TITUS
Svan Chrestomathy
Part No. 151
Previous part

Text: 146 
Page of edition: 124 
Line of edition: 38 
146. ლიკვნუ̄რი ი ლიჯლჷ̄რი


Line of edition: 39       წივერს შვანა̈რ ჲეს იმჟი̄ნ არმიხ ი ჲეს იმჟი̄ნ. ხოშა̄მ ლაღა̈ლდ ჯალს ჷგემხ წივრი
Line of edition: 40    ლარმეჲდ.

Line of edition: 41       ჯალ ხაჟხა ლეღვს. ალ ლაღვს ჲედ ჟი ხორკინეხ მეგა̈მჟი̄ნ, ეჩჟი̄ნ ერე წივერს
Page of edition: 125  Line of edition: 1    ლაჰე̄წვა̄ლ გარ ხა̈̄ც ი ჟი ლაჰა მო̄მა. ჩუქვა̄ნ ყაფლა̄ნს ჷგემხ ეჩჟი̄ნ, ერე ქა მა̄მ თერა.
Line of edition: 2    წივერ ჟი იქვნი ჯალს ი ეჩის ხა̈სიპ გირკიდ. ალ ლა̈სიპჟი უმბილდ სგა ხერმი
Line of edition: 3    ყაფლა̄ნს. ყაფლა̄ნ ჩუ ლჷლა̈ჯ მა̄მ ლი. სგა ლჷრმ თხე̄რე ი̄რი ა მა̄ლ, ჰა კვენ, ქა ითრინე
Line of edition: 4    ყაფლა̄ნს ი ესღვა, შომვა̄ლე ალ ყაფლა̄ნა̈ ფუცხვა̈რ ცხეკისგა სგა ხერკიხ იმვა̄ლა
Line of edition: 5    მეგმე̄მი კურდანს. ყაფლა̄ნს ნა̄ჭა ხა̈ბ. ნა̄ჭას ჰოკერ სგა ხა̈̄ბ ფუცხვ. ალ ფუცხვს
Line of edition: 6    ჟი ლჷკირკო̄ლდე სემი ლჷქიმ ფუცხვ ხა̈ბ. ფუცხვ სგა ხერკ' , ეჩქას სერ სგა
Line of edition: 7    ნარმა̈ვ წივერს ლა̄ზ დე̄მთე ხა̄რ. წივერ ხოშა̄მ ნაღა̈ლ ლა̈̄თშვ ხერმი ყაფლა̄ნს, მე̄რმა
Line of edition: 8    ლადა̈ღ მჷჯლჷ̄რი ჟი იწვე̄ნე ჯალა̈რს ი ლახე ყაფლა̄ნ ჟი მო̄მ ხეხო̄ლი, ეჩქას
Line of edition: 9    ნა̄ზვს ხეჭმენი ი სგა ხელა̈კ წივერს. ეჩეჩუ̄ნ ეჯას ჲედ თოფშვ ი მა̄დეჲ ტყენშვ ჩვადგა̈რი
Line of edition: 10    ი ტუფს, ქა ნატფუ̄რუნღო, ა̈გითე ჴიდე, ძვერს ჯალდჷდ ჷგემ. ობა̈შინ, ლახე
Line of edition: 11    მჷჯლჷ̄რის გვიანდ ხოქიხ ი ჲო̄რი ღეთ ლადა̈ღ ქა ხერა̈̄გი ჯალა̈შ ი ყაფლა̄ნა̈ უწვე̄ნად,
Line of edition: 12    ეჩქას ხოშა̄მ ლაღა̈ლს მა̄ლვა̈რ ი ღო თხე̄რა̈̄ლ ჭიშხს სგა იჴინშდო̄რეხ, ქა
Line of edition: 13    იქვცეხ ი ეჩჟი̄ნ სამ ჭჷშხვშ ქა ი̄ტვხ. ყაფლა̄ნა̈ ფუსდვს ნა̈ქვიც ჭიშხ ი ყაფლა̄ნ გარ
Line of edition: 14    ხეხო̄ლი ეჩეჩუ̄ნ.

Line of edition: 15       კონრე ლარმეჲდ ლჷქცა ჭვეკს ხადე̄სგიხ. ალ ჭვეკჟი̄ნ თევლა̈ჲს ჷგემხ ეჩჟი̄ნ,
Line of edition: 16    ერე კვენ, ჭვეკქა ქა ღჷრ' ე̄ჩქას, თევლა̈ჲს ხერმი. თევლა̈ჲს ჟი მენკვე ზექ ხა̈ბ, ალ
Line of edition: 17    ზექ ჟი რეწვნი ი ჟი იყმე კვენს. ეჩჷნქა აჯაღ ღვებილა̈რს ასყე̄ნეხ ჲარვ, უშხვა̄რა̈
Line of edition: 18    ნა̈ბიჴვს, ალჲა̈რს ჩუ ლუჴვი̄რ ხა̄რხ, აშხვ კა̈ცხხა̈ნ უშხვა̄რ ხალჯახ თა̈კულდშვ, მე̄რმახა̈ნ
Line of edition: 19    ჩვაკრეხ ი კა̈პი̄ლს ხოგემხ, კა̈პი̄ლმჷყ ჯალჷლდ ხოწიბ. კვენ ჟი იქვნი ჯალს,
Line of edition: 20    სგა ღჷრი ღვები̄ლთე̄'სგა ი ჯალს ლიზვებს ხობნე, ეჩქას კა̈პი̄ლ ქა ხოქფენი, ღვებილ
Line of edition: 21    უშხვა̄რ ხეტხენი, ჟიქა̄ნ ბა̈ჩ ხოთლე, ეჯა ლაკრად დე̄მ ფიშვდე ღვები̄ლს ი
Line of edition: 22    კვენ სგა ხეყმი ი ჲედ სგა ხელტჷნი ალ ღვები̄ლრე უშხვა̄რ ნე̄სგა.


Line of edition: 23 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.