TITUS
Svan Chrestomathy
Part No. 157
Previous part

Text: 152 
Page of edition: 131 
Line of edition: 6 
152. ლერქვა̈რ


Line of edition: 7       ჯვინალდ შვა̈ნისგა ქანჷნქა მა̄მგვეშ ითხო̄ლდა. ეჩი̄ სგვირს იჯიშდახ ზურალა̈̄რ.

Line of edition: 8       ეჯას ჩვაქჷრშახ წირშვ ბჷგიდ ი ზჷმშვ ჩუ ითთვა̈ნო̄ლდა. ეჩხა̈ნქა ზურალა̈̄რ
Line of edition: 9    ფატნა̈რს ი არშვლა̈რს ა̈შხბიე̄დახ ი ეჯა გარ ნა̈ქვდა ზურა̄ლს ი ღვაჟმა̄რა. მა̈ნცინდ
Line of edition: 10    დაჴჷლ ხორდა ჩი̄ ხოშა ლაღა̈ლ ი ეჩი ქურქვა̈რს ხვიშხებდად. ობა̈შ მა̄რე მაშყიდ,
Line of edition: 11    ერე მიჩა ლჷჲარობჟი̄ნ ქანა̈ ფატნიშ ი ქვირქვი ჰამა̈რჟი̄ნ გარ არდა ი ეჯჲა̈რჷნქა
Line of edition: 12    მა̄მგვეშ ხეთხო̄ლდა ლექვემდ. ღველია̄ქს ძვირდ გარ ირდვნა მა̈გ ი ჩვე̄სვა̈̄ჲ ხორდა,
Line of edition: 13    ეჯჲარე ტუფვა̈რხა̈ნქა კე̄შა̈რს იშხებდახ. ზურალა̈̄რ ლაჩაქდ ჩუ ლჷღა̈ფ სგვირს
Line of edition: 14    აშხებდახ. ბალყჩი ცილხა̈ნქა მჷრა̈̄მჟი̄ნ ასყე̄ნახ ლაღფია̈რს ი ეჩნოვშ წჷრნიდ ჩვაღფენდახ.
Line of edition: 15    ლუღფუ̄რე ლახე ლა̈სვხ, ეჩქას ჩვატყვა̈ლდახ სგვირს მეშხად ი ეჩი̄ ლერქვა̈რს
Line of edition: 16    იქვა̈მდახ. ლატყვა̈ლს მეშხა ხოლა ქვინ ხოჴა̈ნ ეჩხა̈ნქა. ბალყჩი ცილა̈რხა̈ნქა
Line of edition: 17    ი ჯერა̈ბხა̈ნქ' ა̄სყე̄ნახ ი ეჯა მეშხად აღფენდა.

Line of edition: 18       ღვაჟა̈რს ფაყვრე მჷქაფდ კვარულდა̈რ ნა̄გა̈ნხ. ეჯჲა̈რ მურგული̄და̈რ ლა̈სვხ,
Line of edition: 19    კოტო̄ლჷდა̈რ, გუჯს ვედდ გარ ალფა̈რდახ. ლა̈გჭა̈̄რდ ჰა̈შკი ქიპი სა̈ყბავირა̈რ ნაბჷდახ.
Line of edition: 20    მა̈ტყ ლაყიდთე სა̈ვთე ღურდად. მჷჟა̄ლვა̈შ, მესტია̈̄შ, ლაჰბე̄რიშ, ბეჩვი̄შ
Line of edition: 21    ი ჩუბეჴევი თანღა̈რქა ხვიზელა̄ლდ. მა̈ტყი ნაცა̈̄დდ ცხიკა̈რს, ლუბჴველა, ნა̈̄შყის
Line of edition: 22    ი ამკა̈ლიბ ცვირი̄ნბა̈რი̄ლა̈რს ხვა̈ჲა̈̄სგდად. ალჲა̈რღა სავჲა̈რ მა̈ტყს ი ნაბდა̈რს ნი
Line of edition: 23    ცა̈̄დდახ ი ეჯნოვშ ლჷქა̈ფ ონღურდად ა̈გითე. ერხი ლუბჴველაღა ი ხილა̈რღა ნაქვა̈მ
Line of edition: 24    ლერაქვი̄ ნაჰვედდახ. მა̈ტყს ზურალა̈̄რ ჟ'ა̈ლთახ, კულია̈რს იჯიშდახ ი ეჩხა̈ნქა
Line of edition: 25    ვოსრა̈რს ნიშხებდახ. კაბა̈ შორ ღალ იმ' ა̄რდ' ე̄ჩქას, ქანა̈ ფატნა̈რ ნა̈ქვდახ.


Line of edition: 26 
მჷლახ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.