TITUS
Svan Chrestomathy
Part No. 163
Previous part

Text: 158 
Page of edition: 136 
Line of edition: 8 
158. ჟა̈გიშ ი ფინდხი ლისყე̄ნე შვა̈ნისგა

Line of edition: 9    შვანა̈რ ჯვინალდ მინოვშ ისყე̄ნახ ჟა̈გს, მინოვშ ათმახ ტყვის ი ამხა̈ნ ფინდხა̈რს
Line of edition: 10    ისყე̄ნახ. გოგირსი მინეშშვ ითხა̈̄ლდახ ჯვე̄დჲა თანღარჟი̄ნ. თანღა̈რს ქვაბა̈რ
Line of edition: 11    ხა̄დხ ი ეჯ ქვაბა̈რს ჟიქა̄ნ, კჷლთხიხა̈ნჩუ̄ნ, ჟი ხორიკდახ ყვითელ გოგრი დუდუ̄ლა̈რ.
Line of edition: 12    ალჲა̈რს ჟი დეშ ხეჰო̄ლდახ მა̄რა̈̄ლ, მარე თოფა̈რს ხა̈ფშვდახ ი ალჲარშვ ჩუ
Line of edition: 13    შიდახ ალ გოგირჲა̄ქ დუდუ̄ლა̈რს, მა̈ზუმვა̈̄ჲ ხეკვა̈დხ, ეჩი̄ზუმს. ამის ა̈გითე ჴიდახ.
Line of edition: 14    კოკერთე ჭყა̈ნს და̈̄სგდახ, სგა ხა̈ნჩჷდახ ალ გოგრი დუდუ̄ლა̈რს ი აშხუდ ჩვა̈ჰნახ
Line of edition: 15    ლემასგვჟი̄ნ. ამის ქა ხეფსო̄ლდა ტკიც გოგირ. გოგირ ლჷმა̄რე ხა̄დხ.
Line of edition: 16    ჲერხი ლუშნუ ქორა̈რს ჩუქვა̄ნ მე̄სმე სადგვემ ხა̄დხ. ალჲა̈რთე̄'სგა ნარჰას
Line of edition: 17    ზჷმშვ გარ ი მა̈დეჲ ჰა̈დურდ მა̄მ ხა̄დ ლა̈ზ ი მასა̈რდ ლა̈მბ ლა̈სვ. ალ სადგვემისგა
Line of edition: 18    ობა̈შინ ზავლადა̈ღ ლეღვა̈რს იშხვინდახ ი ხოშა ლაღა̈ლ ნარმა̄ლვარე ლა̈ჭბიდა̈̄ნ
Line of edition: 19    ხა̄დხ.

Line of edition: 20       ალ სადგვემ ჟიბა̄ვ ი ჭვა̈დვა̈რთე თვეთნა̄მ ბიჰვს იდა̈̄სგდა. ამის ჟი ინზო̄რახ,
Line of edition: 21    ჩვეინთე და̈̄სგდახ, ლიცს ხა̈ქმახ ი ჩვა̈წვრი̄ნახ. ეჩქანღო ლემასგვჟი ლინკვშდეს
Line of edition: 22    ხობნახ ი გუნ ჩვა̈ნკვშდახ. ჩუ ლუნკვშდანღო ჩვეინს ჟიქა̄ნქა ნა̈ჴჩულვა̈რს ხაბო̄გახ
Line of edition: 23    ჲარვ ი სამ ფად, ჟიქა̄ნ ძაძრას ხალფა̈რდახ ი ჩუ ცვირახ. მე̄რმა ლადა̈ღ ალ
Line of edition: 24    ნა̈ჴჩულვა̈რს ჟი ხეფო̄ნთა̈̄ნხ ჟა̈გია̄ქ გვა̈რჯილა̈ჲ ნა̈ფცხულა̈რ. ამის ჟი იყვბახ ი შედთე
Line of edition: 25    და̈̄სგდახ. ეჩქანღო ჰადრა̈̄ შიხს იშიხდახ. ალ შიხს, გვა̈რჯილა̈ჲს ი გოგირს ჩვა̈ნჩჷდახ
Line of edition: 26    ი მა̈̄ნკვი ბა̈ჩა̈ ლაყლა̈̄რთე და̈̄სგდახ ი ამე̄'სგა ჟი იყა̈ლდახ. ეჩანღო ზექი ლაყლა̈̄რთე
Line of edition: 27    იტხახ. ლაყლა̈̄რს გურნა̈̄ჲ ზექიშ ხუღვა̈̄ნდა. ამე̄'სგა ხობნახ ლიყა̈ლს ი მა̄დხვა̈ჲ
Line of edition: 28    ლიცსი ხა̈̄ქმახ. ამე̄'სგა ლიყა̈ლს ჟი ხათა̈რდახ, ეჩქას ქა ლჷსპა ზუჰე̄რაჟი̄ნ
Line of edition: 29    და̈̄სგდახ, წერაქვშ ლიცს ხაბფხჷნახ ი ა̈სპუნახ ეჩქად ე́, ოდე ჟი დო იკუნკვილო̄ლდა
Line of edition: 30    ჟა̈გ. ათხე სერ ჩუ ხეყა̈̄დ ლეჴმა̈რიდ.

Line of edition: 31       ჲერხის ლახვა̈რისგა ტყვი̄მი ლაკა̈დი ხოცხჷნდახ, მარე ამის ქა და̈̄ს ხოკვშენდახ
Line of edition: 32    ი მინს გარ ხუღვა̈̄ნხ.

Line of edition: 33       ტყვის, ჯვიდს ი ნაცმუნს ჩვა̈ჰნახ კოკერისგა ი სგ'ა̈̄გვშახ კალპეტვთე, ეჩქანღო
Line of edition: 34    ეჩხა̈ნქა ქა იტხახ, ჩვაცხა̄ნახ, ჭჷშხა̈რს ქა ხაჭკვრახ ი ეჩქანღო ხაზრა̈რჟი̄ნ ხაცყე̄რახ.


Line of edition: 35 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.