TITUS
Svan Chrestomathy
Part No. 145
Previous part

Text: 140 
Page of edition: 115 
Line of edition: 38 
140. ლექვე̄რ ი მიჩა სა̈ხმახა̈რ


Line of edition: 39       მეზგა ლახე ლექვე̄რ მო̄მ ხო̄გან, იშგნა̈ ლექვე̄რქა ხა̄დ ლეგვეჰ, ეჩქას ნა̈ლგვჰი̄რ
Line of edition: 40    ი ნაკრავ ხა̄დ ლეჴდე. ალ' ე̄რ მო̄მ ხა̈კვდე̄ნს, ეჯღა ლექვე̄რს ჷგა̈მდა მეზგე,
Line of edition: 41    ლახე ლექვე̄რი ლაგა̈მ ჩუ ხა̄დ. ლექვე̄რი ლაგა̈მ ჩი̄ მა̄მ ხა̄რ, ეჯღ' ე̄რე ლა̈ლგუჰერ
Page of edition: 116  Line of edition: 1    ლიცს პილა̈რქა ეჯამა̈გ ნაკჷლდა̈რ მა̄მ ხა̄რ, ერე ხვა̈ჲ ლექვე̄რი ლაგა̈მ ლესვ. მეზგე
Line of edition: 2    ჲედ ფიტკრი ლექვე̄რს ჷგემ ი ჲედ -- ზექრა̈̄შს. ჩიდ მა̈̄ნკვი ლალჰენდას ასყე̄ნე.
Line of edition: 3    ლექვე̄რი ლაგა̈მ იმვა̈̄ჲ ლი, ეჩხა̄ვთე̄'სგა ხო̄ზნე მო̄ლა ი ეჩეჩუ̄ნ ზექი ჯიხვირს
Line of edition: 4    ჷგემ, მა̈ზუმვა̈̄ჲ წჷხი ლი, ეჩზუმ კჷლთხის. ეჩას ჟიბავ ლჷლჰენდი ლაკვა̄ნათეჟი
Line of edition: 5    აშხვ პილხა̈ნ მეგმა̈რს, აშხლა̈რს ი ეჩქანღო ბაჩა̈რს ხოქმე, ერე ლჷლჰა̈ნდ პილა̈რქა
Line of edition: 6    ქა ნომ თხერენდე̄დს.

Line of edition: 7       ამის ჟ'ასყე̄ნე, ეჩქას ლექვე̄რს ჷგემ. ჲერხი ხოშა̄მ იგემხ ი ჲერხი -- ხოხვრა̄მ
Line of edition: 8    ტა̈ნიშს. ლექვე̄რს ლაღრამჷყ, იმვა̈̄ჲ ბარბო̈ლდ სიპ, ეჩეჩუ̄ნ ლამჷნქალას ხოსყე̄ნეხ,
Line of edition: 9    ეჩქანღო ჟიქა̄ნ ბჷგიდ ფიცარშვ, კავშ ჩვალფა̈რი, ერე ქა ნო̄მჟი̄ნ იწვრი̄ნო̄ლდე̄დს,
Line of edition: 10    ეჯღ' ე̄რე ალა ლენკი̄რი ძირია̄ქ ლი. ეჩქანღო ლექვე̄რს აშხვ ყო̄რს
Line of edition: 11    აშხვ ხოვხრა̄მ ლაჴვრას ხა̈ჩომ ი ეჩქანღო ჩუ ჷლშგი. სერ ლექვე̄რ ლჷგე ლი.
Line of edition: 12    სგა̈̄ნჩუ̄ნ ლენკი̄რს ასყე̄ნეხ. ლენკი̄რ ჩუხი̄ნ ლი ი ალა ნაგოჰ ფექი შედ ლი.
Line of edition: 13    ი ამხა̄ვთე̄'სგა შჷ̄დნი ნაგოჰ ფექ. ლენკი̄რს გა̈ნხა̈ნჩუ̄ნ ში̄რა̄ლე ლადა̈̄სგ ლი.
Line of edition: 14    ში̄რა̄ლე ლისყი ჩი̄ მა̄მ ხოხალ, დეჲ ჩიჲა̈̄გ ა̈რი ში̄რა̈̄ლია̄ქ ბა̈ჩ. ხოშა ლაღა̈ლ
Line of edition: 15    ამკა̈ლი ბაჩა̈რ უშგულს არიხ ი ეჩხა̈ნ ჴიდა მა̈გ ათხად მჷსყა ში̄რა̈̄ლს. ში̄რა̈̄ლს ჲე
Line of edition: 16    ლა̄რუ ი ლატლარ იჩომდახ ჯვინალდ.

Line of edition: 17       ჩუბე ში̄რაჲ ჩუ მეფტე ლი ი ეჯას ჩუქვა̄ნჟი ბერჟა̈ ლაკა̈ჩ ხოსვა მეგჭად. ლაკა̈ჩ
Line of edition: 18    ბარბელდს ხაჯჷნგავა მეგჭად, ბარბელდს ჩუქვა̄ნჟი̄ნ გელჯ ხოსგურ ბერჟა̈შ.
Line of edition: 19    გელჯ ცჷგჟი ლჷგ ი ლა̈სიპ ხა̄რ, ცჷგ ჯო̄დი ლჷტა̄ბა ზექჟი̄ნ ხალჯა. ალ ზექს აშხვა̈ნ
Line of edition: 20    ჯო̄დი ზექ ხა̈ნგჭვა ი ჟი მეტხელი ში̄რა̈̄ლმჷყვ. ლაკა̈ჩს ჟიქა̄ნ ბერჟა̈ ლატა̈ფ ხოსგურ.
Line of edition: 21    ჟიბე ში̄რას ჴარჴჷნქა ჩუქვა̄ნჟი ლატა̈ფი ლასგვრა ხა̄რ ჟი მეკდე ი ჟიბე ში̄რა ლატა̈ფჟი̄ნ
Line of edition: 22    ხეგფი, ლახე ჟი ხა̈ტხეხ. ბარბელდთე̄'სგა ღა̈რ ხა̈ხლა, ლიცს ქა ფიშვდეხ
Line of edition: 23    ბარბელდჩუ̄ნ ი ეჩქას ლექვე̄რ ჟი ისპუნი.

Line of edition: 24       ჟიბე ში̄რას ჟიქა̄ნჩუ̄ნ ქუფ ხა̈ხლა, ქუფს ქა ხოსა̈რ ში̄რა̈̄ ჴარჴთექა ითქი ლაჴა̈დ,
Line of edition: 25    ამის გა̈ნხა̈ნ ლარყა̈ნ ხა̈ბ ი ში̄რაჟი̄ნ ზი. ლარყა̈ნ ითქი ლაჴდა̈̄რს ქ'ა̄ქთუნე ლაგოჰჟი̄ნ
Line of edition: 26    ი ეჩქას ითქ ჩუ შჷ̄დნი ში̄რა̈̄ ჴარჴჩუ̄ნ.

Line of edition: 27       ში̄რას ეჩხა̈ნ-ამხა̈ნ ზექი კამრა̈ჲა̈რ ხაცხიპხ, ერე ფექ ეჩხა̄ვ-ამხა̄ვ ნო შჷდენდე̄დს
Line of edition: 28    ლაგოჰჟი̄ნ.


Line of edition: 29 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.