TITUS
Svan Chrestomathy
Part No. 146
Previous part

Text: 141 
Page of edition: 116 
Line of edition: 30 
141. ლიჴნი, ლილა̈̄ში, ლითჲე̄ლ, ლიკლა̈ვჲე̄ლ, ლიშყვდი, ლიფრე,


Line of edition: 31       ლილგუჰე̄რი, ლიფექ, გვიზ, ლირბიე̄ლ ი იშგენ გოშა̈რ
Line of edition: 32    მეზგე მუჟღვერ ლუვო̄ბა და̈ბს ჩვაქვთუნე, მადე̄ი, ლუფხვს, ი ეჩქანღო ჩვაჰუნწვი
Line of edition: 33    მა̈ზუმვა̈̄ჲ ჰა̈ნწ ხორი, ეჩნუვშ. ლინთვისგა ჰა̈ნწს ქ'ა̈̄ი დაბართე ი ჟი ხაგემ ჰუყვდ,
Line of edition: 34    ერე ზუნე ქა ნომ ახჷნწჷრე̄ნს ჰა̈ნწს. ალას ეჯღა იჩომ, ერე ნეცინდ ლჷფ
Line of edition: 35    ხჟჷ̄რა ჰა̈ნწს ზუნე ქა ხო̄ზი ი აშხვ აგიჩუ გარ ღჷრი ი ჩჲავ დეშ ხესგვრი გიმს.
Line of edition: 36    მა̈̄ჭვია̄ქ დაბა̈რს მუჟღვერ სკვე̄რდ ხადე̄სგიხ ჰა̈ნწს, შომვა̈̄ჲ ლადა̈ღ ლიჴნის
Line of edition: 37    ხამურჯვიხ, ეჩქას ა̈ჰჷწი, სკო̄რა̈რს ქა ხოფხჟეხ ი ეჩქანღო და̈ბს ჩვაჴნიხ. ლიჴნის
Line of edition: 38    ჩუქვა̄ნჟი̄ნ იბნეხ. ხათერხ მჷჴნ', ე̄ჩქა ჴანა̈რს ჟი ხაშვმინნეხ ი მინი ჟი იშვმინეხ.
Line of edition: 39    ეჩქანღო აჯაღჷდ იბნეხ ლიჴნის ი ამჟი̄ნ ქ'ა̈̄ზჷრეხ ლიჴნის. ეჩქანღო მჷლა̈̄ში ფაყვს
Line of edition: 40    ჩუ იკედ, ლა̈̄შის ლალა̄შთე̄'სგა დე̄სგი ი მა̈̄ნკვი ყჷლე: "ღე̄რბეთ, ბა̈რქია̈ნ ჩვემნ ამზავი
Line of edition: 41    ნიშგვეჲ ნაჴანვ-ნალა̄შვ" ი ვიშკვს ლეჟავ იჩო ი ამჟი̄ნ იბნე ლილა̈̄შის. ლეჟა̈̄
Line of edition: 42    პილდ ლეჟა ღჷრი, ეჩქას ჟი ხოჭვე̄ნი ი ლექვა̈̄ პილდ ალა̈̄ში. ამჟი̄ნ და̈ბს ჟი ილა̈̄ში
Line of edition: 43    ი ლალა̈̄შს ჩუ ჲჷგემ.
Page of edition: 117  Line of edition: 1    ეჩქანღო ჴანა̈რს ლაჭა̈̄დი̄რს ხობემხ, ეშხუ ხოჟვეღ ი მერმე ჟი ხასგურ. ამჟი̄ნ
Line of edition: 2    ჟი იჭა̈̄დიხ და̈ბს ი ნა̈ბოზს ა̈გითე ღჷრიხ. სერ მა̈̄ჲ მუჟღვრეში ლეჴნიდ ხაკა̈ფხ, ეჯას
Line of edition: 3    ქ'ა̄ჴნიხ. მა̈̄ჭვა ლიჴნი გვიანდ გარ ხა̈მთქვახ, ხოშა̈̄მ ლაღა̈ლს ბარბლა̈შჲე̄რ, ეჯღ'
Line of edition: 4    ე̄რე ეჩქა̈̄ში ნაჴანვ მა̈̄ჭვა̈რს ხოჩა ხეფსიხ. ხვა̈̄ინ ლ' ე̄რე მა̈̄ჭვს მუს მეჴდანღო̄ჲ აჴნიხ.
Line of edition: 5    მუსს ჩიქე ქ'ა̄ლღა̈ხიხ ი ეჩქანღო ჩვაჴნიხ და̈ბს, ამჟი ლიჴნის ხოშა ჭირ ი გარჯ
Line of edition: 6    ხაკუჩ, მარე მაჴად ხოჩა ხა̈მთქვა ამ ჩიქქა̈̄ ნაჴანვს.

Line of edition: 7       ლინთვისგა ზავლადღი ნაზორ ჰა̈ნწს ჩი̄ დაბა̈რთ' ა̈̄იხ ი ჰუყვა̈რდ ხაჰყვეხ. ლინთვისგა̈̄
Line of edition: 8    ნაზორს ლუფხვს ა̈იხ დაბა̈რთექა ი დაბა̈რს ლახე მუს მასა̈რდ ხა̈̄ზ, ეჩქასი
Line of edition: 9    ჰუყვდ ხადე̄სგიხ. ამჟი̄ნ ლიჰუნწვი ქა იზგჷრი. თებურვა̈ლისგა, ლახე ხოშა მუსობ
Line of edition: 10    ლი, ეჩქას დაბა̈რს, ხუ̄ნკვი̄ ლეჴნიდ მა̈̄ჲ ხაკა̈ფ მეზგა, ამჟ ა: ედ ლეკვცენ ლი, მა̄დეი
Line of edition: 11    ლერეგვ, ეჯას ვერს ხა̈შდეხ მეჯა̈რქა. ამის ხაჟხა ლიდცვე. ამის ეჯღა იჩოხ,
Line of edition: 12    ერე ვერ მუსს ხუ̄ნკვიდ ა̈ჰნე ი ლეჴნიდი ხუ̄ნკვიდ ისყი და̈ბ. ლეჭმინს, ლესმინდს,
Line of edition: 13    ლეფტვიშს ი იშგან მამა ხაკუ ლიდცვე, ეჯღ' ე̄რე კვეცნარეშ ი როგვარე ლიჴნა̄ლა̄ლვ
Line of edition: 14    მუს ჩუ იჰნი ი სერ ამღა დე̄მის ჲა̈რ ადცვ', ა̄დო ეჩქას დაბა̈რ ჩუ იბგიხ ი ხოლა
Line of edition: 15    ლეჴნი ლიხ. ლუფხვს ნადაცვ დაბა̈რ ჩუ იჩვფიხ ი იფკვიხ, ეჩქას იბნი ლიჴნი.
Line of edition: 16    ლელჴნია̄ლდ მეზგე ჟ'ამა̄რე ლაჴნია̈ ბა̈რგს: ღა̈ნწვიშს, ამის ხა̄რ ღა̈წვში ბერ
Line of edition: 17    ი ძვიჰე. ძვიჰე ჟი მენკვე ლი ნესგაქა, ღვეშგიმხა̈ნ ქუთუ̄ლ ხა̄რ მაშრიდ ი ზჷმშ დჷთხალდ
Line of edition: 18    ლჷტა̄ბე. ამის ჩუ ხოსვემხ თხუმთეჩუ მეფტა ბერჩუ̄ნ, ქუთუ̄ლს ღვეშგიმხა̈ნ
Line of edition: 19    ხატყვბეხ ლაგვდირს. ეჯა ჩვექი (\\ ქუთუ̄ლა) ნაკლა̈თხი ლი ი ლაგვდირ სგა ხა̄რ.
Line of edition: 20    ამის ი ქუთუ̄ლს ბერ ჩუქვა̄ნქა ჭვინთს ხოსვემხ ი ჟიქა̄ნჩუ ჩვათლჷრეხ ეჩჟ'
Line of edition: 21    ე̄რე ლაქვთუნა̄ლ მოდ ხა̈̄ც. ლაგვდირს ყა̈̄რი ლახკჷნ ხორიკ ნეცინ თა̈კვშ. ალ' ე̄ჯღ'
Line of edition: 22    ე̄რე ბერ ლახე ვერს იცვმენი, ეჩქას ამნოვშ ქ'ა̄ხკჷნეხ და̈ბა ჟა̄ბეშ ი ჩვა̄ბე პილსძვიჰე
Line of edition: 23    თხუმხა̈ნ ხოშა სკჷრე ლი ი თხუმხა̈ნ (სგვებინხა̈ნ) ჩუ მეფტე ხა̄რ წემში ლა̈თხ
Line of edition: 24    პინად. წემა̈შ ჲერს თა̈კვა̈შ ხუღვე ი ჲერს გვერე̄მიშ ჟი ლჷშდრა̈ნ. უღვა ხოშა ჯო̄დი
Line of edition: 25    ლი. ალ'ე̄ჯღა ლ', ე̄რე ჴანა̈რს ხოხვრა გარჯ ხა̄რხ ეჩნოვშ ლიჴნი. უღვას ნე̄სგაქა
Line of edition: 26    წემში ლაბა̈მ ხა̄რ ი ეჩხა̈ნ-ამხა̈ნ ლასვმანა̈რ ხოსვხ. ლასვმანა̈რს თხუპვა̈რ ხა̈ბხ.
Line of edition: 27    ბერს სგვებინხა̈ნ ქა ლჷსკრე ხა̄რ ი ეჩე̄'სგა მჷკრას ხოსვემხ. მჷკრა ჰა̈ლ ხოშა ლი,
Line of edition: 28    ეჩზუმშვ ხოშა ბა̈რქიჲა̈ნ ნაჴანვ ხა̄რ. ბერს ნე̄სგაჟი ჟი მეკდე ხა̄რ გვიგვ ი პილა̈რქ
Line of edition: 29    ხოდთხელა ლი. ალას ეჯღა იჩოხ, ერე მჷკრა̈̄ ნა̄ზვქა ხოშა̄მ ი ხოჰშა̄მდ აჴნი გიმს.
Line of edition: 30    ჟ'ამა̄რეხ ლეთხვმა̈რს. ლეთხვმა̈რ ჲედ გვერე̄მიშ ლი ჩუ ლუჰიჭვ, მა̄დე̄ჲ თაკვა̈შ.
Line of edition: 31    ეჩხა̈ნ-ამხა̈ნ მუჭვარე ლა̈რკინა ხა̄რ.

Line of edition: 32       ბერგა̈რს ხოშა ლაღა̈ლ სგა̄ნქა ჴიდახ, მარე ლახე ჩუ ჴეჩნიხ, ეჩქას ამეჩუ̄ნა̈
Line of edition: 33    მჷშკდა̈რს ხაშკა̄დუნეხ, მა̄დე̄ჲ ჯვინელს ჟი ხალდა̈̄სგუნეხ. ბერგა̈რს ჭომა̈რს სგა
Line of edition: 34    ხოსგვრეხ ი ამჟი̄ნ ჟ'ამა̄რეხ ლელჴნია̄ლვდ. ესვა̈̄ ბერგ მომ ხუღვ', ე̄ჩას
Line of edition: 35    ლაღვა̈̄ნი̄რ ხუღვე. ალ ლაღვა̈̄ნი̄რ ზექხა̈ნქა ლი მე̄სყე ბერგი მაჯო̄ნდ, მარე
Line of edition: 36    ძღჷდშვ ხოშა გვა̈მი ლი, მარე კიცხა̈რს ხოშა̄მ აფთქუ̄რე. ამჟი̄ნ მეზგე ჟ'ამა̄რე
Line of edition: 37    ლელჴნია̄ლვ ბა̈რგ-ნაბა̈რგს.

Line of edition: 38       ლელფხუ̄შად ლახე ჯვინელ ლაჭა̈̄დი̄რს მამ ხაყა, ეჩქას მახა ლაჭა̈̄დი̄რს ასყე̄ნეხ.
Line of edition: 39    მა̈̄ნკვი გარვს ატა̄ბეხ. ალა ეშხუ ჴა̈ლ ღეთ ლი ნაჯვდან ი მეგრე ლი, ამის ნე̄სგაქა
Line of edition: 40    ჟი ხოკედ გვიგვს ი ღა̈რს ხა̈ჩომ. ამის სამ ადგილჩუ ი მადეი ოხვიშდ ა̈გიჩუ
Line of edition: 41    ჩუ ხოფტე სიფრითშვ. ამის ეჯღა იჩვ, ე̄რე წირხრე ლასყე̄ნა ხა̈ც სა̈ბრი ლა̈ნგჭვად.
Line of edition: 42    ეჩქანღო ცხეკთე ღჷრი. ეჩე ჟი ითხე̄ლი ლჷცა̈გ ბარყვენდი კვადლა̈რს, მა̄დეი ღამვლი
Line of edition: 43    აშხლა̈რს. ალჲა̈რს ა̈გის მუგუდ ჟ'ასყე̄ნე ი ღვებისგა სგა ხოსგვრე ლაჭა̈̄დი̄რი
Page of edition: 118  Line of edition: 1    გარვს. გარვს ჟიქანქა ფიცა̈რს ხაგფენი მა̄რემი ლა̈გნად. ალასი ეჩშელდ ხა̄რ მეფტე,
Line of edition: 2    ოშვა̈̄დ -- გარვს. ამელექვა წირხა̈რს ა̈ქვჭე ი ამნუვშ ჩვა̈ნგჭე ლაჭა̈̄დი̄რს
Line of edition: 3    ეჩჟ', ე̄რე სა̈ბრ ქა ნომ'ა̈̄ხყვეზს, პილა̈რხა̈ნ ეჩხა̈ნ-ამხა̈ნ წირხა̈რს ხაბემ ჯო̄დიდ ი
Line of edition: 4    ნე̄სგაისგა უშხვა̄რ ხაბემ, ეჩქანღო ლაჭა̈̄დი̄რს ჩვაჭშხე. სა̈ბრს ყა̄რა̈რს ხადე̄სგი ი
Line of edition: 5    ბაჩარშვ ჩვალდევი მასა̈რდ. ამჟი̄ნ ჩუ ცვირე ეზარ ხა̈ნს. ამის ეჯღა იჩვ, ე̄რე ლაჭა̈̄
Line of edition: 6    დი̄რ ი სა̈ბრ მუგუდ ასეს ი ლაჭა̈̄დჟი̄ნ მუგუდ იჭა̈̄დდედს. ლაჭა̈̄დი̄რი გარვს ჩუქ
Line of edition: 7    ვა̄ნჟი̄ნ შდჷქა̈რსი ხოსგვრეხ.

Line of edition: 8       ამჟი̄ნ ლუფხვჲა̈ ლიჴნიე̄ლი ჴედნი. შომვა̈ჲ ლიჴნი იბნი, ეჯ ლადა̈ღ ჰამს ზურალა̈̄რ
Line of edition: 9    ლემზჷრა̈რს ანყეხ, ღვაჟა̈რ ჟი ხა̈მზჷრიხ სოლომნ ლიჴნიე̄ლეშს, ერე ხოჩა
Line of edition: 10    ლიჴნი-ლილა̄შჲე̄ლ ხა̈ყრის მინს, ნაჴანვ-ნალა̄შვ ბა̈რქჲა̈ნ ჩვემინეს ი სა̈ლხინისგა
Line of edition: 11    ლეჴმა̈რი ხა̈ყრის. ამჟი̄ნ ქა ღჷრიხ ლაჴა̈ნთე. ჴანა̈რ ლახე ჟი ლუმთქვე ლიხ უჟღვად
Line of edition: 12    ლაჴა̈ნს, ეჩქას მუჟვეღ მა̄მ ხაკუხ, ლახე მო̄დეი აშხვ ლეჟვეღ ხა̄რ, მე̄რმე
Line of edition: 13    ღა̈ნწვიშს ხოგდური ი მე̄სმე მჷბე̄რგე ხაჭიმ ღვეშგიმ, მჷბე̄რგა მჷწსხა ხაჭიმხ, წჷსხა
Line of edition: 14    ითშიხ ი ლაწსხა̈̄რთე დე̄სგიხ. ალ წჷსხა ნა̈ბოზს ხამა̈რს ხა̄მნეხ. ლიჴნის ეჩჟი̄ნ
Line of edition: 15    იჩოხ, იმვა̈̄ჲჟი მუჟღვერ. ჟი ნაჭა̄ნდუნღო ნე̄სგა დაბისგა ჩი̄რხუს დე̄სგიხ ეჯღ'
Line of edition: 16    ე̄რე თე̄ჲ ჰა̈ყბ'ე̄სერ ა̈თქა̄ბვნი და̈ბს. ჩიდ მა̈ნკვი კვეცენს ი როგვს ალა̈̄შიხ, ეჩქანღო
Line of edition: 17    იშგან მალა̄შა̈̄ლს: მა̄ნა̈̄შს, ზჷნთხს, ჭჷმინს, ქირსს ი იშგან. ფა̈ტვა̈რჲა̄ქ დაბა̈რს
Line of edition: 18    სგვებნა̄ვ ქ'ა̄ქვთუნეხ ი ეჩქანღო გვიანდ გარ აჴნიხ. ფა̈ტვ ეჯღა̈̄ჲ ჩუ იჰი ი ლეჰა̈̄ლ
Line of edition: 19    მა̄მ ლი. ლილა̈̄შიჟი̄ნ ლალა̈̄შს კირკა̄ლდ ხორიკ. კირკა̄ლდუ ჴიცხა̈ნქა ლი მჷნა̄ყ ი
Line of edition: 20    ლემზირდ ხოხვრა ლი. ამის ეჯღა ხორკინეხ ლალა̈̄შს, ერე ლა̈̄შის ესერ ბარაქ ლა̈ჰვედი.
Line of edition: 21    ლიჴნი ქა ისრულ', ე̄ჩქას მეზგე ჰარა̈ყს ჲჷთრე ი ლემზჷრა̈რს ანყე. ამ ლე̄თს
Line of edition: 22    ლიჴნუ̄რეს ხაყლეხ. ამჟი̄ნ ქა ისრული ლიჴნი. დაბა̈რ ლიცვა̄ლდეს იბნეხ, ეჩქას ზურალა̈̄რ
Line of edition: 23    ლაჩო̄რა̈̄ლთე ღჷრიხ ი დაბა̈რს ქ'ა̄ჩო̄რა̈̄ლიხ. ლიჩო̄რა̈̄ლი ხაჟხა ამის: ზურალა̈̄რ
Line of edition: 24    ჟი იკედხ კიცო̄რა̈̄ლს ი ღჷრიხ დაბა̈რთე. დაბა̈რისგა მა̈̄ჲ ესამა ჩხჷტ ი ბა̈ჩ
Line of edition: 25    ჩვა̈რი, ჩი̄ ჟი იხურჲე̄ლეხ. კიცო̄რა̈̄ლ ჟი ხა̈ცვხ ი ჩხჷტს ი ხოხვრა̄მ ბა̈ჩს ეჩხა̄ვთე̄სგა
Line of edition: 26    სგა შიდეხ, ჟი ხემუნგვა̈მი̄ნიხ, ეჩქას ქ'ა̈̄ჲხ ჩირთთექა ი ეჩეჟი̄ნ ჩვაჰრეხ. ჩირთა̈რ
Line of edition: 27    ძღჷდა̈რ ლიხ ნაჩო̄რა̄ლხა̈ნქა ჟი ლუზუ̄გვე. ამჟი̄ნ ქა̈̄წყჷლჲა̈ნიხ დაბა̈რს ჩხჷტხა̈ნქა
Line of edition: 28    ი ნეცინ ბა̈ჩხა̈ნქა. დაბა̈რ ჟი იცვა̈̄ლდინიხ, ეჩქას ლაჟგჷნათე ღჷრიხ ი კვეცნა̈რს
Line of edition: 29    აჟგჷნეხ მა̈̄ნკვი. ალჲა̈რს მა̈ჩიჩხვს ქა ხა̈ღრეხ. ეჩქანღო როგვა̈რს აჟგჷნეხ.
Line of edition: 30    ალჲა̈რხა̈ნქა მელვს ჟი იყვფეხ წამარშვ ი ეჩჟი̄ნ ქ'ა̈̄წყჷლჲა̈ნიხ. ამჟი̄ნ აჟგჷნეხ ფა̈ტვა̈რსი̄.
Line of edition: 31    ეშხუ გვეშ ლი, როგვა̈რ ზჷმშვ ჟი იცვა̈̄ლდინიხ, ექჩას გარ იჭა̈̄დიხ. სერ
Line of edition: 32    ამჟი̄ნ ქა ისრული ლიჟგჷნე.

Line of edition: 33       ლეყურყვე მა̈̄ჲ ლი და̈ბ, ეჯას ჟი იყურყვეხ, ჲერხის ნაშხატვ ი ჲერხის
Line of edition: 34    მა̄გა̈̄რშვ.

Line of edition: 35       ლითჲე̄ლ ჴედნ', ე̄ჩქას ჟი იმა̄რეხ ნაშთქა̈რს ი ლაშე̄რა̈რს. ზურალა̄რ მა̈̄ნკვი
Line of edition: 36    ჭჷმნა̈რ ლათეჲთე ღჷრიხ, ღვაჟა̈რ ნაშთქა̈რს ქა ხოშე̄რეხ ი იბნეხ ლითის. ღვაჟა̈რ
Line of edition: 37    აჴა̈რს ასკრეხ, ჩუ ხოსვემხ ი ეჩეჟი̄ნ ჟი ხა̈ჲჴეხ ნათა̈ვს. აჴა̈რს ჟი ხაგემხ, ეჩქას
Line of edition: 38    ჟიქა̄ნჩუ̄ნ ფაყვა̈რს ხაგემხ, ეჯღ' ე̄რე უჩხა ალ ფაყვრე შდა̄რა̈რს ხაჭიმ ი მჷღა̈ვს
Line of edition: 39    სგა დე̄მ ხესგვრი. ჲერხ'ა̈̄გის ჭჷმინს ჟი̄ჲ ანჩვრიხ, მარე აშხვ ი ჲარვ სოფელჷნქა
Line of edition: 40    ჭჷმინს ჟი და̈̄რ ანჩვრი.

Line of edition: 41       ჭჷმნარე ნათა̈უნღო როგვა̈რს ითიხ ი ალჲა̈რსი ჭჷმნა̈რშა̄ლ ჟი ხაჲჴეხ.
Line of edition: 42    ეჩქანღო კვეცნა̈რე ლითის იბნეხ. კვეცნა̈რს, მა̈ჲ საკვრელ, ზურალა̈̄რ ა̈თიხ
Line of edition: 43    ღვაჟა̈რ ვეშგიმ ხაჭიმხ ი ანჩვრიხ. ლითის ი ლინჩვრის ქ'ა̄ზგჷრეხ, ეჩქას ლუნჩვრა̈რს
Page of edition: 119  Line of edition: 1    აშხვ ა̈გითე̄სგ' ა̄ხურჲე̄ლეხ მურგვალდ ი ნე̄სგაისგა ჰა̈რის ხა̈ცვრეხ. ალ ლუნჩვრა̈ხა̈ნქა
Line of edition: 2    მა̄რე ჟი იხვნი მაჭვალჲა̄ქს ი იბნე ლიგემს. ოდე მა̄რე ხეჰა̄ლ', ე̄ჩქად
Line of edition: 3    შიჲარშვ ჲჷგემ, ეჩქანღო როკვს აჲე̄სგი ი ეჩნოვშ ჲჷგემ. ამის დეშ ხოჰე̄სგ', ე̄ჩქა
Line of edition: 4    ლამჭვალა̈̄რს ა̈ჲე̄სგი ი ჟი ხონსკრე ჟიბა̄ვ მაჭვალს აშგარ, მარე შდას ქამავ ხა̈ჩო
Line of edition: 5    ლუნჩვერს, ამჟი̄ნ ლასკრუშ ქ'ა̄ზგჷრ', ე̄ჩქას ჟიქა̄ნ ფაყვს ხაგემ. ამჟი̄ნ ლჷგე მაჭვალ
Line of edition: 6    ხოჩა ლესგდი ი კჷ̄ლთხი ლი.

Line of edition: 7       ათხენღო მეზგე მჷღვი ლიჴდეს იბნე კალვთე. ლალჩა ჩი̄შა̄ლ ხო̄გ ი ეჩხა̄ვთე̄'სგა
Line of edition: 8    დე̄სგიხ.

Line of edition: 9       ამჟი ლიკლა̈ვჲე̄ლი იბნი. ნაბოზს ზურალა̈̄რ ლანგვარშვ კალვს ქ'ა̄ჯე̄ლვეხ.
Line of edition: 10    მე̄რმა ლადა̈ღ, ჰამს, ქა იშდეხ მჷღა̈ვს კალვისგა ი მიჟ ჟი იჴმა̄შ', ე̄ჩქას ლიკლა̈ვის
Line of edition: 11    იბნეხ. ლაკლავდ კა̈ვირ ხუღვეხ. კა̈ვირს ჩუქვა̄ნ მეგჭა ბაჩრე შდჷქა̈რ ხოსგურ ი
Line of edition: 12    თხუმხა̈ნ ჩვეჲნჷრა̈̄ ნაკვშუვარს ი ჲედ ბერჟა̈შს ხაშკა̈̄დიხ მჷღვი მუჭკვრად. შდჷქა̈რ
Line of edition: 13    ვეჴს ჩვამურსვი̄ნეხ. კა̈ვირს თა̈კვ ხა̈ბ კა̈ვა̈ ლა̈თხპინად. კა̈ვ ზექიშ ლი ი უღვას
Line of edition: 14    ხალჯა. ჴანა̈რს მა̈̄ნკვიქა ზერდა̈რს ხოდე̄სგიხ პილა̈რქა, ეჯღ' ე̄რე მჷღვი ლაზობ
Line of edition: 15    მო̄დ ხა̈̄ცხ. ჴანა̈რს ეშხუ სგვებინ ხოჟვეღ, ეშხუ კა̈ვირჟი̄ნ ხასგურ ი ჲედ ჟი ხა̄გ ხოშა̄მ
Line of edition: 16    ლაღა̈ლდ, აშხვ ტოტისგა კვა̈დალ ხუღვე ი მე̄რმახა̈ნ -- ლა̈ხი̄რ. ლა̈̄ხი̄რ ეჯღა
Line of edition: 17    ხუღვ', ე̄რე ჴანრე კოლ მჷღა̈ვთეჩუ̄ნ ნომ' ა̄ფუშდეს. ჴანა̈რს ლახე ხასე̄ნიხ, ეჩქას
Line of edition: 18    ჩვა̈გნეხ, ეჯღ' ე̄რე ნასა̈̄ნვ აშხვ ადგილჩუ̄ნ გარ ადჟირი მჷღა̈ვს. ამჟი̄ნ აკლავიხ,
Line of edition: 19    ოდე ლიშდბენი̄ დო ჴედნი. ეჩქას ჴანა̈რს ქა ხოფშგეხ ი ლამჷნჩა̈ლთე ფიშვდეხ.
Line of edition: 20    მჷღა̈ვს როკა̈რშვ ჟ'აშდბენიხ ი ეჩქანღო ქა ხომჟუნეხ ეზერ ხა̈ნს. ეჩქანღო ჟ'ი̄დ
Line of edition: 21    ხა̈გნეხ ჴანა̈რს ი აკლავიხ. ამჟი̄ნ სუმინ ჟ'ი̄დ ხოშდბენიხ. ღვეშგმეპილს ლჷშდიქვშ
Line of edition: 22    ხოშდბენიხ ი სერ კალვ ჩუ ლჷკლავე ლი. ჴანა̈რს ფოყა̈რქა ვეჴს ხა̈შდეხ ი ტვეტს
Line of edition: 23    ხა̈ჭმინეხ. "მაფაშს ესერ ხოშდე" ი ქა ფიშდვეხ ლაჩა̈ხვთე. კა̈ვირს ქა ხა̈ჭდეხ ჭვა̈დ თე
Line of edition: 24    ი ლჷკლავა მჷღა̈ვს აშხვ ა̈დგილთე ლაქხი̄რარშვ ჟ'აქხჷრეხ. მჷქხჷრას ზურა
Line of edition: 25    ლა̈რ ესჭიმხ ვეშგიმ ლანგვარშვ ი აჯე̄ლვეხ, ერე ითქ ჩუ ნომ' ა̄სეს კალვისგა ი ნაქხჷ̄რათე̄სგა
Line of edition: 26    ადჯე̄ლვახ.

Line of edition: 27       ჟი ნამოჭმუნღო იბნეხ ლიბა̄ბეს. ბიქვ ხედვა̈̄ჲხა̈ნ მო̄მ'ა̄ნღრი, ეჯ ფოყხა̈ნ ხოშა̄მ
Line of edition: 28    ჯო̄დი ჭერს დე̄სგიხ ითქიშ ი ვეჴი ლა̈ყვლად. ლაბა̄ბად ფიწლა̈რ ხუღვეხ. ჩუ
Line of edition: 29    იბა̈̄ბი, ეჩქას ითქი მჷნწირ გარ სედნი ი ფიწალ ეჯას დეშ იკედ, ამღა ლამშვნა̈̄ ლა̈̄
Line of edition: 30    ხი̄რს იკედხ ი ეშხვ'ე̄ჩნოვშ ამშვნე ითქვს, ზურა̄ლ ჟიბა̄ვ ნა̈კიდვ სუგვა̈რს ლანგავშ
Line of edition: 31    ქა ხა̈თში ი ამჟი̄ნ სერ ითქ ჩუ იმშვნი. ეჩქანღო ეშხუ ცხჷრილს იკედ ი ქახირქა ჩუ
Line of edition: 32    იგნი, მე̄რმე კარვოშ ითქს ხოშდე ეჩხა̄ვთე̄სგა ი ამჟი̄ნ ითქს ჟ'აცხრჷლიხ. ეჩქანღო
Line of edition: 33    შედარშვ ჩუ ჲჷგემხ სერ. ამჟი̄ნ ლა̈დი̄ ლიკლა̈ვი ქა ლჷზგჷრე ლი.
Line of edition: 34    მე̄რმა ლადა̈ღ ჟ'ი̄შყვდიხ ითქს ი ლა̈ლფრაჟი̄ნ ჩვაფრეხ, ეჩქანღო ჟ'ი̄რსგვეხ
Line of edition: 35    ი კიბდვენთე̄'სგა სგა დე̄სგიხ. ამჟი̄ნ აკლა̈ვიხ მჷღა̈ვს.

Line of edition: 36       ფა̈ტვარე ლითჲე̄ლ ჴედნ'ე̄ჩქას ფა̈ტვს ჟი ითიხ ი შიშდ ჩვამჷნთა̈ჟიხ. მანთა̈ჟს
Line of edition: 37    ტოტვშ ხოფხჟეხ კალვისგა, შდა̄რა̈რს კიბა̄ვ ხა̈ჩოხ ეჩჟი̄ნ ი იბნეხ ლიმჷნთა̈ჟის.
Line of edition: 38    კა̈ვირჟი და̈̄რ ხეგნი, ეჯღ'ე̄რე კა̈ვირ ჟ'ახუ̄პე. ხათერხ ეჩქა ტოტშვ ჟ'ა̈სპეხ ი იბნეხჷდ
Line of edition: 39    ლიმჷნთა̈ჟის. ამჟი̄ნ ჩვამჷნთა̈ჟიხ ი ლახე ჩუ̄დ სიდ ლემჷნთა̈ჟი, ეჯას ჩ'უ̄დ
Line of edition: 40    ამჷნთა̈ჟიხ, მა̄დეი ჟ'აქხჷრეხ ფა̈ტვს, ჟ'აჯე̄ლვეხ ი ლა̈̄ხი̄რშვ ჟ'ამშვნეხ. ღო ჟი იშყვდიხ
Line of edition: 41    ი ჩვაფრეხ. ფა̈ტვს შიშდ ხაკუჩ ლიმჷნთა̈ჟი ი ლიშყვდ'ა̄დო ჩუ იჲთუნი ი ეჩქას
Line of edition: 42    ჩუ იდშა̈ვი. ამჟი̄ნ ლი ლიკლა̈ვჲე̄ლ. ღვეშგმე პილს სუგვა̈რს აკლა̈ვიხ. ვეჴს ნაკლაუნღო
Line of edition: 43    ჩიგარ დარბაზთ'ა̄იხ მარა̄კარშვ ი ჭემცახა̈ნ გა̈ნხა̈ნჩუ̄ნ აშხვ ა̈დგილჟი̄ნ.
Page of edition: 120  Line of edition: 1    ჟი ხა̈შთქვეხ. ლიკლა̈ვი ქა ისრულ', ე̄ჩქას ეჯ ლე̄თ ლიკლაუ̄რეს იჩოხ; ამგვა̈რ საბრალ
Line of edition: 2    მეზგე მა̈̄ჲ ი̄რი, ეში̄ ჩუ იჩომ ლიკლაუ̄რეს, ადო ეჩურ მა̄მ ხო̄ყა, ხოლა ბა̈რ
Line of edition: 3    ქია̈ნ ესერ ხოხალ ეჯ ზავჲა̈ მაჴა̈დს.

Line of edition: 4       მეზგა ითქ მა̈გ ჟი ლუშყვედ ი ლუნჭუ̄რე ხა̄რ, ეჩქას, ლექვე̄რ ლახე ხო̄გ, სგა
Line of edition: 5    ხოდე̄სნი მჷმა̈̄ხვჲარ, მა̄დეჲ იშგნა̈ ლექვე̄რს იმგები. ნაგზაისგა̈̄ ქირა̈ჲდ ჯვინელ მან
Line of edition: 6    თიშს ხაჰვდი ი აშხვ ხოშა̄მ კარა̈ნ ფექს. კარა̈ნთე̄'სგა ხიჲა̈̄რი ფუთ სგა ღჷრი. მეზგა
Line of edition: 7    მა̈̄ჲ ესამა ლეგვეჰ ჩუ ხა̄რ, ჩი̄ ქა იგვეჰ ი კიბდონართე სგადე̄სგი, კვეცენს აშხვ
Line of edition: 8    კიბდვენთე ი ჭჷმინს -- მე̄რმათე, მანა̈̄შს მესმათე. ფა̈ტვს დე̄მის იგვეჰ, ეჯღ'ე̄რე
Line of edition: 9    ქა ლუგვეჰ ფა̈ტვს ეშხუ ნაგზი ლახე ქა ხერა̈̄გი, ეჩქანღო მაკდი გა̈მს იკედ ი ხოლა
Line of edition: 10    მჷხმი გა̈მ ხა̄რ. ხოშა̄მ ლაღა̈ლდ ფა̈ტვს ზავლა̈დღიშ იშხვნიხ, ეჯღ'ე̄რე ზავლადა̈ღ
Line of edition: 11    ლა̄შგ ლი ი ფეტვრა თა̈შცახა̈ნ ეზერ ხაბჟახ შვანა̈რს ლუკვნად ი ჭიშდვა̈რდ. ფექს
Line of edition: 12    კიბდონა̈რისგა ჩვა̈კი̄მბიხ, სგა̈̄ჩუ ღჷრ' ე̄შხუ ი ჭჷშხშვ ჩვა̈კი̄მბი ბჷგიდ. სერ ათხე
Line of edition: 13    მეზგე ქა ლულგუჰე̄რე ლი ი ლიზვებჷნქა დე̄სამა ხოწივ მუჟღვრეშჲე̄რი ლჷწსათე
Line of edition: 14    ლი̄ზინქა, ეჯღ'ე̄რე მუჟღვრეშჲე̄რ ქუნე გოშა̈რ ი ქვერწლა̈რ იჭჷრჲე̄ლიხ ი ჩი ლადა̈ღ
Line of edition: 15    ი ჩი ლე̄თ ხოჩა ტაბა̈გ ი ხოჩა ხინ ლი. ამჟ' ე̄რე მუჟღვრეშჲე̄რ ჲერხი მერხ
Line of edition: 16    ა̈ლდ მეზგა ლერბიჲე̄ლ მა̄მ ხა̄რ.

Line of edition: 17       მეზგე მა̈̄ნკვი̄ მახა ზავჲა̈ ფექს ჟი იბნ' ე̄ჩქა ლეშგნის ანყე. ამის მჷშგნის ქა
Line of edition: 18    ხოზზი. მჷშგნიდ, ხოჩა ნარდვ ი ში ჲესვა̈̄ჲ ხა̄რ, ეჯას გარ ხაყა. მჷშგნი დი̄რი მჷჴდა
Line of edition: 19    ქა ხებში დიჲა̈რს, ა̈სპუნე ლერსგვანთე ი ყჷლე: "მა̈ლდია̈ნ ლამა̈̄რჲა, ალ მეზგე̄მი
Line of edition: 20    კიბდონა̈რ უბი̄რ ი უპი̄წკა ჩვემნ, ბარაქ ლა̄ხო, სა̈ლხინისგა ლეჴმა̈რიდ ოხოსყ
Line of edition: 21    ამ ზავი მაჴა̈დ, ამსვა̄ლდს მაჩე̄ნე ნაშგა̈ნვ ჩვე̄სვა̈̄ჲს ხა̄რე̄ნს, ეჯა მე̄რმად მ'ა̈̄მმა̈რჯვ,
Line of edition: 22    მა̈დილშვ გვეში ლამა̈̄რჲა! ამჟი̄ნ დიჲა̈რს მჷშგნი შდჷქარშვ ოხვიშდ-უსგვა̄მ ა̈გიქა
Line of edition: 23    ქა ხა̈ფცხე ი ჴვენაჟთე̄'სგა იტბჷნე. ეჩქანღო დიჲა̈რს ისგდ ჩუ კვიშე, ხჷ̄ნსგა̄მ
Line of edition: 24    ჯა იყდა̈̄ნი ი ხჷ̄ნსგა̄მ ვეშგდ ხა̈ტხე. ათხენღო სერ ჩუ ხოშიდ მეზგა ფექი ლიჴმა̈რი
Line of edition: 25    იმვა̈ჲნა̈რ დო ხეკვდენი.

Line of edition: 26       ლირბჲე̄ლს ამჟი̄ნ იჩომხ. ნა̈ბზა̈ ლერბჲე̄ლს ჰამს ა̈გნეხ ზურალა̈̄რ საფვა̈რდ, ლახე
Line of edition: 27    ჭჷმინ ლი. კვეცან ჟი იშგურდენიხ ი ხოჩა̄მდ ჟი იყშდჷნეხ. მეზგა კა-კერა̈ჲ ხო̄გ
Line of edition: 28    ჩი̄. კერა̈ჲ ბერჟა̈შ ლი ი ო̄შთხვ ჭიშხ ხა̄რ, სგვებნე ჭჷშხა̈რს წვა̈დი ლატყბაჟი̄ნა̈შდ
Line of edition: 29    ქა ხოსა̈რხ მენკვე ბერჟა̈რ. ჟიქა̄ნ კა ხალფარა. კერა̈ჲს სამ ფოყხა̈ნ ლა̈მყინა̈̄ლ ხა̄გხ,
Line of edition: 30    ალჲა̈რი კა̄რა̈რ ლიხ ი ვეშგიმხა̈ნ ბაჩა̈რ ხა̄გხ ჩუ მჷგჭად, ეჯღ'ე̄რე ლა̈მყინა̈̄ლ
Line of edition: 31    ხაკუჩ, ერე მჷლტა̄ფრვიარ კაჩ ლჷ̄გა̈ნდე̄დხ, სგვებინხა̈ნისგა ლემსგა̈ ლა̄შვა ი ზექი
Line of edition: 32    ლაჩიდ. შომვა̈̄ჲ ლირბჲე̄ლ ხაკუხ, ეჩქას კათე ხო̄შვეხ. მერბჲე̄ლ ზურა̄ლ ნჷნჲა̈რჲა̄ქ
Line of edition: 33    ფექს ჯა̈რთე სგ'ა̈̄ჲსვე̄რე, მუნჩუდნა̈ლი ნაჩდუნჲა̄ქს ლა̈ნჩუდნა̈̄ლ ჯა̈რთ'ა̈̄ჲსვერე
Line of edition: 34    ი ნა̈ჩდუნვა̈რს იჩომ, ჲედ ფეტვრას, ჲედ სიმინდს ი ჲედ მჷჯბა̈̄რს. მჷჯბა̈̄რ ხაჟხა
Line of edition: 35    ეჯას: როგვს სგვებნა̄ვ ჟ'აჯა̈ბხ, ეჩქანღო ჩვაფრეხ, ღო ქა იგვეჰხ ნა̈ჩდუნჲა̄ქს.
Line of edition: 36    ეჩქანღო თა̈შ ლახე ხუღვე, სგა ხა̈ნჩჷდე ლუშგვერდ ნა̈ჩდუნჲა̄ქ ჴიცს ი ჟი იჩომ ეჩშელდ
Line of edition: 37    ნა̈ჩდუნს, ოშვა̈̄ჲდ ქორისგ'ა̄რიხ. ლახე ქუთვა̈რს ანყა̈̄ლიხ, ეჩქას თა̈შს გარ
Line of edition: 38    ა̈ჰიჭვირ ი ეჯასი ნა̈ჩდუნდ ჟი იჩომხ. ნა̈ჩდუნ მურგვა̈ლ ლი ფუ̄რთიშა̄ლ. მერბჲე̄ლ
Line of edition: 39    საფვა̈რხა̈ნჟი ჟი იკედ ჴიცს ი ნჷნჲა̈რისგა ხაგვრანა̄ლვნე. ეჩქანღო აშხვ ნა̈ტფუნჲა̄ქს
Line of edition: 40    ქა ხა̈ყვლე ჴიცს, ეჯას ჟ'ამჷრკა̈ნი, ღო ში ჯუგვმად მჷსყაჟი̄ნ ფაყვშა̄ლ ჟი ხაგემ
Line of edition: 41    ი ჩუ ხოჴვრიჩი, ეჩქანღო ნა̈ჩდუნს ხა̈ნჩჷდე, ჟ'ამურგვა̈ლი, ღო ნჷნჲა̈რისგა
Line of edition: 42    ქ'ა̈̄ტფხელე ი ეჩქანღო ლჷქჷნთრინა კა̄თექა ქ'ა̄დე̄სგი. ამჟი̄ნ დი̄რა̈რს ქ'ა̄დესგი
Line of edition: 43    კა̄თექა, ხათერხ მჷჭალა, ეჩქას ჟ'ა̈სპეს დიჲა̈რს, ღო ლა̈მყინაისგა ხადე̄სგი̄ხ ი ამჟი̄ნ
Page of edition: 121  Line of edition: 1    ქ'ა̈̄ჭიხ. დი̄რა̈რ ქა იჭიხ, ეჩქას ტაბა̈გთექა დე̄სგიხ, ი ლახე ოხდრის ხუღვეხ,
Line of edition: 2    ეჩქას ლჷდგარუს ქა ხოფა̄ნეხ. სერ ჩუ ისგვრიხ, ხოშა ქორისგა̈̄შ საკარცხვილჟი̄ნ
Line of edition: 3    ისგვრი, მე̄რმა̈̄ლ ბანდრა̈რჟი̄ნ, ალჲა̈რს ზურალა̈̄რ თვითო̄ლაჟი̄ნ ჩუ ხოდე̄სგიხ ჩი̄
Line of edition: 4    დიჲა̈რს. ლახე ნა̈̄ყუ̄ნ ხუღვეხ ჲედ როგვ, ჲედ ქირს ი ჲედე იშგენ მა̄ლე, ეჯასი ფაკნარშვ
Line of edition: 5    ჩუ ხოგემხ ჩი̄ სგვებინჩუ̄ნ. ბოფშა̈რ შდა̄შვ სგურხ. ნა̈დჲარობენ ჟი იგნა̄ლხ
Line of edition: 6    ი ზურალა̈̄რ, ჩუ ლახე ჲა̈სმა ხოსდენდა ნამსა̈დვ, ეჯას ჟი ხოშხვინდახ მიჩა ფუსდს,
Line of edition: 7    ლა̈̄თშვ ლახე ლა̈სვ ხარჯობ, ჩუ იყვნა̄ლხ ი ლადაღვშ ლახე, ეჩქას მიჩა-მიჩა ლეშდა̈ბს
Line of edition: 8    ხეწვდოლდა მა̈გ.

Line of edition: 9       მეზგა გუზა̈რი ხო̄გა̈ნდა. ალ გვიზი ფექ ნა̈მზურუნჲა̄ქ ხა̄დდახ ი ლა̈̄თშვ ანყახ,
Line of edition: 10    ეჯღ'ე̄რე მე̄რმა მა̄რა მა̄დ ხოშიდდ' ე̄ჩი̄ ლიწედ, ქორა̈შსი̄ მა̄დ ხოშიდდა. ლახე
Line of edition: 11    ხომხა̈̄ ნაჭშხუნვარ მო̄მ ხოსგდინა̈̄ნ. ლა̈̄თშვ ჲერხი მეზგე ყო̄რჟი̄ნ ყა̈რვილს ა̈გნა,
Line of edition: 12    ერე სგა ნო̄ს ლოხვტუ̄ლე̄ნე ეჭკა̈ლიბს, ერე ესვა̈̄ჲ მო̄მ ხეხლო̄ლ ალ მეზგე̄მი ბა̄ზი̄
Line of edition: 13    ლიმზირ ი გვიზი დი̄რრე ლინყა̈̄ლი. გვიზხა̈ნქა ისგ ლილჩა̈̄ლ ლე̄თ ლიმკვი̄ჲ ხემთქვა̄ნხ.
Line of edition: 14    ქა ნა̈რბია̄ლუნღო ბოფშა̈რს ქა̈̄მთ' ა̈̄გნა̈ლდახ, ეჯღ' ე̄რე ლიმკვიჟი̄ნ გა̈რგლას
Line of edition: 15    ი ლი̄ცვნა̈̄ლს დეშ აჭკრჷნეხ ბოფშა̈რ. ხოშა̈̄ლ ჩუ ისგვრა̄ლხ ი უშკვ უშჷმდ
Line of edition: 16    იდჲარა̄ლხ. ხოხვრა̈ლ გვალვა̈რჟი̄ნ ისგვრო̄ლდახ ი ეჩეჟი̄ნ იზობდახ უშკვდუშჷმდვ
Line of edition: 17    დიჲა̈რს. ნა̈დჲა̈რობენ სგა იხინდახ ბოფშა̈რს ი ეჯჲა̈რი ჩუ იდჲარა̄ლდახ.
Line of edition: 18    ამჟი̄ნ ლა̈სვ ი ლი ლიჴნჲე̄ლ, ლილა̈̄ში, ლითი, ლიკლავი, ლიშყვდი ი ლილგვეჰ
Line of edition: 19    შვა̈ნისგა.

Line of edition: 20       ათხე ლე̄მბვა̈̄ლ ლი ეჯ ლა̈ნშანა̈რდ' ე̄, ხედვა̈̄ჲ ლაჴანჟი ი იშგან გვაშვჟი̄ნ ლიხ
Line of edition: 21    ჩუ ლჷნშა̈ნ.

Line of edition: 22       ჩი̄დ მა̈̄ნკვი ლიჴნჲე̄ლ ჩიქდ მეზგე მჷკრას ხოგემ ი ლა̈შის აქვთუნე. მჷკრა̈̄ ლაგა̈მდ
Line of edition: 23    დოშდულს ათშიხ. ეჯ ლე̄თ ე, შომვა̈ჲ ხოჩა დოშდულ ხაბჟახ, ჲო̄რი მა̄რე
Line of edition: 24    ქ'ა̈̄ი ქა̈̄მთე ღა̈ნწვიშს, მუსს ქ'ა̈̄ფხრიჭვიხ, ეჩქას ეშხუ ქა ხობიდ ღა̈ნწვიშს, მე̄რმე
Line of edition: 25    სგა ხოგემ ი ამჟი̄ნ მა̄დხვა̈ჲს ჟ'ა̄ჴნიხ ვერს, ეჩქანღო ლა̈̄შის ხა̈შდეხ მა̄დხვა̈ჲს ი სერ
Line of edition: 26    ღა̈ნწვიში ქა ლჷგელი ი ლა̈̄შიი ქა ლუქვთუნე ლი. ამის იჩო̄მხ ლელფხუ̄შათე. აჯაღჷდ
Line of edition: 27    ლილა̄შუ̄ნე ლე̄თ ცხვადთე̄სგა ჩი ნუკვი ლა̈̄შის შიდეხ ი ჟ'აჯა̈ბხ, ეჩქანღო ჟი
Line of edition: 28    ხა̈მზჷრიხ ლამა̈̄რიას ი ხეჴჷ̄რა̈̄ლხ, ერე მინე ლა̈̄ში-მალა̄შას ხოჩა ბედ ი ბარაქ ლახ
Line of edition: 29    ო̄მას. ალ ლილა̄შუ̄ნეს იჩოხ, ლილჩა̈̄ლ სგა ლჷგნე ლ'ე̄ჩქას. ალ მო̄შ-მო̄შ მჷჯა̈ბ ლა̈̄შის
Line of edition: 30    ხაყლეხ ჩართულა̈ჲს. შომვა̈ჲ ლიჴნის ჟი იბნე მეზგ'ე̄ჩქას სგვებნე ლე̄თ ზურა
Line of edition: 31    ლა̈̄რ ლემზჷრა̈რს ანყეხ ი ჟი ხა̈მზჷრიხ, ერე "ხოჩა ლიჴნი-ლილა̈̄შჲე̄ლ ესცვადის ღერ
Line of edition: 32    თემ მინე ქორს ი მინე ქორს მერდა მა̄რა ი ნაჴნავ-ნალა̄შვ ბა̈რქჲა̈ნ ი სა̈ლხინისგა
Line of edition: 33    ლეჴმა̈რ ხა̈ყრის. ეჯ ლე̄თ უშხვა̄რე ლიხრინე მა̄დ შიდ, ადვ'ე̄ჩქას ესერ გვიმი მა̈ზგუვა̈̄
Line of edition: 34    ლიჴნჲე̄ლ ხოხალ. ლაჴა̈ნს მეზგე მა̈̄ნკვი ლექვა̈̄ნისგა ხეგნი, ეჯღ'ე̄რე "მიჟ ლეჟა̈̄ნისგა
Line of edition: 35    ხეწდენი. მიჟს ესერ მიჩა ლა̈მზჷრ ხა̄გ თხუმჟი̄ნ ი ეჩი ლა̈მზჷრ ესერ მაშედ
Line of edition: 36    ხე̄რახ". ხა̈ლხს ხოხალ, ერე მჷჴნა̈̄ ლინწირ ესერ ხოჩა ლი. მა̄რე ლახე ესღრი
Line of edition: 37    შუკვს ი მა̈̄ნკვი̄შჟი̄ნ ხეწდენი, ეჩქას ლახე მჷჴნას ლეჟა̄ვ ხა̄რხ ვიშკვ, ეჩქას მჷჴნა
Line of edition: 38    ლიხ ლჷნწირ, ლახე ღვეშგმა̄ვ, ეჩქას მა̄რე ლი ლჷნწირ. ამჷნქა ლაჴა̈ნისგა ლახე
Line of edition: 39    მჷთნა̈ფო̄ლა̈რ მასა̈რდ ა̈რიხ, ეჯა ხოჩა̄მ ზაობა̈ ლა̈ნშა̈ნ ლი. მჷთნა̈ფო̄ლ ყვითე̄ლ
Line of edition: 40    ლი, ჯო̄დი ჰაკვა̈დ ხა̄რ, ეშ ხოქულქუნე. ჩუ კვეტო̄ლ ლი ი ნაყვთილანქა ღო მჷჴ
Line of edition: 41    ლი̄ნდს ხაჯეშ.

Line of edition: 42       მეზგე კალვს ქა იშდ'ე̄ჩქას ეშხუ მა̄რე ასტამს ი ჲედ მერჩილს აშხვ ტოტისგ'
Line of edition: 43    ა̈̄ი ი მე̄რმა ტოტშვ ბერჟა̈ ნა̈ქვიცს ხატყცი ი ა̈მნოშვ ხორსკჷნე. ამის ეჯღა იჩოხ,
Line of edition: 44    ერე მჷღა̈ვ ესერ ჩუ იფრი ი ლიკლა̈ვი ხოხვრა გარ ა̈ხკვედნი. ლაბაბაჟი̄ნ დე̄მგვაშ
Page of edition: 122  Line of edition: 1    ხა̈ნჩჷდეხ ლჷკლავა მჷღა̈ვს, მარე ლიმშვნეს იბნეხ, ეჩქას ჲედ ნა̈ლი ნა̈ქვიცს ხონხენიხ
Line of edition: 2    ითქს ი ჲედ ბერჟა̈ იშგან ნა̈ქვიცს. ამის ეჯღა იჩოხ, ერე ბერაჟშა̄ლ ესერ ბჷგი
Line of edition: 3    ი̄რა ითქ. ლაშყვედჟი̄ნ ლიც ლახე ჟიბა̄ვ იკო̄დე ხოდრა̄მ ითქს, ეჯას მა̈̄ნკვი ფიშვდეხ
Line of edition: 4    ქა ღვებხა̈ნქა ი შდა̄შვ ჲჷგემხ. ამის ხაჟხა ყიჯბა̈რ. ყიჯბა̈რს ჩუ ლჷფრანღო,
Line of edition: 5    ქა იგვეჰხ ჲედ ლეჰრა̈ყი ლევრა̈̄შითე̄'სგა ხა̈ნჩჷდეხ ი მა̄დეი ლამნას ხოთჷ̄თხეხ ი
Line of edition: 6    ეჩას ხა̄მნეხ. ფა̈ტვა̈ ლაშყვედჟი̄ნ ხოდრა ითქ მა̈̄ჲ ხეჩდა, ეჯას ჟიბა̄ვ იკო̄დე ლიც,
Line of edition: 7    ამისი შდა̄შვ იხნიხ ღვებხა̈ნქა ი შდა̄შვ აფრეხ. ამის ხაჟხა გოწვა̈̄რ, მარე ამ გოწვა̈̄რს
Line of edition: 8    ლეზობდ იჴმა̈რიხ: იცხრას ხა̈ნჩჷდეხ ი ეჩჟი̄ნ ქა იგვეჰხ. ამის დი̄რი ნა̈ჩდუნდ
Line of edition: 9    იჴმა̈რიხ ი ეზერ გა̈მა̈შ ლი, ლახე თა̈შ ხეჩდა მა̄დხვა̈ჲ. სუგვა̈რ ხაჟხა ეჯას ე, ლახე
Line of edition: 10    ლაკლა̈ვჟი̄ნ შდა̄რა̈რს ქა იყვჩუ̄რეხ ერხი კელა̈რ. ეჯა ლამშვენჟი̄ნ ჟიბა̄ვ ჴედნი ი
Line of edition: 11    ამის ლანგავშ ქა ხა̈ყვლეხ ი აშხვ აგის დე̄სგიხ ლალჩა̈̄ მუხვირისგა, ლიკლა̈ვი̄ ქა
Line of edition: 12    ნაზგჷრჷნღო ალ ნაყვაბ სუგვა̈რს ჩი აშხუდ აკლა̈ვიხ ი ეჩქას ქა ნაყვჩუ̄რ შდა̄რრე
Line of edition: 13    ითქ ჩუ მა̄მ იცვდი. ამისი შდა̄შვ იშყვდიხ, აფრეხ ი ქა იგვეჰხ, ეჯღ'ე̄რე სუგვა̈რს
Line of edition: 14    მა̈გ ნუკვი შდა ხეჩდა: კვეცნა̈შ, ჭჷმნა̈შ, მანა̈̄შიშ, ქირსა̈შ, როგვა̈შ ი იშგან ნამშიშ.
Line of edition: 15    ამის, მა̈ჲ საკვრელ ლი, ფექი მა̄მ ხერი აშხვ ნუკვი ნამშა̈ჲშა̄ლ ი ხოდრა ფერიშ
Line of edition: 16    ი გა̈მაშ ხეფსი.


Line of edition: 17 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.