TITUS
Svan Chrestomathy
Part No. 160
Previous part

Text: 155 
Page of edition: 133 
Line of edition: 24 
155. სა̈ვა̈ ლიწჷრხე


Line of edition: 25       სა̈ვი (\\ სა̈ვა̈) ლისყე̄ნე ლახე ჲა̈ს ხაკუჩ, ეჩქას მა̄რე ქა ღჷრი ცხეკთე ი ეჩე
Line of edition: 26    ჟი იჭი̄რხი ოშვა̈̄ჲდ ხაკუჩ, ეჩშელდ სა̈ვა̈ ჭიშხს. ამნა̈რდ მაჩე̄ნე ღუმრა̈ ჭჷშხა̈რ ლიხ,
Line of edition: 27    ეჯღ' ე̄რე მაშე̄ნა̄მ გეჭნიხ, ალჲა̈რ ლახე დო̄სა წვახ, ეჩქას ჟაჴვრა̈შ ი ცხვიმრა̈̄
Line of edition: 28    ჭჷშხა̈რს იკდჷ̄რეხ, მარე ეჯჲა̈რ ხონგვმაჲ ლიხ ი ხოხვრა̄მი გეჭნიხ. ალ ჭჷშხა̈რს
Line of edition: 29    ა̈გითე ჴიდე მა̄რე, ეჯ ლადა̈ღ თხუმა̈რს ქა ხოსყა̈̄ლი ხოჩა̄მდ ი ეჩქანღო მახა ტებდი
Line of edition: 30    ჰა̈ნწს ხაცვმენი, ეჯღ' ე̄რე ჭჷშხა̈რ ჩუ იფრიხ, ეჩქას თხუმა̈̄რ სგვებინხა̈ნისგა ჩუ
Line of edition: 31    ნომ' ა̈̄დცხირა̄ლე̄ნხ, ადო ეჩქას ჭიშხ ჩუ ცელნი ი მა̄მ ხაყა. ამჷნქ' ა̄ჯაღ უღვა̈̄
Line of edition: 32    ლასვა̈მს ჩუ ხოფტეხ ი ამჟი̄ნ ჟი ხა̈ჭდეხ, თხუმა̈რს ჟიბა̄ვ ხა̈ჩომ, ეჩჟი̄ნ.
Line of edition: 33    ჭჷშხა̈რს ლესყე̄ნად მა̄მ ხაყახ, ოდე ჩუ დო იფრიხ. შომვა̈̄ჲ ჭჷშხა̈რ ლჷმა̄რე
Line of edition: 34    ლიხ ლესყე̄ნად, ეჩქას მა̄რე ოსპრა̈რს ატა̄ბა̈̄ლი. ოსპრა̈რ ჟაჴვრა̈შ ლიხ ხოშა ლაღა̈ლ,
Line of edition: 35    მა̄დეჲ ცხვიმრა̈̄შ. ალ ოსპრა̈რ ნაჯვდან ო̄შთხვ-ოხვიშდ კამვინ ლიხ. ეჩხა̈ნ-ამხა̈ნ
Line of edition: 36    ჩუ ხოფტჷ̄რეხ ეჩზუმს, ერე ფა̈კვნა̈რ ჟი ხასკი̄დხ. ეჩქანღო ფა̈კვნა̈რს ატა̄ბეხ.
Line of edition: 37    ალჲა̈რ ნაჯვდან კამინდ ხოშა ზჷმშვ გარ ლიხ, ისგჷნჟი̄ნ ჟი ლჷტა̄ბე ლიხ, ეჩჟი̄ნ ერე
Line of edition: 38    ოსპერ ჟ'ესხეტს ი სა̈ვთეჩუ̄ნ სემი ი ო̄შთხვ ფხულე ხო̄ზდე̄დს.
Line of edition: 39    სა̈ვს სემი ოსპერ, უსგვა ფა̈კვნა ი ეშხუ უ̄ღვა ხაკუჩ. ალ უ̄ღვას, ოსპრა̈რს
Line of edition: 40    ი ფა̈კვნა̈რს ჟ'ამა̄რე, ეჩქას მახა გოგლა̈ნდიშ ი იედ ცხვიმრა̈̄ წირხა̈რჲა̄ქს კვა̈დლა̈რს
Line of edition: 41    ჴიდე. ეჩქანღო სა̈ვს უ̄ღვას ხოსგვრე ჭჷშხა̈რს ეჩხა̈ნ-ამხა̈ნ ამხა̈ნჟი ჭიშხი შელდჟი̄ნ
Page of edition: 134  Line of edition: 1    ფა̈კვნა̈̄ ლასგვრას სიფრითშვ, ჲედ ასალშვ ჟი ხოფტე, ჭიშხს ისგთეჩუ̄ნ, ოსპრიშ
Line of edition: 2    ი ოსპრი უშხვა̄რ ნე̄სგაჟი̄ნ ქა ლა̈ცქფუშ ჲარვ ა̈გის უშხუდ ჟი ხოფტე ხოხვრა̄მ სიფვრითილშვ
Line of edition: 3    ნეწთხარე ლა̈ყრას. ეჩჷნქა სა̈ვა̈ ჭჷშხრე კაცხა̈რჟი̄ნ ჩიქე ჩუქვა̄ნჟი
Line of edition: 4    ისგმუყვ ჟი ხოჭი̄რხი კა̄დოშ ი ეჩქანღო ჩუ ხოფტჷ̄რე თხუმმუყვ. სა̈ვს უ̄ღვას სგა
Line of edition: 5    ხოსგვრეხ, ეჩქანღო ფა̈კვნა̈რს ხოსვა̈ლიხ. ალჲა̈რს ოსპრა̈რს ჟი ხოსგვრეხ, ეჩქანღო
Line of edition: 6    ჩიქე აშხვ ჭიშხი ჰოკერხა̈ნ ი̄ყიხ ჲარვ წირხს. ალჲა̈რს ჟი ხაგვრუზი̄ხ, ოსპრა̈რ
Line of edition: 7    ჟიქა̄ნ ჟი მასა̈რ ფაკვნა̈რჟი ჟი ხაჭშხეხ ი უღვა̈̄ ფე̄დის მეფტაქა ჟი ი̄ყიხ კაცხა̈რს
Line of edition: 8    ი ჟი ხაწჷრხეხ მეგჭად. ოსპრიშ ი ოსპრი უშხვა̄რ ნე̄სგაჩუ̄ნ ნა̈წჷრხუნს ჩუ ხოჯვი̄რიხ
Line of edition: 9    ეჩჟი̄ნ, ერე სა̈ვს ჟი ხეთლენი ი ნეწითხვშ ჟი ხა̈ნგჭვეხ. ამჟი̄ნ ქა იხრესიხ ეჩხა̈ნ-
Line of edition: 10    ამხა̈ნ ჭჷშხა̈რს ი სერ სა̈ვ ლჷმა̄რე ლი.

Line of edition: 11       ამუნღო სა̈ვს მა̈რჴლა̈რე ლიბემ გარ ხაკუჩ, მა̈რჴლა̈რს ხოშა̄მ ლაღა̈ლს ჯიჰრა̈̄შს
Line of edition: 12    იჩოხ მეგჭაღა.


Line of edition: 13 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.