TITUS
Svan Chrestomathy
Part No. 148
Previous part

Text: 143 
Page of edition: 123 
Line of edition: 4 
143. ლიკლა̈ვი


Line of edition: 5       შომვა̈̄ჲ მეზგ' ა̄კლა̈ვი, ეჩქას ზურალა̈̄რ ჰამს დო̄სგ კალვს ქ'ა̄ჯე̄ლვა̈̄ლიხ გუნ
Line of edition: 6    წყილჲანდ. მიჟ ჟი ხეწდენი, ეჩქას ქა იშდეხ კალვისგა ლეკლა̈ვი მჷღა̈ვს. მიჟ ქა
Line of edition: 7    ხა̈ტბიდე ი მჷღა̈ვ ჩუ იქჷნთრინი, ეჩქას ჴანა̈რს ხაბემხ კა̈ვირს. ალ კა̈ვირს ჩუქვა̄ნ
Line of edition: 8    სუნწუფ ბაჩა̈რ (კა̈ჭი ჩი̄რხუვა̈რ) ხოსგურხ, ეჯღ'ე̄რე ალ ბაჩა̈რ ხონგჭვა ლიხ ი
Line of edition: 9    ხოშა̄მ კვიშეხ მჷღა̈ვს. ლაკლა̈ვჟი ჴანა̈რს ზერდა̈რ ხო̄ზხ უშკვჟი̄ნ, ეჯღ'ე̄რე მჷღვი
Line of edition: 10    ლაზობ მა̄მა ხა̄რხ. ლაკლა̈ვჟი̄ნ ეშხუ ჴანა̈რს ხოჟვეღ ი მე̄რმე კა̈ვირჟი̄ნ ხა̄გ.
Line of edition: 11    კა̈ვირჟი̄ნ მეგნა შჷნისგა ლა̈ხი̄რ ხუღვე, მე̄რმახა̈ნ კვა̈დალ ლაზხა̈ლდ. ლახე
Line of edition: 12    ჴა̈ნ ჷსგე̄რ, ეჩქას კა̈ვირჟი მეგნე ლა̈̄ხი̄რს ხოხლი̄ნე, ჴა̈ნ ქა ჷსგე̄რ, ეჩქას ჰა̈ნწს ქ'ა̄ კვა̄ნე
Line of edition: 13    მე̄რმა ა̈დგილთე. ალას ეჯღა იჩვ', ე̄რე ჰა̈ნწ ნომ' ა̈̄თნა̈ჩდე̄ნს მჷღა̈ვს, ადო სგა
Line of edition: 14    ლახ ხენჩჷდი, ეჩქას ლეკლა̈ვი ლიხუ̄პა̈̄ლის იბნე ი მეტ ჭირ ხეფსი.
Line of edition: 15    ამჟი̄ნ აკლა̈ვიხ. ლახე ხათერხ, ეჩქას ჴანა̈რს ქა ხოფშგეხ ი მანჩალთ' ა̈̄იხ. სგა
Line of edition: 16    ხეგნიხ ფიწლარშვ ი ორთითარშვ მჷღა̈ვს ი ჟ'აშდბენიხ, ჟიბავიშს ჩუბავ ხა̈ჩოხ.
Line of edition: 17    ამის ქ'ა̄სრულეხ, ეჩქას აშხვ დვრევდ ქა ხომჟუნეხ მჷღა̈ვს ი ეჩქანღო ჟი̄დ ხეგნიხ
Line of edition: 18    ლაკლა̈ვს. ამჟი̄ნ ო̄შთხვინ ი ოხვიშდინ აშდბენიხ კალვს. ღვეშგმეპილს ლჷშდიქშვ
Line of edition: 19    აშდბენიხ ი სერ კალვ ჩუ ლჷკლავე ლი. ქა ხოფშგეხ ჴანა̈რს. ფოყა̈რჟი̄ნ ვეჴს
Line of edition: 20    ხა̈შდეხ, ტოტა̈რს ხა̈ჭმინეხ, ერე მაფა̈შ ოთში̄დხ ი ქა ფიშვდეხ ლაჩა̈ხვთე. ეჩქანღო
Line of edition: 21    ხეგნიხ ლაქხი̄რარშვ ი აშხვ ა̈დგილთე სგ'ა̄ქხჷ̄რეხ. ზურალა̈̄რ ვეშგიმ ლანგავშვ
Line of edition: 22    ესჭიმხ ი ამჟი̄ნ ჟ'ახურჲე̄ლეხ. ბიქვ იმვა̈̄ჲხა̈ნ მო̄მ ლი, ეჩხა̈ნ ლაყვლას დე̄სგიხ ი
Line of edition: 23    ლიბა̄ბეს იბნეხ. ჩუ იბა̈̄ბი ნაკლავ, ეჩქას ითქს აჯაღჷდ ამშვნეხ ლა̈̄ხი̄რშვ, ზურალა̈̄რ
Line of edition: 24    ლამშვნაჟი̄ნ სუგვა̈რს ხა̈თშიხ ითქს ლანგვარშვ. ითქ ჩუ იმშვნ' ე̄ჩქას ჟი იცხრჷლიხ
Line of edition: 25    აშხვ ა̈დგილჟინ. ეჩქანღო ჟ'ა̈რსგვეხ, ჟი იკედხ კვიდო̄ლარშვ ი ესღვახ
Line of edition: 26    შედა̈რთე. მე̄რმა ლადა̈ღ, ლახე ხოჩა და̈რ ლი, ეჩქას ითქს ჟი იშყვდიხ ი ჟ'აფრეხ.
Line of edition: 27    მა̈̄ნკვი ლაკლა̈ვჟი̄ნ ზურალა̈̄რ ქა̈მ კასგვილას ჷგემხ ი ხოჩა̄მ მაჴა̈დხა̈ნ ჟი იდბა̈შიხ.


Line of edition: 28 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.