TITUS
Svan Chrestomathy
Part No. 128
Previous part

Text: 123 
Page of edition: 100 
Line of edition: 39 
123. ჰა̈̄რში გველჲაშა̈პი დაგრა


Line of edition: 40       ჰა̈̄რში ლახვისგა გველჲაშა̈პ ლჷმა̈რდ, ეჯკა̈ლიბ ფისრა̈ჲ ი ლჷტა̈ნ ჩუ ლჷმა̈̄რ,
Line of edition: 41    ერე ეშხუ ქვილჷმგენე აშხვ ნა̄პუდ ქა დეშ ხა̄რა. ერვა̈̄ჲ ქა ხადო̄ლნა ქვილჷმგენე ი
Page of edition: 101  Line of edition: 1    მა̄რე, ჩი ჩუ ლჷმჴაცვინ ი ჩუ ლუმურტყვინ. ობა̈შ წყა̈ნ ი მა̄რცხ ოთდა ლატლიდ
Line of edition: 2    ი ლენჯა̈̄რდ ი ეჩავ ახჴედახ გვეშ, ერე ქვილჷმგენა და̈̄რ მოშ ლჷმჲა̈̄სგვინ ჰა̈̄რა̈შთე
Line of edition: 3    ლაჯოგდ ი ეჩხა̄ვ უჲად ზავლადა̈ღ ქვილჷმგენა ქუნ და̈̄რ მოშ ხა̈ცვრე. სურუ თჷმ'
Line of edition: 4    ა̄ხჴედახ სოფლა̈რს ღალ. ამ დვრექა ლჷმა̈რდ მეთხვჲა̈რ კა̄ხა̄ნ ჩამგელია̄ნ. ამის ი
Line of edition: 5    მე̄რმა მეთხვიჲარას ჩიგარ ხა̈კვდახ ალ გველჲშა̈პი ლიჴვესგ, მარე ქა ღალ და̈̄რ
Line of edition: 6    მოშ ლჷმპირვინ მაყალშვ ეჯღ, ე̄რე გველჲაშა̈პს ქა და̈̄რ მოშ ხა̈სდა̈ნვნა. ალ კა̄ხა̄ნ
Line of edition: 7    ჩიგარ ხა̈სიპ ესნა̈რ ალ გველჲაშა̈პს ი ხესხათა̈̄ლ, ერე იმვა̄ლაჟი̄ნ ოხსახთას დაგრა.
Line of edition: 8    აშხუნღვ' ე̄სნარ ჟ'ა̈ნმეჴრე შომვა̈̄ჲ ივჟუნო̄ლდა გველჲაშა̈პ. აშხვ ლადა̈ღ ესლოთმე
Line of edition: 9    გველოჲაშა̈პი ლი̄ვჟ', ე̄ჩქას ადჲე ეშხვი ჩვეინ მეშხა ფირვი ლჷჯე, ლა̄ჲე ი
Line of edition: 10    აჩა̈დ. ალ ლჷჯოშ გვეში ჩვეინ ჩვესიგ გველჲაშა̈პი ლავჟა̈̄ ფე̄დი̄ს, მიჩნე̄მ კიჩხ ა̈ნტა̄ბე,
Line of edition: 11    სგა ლა̈იგ გველჲაშა̈პა̈ თხუმთეჟი̄ნ. აჩა̈დ ამხა̄ვთეჟი̄ნ ი სემი ცხვი ხაჴიდ შდჷმ
Line of edition: 12    ლექვა, მიჩნე̄მ ჩვა̈ნსკინე ენასდ კიჩხჩუ̄ნ ი ლა̄ტვთ' ა̄ჩა̈დ. ამჟინ ფისრა̈ჲ გველჲაშა̈პ
Line of edition: 13    ჟ'ანჲა̈ცხ ი ლიღვეჭ ლოხვბინე კა̄ხა̄ნს. ალ ლაღვაჭჟი̄ნ გველჲაშა̈პ ლჷჯ' ა̄ხა̄სდ
Line of edition: 14    ი ამის ესსკვა̈დ. ეჩხა̄ვთე̄'სგა აჯაღ ხაჴიდ კა̈ხა̄ნდ ცხუვა̈რ ი გველჲშა̈პ ჩვადგა̈რ. ეჩი
Line of edition: 15    ჯიჯვს ეჩი̄ზუმ ახფას', ე̄რე ხოშა სიკვ ათხე̄ჲ ქა ხეთრა ჰა̄რა̈შ. ალ გველჲაშა̈პი დაგრა,
Line of edition: 16    მა̈ჲ საკვრელ, მასა̈რდ ათხი̄დახ ლატლა̈რს ი კა̄ხა̄ნა̈შდ ი მიჩა მესვფელა ლახვშდა̈რდ
Line of edition: 17    ლახვშდულდა̈ ლახულდ ი სგიმ ხოსჩქვარახ ი მა̈̄ნკვი ლა̈თხვჲართე ჩამგელა̄ნა̈რ
Line of edition: 18    ლჷმა̈̄რხ მე̄ზი ჰა̈̄რა̈შთე.


Line of edition: 19 
მესტია



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.