TITUS
Svan Chrestomathy
Part No. 150
Previous part

Text: 145 
Page of edition: 124 
Line of edition: 15 
145. ლიცხეპ


Line of edition: 16       მეთხვჲარას მო̄შ-მო̄შ ნა̈ირდ ხა̈მთქვახ ლითხვჲარვ. ფარა̈რს ლინთვისგა ლიცხეპ
Line of edition: 17    ხა̈მთქვახ. ნა̈ბოზს მეთხვჲარა უშხვა̄რ ხა̈ბჟინეხ ი ჩუ სკიბეხ მე̄რმა ლა̈დღიშდ,
Line of edition: 18    ჰამა̈შდ, ლიცხეპს. ამის ამჟი̄ნ იჩომხ: მეცხეპ ეშდ ი მო̄დეჲ ხოფშირა მახეღვაჟა̈რ
Line of edition: 19    ღჷრიხ. სგვებნა̄ვ ჟი ლჷსა̄გე ხა̄რხ, იმვა̈̄ჲ ნა̈ბოზს ჲერსკნარე ჯვეგ არდა ი ლირჰა̈̄ლთე
Line of edition: 20    ჲერხი ჟიქა̄ნ ხეცა̈̄დიხ, ზაგა̈რთეჟი̄ნ, ეშხუ ნაღა̈ლ აშხვ ფოყხა̈ნ ხეცა̈̄დიხ ღა̈რს
Line of edition: 21    ი მე̄რმე ნაღა̈ლ -- მე̄რმა ფოყხა̈ნ, ამჟი̄ნ ნა̈თხვჲარა̈̄ლს ნე̄სგათე იკვა̄ნეხ ლეთოფდ.
Line of edition: 22    ჩუ ირჰ' ე̄ჩქას ჲერსკნა̈რ ლაწევთექა ჴედნიხ ი ხობნეხ სამ ფოყხა̈ნ ლითოფს. ალჲა̈რ
Line of edition: 23    ღალ ა, ჲერსკნა̈რ ჩი̄თე იტვხ, მარე სგვებინხა̈ნ მეთვფა ხეხო̄ლიხ ი ადგა̈რიხ.
Line of edition: 24    ამჟი̄ნ, შომვა̄ლე, ჩუ ნასა̈დვ ჲერსკნა̈რ ქა ითშიხ ლა̄ტვს ი ღჷრიხ. ლჷდგარუნღო
Line of edition: 25    მეთხვჲარა ა̈გითე ჴიდეხ, ჩვატფუ̄რეხ, ჩვაშდბუნეხ ი ლეღვა̈რს ჩუ ი̄თა̈̄ლიხ. ტუფ
Line of edition: 26    ი თხვიმ ეჩი̄შ ლ' ე̄, ჲერვა̈̄ჲ ჩვადგა̈რი ი იშგან ჩი̄ მუგუდ ი̄თა̈ლიხ. ჲარვ-სამ ლადა̈ღუნღო
Line of edition: 27    ჟი იყვბა̈̄ლხ, თხუმა̈რს, ჲესვა̈̄ჲ ალჲა̈რ ათხვი̄დხ, მინ გარ დე̄მ იჴმა̈რიხ ი სგა
Line of edition: 28    ჴიდეხ ლა̈მზჷრთე. ლიმზირს ლაჴვა̈მისგა იჩომდახ, ლადბა̈შისგა, აგიხა̈ნ ლესკრა̈რს
Line of edition: 29    ჴიდეხ. ალჲა̈რს სგა̈̄ნ ნა̈თხვჲარე̄მი ლეღვ ხეჩდახ. ქორხა̈ნ აჯაღ ეჩჷნქა ნატუ̄სუნს
Line of edition: 30    ი ლეტვრა̈̄ლს ჴიდეხ. ლეტვრა̈̄ლს ჟ'ატვრეხ, თხუმა̈რს მუჭვა̈რჟი̄ნ ხალწენიხ,
Line of edition: 31    თხუმა̈რ ქა ლჷჭა̄რვე ლიხ. ა̈გიხა̈ნ ნა̈ჴიდვ ზედა̈ში ხუღვეხ თვით შედ ნათხუმ ჰარა̈ყ.
Line of edition: 32    ალ ლესკრა̈რს, ჰარა̈ყს ი თხუმა̈რს ჟი ხა̈მზჷრიხ აფსა̈თს ი ჯგჷრა̈̄გს. ეჩქანღო
Line of edition: 33    ლეტვრა̈̄ლს ჩუ დე̄მის დიგეხ, ოდე მინოვშ დო ჴეჩნიხ. ჩუ ისგვრიხ, ჲერვა̈̄ჲ ხაკა̈ფხ,
Line of edition: 34    ეჯას ქ'ა̈̄წჰიხ ი ხოჩა̄მ ლარდას ასყე̄ნეხ, ხა̄რხ ლა̈ხი̄რულ. ისგ ტაბგობჟი̄ნ კირჲა̄ლეს
Line of edition: 35    ყჷლეხ ლაღრალშვ. ჩი̄ ღერთა̈რს ი ლაჴვმა̈რს ჟ'არშვნიხ ი ეჩქანღო კირჲა̄ლეს
Line of edition: 36    ხა̈ჭმინეხ. ეჩქანღო აჯაღჷდ ჷთრეხ ი იხირვილხ ი ნა̈ბოზს ჩუ ფხეჟნიხ.


Line of edition: 37 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.