TITUS
Svan Chrestomathy
Part No. 159
Previous part

Text: 154 
Page of edition: 132 
Line of edition: 31 
154. ლაღობ ი ნიჩა ლი̄ზნა̈ნი


Line of edition: 32       ლაღობ ფიშირს ხო̄გ შვა̈ნისგა, მარე აშხვ ღვებხა̈ნქა ხვა̈ჲ თვი მა̄მ ხეკი̄დი, ეჯღ'
Line of edition: 33    ე̄რე უსგვა̄მ დოშდულმახაისგა მე̄რა̈რს ლამშია მა̄მ ხა̄რხ ი თვის გარ იზბიხ ეჯჲა̈რ.
Line of edition: 34    ეჩჷნქა ღვებ მა̄მ ლი ძღჷდ ი ხვა̈ჲ ფარა̈ ლადა̈̄სგ მა̄მ ხა̄რ.

Line of edition: 35       შვანა̈რს ხოხახ, ერე ლაღობ ჯგჷრა̈̄გ ლენჩა̈̄ში ნასყა̈ვ ლი ლენჩაისგა.
Line of edition: 36    აშხვჟი̄ნ ესნა̈რ დიდა̈ბი ლეჴედ ჯგჷრა̈̄გ შუკვს ესღრი გველჲაშა̈პ ლა̈დრა̄ლთე
Line of edition: 37    ა̈თჴა̈დჷ̄ნ ცხეკთე ი ამეჩუ̄ნ შუკვ ჩვა̈თქარვა̈̄ნ ი ქა დე̄მთე მოშ ხეხო̄ლი. სიპ
Line of edition: 38    ამჟი̄ნ ლენჩაისგა, სიპ ი თხვიმს ი შუკვს ი ზჷზს დე̄მთე მოშ ისყე̄ნე. ცხეკთე̄'სგა
Line of edition: 39    ნა̈პო̄ლი დე̄მხა̄ნ ანღრ', ა̄ვე ეჯას ლა̈ხჭვედდა ი შუკვ ქა ლახთო̄ნე იმთვა̄ლე.
Line of edition: 40    ხა̄რ ამჟი̄ნ ესნა̈რ ვისჲა̈შ ი ხოლა მიჰმა̈ნ ი ძღჷდ ვიბთე̄სგა აშყა̈დ. ჩუ
Line of edition: 41    ლიმბოზედ ი ამე̄'სგა ლისედდ ლახყალვი̄ნდა ი ჩ'ოხქა̈ხ ჩა̄ჟვ. ჩა̈̄ჟ ლაჩა̈ხვს
Page of edition: 133  Line of edition: 1    ლახფიშვდ ი ჯა ხოშა̄მ კჷლთხი მეგა̈მთეჟი̄ნ აჩა̈დ ესნა̈რ, "ამხა̈ნქა ესერ ჰე̄მთე
Line of edition: 2    მოშ ესწვე̄ნი შუკვს". ისგთეჟი̄ნ მეჩდე ლი ი ამჟი̄ნ მეგა̈მხა̈ნქა ეშხუ მე̄რილდ
Line of edition: 3    ამპა̈რ ი ჯგჷრა̈̄გს ტოტჟი̄ნ ესა̄გა̈ნ. ჯგჷრა̈̄გდ ტვეტ ადქუთნე, ალა მე̄რდ ა̈დსისტკე
Line of edition: 4    ი ა̈თჴა̈ფ ესნა̈რ ტოტჟი̄ნ. ჯგჷრა̈̄გს ოხვსტვი̄ნდა ი ტვეტს ლიკვთხუნე ლოხვბინე.
Line of edition: 5    მე̄რ ქ'ა̄პა̈რ. ამის ჯგჷრა̈̄გდ გვი ლახვე̄მ ა, იმვა̈̄ჲ ფა̈ყთე მე̄რ აპა̈რ ი რა̈̄ქვ: "ჯა̄ვ ესერ
Line of edition: 6    ლჷჭა̈თ ლი, ამი̄ ნა̄ზვს მო̄დ ა̈თჭემს ა', იმვა̈̄ჲთე მე̄რ ა̈მპერე̄ლი". ათხე სერ ჩვანჴა̈დ
Line of edition: 7    მეგა̈მხა̈ნჩუნ, ჟი ლახსგურდა ჩა̈ჟს ი აჩა̈დ ეჯ ფოყხა̈ნ ე, ხედვა̈ჲხა̈ნ მე̄რ აპა̈რ. ესღრი,
Line of edition: 8    ესღრი ი წეს შუკვთე̄'სგა ლა̈ხჴა̈დჷნ. ალა მასა̈რდ ათხი̄დჷნ. ესსგი̄დრა̄ლე ი
Line of edition: 9    ალ მე̄რო̄ლ ა, ხედვა̈̄ჲ მიჩ ა̈თჴა̈ფ, ესნა̈რ შუკვე პილს მეგმა̈ აშხალჟი̄ნ ხა̄გ. ეჩქას
Line of edition: 10    ჯგჷრა̈̄გდ ჟ'ა̈ნირმ ალ მე̄რ, ბეყვი̄ლ ანსყე ი სგ'ა̄დგენე ამხა̄ვთე̄'სგა ალ მე̄რ ი ხა̈̄ქვ:
Line of edition: 11    "ჯ'ე̄სერ ღერთა̈ ნა̈მზურუ ლი ამუნღო ი ამსვა̄ლდა̈შ ი ღერთა̈ ლა̈სჷრგებდუ ხაყა".
Line of edition: 12    ეჩქანღონ გარ ალბინელი ლაღობ.

Line of edition: 13       შვა̈ნისგა ლაღობ ესვა̈̄ჲ ხო̄გ, ეჯჲა̈რ მეკვშდა კუდურს ისგდ ბიჴვეხ, ეჩას სგა̈̄ნჩუ̄ნ
Line of edition: 14    გვიგვს ჟი ხოკედხ, დჷთხელ ბეჰა̈რს გარ ცვირეხ ი ეჩხა̈ნ-ამხა̈ნ ნაქვცუ̄რქა კურივდ
Line of edition: 15    ცვირეხ სამ ღეთ ფხულე̄მი ნამშარა.

Line of edition: 16       ლახე ღვებ ქა ირშგინე, ეჩქას ნარა̈შგვს ამხა̄ვთე̄'სგა სგ'ა̄ფთხჷნეხ, სგვებნა̄ვ
Line of edition: 17    ჟიბე ბეჰს წაქვშ ი ჲედ შველშვ ჩვაბფხჷნა̈̄ლიხ. ლა̈რშგინაჟი̄ნ ასტამს ი ჲედ
Line of edition: 18    ბერჟა̈ იშგან სკჷ̄ლა̈ჲ ნა̈ქვიცს არსკჷნეხ. თვის შვა̈ნისგა ლიმჷრჲე ლადა̈ღ ი ლივჭმა̈̄ლჲერ
Line of edition: 19    გარ ხოკედხ. მუჟღვერ სგა ჲჷგა̈̄ლიხ ყვედი ი ტებდი სადგვემთე̄'სგა ი
Line of edition: 20    ეჩე̄სგა ხო̄გხ ხარა̈ბლადაღვ. ალა ლი ლუფხვს ი ეჯ ლადაღ ქა ჲჷგა̈̄ლიხ, ლახე ხოჩა
Line of edition: 21    ტარო̈ს ლი, ლახ ტებდი ლი ი სურუ მჷცხი მო̄დ ხა̄რს ღვები̄ლა̈რს.
Line of edition: 22    ხარა̈ბ ხეხო̄ლ 25 მა̈რტს ჯვინელ შელდჟი.


Line of edition: 23 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.