TITUS
Svan Chrestomathy
Part No. 149
Previous part

Text: 144 
Page of edition: 123 
Line of edition: 29 
144. სა̈ვჲა̈ ლიჭმე


Line of edition: 30       შვანე ქვინლჷმგენე ხოდრა გვა̈რიშ ლი. ლუშნუ ჴანა̈რ ლუსუ ჴანრე ნა̈ხუმსარდ
Line of edition: 31    ხოხვრა ლიხ. ეჯჲარე ნამსგიდვინ ჩუხვა̈რს ხაჯეშხ. შვანა̈რ სა̈ვთე ღჷრდახ
Line of edition: 32    ლაჭმად, ეჩე ჲარვ დოშდულ მახა ა̈ჭმახ. ლიჭმეს, ანტყვსგა̈რ ხეჰვრენდახ, ეჩქას
Line of edition: 33    იბნახ ი ქ'ე̄ჩქას ხეყჩენდახ ე, შომვა̈̄ჲ ანტყვსგა̈რ ხეწდენდახ. და̈რ ი ჰა̄ვდა̈რ ნა̈ ხუმსა̈რ
Line of edition: 34    ხა̄დხ სა̈ვჲა̈რს ი ვებილადღა̈რს დე̄მის აჭმახ, ეჯღ'ე̄რე ეჯ ლადა̈ღ უსურმა̈ნი
Line of edition: 35    ლიგსვრე̄შ ლი. ეჯ ლადა̈ღ ჟაჴვრა̈ კვა̈დლა̈რ ლაქჩათე ხა̄დხ ლე̄ზი შვანა̈რს ი ეჯა̈რს
Line of edition: 36    იქჩახ გებნა̈რ ჩუქვა̄ნ ლენხენი ბალა̈სია̄ქდ. ობა̈შინ ხოლა̄მ მა̈ნკიშს ხეგნო̄ლდახ
Line of edition: 37    შვანა̈რ მჷჭმად, ლახე ჩუ მო̄მ ხოთრო̄ნდახ.

Line of edition: 38       ალ მა̄რე ძდჷდს ხოწჷრმი̄ნა ი ხოთმი̄ნა მჷჭმას ლა̈ჭმათე. მჷჭმი ლადა̈ღისგა აშხვი̄ლს
Line of edition: 39    გარ იშვმინა ლა̈დჲარა̄ლჟი̄ნ, ეჩქანღო ნა̈დჲარობენ მერჩლა̈რს იკვა̈თხდა.
Line of edition: 40    ლეზობდ ხოშა ლაღა̈ლ მეტხე მარწვენ ი ტჷტისგა ნანაყვ ფჷრი კვა̈̄შიჲა̈რ, ქჷრჯინ,
Line of edition: 41    ხუღვა̈̄ნხ. ობა̈შინ ლა̈ჲსასი ხოჲსენდახ სა̈ვჲა̈რ.
Page of edition: 124  Line of edition: 1    ლა̈ჲსას მინ ა̈ჲსენდახ, ეჯღ' ე̄რე ქრისდია̄ნი ნა̈ჲსა̈ნვს უსურმა̈ნ დე̄მ იზბი.
Line of edition: 2    ობა̈შინ შვანა̈რ ხოლა̄მ მა̈ნკიშ თამა̄თას ლეზობთე̄სგა სამტრა̈კს ხონჩჷდახ,
Line of edition: 3    ეჯა სა̈ვჲა̈რს მა̄მ ხოთრახ ი დეშ ჴედნიხ გუდ ეჩი̄ ლინჩჷდეს.
Line of edition: 4    ალ სამტრა̈კ მე̄რმა ლადა̈ღ ეჯჟი̄ნ ლიტხუნეს ქა ხაბნა̈ვნა ეჯ ხოლა̄მ მა̈ნკიშს,
Line of edition: 5    ერე ლადგარა̄ლს ხა̈ბკინა. ლეგდმერდე ჩა̄ჟვ ხესგრო̄ლდა ი ა̈გითე ღჷრდა. სამ ი
Line of edition: 6    ო̄შთხვ ლადა̈ღ ჩვაყვრა ღალ ა̈გის ი ეჩქანღო გარ ჴედენდა ლა̈ჭმათე. ამი̄შ ი ამი̄
Line of edition: 7    ნე̄სგა შვანა̈რ მინე ბჷნა̈ბჟი̄ნ გარ ა̈ჭმახ ი ხოშა ლა̈შვმინა ხოჴდენდახ. ლიჭმე̄ დვრევს
Line of edition: 8    ქ'ა̄სრულახ შვანა̈რ, ეჩქას ნარდიე̄რს ხეშგომდახ.

Line of edition: 9       ნარდიე̄რ ეშხუ სემი ლჷზა̈ჲ ი მე̄რმა ჲორი ლჷზა̈ჲ ხაბნა̈რ ხა̄დხ ლეჰვდი, ეჩჷნქა
Line of edition: 10    ეშხუ ზა̄და გიცა̈რ, ღა̈რთ, ნაბა̈დ, ი ეშხუ ში ლეჯბირ. მარე ხოლა მა̈ნკიშ მეზგე
Line of edition: 11    ჩი̄ დე̄მ ხაჰვედდა ალ ჩუ ნაბაცვს ი ამნია̈̄ნიდ ტე̄ვაჲ ყალაჩხუფა ხოჩჷ̄დენდახ. იმჟი
Line of edition: 12    დო ლა̈სვ ჩუ ირგივა̈̄ლხ სერ ი ქა იმშვგვა̄ნახ. შვანა̈რ სგვებინ ირკა̈ლდახ ნა̈ქიმვ
Line of edition: 13    ხაბნა̈რს ი გიცრა̈რს, ი ა̈გითე ჴიდახ.


Line of edition: 14 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.