TITUS
Svan Chrestomathy
Part No. 122
Previous part

Text: 117 
Page of edition: 97 
Line of edition: 12 
117. იფა̈̄რიშ ი ზეგა̈ნი გვეშ


Line of edition: 13       ჩიდ მა̈̄ნკვი ბოგრეშ ლჷმზიგხ პირველშა, მარე ალ მეზგე შარვა̄ნშე̄რ ჩვოთღალტახ.
Line of edition: 14    შა̈რვა̄ნშა ეჩქად ბოგრეშ ჟიქა̄ნ შა̈რს ლჷმზიგხ. პირველშე̄რ მა̄რა მჷლატეხ
Line of edition: 15    ზურა̄ლ ხაყე̄ნა ხახვდ ი შა̈რვა̄ნა̈რ სგ' ა̈̄მჩედხ პირველშე̄რთე̄'სგა, ეჩქას ალ
Line of edition: 16    ზურა̄ლ ჩვათჩედახ ი სგ'ა̈̄მჩედ ლელტხათე, მიჩა ლამვარა̈რთე. ალ ზურა̄ლ ღანავ
Line of edition: 17    ლჷმა̈̄რ, ჩვალღვა̈ჟ ი ჲე̄რუ ჭყინტ ოხვთავა. ალ ბოფშა̈რს ჟ'ოხვცხახ ი გუნ ლამარგ
Line of edition: 18    მახეღვაჟა̈რ ახფასახ, ლელტხაისგა̈̄ მახეღვაჟა̈რს ჩი̄ ჟი ხა̈წნო̄ლნახ, ეჩქას
Line of edition: 19    ლელტხა̈̄ლ ხასყვა̈დრუნახ: "მინ ესერ ხოჩა მახეღვაჟა̈რ ჰე̄ ლიხ, მინე ქორ ი მინე
Line of edition: 20    ტყოფუ ა̈ნთხეხ". ალჲა̈რ ესნა̈რ ქა ლა̈ხჭვედდახ მინე დის ი: "ლ'ე̄სერ მა̄ ალა ტკიც,
Line of edition: 21    ა ლელტხა̈̄ლ ხესყვა̄დირხ". მინე დიდ მა̈გ ქ'ო̄ხუნბავე, იმჟი̄ნ ანხვიტხ შა̈რვა̄ნა̈რდ,
Line of edition: 22    იმჟი̄ნ ოხვჩა̈დ ჯა ქა ი მა̈გ ქა ხა̈̄ქვ: "მინე ლა̈ლზიგ' ე̄სერ ბოგრეშ ლი" ი შუკვი
Line of edition: 23    ქა ლახთო̄ნე ლალსი̄ლქა̈̄შ. ეჩჷნქა ხა̈̄ქვ, ერე "მინ ესერ ქა ხეწდენიხ შა̈რვა̄ნა̈
Line of edition: 24    ქორს. ახანახა ლადა̈ღ ესერ ნადობ ხე̄რი, შა̈რვა̄ნ ესერ ჰილვს ხესგვრი. მინ ესერ
Line of edition: 25    ლაჴა̈ვ მა̈რკვა̄ლა̈ ბა̈ჩა̈რს სგა̄ვ ლა̈ხპა̈ჟხ ი ეჩხა̈ნქ' ე̄სერ ეზერ ლადგა̈რ ხოჴდენიხ".
Line of edition: 26    ალ მახეღვაჟა̈რ ქ'ა̄ნჴა̈დხ ესნა̈რ ამხა̈ნჩუ̄ნ ი სგა ლა̈ხპა̈ჟხ მა̈რკვა̄ლა̈ ბა̈ჩა̈რს. ლა̈დ'
Line of edition: 27    ე̄სნა̈რ შა̈რვა̄ნს ახანახა ხა̄რ ი ნადა̈რ ხაწა. ეჯკა̈ლიბ ხოლა მა̈ნკიშ ლჷმა̈̄რ ალ შა̈რვა̄ნ,
Line of edition: 28    ერე ხოჩა̄მ ზურა̄ლს ი ხოჩა̄მ ჭემი სა̈ვს ჩი̄ მიჩე ქორთე ხა̈სპუნა. ახანახა ლადა̈ღ
Line of edition: 29    ესნა̈რ ჟ'ახსგურდა ჰილვს ი ლა̈ჲბინე ლი̄ზი ლა̄რა̈̄ლთე. მა̈რკვა̄ლა̈ ბა̈ჩა̈რთექა
Line of edition: 30    ქ'ა̈̄ხჴა̈დჷ̄ნ, ეჩქას ოთცა̄დუნეხ ლახვბად თოფა̈რ ი შა̈რვა̄ნ ჟ'ესრიწვხ ამეჩუ̄ნ. ნა̈ბოზს
Line of edition: 31    ესნა̈რ ნადა̈რ ალმა̈̄ზხ ლა̈ჭმახა̈ნ, ეჩქას გარ ახხვი̄დხ შა̈რვა̄ნ ჩულჷდგა̈რ
Line of edition: 32    ი გუნ ათჷმბაჟე̄ნახ: "ჲა̈რ ესერ ადდაგრი̄ს ამეჩუ̄ნ ალ მა̄რა!" ალ ლახვბად
Line of edition: 33    ესნა̈რ შა̈რვანა̈რ ჟ'ანხვიტხ ქორისგა ამ ლადა̈ღ ჟი ნაჭო̄ნუნღო ი მინ სგ'ა̄
Line of edition: 34    ჩა̈დხ ჴაც მურყვამთე̄'სგა. ეჩხა̈ნჩუ̄ნ ჩვანჴა̈დხ ესნა̈რ ი მინე ჯვინელ ნალზიგვჟი̄ნ
Line of edition: 35    ჩვა̈დზიგა̈̄ნხ. ეჩქანღვ' ე̄სნა̈რ ჩვა̈დფიშრა̈̄ნხ. ეშხუ ჩვასა̈დ ბოგრეშ ი მე̄რმე ნაკი
Line of edition: 36    ფა̈̄რს ა̈დზიგა̈̄ნხ. იფა̈̄რ ქორ ა̈დგე აშხვ მუხვბე̄მ. ეჯ ქორისგ' ა̄თხე ჩიტჲა̈ჲშა იზგეხ.
Line of edition: 37    ამეჩუ̄ნ ესნა̈რ ჩვა̈დზიგა̈̄ნხ ი ეჩქანღო ჩვა̈დფიშრა̈̄ნხ. რა̈̄ქვხ ესნა̈რ: "სანგეჭუ მ'ა̄დ
Line of edition: 38    გეხ ესერ". ბაკუს ხო̄ქვა: "ჯ'ე̄სერ ადგემ ლაბიგ ქორს ი ლოხმარჯვეხუ̄". ამჟი̄ნ
Line of edition: 39    ესნა̈რ ჩვადგეხ კჷ̄რშა̈̄რ ქორ ი მურყვამ. მურყვამ ქ'ა̄დზჷგრეხ, ეჩქას ესნა̈რ ჴა̈ნი
Line of edition: 40    ქ'ა̄ნკვა̈რხ ჟიქა̄ნხა̈ნჩუ̄ნ. მურყვმა̈ ლაგა̈მჟი̄ნ ბა̈ჩს ი იშგან მასალას ლამე̄შხოშ ლჷმ
Line of edition: 41    ჲა̈̄სგვინ მა̈გ, ადო მა̄რე იმჟი̄ნ აჲა̈̄სგუნო̄ლ ამჟი̄ნ კჷლთხითეჟი̄ნ. ალ ქორა̈შ ი მურყვმა̈
Page of edition: 98  Line of edition: 1    ნაგა̈მუნღვ' ე̄სნა̈რ გუნ ეზა̈რ ლა̈ხჲადა̄ლ აჩვმინხ. ეჯ ქორისგა ერვა̈̄ჲ იზგეხ
Line of edition: 2    ეჯჲა̈რს კჷ̄რშა̈რს ხვაყლედ.


Line of edition: 3 
იფა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.