TITUS
Svan Chrestomathy
Part No. 164
Previous part

Text: 159 
Page of edition: 136 
Line of edition: 36 
159. ჯვინელ ბა̈̄ლრე ლისყი ი ლიმჷნჩხრინე


Line of edition: 37       ჯვინელ მჷშკდა̈რს, ჯვინალდ, აშხვჩიქქა ათხე̄ გუვა̈რდ მა̄მ ხა̄დხ ლჷდა̄წყე
Line of edition: 38    ლა̈შკდა̈შ ი მიჩა მაჴმარა. ბა̈̄ლა̈რ დაჴლა̈ ტუფვარე გუდრა̈̄ლხა̈ნქა ხა̄დხ მჷსყე.
Line of edition: 39    ალჲა̈რს ამჟი̄ნ ასყე̄ნახ ა: დაჴჷლს ტუფს მურგვალდ ხა̈ტმახ ქა ი ეჩჟი̄ნ, ერე კინჩხ
Line of edition: 40    ჩუ უცვი̄ბად სედენდა, თხვიმს ჩუბავ ხა̈ჩომდახ ლატფუ̄რაჟი̄ნ ი ვეშგიმხა̈ნ იბნახ. ლიტფუ̄რეს.
Line of edition: 41    ამის ა, ტუფს, ქა ხა̈შყვჟახ, ეჩქას მა̈̄ნკვი ჩალშვ აყუ̄ბახ ქა ალ ტუფს ი ეჩჟი̄ნ
Page of edition: 137  Line of edition: 1    ჩვაფრახ. ეჩქანღო ჩუ იკა̈დდახ ი ზჷმშვ ჩვა̈ჰი̄ჭვდახ. სგვებნავ სამ ზექი კამრა̈ჲს
Line of edition: 2    ჟ'ამურგვა̈ლდახ ი სგა ხაყუ̄ბახ გუდრათე̄'სგა ჩუ მეყვლად, ეჩჷნქა აჯაღ
Line of edition: 3    ფიცა̈რს ამურგვა̈ლდახ ეჩი̄ზუმდ, ერე ტუფი ღვეშგიმხა̈ნი ხა̄რე̄ნს. ალ მურგვა̈ლ
Line of edition: 4    ფიცა̈რს გარვს ხაყლახ ი გჷრკიდ ქა̄მენქა ჩია̈̄გ სგა ლჷჭი̄რხ ხა̄დ. ნე̄სგაისგა ჩუ ხოფტახ,
Line of edition: 5    ეჩის სგა̈ნჩუ̄ნ სგელ მა̈შრი გვერე̄მი ნა̈ქვიცს ხორკინახ ეჩჟი̄ნ, ერე ლუმქუთვნა̈ლვნ ეს,
Line of edition: 6    ამის სგა ხოსგვრახ ტუფს, სგა ხა̈ნგვჭახ ნა̈უნშვ, სგა ლჷჭი̄რხ გარვს
Line of edition: 7    ქა ხა̈ყვფახ ტუფს, სგა ლუკვა̈რ ხა̄დ გარვ ეჩჟი̄ნ ი ქა̄მენქა ნა̈უნს ხოთლახ, ეჩქანღო
Line of edition: 8    სერ ჩუ ლჷნგჭვე ლა̈სვ.

Line of edition: 9       კინჩხი ა̈დგილისგა ვერი სტვი̄რს ხოსგვრახ ი ეჩის სგა ხა̈ნგვჭახ ნა̈უნშვ.
Line of edition: 10    ათხე სერ ბა̈̄ლ ჟი მჷსყე ლა̈სვ. გარვს აჯაღ ნე̄სგაისგა მარყვინჯ ხა̄დ სგა ლაგვდირ.
Line of edition: 11    ამჟი̄ნ მე̄რმა ბა̈̄ლსი ასყე̄ნახ ი ერქჷდა̈̄შ ჟი ხორკინახ ჟიქან მჷსყა ლა̈რკინა ზექჟი̄ნ
Line of edition: 12    ი ბა̈̄ლა̈რ ჩუ ხოწიბდახ. ალ ბა̈̄ლა̈რს სტუ̄რა̈რხა̈ნ ფათქთე̄'სგა სგ'ა̈̄ყხახ ი ეჩქანღო
Line of edition: 13    ბაჩარშვ ჩვა̈ნგჭვახ სგვებინხა̈ნ ი ბაჩვშ ჲჷგა̈მდახ, ერე ბა̈̄ლა̈რს მუტყვა̈სგ ნო̄სა იმე
Line of edition: 14    ახტყვესგე̄ნს. მჷბე̄ლე მა̄რე ბა̄ლა̈რს ღვეშგიმისგა სგა ხესგვრო̄ლდა, აშხვ ბა̈̄ლა̈
Line of edition: 15    მარყვენჯს აშხვ ტოტშვ ხეგვდირნო̄ლდა, მე̄რმა -- მე̄რმა ტოტშვ ი ამჟი̄ნ ხობე̄ლა.
Line of edition: 16    გარვა̈რს ერ ნე̄სგაისგა მეფტე ხა̄დ, ქა ლაბჷდჟი̄ნ ეჩნოვშ იხუ̄წა ბა̈̄ლ ჰაერს ი სგა
Line of edition: 17    ლა̈ჯვი̄რჟი̄ნ გვერე̄მი ნა̈ქვიც ქა ხენტყო̄ლდა გარვს ი ჰაერ სგვებნა̄ვ ღჷრდა.
Line of edition: 18    ლამჷნჩხრინაჟი̄ნ მჷშკიდ ჩიქე ჩვა̈ქჷნთრინა ბერჟა̈ ნა̈ქვცუვა̈რს, ეჯჲა̈რს უშხვა̄რჟი
Line of edition: 19    ხადა̈̄სგდა ი სგა და̈̄სგდა ლემასგვთე. შიხს გუნ ხადა̈̄სგდა ი მჷბე̄ლე ხვა̈̄ჲხა̈ნს
Line of edition: 20    ხობე̄ლა. მჷშკიდ ხათა̈რდა, ეჩქას ქვიშა ხა̈შდა ჟიქა̄ნ. ბერჟა̈რ უშხვა̄რ ხემჷნჩხრინო̄ლდახ,
Line of edition: 21    ეჩქას ქა იკა̈დდა მჷშკიდ, ბერეჟ ეშ აჰრა ეჩხა̄ვ-ამხა̄ვ მჷნჩხირს, ეშ
Line of edition: 22    აბა̄ბა.

Line of edition: 23       ჩიქე კვა̈თხშვ ხობნა ლიკვთხის, მჷშკიდ აჯაღ ა̈მჷნჩხრინა.


Line of edition: 24 
ლენჯა̈̄რ



Next part


This text is part of the TITUS edition of Svan Chrestomathy.

Copyright TITUS Project, Frankfurt a/M, 24.1.2010. No parts of this document may be republished in any form without prior permission by the copyright holder.