TITUS
Svan Chrestomathy
Part No. 162
Previous part

Text: 157 
Page of edition: 135 
Line of edition: 22 
157. საპვნი ლიჩვემ


Line of edition: 23       ზურალა̈̄რ საპვენს ლახე იჩოხ, ეჩქას სგვებნავ ტჷტს ინზო̄რეხ მასა̈რდ. ტჷტს
Line of edition: 24    ჩიქე ჩვა̈ჲსვე̄რეხ ი შიხს ქა ხა̈თშიხ, ეჩქანღო კიცო̄რათე̄'სგა სგადე̄სგიხ ი ალ კიცო̄რას
Line of edition: 25    ჟი ხორკინეხ; ეჩი̄ზუმ ჟიხიქ', ე̄რე ჩუქვა̄ნ ჩვეჲნი ლაგა̈მ ხა̈̄ც, ეჩქანღო ჟიქა̄ნჩუ
Line of edition: 26    ტებდი ლიცს ხა̈გვშეხ, ჩუქვა̄ნ ჩვეინ ხოხლა.

Line of edition: 27       ლიცს ეჩი̄ზუმს იხუ̄წე ტჷტ, ერე ჩუქვა̄ნთე მა̈̄ნკვი წიქვ-წიქვშ გარ ანღრი ი
Line of edition: 28    ეჩქანღო გარ იბნე ზჷმშვ ლიჴედს ლაჰრა̈ყი მა̈̄ზნაშა̄ლ. ამჟი̄ნ აშგარ ხა̈ქმეხ ლიცს
Line of edition: 29    ი ალა ჩვანღრი ჩვეინთე ლა̈სკვი̄რუშვ. ტჷტი ნა̈ცვრი̄ნ მჷწრან მეშხე ფერიშ ლი.
Line of edition: 30    ამის ხაჟხა ჰერა̈მ. აშხვ კიცო̄რა ტჷტი ლიწვრი̄ნეს ჰამუნღვე̄ ნა̈ბოზდ ხაკუხ. ალ
Line of edition: 31    ჰერა̈მს აშხვ ჩვეინს ქა იხნიხ ი ეჩქანღო ჟი ხაგემხ ლა̈ნკვშდას. ლინკვშდეს ქა̈̄მ
Line of edition: 32    იჩოხ ი ქორს დე̄მა, ეჩი̄ ქვინ, სგა̈ნჩუ̄ნ, ქორისგა მერდა ხოლა ხა̄რ ი სერთხი ლეგმერდე
Line of edition: 33    ლახ ჲა̈რ ა̈რი ქორისგა, ეჯას ლეგდლირდე ჟი ხოკვდე. ეჩჷნქა, ლახე ლიმზირი
Line of edition: 34    ხა̄რ მეზგა მეკვშდა ხა̈ნისგა, ეჩქასი მა̄დ ხაყა ჰერა̈მი ლინკვშდეს ქორისგა.
Line of edition: 35    ურწყულ ხაბჟახ.

Line of edition: 36       ჰერა̈მს მა̈̄ნკვი ნეც-ნეცინდ გარ ხოკვი̄ლცხა̈̄ლიხ ი თა̄მა̈შდ გარ ა̈ფვი̄ნეხ, ეჯღ'
Line of edition: 37    ე̄რე გუნ ლუფვი̄ნე ქა̄მენჩუ̄ნ ჴედნი ი ჰერა̈მ ხატკლებხ ჩუ ლეცვდად. ალ ჰერმი
Line of edition: 38    ლინკვშდეს ლე̄თ-ლადა̈ღ ხაკუჩ. ლაფვაისგა აშგარ ჴეჩნი ი ღვეშგმე პილს ჩუ სედნი
Line of edition: 39    სგელ მჷდჷ̄ნგლევი ტჷტ. აშხვ ჩვეინ ჰერა̈მს აშხვ ხოშა̄მ ფაკა̈ნდ ხოშა მა̄მ ხეფსი.
Line of edition: 40    ალ ჩუ ნანკოშდს ი ტჷტდ ლჷსპა ჰერა̈მს მეშხე ფერიშ ხეფსი. ალას სგვებნავ ჩვა̈ჰი̄ჭვიხ
Line of edition: 41    ჩვეინისგა კიზარშვ ი ეჩქანღო ფაკა̈ნთე იტხეხ ი ეჩნუშ აშხვნიხ. ჩუ ლუფკვანღო
Page of edition: 136  Line of edition: 1    ალ ლესპენი ტჷტ ლუფურშგვი̄ნე ლი. ჯვინალდ ი ათხეი̄ ეშხუ ფაკა̈ნ ტჷტ
Line of edition: 2    ფაკნი ხჷნსგა̄მ საპვენდ ხაჯეშ.

Line of edition: 3       ეჩქანღო, შომვა̈̄ჲ ჭყა̈ნ ხუღვეხ, ეჩქას ალ ტჷტს ი ჭყა̈ნს სგადე̄სგიხ ჩვეინთე̄'სგა,
Line of edition: 4    ჩვეინს ლემასგვჟი̄ნ ხორკინეხ ი ალჲა̈რ ჟი იფვი̄ნიხ, ეჩქას ჟი იფუ̄ნჩი ი ეჩჟი̄ნ
Line of edition: 5    ფუვე. ზურალა̈̄რ კიზარშვ ა̈ნჩჷდეხ ი ხათერხ, ეჩქას ქა იკედხ ი ფაკნა̈რთე დე̄სგიხ.
Line of edition: 6    ათხე სერ საპვენ ჟი ლუჩვმინ ლი ი იჴმა̈რიხ, იმვა̈̄ჲნა̈რდ ხაკუხ, ეჯნა̈რ.


Line of edition: 7 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.