TITUS
Svan Chrestomathy
Part No. 118
Previous part

Text: 113 
Page of edition: 94 
Line of edition: 39 
113. ოთარშა ნაჭვლაშ


Line of edition: 40       ეჩქას მი მახე ქემქეთ გარ ხვა̈სვ. ოთარშე̄რს მასა̈რდ ხვალტჷნდა̈ს ი აფხნეგდ
Line of edition: 41    მინჴრინახ, ლახე იმთე ღჷრდახ. მიე მასა̈რდ ხვაცხნა̈ს ოთარშე̄რთე ი ა̈გის ლირდეს
Page of edition: 95  Line of edition: 1    ეჯჲა̈რმჷყ მიცხა̈̄ნდა. აშხვ ზავ ჯა̈ნსუხდ ოთარშე̄რ მიჩა დაჩვირ ადწვი̄ლე ყა̈რჩათე,
Line of edition: 2    დუდაშე̄რთე. ეჯჲა̈რ ეჩეგ ლა̈სვხ ფუსდ ი ყა̈რჩა მინე შჷნისგ' ა̄რდა. ლინჭვლაშა̄ლე
Line of edition: 3    დვრევ ანჴა̈დ, ეჩქას ა̈დჰერხ დუდაშე̄რემ ყა̈რჩათე ნაჭვლაშა̈ ლაკა̈დდ. ოთარშა
Line of edition: 4    ჟ'ა̈ნმა̄რა̈̄ნხ. სემი ღეთ მინ აჩა̈დხ: მოსოსტრ, ბექჷრბი ი ჯა̈ნსუხ. ეჩჷნქა ფა̈მლი
Line of edition: 5    მა̄რა̈̄ლ ლა̈ჲჴერნეხ. მიე სგა ლა̈მფხანგეხ ი ოჩა̈დდ ყა̈რჩათე. ეჩეჩუ̄ნ მე̄რმა ნუკვიშდ
Line of edition: 6    ხა̈მთქვე̄ნახ მუშგვრი̄ სა̈ხ. ოთარშა ლარდა̈̄ლთე̄'სგ' ა̄დჲეხ ი ნა̈ჲ ეშხვი ოთა̈ხ ლან
Line of edition: 7    ვე̄მხ ლარდად. ლა̈ჲსა̈ლ აზიჰხ. ლეღვი ი დიარ ლეზობდ ხამვა̈̄ჲ მოშ ნეკვა̈დ, ეჩჟი̄ნ
Line of edition: 8    ნუღვა̈̄ნ, მარე გა̈ჩ მა̄მ ხახლე̄ნახ ეჩეგ ლეღვ ლაზობჟი̄ნ ი შია̈რშვ ხვიზობდად. ლეთრად
Line of edition: 9    ორა̈̄შ ი სჷრა ჰა̄ლ მოშ ნეკვა̈დ, ეჩჟი̄ნ ნუღვა̈̄ნ. სამ ლადა̈ღ ამჟი̄ნ ხვარდად ი
Line of edition: 10    ხოჩა̄მდ ჟ'ა̈ხშვემდ. მე̄შთხვამ ლადა̈ღ ქ'ა̈̄ნკიდხ ოთარშე̄რემ ნაჭვლაშდ: ერვეშდ
Line of edition: 11    ხოშა ჴა̈ნ, ეშდოხვიშდ ხოჩა ლჷქშაგუ ყვა̈რვილ, სემეშდ ლუღვინ ფირვ, აშირ ლჷნღეშტ
Line of edition: 12    დაჴჷლ ი აშირ გიცა̈რ. ეჩჷნქა სემეშდ ღეთ თვით სემი ლჷზა̈ჲ ხაბნა. ეშხვი
Line of edition: 13    ხაბნა ი გიცარ ლეზიზდ ლანვე̄მხ. ლა̈ხვრეყდ ალი მა̈გ ჯვეგ ი ლა̈ხვბინედ ლიჴედ.
Line of edition: 14    დუდაშე̄რემ ხოშა̄მ ბაჩვმუყვ მინე ფა̈მლია̈რ ლა̈ნჴერნეხ, დუდაშე̄რემ ბა̈ჩა ბოგმუყვ
Line of edition: 15    ანგენეხ ი ამეჩუ̄ნ ჩვა̈თყულუ̄რა̈̄ნდ. ოთარშე̄რ ჲეშდ ღეთ ხონჴერდახ აფხნეგა̈რდ
Line of edition: 16    მე̄რმე მესვფელა ი ეჩჷნქა ფა̈მლჲა̈რ. ბა̄ზი ხოშა̄მ ბაჩვმჷყ ხვარდად სადგვემდ. ნე̄სგაჲსგა
Line of edition: 17    ხოშა ლემესგ ოხვა̄შვედ ი ნა̈ჲ ქვინლჷმგენა̈̄ლს ი მა̈ნცინს გჷრკიდ ლა̈ხვცხა̈პდ
Line of edition: 18    მჷლჩად. მე̄რმა ლადა̈ღ აშხვ თანა̈ღს ქ'ა̈̄ხვთანღედ ი უზღვადთე̄'სგა შვიდებდ
Line of edition: 19    ონჴვიდდ ქვინლმგენა̈̄ლ. ბა̄ზ' ამეჩუ̄ნ ხაბნ' ა̈̄ზვიჰდ ი ამი̄ ლეღ ა̈ხვმა̄რედ.
Line of edition: 20    მე̄შთხვა ნა̈ბოზს გარ ონჴვა̈დდ ეცერთე̄სგა ი ჰა̈ზვ ჟ'ოხვტჷტნედ კუმაშშვ.


Line of edition: 21 
ლატლი



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.