TITUS
Svan Chrestomathy
Part No. 144
Previous part

Text: 139 
Page of edition: 114 
Line of edition: 27 
139. ქორისგა̈̄შ ი ქორა̈ ასმა̄ლე ჟახა̈̄ლ


Line of edition: 28       ლუშნუ ქორს ობა̈შ ასმა ხაჭრა, სგა̈̄ნჩუ̄ნ ობა̈შ მუხვირ ი ჩუყუ̄ლ-ბუყუ̄ლა̈რ
Line of edition: 29    ხა̄რხ ი ჩი̄ მიჩა-მიჩა ჟახე ხაჟხა.

Line of edition: 30       ქორს ხა̄რ: ო̄შთხვ ჭვა̈დ ჩუ მეყვლე ლი ჲარვდ -- მა̈ჟი̄ბდ ი მა̈ჩვი̄ბდ. მა̈ჩვი̄ბს
Line of edition: 31    ხა̄რ: ლაგა̈̄გი ჟიბეშ ი ჩუბეშ, ყო̄რ, ყო̄რ სგა̈̄ნ ლაგა̈̄გი, ჲარვ ფოყხა̈ნ გვალვა̈რ(ლაჴან
Line of edition: 32    ი ლაფურ). ლაჴა̈ნისგა ჴანა̈რ ხა̈̄ბხ სა̈ნჭლა̈ლშვ ი ლაფურისგა -- ფურა̈რ. ალ
Line of edition: 33    გვალვა̈რს ლათჲა̈რ ხა̄რხ. ალ ლათჲარხა̈ნქა ქა ისგდიხ კუმა̈შ. სგვებინჩუნ ლა̈დჲარა̈რ
Line of edition: 34    ხა̄რხ. ეჩე̄'სგა ნე̄ნი ხო̄ზხ ი იდჲირა̈̄ლხ. ნე̄ნის მენენ ხოშდე ჭემს ი ვეჴს ჩუ ლუფურთი̄ნა.
Line of edition: 35    გვალვა̈რ ჩუ ლჷჭრავე ლიხ.

Line of edition: 36       ალ ლჷჭრავე ა̈დგილს ნეშკა̈̄ლ ხაჟხახ. აშხვ მუხვირს მარა̈ნ ხა̄გ. მარა̈ნუნღო
Line of edition: 37    ლაღულჲა̄ქ ტირხ ლჷგ ი ეჩე̄'სგა ღველჲა̄ქა̈რ არიხ. ეჯჲა̈რს ლა̈დჲარა̈რ მა̄მ ხა̄რხ ი
Line of edition: 38    გიმჟი̄ნ ხოდე̄სგიხ ლეზობ. ღველჲა̄ქ ჭემს გარ იზბი ი ვეჴს დე̄მა. ამის ჟიქა̄ნ ჲერხი
Line of edition: 39    ქორისგა ლაჟნაღი̄რ ი ლა̈ნღეშტი̄რ ხა̄გ ი ეჩე̄'სგა ნეღშტა̈რ ი ჟინღა̈რ ა̈რიხ. ამის
Line of edition: 40    გა̈ნხა̈ნჩუ̄ნ ლაჯრი̄რ ხა̄რ მჷსყე. ლაჯრი̄რს გა̈ნხა̈ნჩუ̄ნ გვემი ხა̄გ ჲერხი ქორისგა.
Line of edition: 41    გვემისგა კიბდონა̈რ ლჷგხ ი ეჩხა̄ვ ზურალა̈̄რ გარ ღჷრიხ ლაფა̈ქთე.
Page of edition: 115  Line of edition: 1    მე̄შთხვა ფოყხა̈ნ აჯაღ ხა̈რ მჷსყე ლაღუნვა̈̄რ, ამე̄'სგა ღუნვა̈რ ხა̈ჭბიდახ. ამის
Line of edition: 2    ჟიქა̄ნ მჷსყე ლიხ ნიკო̄რთა̈̄ლ. ეჩე̄'სგა ფაკნარეშ ი იშგენ ნეცვნი̄რი შედ-მაკვედი
Line of edition: 3    შედ ლი.

Line of edition: 4       სგა̈̄ლაგა̈̄გის ჟიქა̄ნ სანა̈ჲშა̄ლ ხა̄რ სგა მეცვრე. ამის ნიკო̄რთა ხაჟხა. ნე̄სგა ქორისგა
Line of edition: 5    შგილ ლი მჷსყე. ჲარვ ჩუბე დი̄რჟი̄ნ კა̄რა̈რ ზიხ ლეჟა-ლექვაჟი̄ნ. შგილს ჩუქვა̄ნ
Line of edition: 6    არტა̈ხ ხო̄ზ, ეჩეჟი̄ნ ყველფი ნა̄ჭა ხოწიბ. ნა̄ჭას ჩუქვა̄ნ კერა̈ჲ ლჷგ. ნა̄ჭას გა̈ნხა̈ნ
Line of edition: 7    ლამტვარა̈̄რ ხორიკ, ეჩეჟი̄ნ ლე̄თშვ მუგვა̈ლს ხადე̄სგიხ ი ეჩნოვშ ანჷრჰეხ
Line of edition: 8    ქორს. კერა̈ჲს სგვებინხა̈ნ ლა̈ლსება ხა̄რ ი გა̈ნხა̈ნ ლა̈მყინა̈̄ლ დი̄რლე ლაჭეჲდ. კერა̈ჲჟი̄ნ
Line of edition: 9    მაშრი კა ზი. ამექა ზურალა̈̄რ დიჲა̈რს ანყეხ ი ლა̈მყინა̈ლქა ქ'ა̄ჭა̈̄ლიხ. გა̈ნხა̈ნ
Line of edition: 10    ასტამ ხა̈̄ზხ მჷჭა̄ლას ჩი̄.

Line of edition: 11       ლა̈რბჲა̄ლჟი̄ნ კაჩუქვა̄ნისგა ხოშვეხ ლემასგვ ი ქა ნა̈რბჲა̄ლუნღო ქა იტხეხ.
Line of edition: 12    ამჩუ̄ნ ჩიგარ ხა̈̄შვ ლემესგ, შომვა̈̄ჲ სა̈ჭირო ლი.

Line of edition: 13       ქორისგა კა̈ვა̈რ ხოწიბხ ჲერ ლეღვრე ლა̈რკინად, ჲერ ლა̈ჲსა̈̄ ლატფუ̄რად ი
Line of edition: 14    ჲერ იშგან ბა̈რგი ლა̈რკინად. შგილა̈შ ი ნე̄შკა̈̄ ლეჟა ნე̄სგაქა ჲო̄რი ჭე̄რ ხო̄ზხ. ალჲა̈რ
Line of edition: 15    ტაბგა̈რე ლაგა̈̄ლ ლიხ ი არტბაგა̈ჲ ხაჟხა. ამის ლაღოლჲა̄ქ ჟიქა̄ნქა ობა̈შინ მა̄მ
Line of edition: 16    გვეშ ხა̄გ ი ჩუ ლჷჭრავე გარ ლი. ამის სპა̈ნ ხაჟხა. ამეჟი̄ნ ჷგემხ ზურა̄ლა̈ მჷსყა ი
Line of edition: 17    მჷჯა̈ბ (ნასყა̈ვ ი ნაჯაბვ) ნა̈̄ყუ̄ნს ჩვეჲნარშვ, გა̈ნხა̈ნ ფაკნა̈რ ხა̄გხ ი ქა̈̄ნყუ̄ნა̈̄ლიხ ნა̈̄ყუ̄ნს
Line of edition: 18    ი ჩუ ხოგემხ ქორისგა მესგვრა̄ლას.

Line of edition: 19       ხოშა ქორისგა̈̄შ საკარცხვილჟი̄ნ სგურ ი სგვებინჩუ̄ნ ფიჩქ ხო̄გ. მე̄რმე მეყულფა
Line of edition: 20    ბანდრა̈რჟი̄ნ სგურხ. ხოშა-ხოხვრე̄მი ლეთშუ̄რად ი სგვებინჩუ̄ნ ტაბგა̈რ
Line of edition: 21    ხო̄გხ. ალ ტაბგა̈რჟი̄ნ დე̄სგიხ ი ჷგემხ ლეზობ-ლეთრა. სპა̈ნჟი̄ნ, მუხვირისგა ჷგემხ
Line of edition: 22    ლალდჷ̄რს ი იშგან ბა̈რგს. ყო̄რმჷყ მუხვირისგა ლჷგხ ლალდჷ̄რ ი იშგენ ბა̈რგ.
Line of edition: 23    ყო̄რმჷყ მუხვირისგა ლჷგხ ნეღრა̈რ ი ლაწფხირვა̈რ. ჲერხი ქორხ ჰაგა̄მა̈რი ხა̄რხ
Line of edition: 24    ი ჰაგა̄მს აშხვ პილთე ლამჷნგარ ხაყვილ. ეჩე̄სგა ზავლადა̈ღ ქვინლჷმგენა̈̄ლ ა̈რიხ
Line of edition: 25    ლა̈̄თშვ ი ამე̄ სგა ჰა̈ნწს იზვრიხ შვანა̈რ. ლამჷნგარს ჟიქან გუბა̈ნდ ხა̄გ ზავლა̈დღი
Line of edition: 26    ლარდად. გუბა̈ნდისგა კერა̈ჲ გარ ლჷგ, საკარცხვილ ი ბანდრა̈რ ი ლა̄შგ-ლაყე̄ლჲა̈
Line of edition: 27    ბა̈რგ. ამე̄'სგა ზავლადა̈ღ მა̄რე̄მი ლარდა გარ ლი. გუბა̈ნდხა̈ნქა დარბა̈ზთე̄'სგა (მაჟ ი̄ბთე̄'სგა)
Line of edition: 28    ლი ლა̄ზ. ამხა̄ვ ზავლადა̈ღ შვანა̈რ ჭემს ჴიდეხ ი ვეჴს. ჭემ ი ვეჴ ლელინთვ
Line of edition: 29    ლასა̈დ ლი ქვინლჷმგენა̄ლეშ.

Line of edition: 30       დარბა̈ზს ხა̄რ ლო̈̄ბი, ნე̄ნი̄ ლა̈შდად. ხოშა ლო̈̄ბი, მა̄რე̄მი ლა̄ზ-ლაჩა̈დ ჟი̄ჲჩუ.
Line of edition: 31    ჲერხი ქორა̈რს საკვა̄მი მა̄მ ხა̄რ ჟი̄ბა̄ვ ი ამი̄ ბა̈დშვ ქორისგა კვა̈მ ი დჷგჷლ იგნი
Line of edition: 32    ი თე̄რა̈რს ხოსტვი̄ნნე ქორს მერდა̄ლას.

Line of edition: 33       სერთხი̄, ლა̈̄თშვ ნე̄შკაჟი̄ნ ჲერვა̈̄ჲ აყვრე, ეჯას კვა̈მი ბა̈დშვ მე̄რმალადა̈ღ თე̄რა̈რ
Line of edition: 34    ნალა̈ღვდ ხოჯეშ, ეჩჟი̄ნ ხა̄რ ჩუ ლჷწრანა̄ლე. ჲერხი ქორა̈რს მურყვამა̈რი
Line of edition: 35    ხა̄გხ გა̈ნხა̈ნ. მურყვამთე ლა̄ზ დარბზა̈რხა̈ნქა ლი. მურყვმა̈რ ჲერ ოხვიშდ ლაგვბანდა
Line of edition: 36    ლიხ, ჲერ ხოხვრა. თხუმ ლაგვბანდა̈̄ლს გალვანა̈რ ხა̄რხ ი გალვანა̈რს -- სანცხვრა̈რ.


Line of edition: 37 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.