგე ლჷ
Line of edition: 40    მა̈̄რნე̄ლი. ალ ბა̈რვა̄ნა̈რს ი გა̄გა̄ნა̈რს გუნ ეზერ ლისვფა̈ლ ხა̄რახ. გა̄გა̄ნა̈რ ჟიბე
Line of edition: 41    ხეშკილს ლჷმზიგხ ი ბა̈რვა̄ნა̈რ -- ჩუბეშს. ალჲარე ამგვა̈ჲ ხოჩა ლისვფა̈ლ ათთხამ
Line of edition: 42    ე̄ნახ ლატლი̄ ჩა̈რკვია̄ნა̈რს ი მჷლხა̈ ქუ̄რდა̄ნა̈რს. ლოხვბიდნახ უშხვა̄რდ ამბა̈ვ ი
Page of edition: 93  Line of edition: 1    ოხვსკო̄რახ ალ ჲარვ სოფლი ლიმსისგა̄რ უშხვა̄რ ნე̄სგა. გაცხაჲდ, ჟი ლოხვმისს
Line of edition: 2    გა̄რახ უშხვა̄რდ ი ეჩქანღო ხოლა̄მდ ხასყუნახ უშხვა̄რ. ეჩქანღო ა̈ნსკო̄რეხ ესნა̈რ
Line of edition: 3    ალჲარე ღალა̈ტ ი ჩვასკიბხ, მა̈ჲ ლადა̈ღ ხაკუჩ ერე ადღალტახ. მარე ქუ̄რდა̄ნა̈რ
Line of edition: 4    აშხვ ლადა̈ღვშ ხუ̄ნკვიდ ოთჩა̈შხ. აშხვ ლადა̈ღ ესნა̈რ გა̄გა̄ნ ლა̈თხვჲართ' ა̄ჩა̈დ ი
Line of edition: 5    მიჩა ყურშა̈ჲ ისგა ლა̈ჲჴერნე. ხეშკლა̈ ბოგჷლდს ეჩხა̈ნთე ქ'ა̈̄თბა̄ჴ, ეჩქას ესნა̈რ
Line of edition: 6    ა̈ნმეჴრ', ე̄რე პირწამა̈ლ ა̈გის ათსედა. ხა̈ქვ მიჩა ყურშა̈ჲს: "ჰატ, ხოლა ყურშა̈ჲ,
Line of edition: 7    ჟი̄ვ აჩა̈დ ა̈გითე ი პირწამა̈ლ ჩუ̄ვ ოხჴიდ. ლა̄პარ ესნა̈რ ჟეღ ი ა̈გით'ა̄ჩა̈დ. ა̈გის თოფ
Line of edition: 8    რე ლა̈რკინა კა̈ვჟი̄ნ პირწამა̈ლ ჟი ხა̈რკე̄ნა ი ამის ლოხვბინე ლიკა̄რჩხა̈ლ. გა̄გა̄ნა̈
Line of edition: 9    ხეხვ ხოჩა ზურა̄ლ ლჷმა̈̄რნე̄ლი ი გუდ ა̈̄მჴედ, ერე მიჩა ჭაშვ პირწამა̈ლ ჩვათსედა
Line of edition: 10    ქორს. ჩ' ოხვკი̄და, ალ ჟაღვ ყიად სგა ლოხუბა. ამპერე̄ლი ჟეღ ი ჩ' ოთჴი̄და
Line of edition: 11    გა̄გა̄ნა̈შდ პირწამა̈ლ. ლოხვბინა ლი̄ზი ი ხა̈წდა მინეშთე მეჴედ ამხვა̈რს. ბოგთე
Line of edition: 12    ქვა ლი̄ზი დეშ ოხვჩი̄შა ი ლჷცეჩხა̈ნთე კოჯხა̈ნქა ქ'ო̄თსკინა. ათხეჲ ამ ა̈დგილს
Line of edition: 13    გა̄გა̄ნა̈ ნა̈სკინ ხაჟხა. ჟ'ანჴა̈დ ესნა̈რ სოფელთე ი სოფლა̈რ ჩვადბა̈ჟნე. ამჩიქდ მჷლ
Line of edition: 14    ხა̈ ლაშგა̈რ ა̈ხჭვა̄დ სგა ღალ ხეშკილს. ოხჩჷდხ ლიშჲა̈̄ლ ი ხეშკილა̈რ ღალ მა̈გ
Line of edition: 15    ჟ'ანხვიტხ. ლა̈ჲრაკლეხ ალჲარე ქვინლჷმგენა̈̄ლ მჷლხა̈რდ სგვებინ ი ლა̈ჲბინეხ
Line of edition: 16    ლი̄ზი. ხეშკლა̈რს ი ლენჯა̄რა̈რს ხოჩა ლისვფა̈ლ ხა̄რახ უშხვა̄რ ნე̄სგა. ხეშკლა̈რს
Line of edition: 17    ლატლიხა̈ნ ამხვარე ლა̈ყრულდ წე̄რში მურყვამ ხა̈გნე̄ნახ. ეჯ მურყვამ ათხეჲ ჩუ
Line of edition: 18    ლჷგ. ობა̈შინ ჩუ ლჷმჴა̈დვინხ კვირჲა̈̄ ლა̈̄ქვი̄სგმუყვ. ამჩუ̄ნ კვირჲას ქა ლჷმყჷლვე̄ნხ,
Line of edition: 19    ჟი ლჷმმა̈ზვრინხ ლენჯა̈̄რა ლაჴვმა̈რს ი ეჩქანღო ჟი ხაჭონნახ ეჩჟი̄ნ. ალ
Line of edition: 20    ხეშკლა̈ ღალა̈ტ ა̈დკვიჰ ესნა̈რ ლენჯა̈̄რდ. ა̈დფადა̄ს ქა ი ალ ფა̄და̈ს სგ'ა̈̄ჰი̄დ მჷლხა̈რს
Line of edition: 21    ჰაწვალ ნა̈შჲა̄ლა̈ ტვიბისგა. ოხჩჷ̄დხ ლიშჲა̈̄ლ. ლენჯა̄რა̈რ ჟ'ახწინდახ ესნა̈რ ი მჷლხარე
Line of edition: 22    ჯა̈რი მათხვმი ჩვაქა̈ჩხ ბჷგიდ. ალ ლჷქა̈ჩ მა̄რე ჩუ ზ'ე̄სნარ ლა̄რაისგა ი
Line of edition: 23    ითჲა̈̄ლ: "ჰა, ბედნიერ ესერ, ერვა̄ლე ჟა̈გი მჷდე̄სგი ჩუ̄ვ ხეყა̈̄დ!" "ჟა̈გს ესერ ჲაღო
Line of edition: 24    ჯა ლოხვდე̄სგი". -- რა̈̄ქვ ესნა̈რ აშხვ მჷლჷნჯე̄რდ. ესფხიქე ხოშა̄მ ჩი̄რხუს, ხაჴიდ
Line of edition: 25    ნიჩვა̈რჩუ̄ნ ი თხვიმ ჟღა̈ბდ ოთგენე. ამჟი̄ნ ალა ამეჩუ̄ნ ჩვადგა̈რხ ესნა̈რ. ხეშკლარე
Line of edition: 26    კეთილს ი ქვილჷმგენა (\\ქვინლჷმგენა) ღვეშდ ესჭო̄ნნეხ. ხეშკლა̈რხა̈ნქა ეშხუ
Line of edition: 27    ბეფშილდ გარ ახსედა. ალა̄ჲ ტყვედ ესყენახ მჷლხა̈რს, ამისი ჟ'ახჭო̄ნნეხ, ჩუ
Line of edition: 28    ანჴიდხ ლენჯა̈̄რთე ი ამეჩუ სოლა̈ თხუმ ჩვადზიგვნეხ. ეჩი ნაბერწყ ათხე ბა̈შშა ლიხ
Line of edition: 29    ი ჩუ იზგეხ ჲო̄რი მეზგე. ეჩქანღვ'ე̄სნა̈რ ალ ხეშკლი ლიფსვნე ლატლა̈რს ხა̈კვდახ
Line of edition: 30    ი მანა̈̄შ ოთლა̄შახ. ლითე̄ლჟი̄ნ ესნა̈რ ა̈დკვიჰხ ალა ლენჯა̄რა̈რდ, ოთშგა̈ბხ ჟი ლატ
Line of edition: 31    ლა̈რს ი ქა̄და̄ტვნეხ. ეჩქანღო სერ ლატლა̈რს დეშ ოთბე̄დავახ ხეშკლა̈ ლიგვდირჲ
Line of edition: 32    ე̄ლ ი ლენჯა̈̄რს ესსედა. ათხე ხეშკილ ქაშვე̄თა̈რს ხუღვეხ. ერხი ჩუჲ იზგეხ ეჩეჩ
Line of edition: 33    უ̄ნ ი ერხის ლაბა̈̄ვდ გარ ხუღვეხ. . აშ ლალდა̈ღდ ლაშთხვერჲა̈რსი სგ' ო̄ხგა̈დხ.
Line of edition: 34    ბა̈რვა̄ნა̈ ლიზგე ათხეჲ ლაჰრა̈კდ ხუღვე ჩი̄. ლახე ჲა̈რ ა̈მზჷრი უშხვა̄რ, ხაყლეხ:
Line of edition: 35    "ბა̈რვა̄ნა̈ ლიზგე̄ვ ესერ ოხსყა მიჩ, ეჩჟი̄ნუ ესერ ოთმა̈ზრა ღე̄რბათ მიჩა ლიზგე
Line of edition: 36    ი ლირდე!" თვითონ ბა̈რვა̄ნ მღჷდ ვიდჲე̄რ, ხოჩა თვალაშ ლჷმა̈̄რ. გა̄გა̄ნ მეთხვჲა̈რ
Line of edition: 37    ლჷმა̈რლი, ქა შომვა̈̄ჲ ლჷმა̈̄ზ ლა̈თხვჲართე, ჰა̈რიდ ეჩი̄ ქორთე ლიტეხ და̈̄ს
Line of edition: 38    როქვ ხასმა. ღჷნჟი̄ნ ლა̈ჲსა მა̄მ ხა̄რა ლეჲსენი.


Line of edition: 39 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.