TITUS
Svan Chrestomathy
Part No. 130
Previous part

Text: 125 
Page of edition: 102 
Line of edition: 5 
125. ლო̈მი ისტორია


Line of edition: 6       ათხად მესტჲა̈ ჯგჷრა̈̄გისგა ი ათხე მუზეუმისგა ლვემი ნახა̈ზ ა̈რი ჟი ლჷშხებ ი
Line of edition: 7    ეჯა ფაუჟი̄ნ ხალჯა. აბურეშიმიშ ლი. ალ ლემ ჰჷლშჲე̄რისგა ჩა̄ჟრე ლაჭმუნა̈̄ლჟი̄ნ
Line of edition: 8    ხუღვეხ ჟი ლჷლა̈̄ჯ.

Line of edition: 9       ჯვინალდ თათრიანობჟი̄ნ, შვა̈ნს თათრა̈რ ახსგურე̄ნახ, ეჩქას შვანა̈რ შიშდ
Line of edition: 10    ჟ'ალნა̈ზო̄რე̄ლიხ ი ქ'ა̄ხშია̄ლე̄ნახ თათრა̈რს. ლა̈შჲა̄ლისგა შვანა̈რ ჟ'ახწინე̄ნახ
Line of edition: 11    ი ალ ლვემი ქ'ო̄თღახ. თათრარე ჟი ლინწირი ლა̈ხჲადა̄ლდ ი ჟი ლა̈შყდუნა̈̄რდ
Line of edition: 12    ოხვსკო̄რახ ალ ლვემი ლიბე̄ლე. ლიშჲა̈̄ლი ჰჷლშიე̄რისგა ლჷმა̈̄რ ი ეჯ ლადა̈ღ ლოხვბინახ
Line of edition: 13    ამი̄ ლიბე̄ლე.

Line of edition: 14       ეჩქას ჩა̄ჟა̈რ და̈̄ს ხარდე̄ნა ი ჭჷშხვშ ლაჭმუვშ ლჷმბა̈̄ლვინხ. ერვეშდ საჯენი
Line of edition: 15    ნაზიმს ეშხუ მა̄რე ლჷმგენ, ეჩჟი̄ნ -- მე̄რმე, ეჩჟი̄ნ -- მე̄სმე ი ამჟი̄ნ ქა ლჷმჭა̄რვო̄ლ
Line of edition: 16    ინხ მესტჲა̈̄ ბოგხა̈ნქა ი ლაჴვმი̄ლდ.

Line of edition: 17       მა̈̄ნკვი მუღვე̄ნე ლაჭვმახა̈ნქა ქა ხა̈ბშინა მე̄რმა მა̄რა ი ამჟი̄ნ ქა ლჷმხა̈̄რსვინხ
Line of edition: 18    ჩი̄. ეჩქანღო სგა ლჷმჲა̈̄სჷვინხ საყდა̈რთე̄სგა.

Line of edition: 19       ეჩქას ოთარშე̄რმჷყ ი̄რო̄ლ ა, მე̄რმა ვა̈რგმჷყ, მჷმსტივ რა̈̄ტჲა̄ნ ჰა̈ნდრაშა ლჷმა̈რდ
Line of edition: 20    ქორს მერდად. ამნე̄მ ა̈ნსკორ' ე̄სნა̈რ: "მახვშის ესერ ჩა̈̄ჟ ჩუ ხორი. მინეშმჷყი
Line of edition: 21    მახეღვა̈ჟ ესერ სგა ხეხვტენი მა̈გ ლაჭმუშ ლემ ლაბე̄ლას, მახვშ' ე̄სერ ჩა̈̄ჟს დე̄მის
Line of edition: 22    ხა̈დჲა̈̄ნი, მარე ქა̄ვ ესერ ა̈დქვით ჰჷლიშ ლადა̈ღ. ჩა̄ჟშუ ადჭომნე ლვემ ი ეჩქას
Line of edition: 23    ესერ მინეშმჷყი მახეღვაჟა̈რ დე̄მის ა̈ნწახვიხ".

Line of edition: 24       ანჴა̈დ ესნა̈რ ი აშხვ ჰჷლიშ ლადა̈ღ მახვში ქორს მა̄მ ლჷმა̈რდ, ეჩქას ჰამს
Line of edition: 25    ჟ'ა̈ნირმ ვა̈რგი ჩა̈̄ჟ, ჟი ლახსგურდა ი ნა̈ბზვა ონაქა, ლეჟ' ა̄ნჴა̈დ მესტიათე, ლემ
Line of edition: 26    ჟ'ესლა̈ჯ ესნა̈რ ჩა̄ჟვჟი ი ამჟი̄ნ ადბე̄ლე. მე̄რმა ლადა̈ღ ესნა̈რ ლექვ' ა̄დჲე ჩა̈̄ჟ მიჩა
Line of edition: 27    ფუსდა̈ სოფელთე ი ქ'ა̄ფიშვდ ლაჩა̈ხვთე.

Line of edition: 28       აშხუნღო ჩვა̈დკვიჰ ესნა̈რ ალა ვა̈რგდ, ქ'ა̈̄ხშჷმ რა̈̄ტჲა̄ნს ი ხა̈̄ქვ: "ჯა ჟეღი გეზალ,
Line of edition: 29    ჲა̈ს ესერ ლოხვთო̄ნა მიჩეშდ მიჩა ლალსგურა ჩა̈̄ჟი ლისგვრე?"
Line of edition: 30    ა̈ხშჷმ ესნა̈რ ფა̈მლია̈რს, ქ'ა̄თა̄ღა̄ლვნე ლერქვა̈რ რა̈̄ტჲა̄ნა̈შდ ი ტიტველ სგა
Line of edition: 31    ლახლა̈ჯ ჟი მჷკა̈ჩ კა̈ვირს.

Line of edition: 32       ეჩქას შუბვა̈რ ლუმწვე̄ნხ ქახიქა ლა̄ჩა̈დ ესნა̈რ ვა̈რგ, ახფიშვდ ალ შუბ რა̈̄ტჲა̄ნს
Line of edition: 33    ი გვამა̈რისგა ლიყერ ი დაგრა ხა̈კვდა, მარე ქ'ა̈̄თქად ესნა̈რ ი ლაღლია̈შ ჩუქვა̄ნქა.
Line of edition: 34    მა̄მ ესერ მჷრე̄ს ლახღვე̄ნა სა̈ხს დაგრას". ათხა̄დ ვა̈რგს ი რა̈̄ტჲა̄ნ ჟ'ანფუშდურე
Line of edition: 35    ი თა̈ვისუფალდ აცვირ. ეჩქას რა̈̄ტჲა̄ნ ჟ'ალხირნე̄ლი ი მა̄დ ალგენე̄ლი
Line of edition: 36    ეჯ ვა̈რგცახა̈ნ.

Line of edition: 37       ეჩქანღო ა̈მსედე̄ლი სერ წესდ ჰჷლშიე̄რ ჩა̄ჟვშ ლემი ლიბე̄ლე მესტჲას.


Line of edition: 38 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.