TITUS
Svan Chrestomathy
Part No. 147
Previous part

Text: 142 
Page of edition: 122 
Line of edition: 18 
142. და̈ბა̈ ლიშდბუნე ი ლი̄ზნა̈ნი.


Line of edition: 19       მუშვა̈ნ მა̄რე ხოშა̄მ ნაღა̈ლს ლინთვისგა ხადე̄სგი დაბა̈რს ჰა̈ნწს. ოშვა̈̄ჲდ სა̈ვ-ჩა̈ვ
Line of edition: 20    ხა̄რ და̈ბს სა̈ჭირო, ეჩშელდ სა̈ვ-ჩა̈ვს აჲე̄სგი დაბთექა.

Line of edition: 21       ჰა̈ნწ ნაზავ ლი ქა ლეჲი მა̈̄ნკვი, ეჯღ' ე̄რე ლამჷნგარისგა ხვა̈ჲ ხა̈ნ ხა̄რ ი ლისკრიბიდ
Line of edition: 22    ხაყვლუ̄ნი მეზგა. ეჯა მა̄დეჲ, ობა̈შ ლჷფშირ ქვინლჷმგენე̄მიშ ი მა̈ნცინი
Line of edition: 23    ფუსდა̈ (პატრონი) ლამჷნგარს მარდარშვ ჩუ ვენდილდ გარ ფითქვეხ. ჰა̈ნწს დაბისგა
Line of edition: 24    აშხვ ა̈გის დე̄სგიხ ჰუყვდ, მა̈ზუმვა̈̄ჲ და̈ბ ლი, ეჩზუმშვ ხოშა ჰუყვ ხეფსი.
Line of edition: 25    ჲერხი ჰუყვს ნე̄სგაქაჲ ხოსყე̄ნეხ სა̈ვა̈ ლა̈ჲა̈̄სგს ი ძღჷდ ჰუყვს ჷგემხ. თებურვა̈ლისგა
Line of edition: 26    ჩვადცვეხ, ჟ'აბჷრჯეხ ი გიმს ქ'ა̈̄თნეხ, ეჩქანღო გიმს აბჷრჯეხ ი ეჯას ხა̈შდეხ
Line of edition: 27    ჟი ლჷმჯერა და̈ბს ჟიქა̄ნქა. ვერს მიჟ ჩვა̈ტბიდე ი მუს ხუნკვიდ იჰნი.
Line of edition: 28    მუს ჩუ იჰნ', ეჩქას მეზგე ჰუყვს ქა ხოფხჟჷ̄რე დაბისგა სკვერდ ჩა̈ვა̈ შელდჟი̄ნ,
Line of edition: 29    აშხვ ნალჯვემს სემეშდ სა̈ვ-ჩა̈ვ ღეთ ხაკუჩ ჰა̈ნწ ი ეჩქას ეჯა სამზავ ქა ხა̄რ და̈ბს.
Line of edition: 30    შომვა̈̄ჲ ლიჴნი̄ დვრევ ლი, ჴედნი ეჩქა, ქა ლუსკო̄რა ჰა̈ნწს ლა̄ხი̄რშვ ქ'ა̄ფხჟჷ̄რე ი
Line of edition: 31    ჟი ხა̈შდე ჟიქა̄ნქა და̈ბს, ეჩქანღო ქ'ა̄ჴნი. ლაჴა̈ნჟი̄ნ ლახე და̈ბ გუნ ლჷკიცხ ლი,
Line of edition: 32    ეჩქას ბერგარჷნქა ლაღვა̈̄ნი̄რსი ა̈ჲიხ. ალა ზექი ხოშა მეგრე ყვაბალ ლი ი კიცხა̈რს
Line of edition: 33    ლახე ჟი ხოჲხენი, შიშდ ჩვა̈ბუნყვილა̈ვი. ჩუ ნაჴანუნღო მჷლა̈̄ში ფაყვს ჩუ იკედ,
Line of edition: 34    ლალა̄შს ლერთან შჷნხა̈ნ იყდა̈̄ნი, ი მეჴა̈რს ითხპინე ლაცვამშვ ი ლერსგვან შჷნშვ
Line of edition: 35    ლილა̈̄შის იბნე, მა̈ჲ ლეჟ' ე̄სღრი ი მა̈ჲ ლექვა ამჟი ლალა̄შუშ. ნალა̄შუნღო ჟი იჭა̈̄დიხ
Line of edition: 36    ი სერ ლიჴნი ლჷზგჷრე ლი.

Line of edition: 37       აშხვ ნაგზანღო, ლიცვა̄ლდა̄ლე ონაქა ბერგა̈რს ი ლაღვა̈̄ნირა̈რს ა̈ჲიხ ი ჟიქა̄ნქა
Line of edition: 38    მა̈ჲ კიცხ ჩუ ირდი უხი̄პად, ეჯჲა̈რს ჩვაყვე̄ბა̈̄ლიხ ი ჩვაფურშგვი̄ნეხ. და̈ბ ლიცვა̄ლდეს
Line of edition: 39    იბნე, ეჩქას ზურალა̈̄რ კიცორა̈̄ლს იკედხ ი და̈ბს ქ'ა̄ჩო̄რეხ. ბა̈ჩს ი ჩხჷტს
Line of edition: 40    ჩი̄ ჟი იკედხ ი იშგნა̈̄გთე შიდეხ. ეჩქანღო ქ'ა̄ჟგჷნეხ, და̈ბს ჟი ხოკედხ მა̈ჩიჩხვს,
Line of edition: 41    ცა̈გს ი იშგან მავინ-მავინ მელუ̄რას ჩი̄.
Page of edition: 123  Line of edition: 1    ალამა̈გ ჭირ ხეფსი და̈ბა ლი̄ზნა̈ნის ლითჲე̄ლჩიქდ.

Line of edition: 2       ლითჲე̄ლ წეს იმვა̈̄ჲჟი ლი, ჩუ გვიხალ.


Line of edition: 3 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.